Cakudya N’nyumba Mwa Simau Ku Bhetanya

Yezu abuluka ku Yeriko mbaenda ku Bhetanya. Buluka ku Yeriko kuenda ku Bhetanya ukhali nsindzo wa makilometru 20, pontho ukhali wakunentsa kakamwe thangwi akhakwira nthunda. Lazaro na anakazi ace awiri akakhala ku Bhetanya, nsindzo wa makilometru cifupi na matatu buluka ku Yerusalemu. Cisa ca Bhetanya cikhali n’khundu-n’khundu mwa Phiri ya Milivera.

Ayuda azinji akhadafika mu Yerusalemu toera kucita Paskwa. Iwo afika nakweru toera ‘kucita mwambo wakuceneseka.’ Akhacita pyenepi khala panango aphata munthu wakufa peno acita cinthu cinango cakuti caacitisa kukhala akupswipa. (Juwau 11:55; Numero 9:6-10) Anango a iwo adafika nakweru agumanyikana mu templo. Iwo akhabvundzika khala Yezu anabwera pa Paskwa.—Juwau 11:56.

Anthu azinji akhaketesana thangwi ya Yezu. Atsogoleri auphemberi anango akhafuna kumanga Yezu toera kumupha. Natenepa, iwo alonga kuti munthu onsene anadziwa kuna Yezu, akhafunika kuadziwisa ‘toera aende kam’manga.’ (Juwau 11:57) Atsogoleri anewa akhadayesera kale kupha Yezu pidamala iye kulamusa Lazaro. (Juwau 11:49-53) Na thangwi ineyi, anango akhapenula khala Yezu anabwera pa Paskwa.

Yezu afika ku Bhetanya n’Cixanu, ‘ntsiku zitanthatu Paskwa mbidzati kutoma.’ (Juwau 12:1) N’sabudu, ntsiku 8 ya Nisane ikhatoma na kubira kwa dzuwa. Natenepa iye acita ulendo unoyu mbidzati fika Sabudu. Mwambo waciyuda ukhakhondesa kucita ulendo kuenda ku Yeriko mu cidodo ca n’Cixanu mpaka cidodo ca n’Sabudu. Panango Yezu aenda kunyumba kwa Lazaro ninga mukhacitira iye pakutoma.

Simau, wakuti akakhalambo mu Bhetanya, acemera Yezu pabodzi na anyakupfundzace kuphatanizambo Lazaro toera kuenda kadya n’Sabudu na masiku. Simau akhacemerwa ‘nyamatanya’, panango thangwi Yezu akhadamuwangisa kale. Nakuti Marta akhaphata basa mwaphinga iye atambira mwadidi alendo. Mariya akhabvesera Yezu pikhapfundzisa iye mbwenye pyenepi pyacitisa nthonga.

Mariya afungula ntete wakuti ukhali na ‘mafuta akununkhira, nardho wadidi.’ (Juwau 12:3) Mafuta anewa akhali akudhula kakamwe, ntengo wace ukhali wa madhenaryo 300, kobiri yakuti munthu akhafunika kuphata basa caka cibodzi toera kuitambira! Mariya aikha mafuta munsolo mwa Yezu na miyendo yace, buluka penepo mbapukuta miyendo ya Yezu na tsisi yace. Khwema ya mafuta anewa yamwazika n’nyumba mwonsene.

Anyakupfundza a Yezu aipirwa kakamwe mbabvundza: ‘Thangwi yanji ukubvunga mafuta anewa?’ (Marko 14:4) Yuda Iskariyoti aipirwa mbalonga: ‘Thangwi yanji mafuta anewa akununkhira nee aguliswa madhenaryo 300, kobiri ineyi mbiperekwa kuna anyakutcerenga?’ (Juwau 12:5) Mwandimomwene Yuda nee akhadzudzumika na anyakutcerenga. Iye akhaba kobiri ya m’bokosi ya anyakupfundza.

Yezu abvunulira Mariya mbalonga: ‘Thangwi yanji musaonesa nyatwa nkazi? Iye andicitira pinthu pyadidi. Imwe ndzidzi onsene muli na anyakutcerenga, mbwenye imwe nee munadzakhala na ine ndzidzi onsene. Pidaikha iye mafuta anewa akununkhira m’manungo mwanga, iye acita pyenepi toera kukhunganya kuikhwa kwanga. Mwandimomwene ndinakupangani, m’mbuto zonsene zinafuna kumwazwa mphangwa zenezi zadidi pa dziko yonsene, pidacita nkazi uyu pinadzalongwambo toera kunkumbukira.’—Mateu 26:10-13.

Yezu ali mu Bhetanya ntsiku ziwiri pontho anthu azinji akhadziwa kuti Yezu ali mwenemo. Ayuda azinji aenda kunyumba kwa Simau tayu basi toera kuona Yezu mbwenye toera kuonambo Lazaro, ‘ule adalamuswa na Yezu muli akufa.’ (Juwau 12:9) Akulu a anyantsembe akhacedza kuti anapha tani Yezu pabodzi na Lazaro. Atsogoleri auphemberi anewa akhanyerezera kuti anthu akakhulupira Yezu thangwi yakulamuswa muli akufa kwa Lazaro. Atsogoleri auphemberi akhali akuipa kakamwe!