Yezu Apereka Uphungu Thangwi Yakugwegwedusa Anango na Kudawa

Yezu amala kulonga citsandzo toera kupangiza atowereri ace njira yadidi yakunyerezera. Iwo akhafunika kuoneka okha ninga anang’ono, akuti ndi akucepeseka na akukhonda funa cidzo. Anyakupfundza akhafunika ‘kutambira anang’ono anewa mu dzina yace, pyenepi pisapangiza kuti atambirambo Yezu.’—Mateu 18:5.

Apostolo akhadamala kwene kupokanyisana kuti mbani nkulu mwa iwo, na thangwi ineyi anyerezera kuti Yezu ali kuasandika. Natenepa Juwau alonga cinthu cikhadacitika: ‘Mpfundzisi, ife taona munthu unango mbakabulusa madimonyo mu dzina yanu, ife tayesera kun’khondesa, thangwi iye nee ndi m’bodzi wa ife.’—Luka 9:49.

Kodi Juwau akhaona kuti ndi apostolo basi akhatawiriswa toera kuwangisa na kubulusa madimonyo? Khala ndi tenepo, thangwi yanji mamuna unoyu Waciyuda akhakwanisa kubulusa madimonyo? Panango Juwau aona kuti mamuna unoyu nee asafunika kucita basa ineyi yakudzumatirisa thangwi nee asafamba pabodzi na Yezu na apostolo.

Mwakukhonda dikhira, Yezu atawira: ‘Lekani kuyesera kun’khondesa, thangwi nkhabe munthu anacita pirengo pya mphambvu mu dzina yanga, buluka penepo mbalonga pinthu pyakuipa thangwi ya ine. Thangwi munthu onsene anakhonda kutipokanya, ali kukhundu yathu. Pontho munthu onsene anakupasani khomitco ya madzi toera kumwa thangwi yakukhala anyakupfundza a Kristu, mwandimomwene ndinakupangani kuti iye nee anadzaluza nkhombo zace.’—Marko 9:39-41.

Natenepa, mamuna unoyu nee asafunika kutowerera Kristu toera kukhala kukhundu ya Yezu. Mpingo Wacikristu ukhadzati kukhazikiswa, maseze mamuna unoyu nee akhafamba na Yezu, mbwenye pyenepi nee pisabveka kuti iye ndi mpingizi wakuti asatomesa uphemberi wauthambi. Ndimomwene kuti iye asakhulupira dzina ya Yezu, pontho pidalonga Yezu pisapangiza kuti mamuna unoyu anadzatambira muoni wace.

Munjira inango, pikhali pyakugopswa kakamwe munthu kugwegweduka thangwi ya mafala na makhaliro a apostolo. Yezu alonga: ‘Munthu onsene anagwegwedusa m’bodzi wa anthu awa akucepeseka akuti asandikhulupira, mphyadidi amangirwe mwala ukulu wa libwe n’khosi mwace mbaponyiwa m’bara.’ (Marko 9:42) Natenepa, Yezu alonga kuna atowereri ace kuti mphyadidi kubulusa cinthu consene cakufunika ninga manja, mwendo na diso khala cinagwegwedusa. Mphyadidi kuluza khundu ibodzi ya manungo toera kupita mu Umambo wa Mulungu m’mbuto mwakukhala nawo mbatiponywa mu Djehena (Gowa ya Hinoni). Panango apostolo aona kale gowa ineyi yakuti isakhala cifupi na Yerusalemu, yakuti ikhapiswa pirombo, natenepa iwo akwanisa kubvesesa mwadidi kuti isaphiphirisa kufudzwa kwa kwenda na kwenda.

Yezu acenjezambo: ‘Citani mphole-mphole toera mukhonde kupwaza nee m’bodzi wa anthu awa akucepeseka, thangwi ine ndinakupangani kuti aanju awo kudzulu ndzidzi onsene asaona nkhope ya Baba wanga.’ Kodi ndi mpaka papi iwo ndi akufunika kakamwe kuna Baba wawo? Yezu alonga pya mamuna unango akhali na mabira 100 mbitayika ibodzi. Iye asiya mabira 99 mbaenda kasaka idatayika, angaigumana, iye anakomerwa kakamwe kupiringana mabira 99. Yezu athimiza: ‘Munjira ibodzi ene, Baba wanga wakudzulu nkhabe funa kuti m’bodzi wa anthu awa akucepeseka atayike.’—Mateu 18:10, 14.

Panango Yezu akhanyerezera pya kupokanyisana kwa apostolo kuti mbani nkulu mwa iwo, pidalonga iye kuti: ‘Khalani na munyu mwa imwe, pontho pitirizani kukhala na ntendere unango na ndzace.’ (Marko 9:50) Munyu usacitisa cakudya kukoma. Munyu wakuphiphirisa usacitisa munthu kutawira mwakukhonda nentsa pinalonga ndzace na usamphedza kukhala mwantendere, cinthu cakuti nee cisacitisa kulongezana.—Akolose 4:6.

Midzidzi inango panaoneka mikandzo mikulu, mbwenye Yezu alonga kuti tinathimbana nayo tani. Iye alonga: ‘Khala m’bale wako akudawira, ndoko kampangize cidadawa iye, panu mwekha iwe na iye basi. Iye angakubvesera, wawina m’bale wako.’ Mbwenye angakhonda kukubvesera, Yezu alonga: ‘Kwata munthu m’bodzi peno awiri, toera pyonsene pimaliswe pamaso pa amboni awiri peno atatu.’ Pyenepi pingakhonda kumalisa nkandzo, tisafunika kupanga ‘mpingo,’ peno akulu a mpingo akuti anakwanisa kucita cisankhulo. Mphapo nyakudawa angakhonda kubvesera? ‘Iye anakhala ninga munthu wa dziko peno ninga nyakulipisa misonkho,’ munthu wakuti Ayuda akhan’calira.—Mateu 18:15-17.

Akulu a mpingo asafunika kuphatisira Mafala a Mulungu. Angaona kuti nyakudawa ali na mulando na asafunika kusandikwa, kutonga kwa munthu unoyu ‘kwakhazikiswa kale kudzulu.’ Angaona kuti nee ali na mulando, pinakhalambo ‘pyakusudzulwa kale kudzulu.’ Pitsogolero pya Yezu pisaphedza mu ndzidzi unakhazikiswa mpingo Wacikristu. Pangaoneka mikandzo mikulu ninga ineyi, Yezu alonga: ‘Panagumanyikana anthu awiri peno atatu mu dzina yanga, ine ndiri penepo pabodzi na iwo.’—Mateu 18:18-20.