Yezu Atawira Mbvundzo Wa Nyakutonga wa M’phale Wakupfuma

Yezu aciri ku Pereya paulendo wace wakuenda ku Yerusalemu. M’phale m’bodzi wakupfuma athamangira Yezu mbagodama. M’phale unoyu akhali ‘m’bodzi mwa atongi,’ panango akhali ntsogoleri wa mu sinagoga peno m’bodzi wa mu Thando Ikulu Yakutongera Miseru. Iye abvundza: “Mpfundzisi Wadidi, ndisafunika kucitanji toera ndigumane umaso wakukhonda mala?”—Luka 8:41; 18:18; 24:20.

Yezu atawira: “Thangwi yanji usandicemera wadidi? Nkhabepo unango wadidi kusiyapo Mulungu.” Mamuna unoyu aphatisira fala yakuti “wadidi” ninga cidzo, ninga pikhacita apfundzisi Aciyuda. Maseze Yezu ndi mpfundzisi wadidi, iye apangiza pakweca kuna mamuna unoyu kuti cidzo cakuti “Wadidi” cikhafunika kupaswa Mulungu basi.

Yezu ampanga: “Khala usafuna kugumana umaso wakukhonda mala, pitiriza kubvera matongero a Mulungu.” Na thangwi ineyi m’phale unoyu abvundza: “Matongero api?” Yezu alonga matongero maxanu anagumanika m’Matongero Khumi analonga pya kupha munthu, upombo, kuba, kulonga umboni wauthambi na kulemedza anyakubala. Buluka penepo, iye alonga matongero akufunika kakamwe: “Funa ndzako ninga iwe ene.”—Mateu 19:17-19.

Mamuna unoyu atawira: “Ndisabvera matongero anewa onsene; ninji pontho cisafunika ine kucita?” (Mateu 19:20) Panango iye anyerezera kuti akhafunika kucita pinthu pinango pyakufunika kupiringana pyenepi toera agumane umaso wakukhonda mala. Mudadzindikira iye kuti phembo ya mamuna unoyu ikhali yakubulukira muntima, Yezu ‘anfuna’ kakamwe. (Marko 10:21) Mbwenye mamuna unoyu akhali na cinthu cakuti cikhampingiza.

Mamuna unoyu akhafuna kakamwe mpfuma yace, natenepa Yezu alonga: “Casala cinthu cibodzi toera ucicite: Ndoko kagulise pinthu pyako mbupereka kobiri ineyi kuna anyakutcerenga, natenepa unadzakhala na mpfuma kudzulu, buluka penepo bwera ukhale nyakupfundza wanga.” Natenepa toera kukhala nyakupfundza wa Yezu, mamuna unoyu akhafunika kupasa anyakutcerenga kobiri yace mbakhonda kudikhira kubwezerwa. Mbwenye iye atsukwala mbaenda pyace. Nakuti akhafuna kakamwe “pinthu pizinji” pikhali na iye, pyenepi pyancimwanisa kuona mpfuma yandimomwene. (Marko 10:21, 22) Yezu alonga: “Pinadzakhala pyakunentsa kakamwe kuti anthu akupfuma apite mu Umambo wa Mulungu!”—Luka 18:24.

Anyakupfundza adzumatirwa na mafala anewa na pidalonga Yezu kuti: “Mphyakukhonda nentsa kakamwe kamelo kupita na pa benga ya ntsingano, kupiringana munthu wakupfuma kupita mu Umambo wa Mulungu.” Pyenepi pyacitisa anyakupfundza kubvundza: “Khala ndi tenepo, mbani anafuna kupulumuswa?” Kodi pyenepi pisapangiza kuti nkhabepo munthu anafuna kupulumuswa? Yezu ayang’ana anyakupfundzace mbalonga: “Pinacimwanika kuna anthu, pisakwanisika kuna Mulungu.”—Luka 18:25-27.

Pedhru alonga kuti iwo acita cisankhulo cakusiyana na cidacita mamuna wakupfuma, mbalonga: “Onani, ife tasiya pinthu pyonsene mbatikutowerani; mphapo ninji cinafuna kudzapaswa ife?” Yezu alonga pya nkhombo zinafuna kudzatambira iwo: “Mulungu anadzacita papswa pinthu pyonsene Mwana wa munthu angakhala pa mpando wace wambiri. Pa ndzidzi unoyu, imwe mudanditowera, munadzakhala m’mipando 12 mbamutonga madzindza 12 a Izraeli.”—Mateu 19:27, 28.

Yezu akhalonga pya ntsogolo mu ndzidzi wakuti makhaliro a dziko anadzasasanyirwa mbakhala adidi kakamwe ninga m’munda wa Edheni. Pedhru na anyakupfundza anango anadzapaswa nkhombo ikulu kakamwe kupiringana pinthu pyonsene pidasiya iwo. Iwo anadzatonga dziko yapantsi ya Paraizu pabodzi na Yezu.

Pontho anyakupfundza nee mbadadikhira nkhombo za ntsogolo basi, iwo akhadatoma kutambira nkhombo zinango mu ndzidzi unoyu, thangwi Yezu alonga: “Munthu onsene adasiya nyumba yace, nkazace, abale ace, anyakubalace peno anace thangwi ya Umambo wa Mulungu, anadzatambira pinthu pizinji kakamwe mu ndzidzi uno, pontho ntsogolo anadzagumana umaso wakukhonda mala.”—Luka 18:29, 30.

Pyenepi pisapangiza kuti m’mbuto zonsene zikhafuna kuenda anyakupfundza a Yezu mbadagumana abale na axamwali akuti akhali alambiri andzawo, pontho akufunika kakamwe kupiringana acibale adasiya iwo. Mwakutsukwalisa, nyakutonga wa m’phale wakupfuma aluza nkhombo ineyi, kuphatanizambo nkhombo yakutonga mu Umambo wa Mulungu wakudzulu.

Yezu alonga: “Mbwenye azinji akuti ndi akutoma anadzakhala akumalisa, akumalisa anadzakhala akutoma.” (Mateu 19:30) Kodi mafala anewa akhabvekanji?

Ntongi wakupfuma akhali m’bodzi mwa anthu “akutoma,” thangwi akhali m’bodzi mwa atsogoleri Aciyuda. Ninga munthu wakubvera matongero a Mulungu, iye akhadikhirwa kucita pinthu pizinji toera atambire nkhombo zizinji ntsogolo. Mbwenye iye aikha mpfuma pa mbuto yakutoma kupiringana pinthu pyonsene. Mwakusiyana na mamuna unoyu, anthu azinji akutcerenga akhaona kuti pipfundziso pya Yezu pikhali pyandimomwene, pontho mbapidaaphedza toera kugumana umaso wakukhonda mala. Iwo akhali ninga “akumalisa,” mbwenye adzakhala “akutoma” thangwi ali na cidikhiro cakukhala m’mipando kudzulu pabodzi na Yezu mbatonga dziko yapantsi ya Paraizu.