“Ine Ndisafuna Baba”

1, 2. Kodi mpostolo Jwau alonganji thangwi ya cakucitika cakumalisa ca ncidodo cidacita apostolo na Yezu?

MAMUNA wa kugwesera abiza lapi yace m’tinta, manyerezero ace adzala na pinthu pyakucitika. Dzinace ndi Jwau na iye ndi mpostolo wakumalisira kukhala maso wa Yezu Kristu. Cincino cifupi na piaka 100 pyakubalwa, Jwau asanyerezera cakucitika cikulu cokhonda duwalika ca ncidodo cidacitika piaka cifupi na 70 ndulimu​—cakucitika cakumalisa cakuti iye na apostolo anzace acicita pabodzi na Yezu mbadzati kufa. M’kutsogolerwa na nzimu wakucena wa Mulungu, Jwau akwanisa kukumbuka na kulemba pyakucitika m’unyomonyomo uzinji.

² Namasiku aneale, Yezu alonga mwapakweca kuti m’nzidzi wakucepa iye mbadaphiwa. Ndi Jwau basi anapangiza thangwi idacitisa Yezu kulonga kuti iye mbadaphiwa m’njira yakubva kupha kakamwe: “Pisafunika kuti anthu a pantsi pano adzindikire kuti ine ndisafuna Baba mbandichita ninga mudanditumira iye. Chinchino lamukani, tibuluke pano.”​—Jwau 14:31.

 3. Kodi Yezu apangiza tani kuti iye akhafuna Babace?

³ “Ine ndisafuna Baba.” Nkhabe cinthu cikhadzudzumisa kakamwe Yezu kupiringana pyenepi. Si kulonga kuti nzidzi onsene iye akhabwerezera mafala anewa tayu. Mwandimomwene, Jwau 14:31 ndi mbuto ibodzi basi m’Biblya inagumana ife Yezu ene mbakalonga kuti iye asafuna Baba. Mbwenye, Yezu akhala maso mwakubverana na mafala anewa. Kufuna kwace Yahova kukhapangizika ntsiku na ntsiku. Cipapo ca Yezu, kubvera kwace na kupirira kwace pyonsene pikhali cipangizo ca kufuna Mulungu. Utumiki wace onsene ukhakulumizwa na kufuna kweneku.

4, 5. Kodi Biblya isakulumiza kufuna kwa ntundu upi, na tingakwanise kulonganji thangwi ya kufuna kukhali na Yezu kwa Yahova?

⁴ Lero, anthu anango angakwanise kunyerezera kuti kufu­na ndi nkhaliro wakupolola. Iwo angakwanise kunyerezera ­kufuna kunagumanika m’mafala akukhala ninga nyimbo, panango kufunana kwa nzidzi wakucepa kwakuti m’midzidzi inango kusalandana na kufunana kwa mamuna na nkazi. Biblya isalonga pya kufunana kwa nkazi na mamuna, mbwenye m’njira yakulemedzeka kakamwe kupiringana kufunana kunaoneka kwa anthu azinji lero. (Misangani 5:15-21) Natenepa, Mafala a Mulungu asalonga makamaka pya kufuna kwa ntundu unango. Kufuna kweneku si kwa kukulisa cilepelepe ca kucita ulukwali peno kwa nzidzi wakucepa basi tayu; nee kwa nzeru zaciunthu. Iko kusaphataniza ntima na nzeru. Kufuna kweneku kusabulukira nkati mwa munthu, kusatongwa mwakubverana na midida yakulinganira na kusapangizwa m’mabasa adidi. Iko si kwakuthondola tayu. Mafala a Mulungu asalonga: “Kufuna kunamala tayu.”​—1 Akorinto 13:8.

⁵ Kwa anthu onsene adakhalapo kale, Yezu ndi munthu adafuna kakamwe Yahova. Nee munthu mbodzi apiringana Yezu m’kukhala maso mwakubverana na mafala adalonga iye ninga ntemo ukulu kakamwe kupiringana mitemo yonsene ya Mulungu: “Unfune Mbuya, Mulungu wako, na ntima wako wonsene, na nzimu [peno moyo] wako wonsene, na nzeru zako zonsene, na mphambvu zako zonsene.” (Marko 12:30) Kodi Yezu akulisa tani kufuna kweneku? Kodi iye apitiriza tani na kufuna kwace Mulungu mwakuwanga m’nzidzi ukhakhala iye pa dziko yapantsi? Na tinakwanisa tani kunsangizira?

6, 7. Kodi tisadziwa tani kuti Misangani 8:22-31 isafokotoza Mwana wa Mulungu, tayu basi nkhaliro wa udziwisi?

⁶ Kodi mwatoma kuphata basa ku mbuto inango pabodzi na xamwali na m’kupita kwa nzidzi muwiri mwanu mbumudzakhala axamwali apantima? Cakucitika ceneci cakutsanzayisa cingakwanise kukuphedzani kubvesesa kufuna kudakula pakati pa Yahova na Mwanace mbodzi ekha. Ife talonga kazinji kene mafala anagumanika pa Misangani 8:30, mbwenye cincino tendeni tidinge mwadidi mafala a nkhundu a vesi ineyi. Vesi 22 mpaka 31, tisagumana mafokotozero akupumirwa a udziwisi wakukhala ninga munthu. Kodi tisadziwa tani kuti mafala anewa asaphatisirwa kwa Mwana wa Mulungu?

⁷ M’vesi 22, udziwisi usalonga: “Mbuya atoma kundichita ine pano kalene maningi, mbadzati kulenga pinthu pinango.” Mphyakukwanisika kuti cinthu cinango kusiyapo udziwisi caphatanizwamo, thangwi cipo udziwisi ‘wachitwa.’ Cipo iwo wakhala na matomero, thangwi m’nzidzi onsene Yahova akhalapo na nzidzi onsene iye ndi wanzeru. (Masalmo 90:2) Mbwenye Mwana wa Mulungu akhali “[wakubalwa] wakutoma, mbachidzati kuchitwa chinthu chibodzi.” Iye abalwa, peno acitwa; iye ndi wakale kakamwe wa pyakucitwa pyonsene pya Yahova. (Akolose 1:15) Ninga pidafokotozwa pa Misangani, Mwana abalwa dziko yapantsi na kudzulu mbipisati kucitwa. Ninga Fala, Nyakulonga ene wa Mulungu, iye akhali cipangizo caungwiro ca udziwisi wa Yahova.​—Jwau 1:1.

 8. Kodi Mwana akhali wakudzudzumika tani mbasati kubalwa ninga munthu, na tingakwanise kunyerezeranji munadzumatirwa ife na pyakucitwa?

⁸ Kodi Mwana akhacitanji m’nzidzi unoyu onsene mbasati kubwera pa dziko yapantsi? Vesi 30 isatipanga kuti iye akhali pa khundu ya Mulungu ninga ‘mphedzi [‘mesire wa basa,’ NM].’ Kodi pyenepi pisabvekanji? Akolose 1:16 asafokotoza: “Mwa iye pyachitwa pya kudzulu na pya pantsi . . . Pyonsene pyachitwa [mwa] iye, mbapichitirwa thangwi ya iye.” Natenepa Yahova, Nciti, aphatisira Mwanace, Mesire wa Basa, towera kucita pyakucitwa pinango pyonsene​—kutomera pyakucitwa pyauzimu m’mbuto yakudzulu mpaka thambo yonsene yakudzulu, kutomera dziko yapantsi na pyakudzumisa pyayo pyakusiyana-siyana pya miti na pinyama mpaka pyakucitwa pya ntundu wapadzulu pya pa dziko yapantsi: anthu. Natenepa, tingakwanise kulandanisa kubverana kwa Baba na Mwana na kwa nyakulemba matandiro a nyumba na nyakumanga, peno anyabasa, anadziwa kumanga mwadidi ninga mudatandirwa iyo. Munadzumatirwa ife na ntundu onsene wa pyakucitwa, mwandimomwene tikusimba Nyakutanda Wankulu. (Masalmo 19:1) Mbwenye, tisafunikambo kukumbuka kubverana kwakale na kwakutsanzayisa pakati pa Nciti na ‘mesiri wace wa basa.’

9, 10. (a)  Kodi ndi ninji cidawangisa uxamwali wa Yahova na Mwanace? (b) Kodi ndi ninji cinafuna kuwangisa uxamwali wanu na Babanu wakudzulu?

⁹ Panaphata basa anthu awiri akusowa ungwiro pabodzi mwakubverana, m’nzidzi unango pasaoneka pinenso. Mbwenye pikhali tenepo tayu pakati pa Yahova na Mwanace! Mwana aphata basa m’nzidzi uzinji pabodzi na Baba na “[akhasekera] ntsiku zonsene na kukhala pa maso pache.” (Misangani 8:30) Inde, iye akhakomerwa kukhala na Babace, na Baba akhakomerwambo kukhala na mwanace. Mwandimomwene, Mwana adzakhala wakulandana kakamwe na Babace, mbapfunza kusangizira makhaliro a Mulungu. Natenepa, si pyakudzumisa tayu kuti uxamwali wa Baba na Mwana wadzakhala wakuwanga kakamwe! Mwakuthema iwo ungakwanise kucemerwa uxamwali wakuwanga kakamwe udatoma m’nzidzi wakale wa kudzulu na pantsi.

¹⁰ Kodi pyenepi pingakwanise kubvekanji mphapo kwa ife? Mungakwanise kunyerezera kuti cipo imwe munakwanisa kucita uxamwali unoyu na Yahova. Ndimomwene kuti nee mbodzi wa ife ali na ciimiriro capadzulu ninga ca Mwana. Ngakhala tenepa, ife tiri na mwai wakupambulika. Kumbukani kuti Yezu afendedzera duzi Babace thangwi ya kuphata basa pabodzi na Iye. Mwakufuna Yahova akutipasa mwai wakukhala “anyakuphedza” ace. (1 Akorinto 3:9) Munatowerera ife citsanzo ca Yezu m’utumiki, tisafunika nzidzi onsene kukhala mbatidziwa kuti ndife anyakuphedza a Mulungu. Natenepa, uxamwali wakuwanga unatiphataniza na Yahova usakhala wakuwanga. Kodi ulipo mwai unango ukulu kakamwe kupita unoyu?

11-13. (a) Thangwi yanji ndi pyakuphedza kunyerezera kufuna ninga cinthu camoyo, na mphale Yezu akwanisa tani kupitiriza kufuna kwace Yahova kukhala kwakuwanga? (b) Kodi Mwana wa Mulungu apangiza tani cifuno cace ca kupfunza kubulukira kwa Yahova, m’nzidzi ukhakhala iye kudzulu na pidabwera iye pa dziko yapantsi ninga munthu?

¹¹ M’njira zizinji, ndi pyakuphedza kunyerezera kufuna m’ntima mwathu ninga cinthu camoyo. Ninga maluwa akubalika m’munda, kufuna kusafunika kudyeswa na kutsalakanwa towera kukule na kupembere. Mungakupwaza, mbamukhonda kukudyesa, iko kunafewa mbakufa. Yezu hadaona kufuna kwace Yahova ninga kwakukhaliratu tayu. Iye apitiriza kukucitisa kukhala kwakuwanga na kwakupembera m’nzidzi ukhakhala iye pa dziko yapantsi. Tendeni tione kuti acita tani.

¹² Nyerezerani pontho pidacitika m’nzidzi udalonga mphale Yezu pa templo ku Yerusalemu. Kumbukani mafalace kwa anyakubalace akupswipa ntima: “Mukhandisakiranji? Mukhapidziwa tayu kuti pikhafunika ine ndikhale mwa babanga?” (Luka 2:49) Ninga kamphale, Yezu mwandimomwene nee akhakumbuka pya umaso wace mbasati kubalwa ninga munthu tayu. Ngakhale tenepa, kufuna kwace Babace, Yahova, kukhali kukulu. Iye akhadziwadi kuti kufuna kweneku kukhapangizika m’ulambiri. Natenepa pa dziko yapantsi nee pakhali mbuto inango yakukomeresa kwa Yezu ninga nyumba ya Babace ya ulambiri wakucena. Iye akhafuna kukhala penepo na nee akhafuna kubulukapo. Kusiyapo pyenepi, iye akhali nyakuona kwene basi tayu. Iye akhafuna kakamwe kupfunza pya Yahova na kulonga pikhadziwa iye. Mabvero anewa hadatoma mukakhala iye na piaka 12 pyakubalwa tayu, pontho hadamala m’nzidzi unoyu tayu.

¹³ Pikakhala iye kudzulu mbasati bwera pa dziko yapantsi, Mwana apfunza kakamwe pinthu kwa Babace. Profesiya idalembwa pa Izaiya 50:4-6 isapangiza kuti Yahova apasa Mwanace cipfunziso cakupambulika thangwi ya basa yace ninga Mesiya. Mokhonda tsalakana kuti cipfunziso ceneci cikhaphataniza kupfunza pinenso pingasi pyakuti mbipidadzera Wakudzodzwa wa Yahova, Mwana apfunza mwakufunisisa. Patsogolo pace, pidabwera Yezu pa dziko yapantsi mbakula, iye akhafuna kakamwe kuenda ku nyumba ya Babace na kucita khundu m’ulambiri mbapfunza kuti Yahova akhafuna kuona anthu mbakampasa mbiri penepa. Natenepa Biblya isalonga pya kugumanika kwa Yezu mokhonda phonya pa templo na pa sinagoga. (Luka 4:16; 19:47) Khala tisafuna kuti kufuna kwathu Yahova kupitirize na kupembere, tisafunika kukhala akuwangisira kugumanika m’misonkhano Yacikristu, munalambira ife Yahova na kukulisa cidziwiso cathu na kupereka kwathu takhuta kwa iye.

14, 15. (a) Thangwi yanji Yezu asaka midzidzi yakukhala ekhene? (b) Kodi maphembero a Yezu kwa Babace apangiza tani kufuna kwakubulukira m’ntima na cilemedzo?

¹⁴ Pontho Yezu apitiriza kufuna kwace Yahova kukhala kwakuwanga m’kuphembera midzidzi yonsene. Maseze iye akhali munthu wauxamwali na wakudzoloereka, mphyakudziwika kuti iye akhalemedza kukhala ekhene. Mwacitsanzo, Luka 5:16 isalonga: “Adzamale Yezu aenda ku thando kalonga maphembero.” M’njira ibodzibodzi, Mateo 14:23 isalonga: “Pidamala iye kuagwinya akwira pa phiri ekha ene, towera kulonga maphembero. Pa kufika ndzidzi wa mawulo, iye athimiza kukhala ekhene kweneko.” Yezu asaka kukhala ekhene m’midzidzi ineyi na inango, tayu thangwi akathunda peno nee akhafuna kukhala pabodzi na anthu, mbwenye ndi thangwi yakuti iye akhafuna kukhala ekhene na Yahova, towera kulonga mwaufulu na Babace m’phembero.

¹⁵ Mukhaphembera Yezu, iye m’midzidzi inango akhaphatisira fala yakuti “Abba, baba.” (Marko 14:36) M’ntsiku za Yezu, “Abba” ikhali fala ikhapangiza kufuna “baba” kwakubulukira m’ntima, yakuti ikhaphatisirwa m’banja. Kazinji kene ikhali pakati pa mafala akutoma akuti mwana mbadaapfunza. Inde, ikhali yacilemedzo. Nakuti fala isapangiza kufuna kwakubulukira m’ntima kwa Mwana mbakalonga na Babace wakufunika, iyo pontho isapangizambo cilemedzo cikulu ku utongi wa nyakubala Yahova. Ife tisagumana kubverana kweneku kukulu na cilemedzo m’maphembero adalembwa a Yezu. Mwacitsanzo, kapitulu 17 ya Jwau, mpostolo Jwau alemba phembero yakulapha na yakubulukira m’ntima idacita Yezu masiku Ace akumalisa. Mwandimomwene phembero ineyi isatikulumiza kuipfunza na ndi pyakufunika kakamwe kuisangizira​—tayu m’kubwerezera mafala a Yezu, mbwenye m’kusaka njira za kulonga mwakubulukira m’ntima kwa Babathu wakudzulu mule munakwanisirefe. Kucita tenepo kunadzakulisa kunfuna kwathu na kukucitisa kukhala kwakuwanga.

16, 17. (a) Kodi Yezu akwanisa tani kupangiza kufuna kwace Babace m’mafala? (b) Kodi Yezu afokotoza tani kupasa kwakudzala manja kwa Babace?

¹⁶ Ninga taona ndulimu, Yezu hadabwerezera tayu mafala akuti “ine ndisafuna Baba.” Mbwenye, m’midzidzi izinji iye apangiza kufuna kwace Babace m’mafala. M’njira ipi? Yezu ene alonga: “Baba wa kudzulu na wa pantsi pano, ndinakusimba” mwapakweca. (Mateo 11:25) Mudapfunza ife Khundu 2 ya bukhu ino, taona kuti Yezu akhafuna kusimba Babace m’kuphedza anthu kuti Andziwe. Mwacitsanzo, iye alandanisa Yahova na baba wakuti akhali wakufunisisa kulekerera mwanace okhonda bvera wakuti iye akhadikhira kufika kwa mwana unoyu wakutcinyuka, pidamuona iye kutali, anthamangira mbankhumbatira. (Luka 15:20) Kodi mbani anafuna kuleri khundu ineyi mbakhonda kukhuyiwa na mafokotozero a Yezu akulonga pya kufuna na kulekerera kwa Yahova?

¹⁷ Kazinji kene Yezu asimba Babace thangwi ya kupasa Kwace kwakudzala manja. Iye aphatisira citsanzo ca anyakubala akusowa ungwiro towera kupangiza kuti tingakwanise kukhala tani na cinyindiro cakuti Babathu anadzapasa ife tonsene nzimu wakucena unafuna ife. (Luka 11:13) Pontho Yezu alonga pya cidikhiro cinatipasa Baba mwakudzala manja. Mwakufuna Yezu afokotoza cidikhiro cace cene ca kubwezerwa mbuto yakukhala pa khundu ya Babace kudzulu. (Jwau 14:28; 17:5) Iye apanga atowereri ace pya cidikhiro cidapereka Yahova kwa ‘nkumbi ung’ono wa Kristu’​—ca kukhala kudzulu na kutonga pabodzi na Mambo Waumesiya. (Luka 12:32; Jwau 14:2) Iye athondolesa nyakucita pyakuipa wakuti akhadasala pang’ono kuti afe na cidikhiro ca umaso m’Paradizu. (Luka 23:43) Kulonga pya kupasa kukulu kwakudzala manja kwa Babace m’njira ineyi mwandimomwene kwaphedza Yezu kupitiriza kufuna kwace Yahova kukhala kwakuwanga. Atowereri azinji a Kristu asaona kuti nkhabepo cinthu cinawangisa kufuna kwawo Yahova peno cikhulupiro cawo kwa iye kupiringana kulonga pya iye na cidikhiro cinapereka iye kwa ale ananfuna.

18. Kodi ndi njira ipi yakufunika kakamwe yakuti tisafunika kutowerera Yezu, na thangwi yanji?

¹⁸ M’njira zonsene zinafuna ife kutowerera Yezu, nkhabepo ibodzi yakuti ndi yakufunika kakamwe kupiringana iyi: Tisafunika kufuna Yahova na ntima wathu onsene, moyo wathu onsene, nzeru zathu zonsene na mphambvu zathu zonsene. (Luka 10:27) Ife nkhabe funika kupima kufuna kwathu Yahova kubulukira basi ku mabvero akuwanga kakamwe a kufuna kweneku tayu; mbwenye tisafunikambo kuona kuti tisapangiza kufuna kwathu m’pyakucita mpaka papi. Yezu nee akhakomerwa basi na mabvero a kufuna akhakhala na iye kwa Babace, nee kulonga basi kuti, “ine ndisafuna Baba” tayu. Iye alonga: “Pisafunika kuti anthu a pantsi pano adzindikire kuti ine ndisafuna Baba mbandichita ninga mudanditumira iye.” (Jwau 14:31) Sathani akhadalonga kuti anthu mbadatumikira Yahova na kufuna kwa kucenama. (Yobe 2:4, 5) Towera kupereka ntawiro wadidi kakamwe ku upambiziri wacikala wa Sathani, mwacipapo Yezu acitapo pinthu na apangiza dziko kufuna kukulu kukhali na iye kwa Babace. Iye abvera mpaka kupereka umaso wace. Kodi imwe munadzatowerera Yezu? Kodi imwe munadzapangiza dziko kuti musafunadi Yahova Mulungu?

19, 20. (a) Kodi ndi mathangwi api akufunika anaticitisa kugumanika mokhonda phonya m’misonkhano Yacikristu? (b) Kodi tisafunika kuona tani pfunziro yathu tekha, kunyerezera pinapfunza ife na phembero?

¹⁹ Ife tiri na cifuno cikulu cauzimu towera kupangiza kufuna kweneku. Yahova aticitira tenepo masasanyiro a kulambira m’njira yakuti kufuna kwathu Babathu kukule na kukhale kwakuwanga. Munagumanika imwe pa misonkhano Yacikristu, yeserani kukumbuka kuti muli penepo towera kulambira Mulungu wanu. Makhundu a kulambira kweneku asaphataniza kubvesera phembero yakubulukira m’ntima, kuimba nyimbo zakusimba, kubvesera mwacidikhodikho na kucita khundu pingakwanisika. Misonkhano ineyi isakupasanimbo mwai towera kuwangisa Akristu anzanu. (Ahebere 10:24, 25) Kulambira Yahova mokhonda phonya m’misonkhano Yacikristu kunadzakuphedzani kuwangisa kakamwe kufuna kwanu Mulungu.

²⁰ M’njira ibodzibodzi, kufuna kwathu Mulungu kunadzawanga m’kucita pfunziro ya munthu ekha, kunyerezera pinapfunza ife na kuphembera. Nyerezerani pyenepi ninga njira zakukhala mwekha na Yahova. Munapfunza imwe Mafala akulembwa a Mulungu na kunyerezera pinapfunza imwe, Yahova asakupangani manyerezero ace. Munaphembera imwe, musalonga piri m’ntima mwanu kwa iye. Kumbukani kuti phembero isaphataniza pizinji kupiringana kuphemba basi pinthu Mulungu. Phembero isakupasanimbo mwai wakupereka takhuta kwa Yahova thangwi ya nkhombo zidatambira imwe na kunsimba thangwi ya mabasa ace akudzumisa. (Masalmo 146:1) Mwakuthimizira, kusimba Yahova mwapakweca na mwakukomerwa na mwakugalamuka ndi njira yadidi towera kupereka takhuta kwa Yahova na kupangiza kuti imwe musanfuna.

21. Kodi kufuna Yahova ndi kwakufunika tani, na tinadzadinganji m’misolo yakutsogolo?

²¹ Kufuna Mulungu ndi mfungulo towera mukhale wakutsanzaya kwenda na kwenda. Ndi pyonsene pyakuti Adamu na Eva akhafunika kupicita towera apembere​—na cinthu cibodzi cidacimwana iwo kucikulisa. Kufuna Mulungu ndi kwakufunika kakamwe towera mupirire mayesero onsene a cikhulupiro na kukhonda ntundu onsene wa mayesero. Ndi kwakufunika kakamwe towera kukhala ntowereri wa Yezu. Inde, kufuna Mulungu kusalandaniswa na kufuna anthu anzathu. (1 Jwau 4:20) M’misolo yakutsogolo, tinadzadinga kuti Yezu apangiza tani kufuna kwace anthu. M’nsolo wakutowerera, tinadzadinga thangwi idacitisa anthu azinji kuona Yezu ninga wakudzoloereka.