Juwau Asafuna Kuti Yezu Ampange kuti Iye Ndi Mesiya

Pakhadapita cifupi na caka cibodzi Juwau M’batizi mbali n’kaidi. Ngakhale tenepo, iye abva pya mabasa akudzumisa a Yezu. Mwakukhonda penula, Juwau atsandzaya kakamwe pidabva iye na anyakupfundzace kuti Yezu alamusa muli akufa mwana wa nzice wa ku Nayini. Mbwenye Juwau asafuna kudziwa na Yezu kuti pyonsene ipi pisabvekanji. Natenepa, Juwau atuma anyakupfundzace awiri toera kabvundza Yezu: ‘Kodi ndimwe adalongwa kuti Anabwera, peno tisafunika kudikhira unango?’—Luka 7:19.

Kodi mbvundzo unoyu ukhapangiza kuti iye akhali wakusowa cikhulupiro? Juwau akhali mamuna wacikhulupiro thangwi mu ndzidzi udabatizwa Yezu cifupi na pyaka piwiri nduli, aona nzimu wakucena mbubwera pana Yezu, pontho abva fala ya Mulungu ikhapangiza kuti atawira Yezu ninga mwanace. Ife nkhabe mathangwi akupenula cikhulupiro ca Juwau. Mbidakhala kuti cikhulupiro ca Juwau cafewa, Yezu nee mbadansimba ninga pidacita iye mu ndzidzi unoyu. Mphapo, khala Juwau nee akhapenula, thangwi yanji acita mbvundzo unoyu kuna Yezu?

Panango Juwau akhafuna kubva Yezu mbalonga ekha kuti iye ndi Mesiya. Pyenepi mbipidawangisa cikhulupiro ca Juwau mu ndzidzi ukhathabuka iye n’kaidi. Mbwenye mbvundzo wa Juwau panango ukhali na mabvekero anango. Iye akhadziwa maprofesiya a Bhibhlya analonga kuti Wakudzodzwa wa Mulungu anadzakhala mambo na mpulumusi. Mu ndzidzi unoyu, Juwau akhali na miyezi mizinji n’kaidi, kutomera ndzidzi udabatizwa Yezu. Natenepa Juwau abvundza khala anabwera munthu unango anafuna kupitira mbuto Yezu wakuti anadzakwanirisa pyonsene pidalongwa thangwi ya basa ya Mesiya.

M’mbuto mwa kulongeratu kuna anyakupfundza a Juwau kuti ‘Inde, ine ndine Ule akhafuna kubwera,’ Yezu apangiza kuti ali na ciphedzo ca Mulungu mukuwangisa anthu azinji akuti akhali na mautenda akusiyana-siyana. Buluka penepo, iye apanga anyakupfundza anewa: ‘Ndokoni kampange Juwau pire pinabva imwe na pinaona imwe: Cincino maboliboli ali kuona, anyakulamala miyendo ali kufamba, anyamatanya akuwangiswa, madhrodhro ali kubva, anthu akufa ali kulamuswa, pontho anyakutcerenga ali kubva mphangwa zadidi.’—Mateu 11:4, 5.

Panango Juwau acita mbvundzo unoyu thangwi akhafuna kuti Yezu acite pizinji kupiringana pirengo pikhacita iye, peno toera am’buluse n’kaidi. Mbwenye Yezu akhafuna kulonga kuti Juwau nee akhafunika kudikhira pirengo pinango kupiringana pikhacita iye.

Pidabuluka anyakupfundza a Juwau, Yezu aphedza mwinji toera kubvesesa kuti Juwau ndi nkulu kupiringana mprofeta. Iye ndi ‘nyakupereka mphangwa’ wa Yahova adalongwa mu profesiya ya Malakiya 3:1. Pontho, iye ndi mprofeta Eliya adalongwa pa Malakiya 4:5, 6. Yezu afokotoza: ‘Mwandimomwene ndinakupangani kuti mwa anthu onsene adabalwa na nkazi, nkhabepo nkulu kakamwe kupiringana Juwau M’batizi. Mbwenye munthu wang’ono mu Umambo wakudzulu, ndi nkulu kupiringana iye.’—Mateu 11:11.

Pakulonga kuti wang’ono mu Umambo wakudzulu ndi nkulu kupiringana Juwau, Yezu akhafuna kulonga kuti Juwau nee anadzakhala mu Umambo wakudzulu. Maseze iye akhunganyira Yezu njira, Juwau afa mu ndzidzi wakuti Kristu adzati kufungula njira yakudzulu. (Ahebere 10:19, 20) Natenepa, Juwau akhali mprofeta wakukhulupirika wa Mulungu, pontho anadzakhala pa dziko yapantsi mu Umambo wa Mulungu.