Iye Adyesa Mwinji wa Anthu Mukuphatisira Mikate na Ntsomba Zingasi

Apostolo 12 akomerwa kakamwe thangwi yakumwaza mphangwa ku Galileya, pontho apanga Yezu ‘pyonsene pidacita iwo na pidapfundzisa iwo.’ Mwandimomwene iwo akhali akuneta. Mbwenye iwo nee akhali na ndzidzi wakupuma, ngakhale wakudya thangwi anthu azinji akhabwera mbaenda. Natenepa Yezu alonga: ‘Bwerani imwe basi, tendeni ku mbuto yathu tekha toera mupume pang’ono.’—Marko 6:30, 31.

Iwo akwira mwadiya, panango dhuzi na Kafarnau mbaenda ku cisa ca Nkulo wa Yordani kukhundu kwa Bhetisaidha. Mbwenye anthu azinji aaona mbakabuluka, natenepa anango adziwa pyenepi. Iwo aenda n’khundu mwa bara mwakucimbiza mbatoma ndiwo kufika.

Pidatcitha Yezu m’mwadiya, aona mwinji wa anthu mbaubvera ntsisi, iwo akhala ninga mabira akusowa nkumbizi. Natenepa iye atoma ‘kuapfundzisa pinthu pizinji’ pya Umambo. (Marko 6:34) Iye ‘awangisambo atenda.’ (Luka 9:11) Pakupita ndzidzi ungasi, anyakupfundza ampanga: ‘Kuno ndi kutali, pontho dzuwa ikudoka, pangani anthu amwazike toera aende m’pisa kagula cakudya.’—Mateu 14:15.

Yezu aatawira: ‘Iwo nee asafunika kuenda; apaseni imwe cakudya.’ (Mateu 14:16) Ngakhale Yezu akhadziwa kale pikhafuna iye kucita, iye ayesera Filipi na mbvundzo uyu: ‘Tinagula kupi mikate toera anthu awa adye?’ Mwandimomwene, Filipi akhadziwa kukhagumanika mikate thangwi akakhala dhuzi na Bhetisaidha. Mbwenye kugula mikate basi nee pyakwana. Pakhali na amuna akukwana pikwi pixanu. Tingalengesa akazi na anapiana numero ineyi panango inabwerezerwa kawiri. Filipi atawira: ‘Maseze tiphatisire madhenaryo 200 toera kugula mikate, nee inakwana toera m’bodzi na m’bodzi wa iwo atambire phindi yace.’—Juwau 6:5-7.

Panango toera kupangiza kuti nee pinakwanisika kupasa cakudya anthu onsene, Andreya alonga: ‘Pano pana m’phale m’bodzi ali na mikate mixanu ya sevadha na nyama zing’ono ziwiri za m’madzi. Mbwenye pyenepi pinakwananji kuna anthu onsene awa?’—Juwau 6:9.

Nakuti ukhali ndzidzi wa khoni, pakhadasala ndzidzi pang’ono toera kucita Paskwa ya 32 N.W., pontho n’khundu mwa mapiri tsanga ikhali iwisi. Yezu aphemba anyakupfundzace toera kupanga anthu kuti akhale m’misoka ya anthu 50 na 100. Iye akwata mikate mixanu na ntsomba ziwiri mbacita phembero yakupereka takhuta kwa Mulungu. Buluka penepo iye agwanda mikate na ntsomba, mbaipereka kwa anyakupfundzace toera iwombo apase mbumba. Onsene adya mbakhuta.

Pakumala kudya, Yezu apanga anyakupfundzace: ‘Gumanyani mapindi adasala, toera pakhonde kubvungika cinthu.’ (Juwau 6:12) Iwo akwanisa kudzadza pitundu 12 na pyakudya pyakusala!