Citsandzo Ca Nsamariya Cisatiphedza kudziwa Kuti Ndzathu Mbani

Yezu mbaciri cifupi na Yerusalemu, Ayuda azinji akhaenda kuna iye. Anango akhafuna kupfundziswa na iye mbwenye anango akhafuna kumuyesera. M’bodzi wa iwo, wakuti akhadziwa kakamwe Mwambo, abvundza: ‘Mpfundzisi, ndisafunika kucitanji toera ndikhale na umaso wakukhonda mala?’—Luka 10:25.

Yezu adzindikira kuti mamuna unoyu nee akhafuna dziwa cinthu. Iye akhafuna kuti Yezu alonge pinthu pyakuti mbapidatsukwalisa Ayuda. Yezu akhadziwa maonero a mamuna unoyu. Natenepa, iye atawira mwandzeru toera kupangiza pikhanyerezera mamuna unoyu.

Yezu abvundza: ‘Ninji pidalembwa mu Mwambo? Usaubvesesa tani?’ Nakuti mamuna unoyu apfundza Mwambo wa Mulungu, iye atawira mwakubverana na pidalembwa. Iye aphatisira Deuteronomyo 6:5 na Levitiko 19:18, mbalonga: ‘Funa Yahova Mulungu wako na ntima wako onsene, na umaso wako onsene, na mphambvu zako zonsene, na ndzeru zako zonsene, pontho funa ndzako ninga iwe ene.’ (Luka 10:26, 27) Kodi ntawiro ukhali unoyu?

Yezu apanga mamuna: ‘Watawira mwadidi; pitiriza kucita pyenepi, natenepa unadzakhala na umaso wakukhonda mala.’ Kodi makani awo amalira penepa? Nkhabe. Mamuna nee akhafuna ntawiro basi. Mbwenye akhafuna kuti Yezu alonge kuti iye ‘ndi munthu wakulungama,’ asacita pinthu pyadidi, pontho asatsalakana mwadidi andzace. Natenepa iye abvundza: ‘Mwandimomwene mbani ndzanga?’ (Luka 10:28, 29) Usaoneka ninga ndi mbvundzo wakukhonda nentsa mbwenye ukhaphataniza pizinji. Munjira ipi?

Ayuda asatawira kuti fala yakuti ‘ndzanga’ ndi ule anacita misambo Yaciyuda basi. Iwo akhanyerezera kuti maonero awo akhabverana na Levitiko 19:18. Ayuda akhakwanisa kulonga kuti mphyakukhondeswa kucedza na munthu wakuti nee ndi Muyuda. (Mabasa 10:28) Natenepa mamuna unoyu akhadziona ninga wakulungama thangwi yakutsalakana mwadidi Ayuda andzace na panango anyakupfundza a Yezu akhalimbo na maonero mabodzi ene. Iwo nee akhamuona ninga ‘ndzawo’ wandimomwene.

Kodi Yezu aphedza tani mamuna unoyu kubvesesa ntsonga yakufunika, mbakhonda tsukwalisa Ayuda anango? Iye apereka citsandzo cibodzi: ‘Mamuna m’bodzi akhabuluka ku Yerusalemu kuenda ku Yeriko. Iye agumanikana na mambava, iwo an’dulisa nguwo zace mbankwatira pinthu pyace pyonsene, am’menya mbaenda pyawo, mbansiya cifupi na kufa.’ Yezu apitiriza kulonga: ‘Pyacitikambo kuti nyantsembe m’bodzi akhaendambo na nseu ubodzi ene, mbwenye pidamuona iye, ancalira mbapita na kukhundu inango. Munjira ibodzi ene, Mulevi afika pa mbuto ineyi mbamuona, iye ancalira mbapita na kukhundu inango. Mbwenye Nsamariya unango akhaenda na nseu unoyu afika pana iye, pidamuona iye, ambvera ntsisi.’—Luka 10:30-33.

Mamuna akhabva citsandzo ca Yezu akhadziwa kuti azinji mwa anyantsembe na Alevi akhaphata basa mu templo akhakhala ku Yeriko. Toera kubwerera kunyumba kwawo iwo akhafunika kufamba nsindzo wa makilometru cifupi 23. Nseu unoyu ukhali wakugopswa, pontho mambava akhabisala n’khundu mwa nseu unoyu. Nyantsembe peno Mulevi angagumana Muyuda ndzawo ali pa nyatwa akhafunika kumphedza. Mbwenye pa citsandzo ceneci Yezu alonga kuti iwo nee acita pyenepi. Mbwenye adabvera ntsisi ndi Nsamariya, wakuti akhali m’bodzi wa anthu akhapwazwa na Ayuda.—Juwau 8:48.

Kodi Nsamariya aphedza tani Muyuda wakuti akhadamenywa na mambava? Yezu alonga: ‘Iye anfendedzera, atsuka pironda pyace na mafuta na vinyu mbapipyangirira. Buluka penepo ankwiza pa buru yace, aenda naye panyumba inafikira alendo mbantsalakana. Mangwana mwace, iye abulusa madhenaryo mawiri mbaapereka kuna ule anatsalakana nyumba inafikira alendo, mbampanga: ‘Ntsalakaneni mwadidi, mungaphatisira kobiri inango kupiringana iyi, ine ndinakubwezerani ndingabwerera.’—Luka 10:33-35.

Pakumala kulonga citsandzo ceneci, Yezu wakuti ndi Mpfundzisi Wankulu, acita mbvundzo wakuti mbudacitisa mamuna unoyu kunyerezera: ‘Mbani mwa anthu atatu anewa anaona iwe kuti apangiza kukhala ndzace wa mamuna adagumanikana na mambava?’ Panango mamuna unoyu anyinyirika toera kutawira kuti ndi “Nsamariya.” Natenepa iye alonga: ‘Ndi ule adam’bvera ntsisi.’ Yezu abvekesa ntsonga yakufunika ya citsandzo ceneci, mbampanga: ‘Ndoko kacitembo pibodzi pyene.’—Luka 10:36, 37.

Yezu aphatisira njira yadidi yakupfundzisa. Yezu mbadatawira kuna mamuna kuti anthu anango akuti nee ndi Ayuda akhalimbo andzace, panango mamuna unoyu na Ayuda anango nee mbadatawira pyenepi. Natenepa, pakubva citsandzo cidalonga Yezu, iwo adzindikira ntawiro wa mbvundzo wakuti: ‘Mwandimomwene mbani ndzanga?’ Citsandzo ceneci cisatipfundzisa kuti ndzathu wandimomwene ndi ule anapangiza ufuni na kukoma ntima ninga pinalonga Malemba.