‘Anyakulungama Anadzatsandzaya na Yahova’

DIANA ali na pyaka pyakupiringana 80 pyakubalwa. Mamunace akhali na utenda wa Alzheimer, natenepa akhafunika kuenda kakhala kuyumba inatsalakanirwa ankhalamba mpaka kufa kwace. Anace awiri amuna afambo, pontho iye akhali na utenda wa câncer pabere. Ngakhale tenepo, Diana akhali wakutsandzaya. Pa misonkhano peno m’basa yakumwaza mphangwa abale na alongo onsene asakwanisa kuona kuti iye ali wakutsandzaya.

John atumikira ninga muyang’aniri wa cisa mu pyaka pyakupiringana 43. Iye akhakomerwa kakamwe na basa ineyi. Mbwenye aisiya thangwi akhafunika kutsalakana wacibale wace wakuti akhabva kupha. Abale na alongo angagumanikana na John pa nsonkhano wa cisa peno wa gawo, iwo asaona kuti iye asapitiriza kukhala wakutsandzaya.

Kodi Diana na John asakwanisa tani kupitiriza kukhala akutsandzaya? Munthu anapitiriza tani kukhala wakutsandzaya ngakhale athimbane na nyatwa? Munthu anakhala tani wakutsandzaya ngakhale aluze mwani wakutumikira mu gulu? Bhibhlya isalonga: ‘Anyakulungama anadzatsandzaya na Yahova.’ (Masalmo 64:10) Toera kubvesesa mwadidi, tendeni tione pinthu pinafuna kuticitisa kukhala akutsandzaya na pinafuna kuticitisa kukhala akutsukwala.

Pana pinthu pinango pyakuti m’midzidzi mizinji pisaticitisa kukhala akutsandzaya. Mwacitsandzo, nyerezerani anthu akuti asafuna kumanga banja. Peno nyerezerani banja yakuti inadzakhala na mwana, peno munthu wakuti apaswa basa ipswa yakutumikira Yahova. Pinthu pyenepi ndi pyakutsandzayisa thangwi pyonsene ndi miyoni yakubuluka kuna Yahova. Iye ndiye adacita banja, anaticitisa toera tikhale na ana, pontho ndiye anatipasa basa toera kucita mu gulu yace.—Genesi 2:18, 22; Masalmo 127:3; 1 Timoti 3:1.

Mbwenye m’midzidzi inango anthu asakhala akutsandzaya mu ndzidzi wakucepa basi. Mwakutsukwalisa, panango ndzathu wa m’banja anasiya kukhala wakukhulupirika peno kufa. (Ezekyele 24:18; Ozeya 3:1) Panango ana nee anabvera anyakubalawo na Mulungu ngakhale kubuluswa mu mpingo. Mwacitsandzo, ana a Samweli nee akhatumikira Yahova mwakukhulupirika, pontho Dhavidhi akhali na nyatwa zizinji m’banja mwace thangwi yakucita upombo na Bhatesebha. (1 Samwele 8:1-3; 2 Samwele 12:11) Pinthu ninga pyenepi nkhabe bweresa kutsandzaya mbwenye kutsukwala.

Munjira ibodzi ene, panango nee tinapitiriza na mwai uli na ife mu gulu ya Yahova thangwi ya matenda, kufuna kutsalakana acibale athu peno thangwi ya macinjo a mu gulu. Azinji adasiya miyai yawo yakutumikira alonga kuti asatsuwa kutsandzaya kwawo m’mabasa akhacita iwo.

Ife tinakwanisa kuona kuti pinthu pyenepi pisatsandzayisa mu ndzidzi wakucepa. Mphapo pana ntundu unango wakutsandzaya wakuti nkhabe mala ngakhale munthu athimbane na nyatwa? Inde ulipo, thangwi Samweli, Dhavidhi na anango nee aluza kutsandzaya mu ndzidzi ukhathimbana iwo na nyatwa.

Yezu akhadziwa kutsandzaya kwandimomwene kusabvekanji. Bhibhlya isalonga kuti mbadzati bwera pa dziko ‘iye akhatsandzaya pamaso pa Yahova ntsiku zonsene.’ (Misangani 8:30) Mbwenye pidabwera iye pa dziko yapantsi midzidzi inango akhathimbana na nyatwa zizinji. Ngakhale tenepo, Yezu akhatsandzaya na kucita pikhafuna Babace. (Juwau 4:34) Ndiye tani pya ndzidzi wace wakumalisa pa dziko? Bhibhlya isalonga: “Thangwi ya kutsandzaya kudaikhwa patsogolo pace, iye apirira pamuti wakusikimizira.” (Ahebheri 12:2) Yezu alonga pinthu piwiri pyakuti pinatiphedza toera kukhala akutsandzaya.

Anyakupfundza 70 pidamala iwo kumwaza mphangwa abwerera kuna Yezu. Iwo atsandzaya na basa yawo yakuti ikhaphataniza kubulusa madimonyo. Mbwenye Yezu aapanga: “Lekani kukomerwa thangwi madimonyo asakubverani, mbwenye komerwani thangwi madzina anu alembwa kudzulu.” (Luka 10:1-9, 17, 20) Mafala anewa a Yezu asapangiza kuti kutumikira Yahova mwakukhulupirika ndi kwakufunika kakamwe kupiringana kupaswa basa yakupambulika mu gulu ya Yahova.

Ntsiku inango, pikhapfundzisa Yezu mwinji wa anthu, nkazi unango Waciyuda adzumatirwa na njira yace yakupfundzisa mbalonga kuti mace Yezu ndi wakutsandzaya kakamwe. Mbwenye Yezu atawira: “Nkhabe, anyakutsandzaya ndi ale anabva mafala a Mulungu mbaaphatisira!” (Luka 11:27, 28) Kukhala wakudzikuza thangwi ya pinacita anathu pinakwanisa kukhala pyakutsandzayisa, mbwenye kukhala na uxamwali na Yahova na kubvera pinafuna iye ndi pinacitisa anthu ndzidzi onsene kukhala akutsandzaya.

Ife tisakhala akutsandzaya kakamwe tingadziwa kuti tikucita pinafuna Yahova. Ngakhale tithimbane na mayesero, iwo nkhabe kwanisa kubulusa mabvero anewa muntima mwathu. Inde, kupitiriza kukhala akukhulupirika m’midzidzi ya mayesero kusathimizira kutsandzaya kwathu. (Aroma 5:3-5) Kusiyapo pyenepi, Yahova asapasa nzimu wace ale anan’nyindira, pontho kukomerwa ndi ubodzi mwa misapo ya nzimu. (Agalata 5:22) Pyenepi pisatiphedza kubvesesa lemba ya Masalmo 64:10 inalonga: ‘Anyakulungama anadzatsandzaya na Yahova.’

Pyenepi pisatiphedza kudziwa kuti thangwi yanji Diana na John adalongwa pakutoma akhali akutsandzaya maseze akhathimbana na nyatwa. Diana alonga: “Ine ndisathawira kuna Yahova ninga pinacita mwana kuna nyakubalace.” Iye athimiza: “Ine ndisadzindikira kuti Yahova asatawira maphembero anga thangwi ndzidzi onsene ndisakwanisa kumwaza mphangwa mbandikamwetulira.” Mphapo ninji pidaphedzambo John toera apitirize kumwaza mphangwa na kukhala wakutsandzaya ngakhale pidasiya iye basa yakuti akhadaidzolowera? Iye alonga: “Kutomera mu ndzidzi udakhazikiswa ine ninga mpfundzisi wa Xikola Yakupfundzisa Basa ya Utumiki mu caka 1998, ine ndisacita kazinji kene pfundziro yanga ndeka kupiringana kale.” Iye alongambo kuti nee anentseka toera kucita macinjo, thangwi ninga banja akhali dzololo toera kucita basa yonsene ikhapaswa iwo na Yahova. Iye athimiza: “Ife nee tatsumbikika na cisankhulo cidacita ife.”

Anthu azinji aonambo kukwanirisika kwa lemba ya Masalmo 64:10 mu umaso wawo. Mwacitsandzo, banja ibodzi idatumikira ku Bheteli ya ku Estados Unidos mu pyaka pyakupiringana 30 yacinjwa toera ikatumikire ninga apainiya akupambulika. Iwo alonga: “Mphyacibaliro kutsukwala tingaluza cinthu cinafuna ife.” Buluka penepo iwo alonga: “Mbwenye nkhabe munthu anatsukwala kwenda na kwenda.” Mudapita ntsiku zingasi, iwo aenda kudatumwa iwo, mbatoma kumwaza mphangwa pabodzi na mpingo. Iwo alongambo: “Ife tacita phembero thangwi ya pinthu pingasi. Pidaona ife kuti Yahova akhatawira maphembero athu, takhala akuwanga manungo na akutsandzaya. Pidafika ife ku mpingo upswa, papita ndzidzi pang’ono basi, anango atomambo kutumikira ninga apainiya, pontho tikhali na mwai wakutoma kupfundza Bhibhlya na anthu awiri akuti akhathambaruka kakamwe.”

Kukhala wakutsandzaya ndzidzi onsene ndi pyakunentsa, thangwi midzidzi inango pisaoneka pinthu pyakuti pisatitsukwalisa. Mbwenye mafala a Yahova anagumanika pa lemba ya Masalmo 64:10 asatiwangisa kakamwe. Vesi ineyi isatipasa cinyindiro cakuti tingapitiriza kukhala akukhulupirika ‘tinatsandzaya na Yahova’ mwakukhonda tsalakana makhaliro athu. Tinakwanisambo kudikhira ndzidzi wakuti Yahova anakwanirisa pikiro yace yakubweresa ‘kudzulu kupswa na dziko yapantsi ipswa.’ Mu ndzidzi unoyu, anthu onsene anakhala aungwiro, pontho ‘anatsandzaya mbakomerwa’ thangwi ya pyonsene pinafuna kucita Yahova.—Izaiya 65:17, 18.

Nyerezerani kuti pyenepi pisafuna kulonganji. Ife tinadzakhala na ungumi waungwiro, pontho ntsiku zonsene tinakhala na mphambvu zakucita mabasa. Ife nkhabebve kudzakumbuka nyatwa peno pinthu pyonsene pyakuipa pinatitsukwalisa. Yahova asapikira kuti ‘pyakale pinadzaduwalikiratu.’ Ife tinadzaona pontho anyakufunika athu adamala kufa, pontho ‘tinakomerwa kakamwe’ ninga pidacita anyakubala a ntsikana ule wa pyaka 12 adalamuswa na Yezu. (Marko 5:42) Pakumalisira, anthu onsene pa dziko yapantsi mwandimomwene anadzakhala akulungama na ‘anadzatsandzaya na Yahova’ kwenda na kwenda.