MIBVUNDZO INACITWA NA ANYAKULERI

Yezu apanga Asaduki kuti anyakulamuka muli akufa ‘nkhabe kusemba nee kusembwa.’ (Luka 20:34-36) Kodi iye akhalonga pya ale anafuna kulamuswa toera kukhala pa dziko yapantsi?

▪ Mbvundzo unoyu ngwakufunika kakamwe, makamaka kwa ale adaferwa na ndzawo wa m’banja. Panango, iwo anakwanisa kukhala na cifuno cakukhala pontho pabodzi na ndzawo mu dziko ipswa ninga anyakumanga banja angalamuka muli akufa. Mamuna unango wakuti ndi nzice alonga: “Ine na nkazanga nee tasankhula kumalisa banja yathu. Na ntima onsene, ife tikhafuna kukhala akuphatana mu ulambiri wathu ninga nkazi na mamuna kwenda na kwenda. Manyerezero anewa adzati kucinja kwa ine.” Kodi pana thangwi yakulinganira toera kudikhira kuti anyakulamuswa muli akufa anadzamanga pontho banja? Ntawiro wacigwagwa, ndi wakuti ife nkhabe kupidziwa.

Mu pyaka pizinji, mabukhu athu asalonga kuti mafala a Yezu thangwi ya kulamuswa muli a kufa na kumanga banja panango asalonga pya ale anafuna kulamuswa toera kukhala pa dziko yapantsi, pontho kuti ale anafuna kulamuswa mu dziko ipswa panango nee anadzamanga banja.a (Mat. 22:29, 30; Mko. 12:24, 25; Luka 20:34-36) Ngakhale kuti ife nee tinakwanisa kulonga na cinyindiro consene, kodi mafala a Yezu anakwanisambo kuphatisirwa kwa ale anafuna kulamuswa toera kuenda kudzulu? Tendeni tidinge pidalonga Yezu.

Nyerezerani pya makhaliro a mu ndzidzi uneule. (Lerini Luka 20:27-33.) Asaduki akuti nee akhakhulupira pya kulamuka muli akufa, ayesera Yezu na mbvundzo unalonga pya kulamuka muli akufa na pya kumanga banja na mulamu.b Yezu atawira: ‘Ana a makhaliro ano anapitisa mbapitiswambo n’nyumba. Mbwenye ale adathema toera kupita m’makhaliro anafuna kudza na kulamuka muli akufa nee hanapitisa, nee hanapitiswambo n’nyumba tayu; anacimwanambo kufa kutsogolo, thangwi ndi sawasawa ninga aanju, ndiwombo ana a Mulungu pakulamuka muli akufa.’​—Luka 20:34-36.

Thangwi yanji mabukhu athu akhalonga kuti panango Yezu akhalonga pya kulamuswa kwa anthu toera kukhala pa dziko yapantsi? Maonero anewa asabverana na ntsonga ziwiri. Yakutoma ndi yakuti panango, Asaduki akhanyerezera pya kulamuka muli akufa pa dziko yapantsi, pontho kuti Yezu mbadaatawira munjira ikhanyerezera iwo. Ntsonga yaciwiri ndi yakuti Yezu amalisa ntawiro wace mu kulonga pya Abrahamu, Izaki, na Yakobe​—amuna akukhulupirika akuti asadikhira kulamuswa toera kukhala maso pa dziko yapantsi.​—Luka 20:37, 38.

Mbwenye pisaonekambo kuti Yezu akhalonga pya ale anafuna kulamuswa toera kuenda kudzulu. Thangwi yanji tinakwanisa kufika pa kunyerezera tenepo? Tendeni tidinge mathangwi mawiri akufunika kakamwe.

‘Ale adathema toera kupita m’makhaliro anafuna kudza na kulamuka muli akufa.’ Anyakudzodzwa akukhulupirika ali ‘akuthema toera kupita mu Umambo wa Mulungu.’ (2 Ates. 1:5, 11) Iwo aoniwa ninga akulungama toera kutambira umaso kubulukira mu ciomboli; natenepa, iwo nkhabe kufa ninga anyakudawa. (Arom. 5:1, 18; 8:1) Iwo asacemerwa “anyakutsandzaya na anthu akuchena” mbakhala na makhaliro akuthema toera kuenda kudzulu. (Apok. 20:5, 6) Mwakusiyana na iwo, ale anafuna kulamuswa toera kukhala maso pa dziko yapantsi, asaphatanizambo ‘akuipa’ peno anyakukhonda kulungama. (Mach. 24:15) Tinakwanisambo kulonga kuti iwo ‘athema’ kulamuswa muli akufa?

“Anacimwanambo kufa kutsogolo.” Yezu nee alonga kuti: “Iwo nee anadzafa pontho.” Mbuto mwace, iye alonga: “Anacimwanambo kufa kutsogolo.” Mabhibhlya anango athumburuza kuti “iwo nkhabe kukhuiwa pontho na kufa,” “kufa nkhabebve mphambvu kwa iwo.” Anyakudzodzwa anamalisa basa yawo mwakukhulupirika pa dziko yapantsi, asalamuswa mbaenda kudzulu mbapaswa umaso wakukhonda kufa​—umaso wakukhonda kumala, wakukhonda kufudzika. (1 Akor. 15:53, 54) Kwa ale analamuswa mbaenda kudzulu, kufa nkhabebve mphambvu kwa iwo.c

Mwakubverana na pidadinga ife, tisapfundzanji? Pisaoneka kuti panango mafala a Yezu thangwi ya kumanga banja na kulamuka muli akufa, asaphatisirwa kwa ale anafuna kulamuswa toera kuenda kudzulu. Khala ndi tenepo, mafala a Yezu mbadatipfundzisa pinthu pizinji thangwi ya ale anafuna kuenda kudzulu: Iwo nkhabe kumanga banja, nkhabe kufa, munjira inango, iwo alandana na aanju—anthu auzimu anakhala m’mbuto yauzimu. Mbwenye maonero anewa asabweresa mibvundzo mizinji.

Wakutoma, thangwi yani Yezu alonga pya kulamuswa toera kuenda kudzulu pakutawira Asaduki, akuti panango akhanyerezera pya kulamuka toera kukhala pa dziko yapantsi? Yezu nee akhatawira apingizi ace ndzidzi onsene mwakubverana na pikhanyerezera iwo. Mwacitsandzo, kwa Ayuda adamphemba cidzindikiro, Yezu alonga: ‘Gomolani templo iyi, ine ndinadzaimanga pontho pa ntsiku zitatu basi.’ Panango Yezu akhadziwa kuti iwo akhanyerezera pya templo yandimomwene, ‘mbwenye Yezu akhalonga pya templo ya manungo ace.’ (Jwau 2:18-21) Panango Yezu aona kuti nee akhafunika kutawira Asaduki akuti nee akhali na cifuno candimomwene, nee akhakhulupira pya kulamuka muli akufa nee kuti aanju alipo. (Mis. 23:9; Mat. 7:6; Mach. 23:8) Mbuto mwace, iye akhafuna kupangiza undimomwene thangwi ya kulamuka toera kuenda kudzulu toera kuphindulisa anyakupfundzace andimomwene, akuti ntsiku yace mbadalamuswa toera kuenda kudzulu.

Waciwiri, thangwi yanji Yezu amalisa ntawiro wace mu kulonga pya Abrahamu, Izaki, na Yakobe akuti anadzalamuswa toera kukhala pa dziko yapantsi? (Lerini Mateo 22:31, 32.) Onani kuti mbadzati kulonga pya amuna anewa, Yezu alonga kuti: “Pyakulamuka muli akufa.” Mafala anewa anapangiza kucinja kwa makani aphedza anthu toera kubvesesa. Buluka penepo, kutomera m’mabukhu a Mose, akuti Asaduki akhaakhulupira, Yezu aphatisira mafala adalonga Yahova kuna Mose pa thendere toera kuthimizira cipangizo cakuti kulamuka muli akufa toera kukhala pa dziko yapantsi ndi cifuniro ca Mulungu.​—Eks. 3:1-6.

Wacitatu, khala mafala a Yezu thangwi ya kulamuka muli akufa na kumanga banja asaphatisirwa kwa ale anafuna kuenda kudzulu, mphapo, pisabveka kuti ale anafuna kulamuswa toera kukhala pa dziko yapantsi anadzamanga banja? Bhibhlya nkhabe kupereka ntawiro wapakweca wa mbvundzo unoyu. Khala mwandimomwene, Yezu akhalonga pya kulamuka muli akufa toera kuenda kudzulu, natenepa, mafalace nkhabe kupangiza ceza cakuti ale anafuna kulamuswa toera kukhala pa dziko yapantsi anadzamanga banja mu dziko ipswa.

Mbwenye mu ndzidzi uno, ife tisadziwa kuti Mafala a Mulungu asalonga pakweca kuti kufa ndi kumala kwa banja. Natenepa, nzice wa mamuna peno wankazi, nee asafunika kupasika mulando khala iye asankhula kumanga pontho banja. Ceneci ndi cisankhulo ca munthu paekha, pontho nkhabe anafunika kusumula anthu anewa thangwi yakusaka citsalakano caufuni mu kumanga pontho banja.—Arom. 7:2, 3; 1 Akor. 7:39.

Mwandimomwene, panango ife tiri na mibvundzo mizinji thangwi ya umaso mu dziko ipswa. Mbuto mwakulonga pizinji thangwi ya mibvundzo ineyi, basi ene tisafunika kudikhira toera kuona. Mbwenye tinakwanisa kukhala na cinyindiro cakuti: Anthu akubvera anadzakhala akutsandzaya, thangwi Yahova anadzakwanirisa pifuno pyawo pyonsene munjira yakuthema kakamwe.​—Sal. 145:16.

[Pidzindikiro pyapantsi]