Ndi Cidikhiro Cipi Ciri Na Makolo Anga?

MU PYAKA pingasi nduli, tsamba ya mphangwa ya ku Koreya yabulusa nsolo unango wakudzumisa kakamwe. Tsamba ya mphangwa yabvundza: “Kodi Shim Cheong, Wakuti Nee Adziwa Cinthu Thangwi Ya Yezu​—Aenda Ku Djendje Ya Moto?”

Nsolo unoyu wadzudzumisa anthu thangwi Shim Cheong ndi mwana ntsikana wakufuniwa kakamwe ku Koreya adaikha pangozwi umaso wace toera kuphedza babace wakuti akhali boliboli. Mu pyaka pizinji iye asalemedzwa kakamwe thangwi ya pidacita iye. Mwandimomwene, ku Koreya, “Shim Cheong” asaoniwa ninga citsandzo cadidi kwa ana acikazi akuperekeka.

Kwa azinji, manyerezero akuti munthu ninga unoyu anaenda ku djendje ya moto thangwi iye nee akhali Nkristu wakubatizwa asaoniwa ninga akukhonda thema, peno akuipa. Kusiyapo pyenepi, pisaoneka kuti mbiri ineyi yamwazika kale kakamwe mphangwa za Kristu mbazidzati kumwazwa mu cisa cace.

Tsamba ya mphangwa yaphataniza mibvundzo idacitwa ntsogoleri wa uphemberi. Iye abvundzwa khala ale anafa mbakhonda kukhala na mwai wakupfundza pya Yezu, asatongwa kuenda ku djendje ya moto. Iye atawira: “Ife nkhabe kupidziwa. Basi ene tisanyerezera kuti Mulungu ali na cifuniro kwa anthu anewa.”

NDI KWAKUFUNIKA TOERA KUPULUMUKA

Nova Enciclopédia Católica isalonga: “Ubatizo ndi wakufunika toera kupulumuka. Thangwi Kristu alonga kuti munthu anakhonda kubalwa na madzi na nzimu, anacimwana kupita mu Umambo wa Mulungu. (Jwau 3.5).” Natenepa, anango asakhulupira kuti munthu angafa mbadzati kubatizwa asaponywa mu djendje ya moto, peno asathabuswa munjira inango angafa.

Mbwenye azinji asaona kuti pikhulupiro pyenepi mphyakukhonda thema. Pikwi na pikwi pya anthu asafa mbadzati kudziwa Bhibhlya. Kodi iwo athema kuthabuswa kwenda na kwenda? Bhibhlya isalonganji thangwi ya pyenepi?

CIDIKHIRO CIDAPIKIRWA M’BHIBHLYA

Bhibhlya isapangiza pakweca kuti Mulungu nee asatcinyusa anthu thangwi yakukhonda dziwa mitemo yace. Lemba ya Machitiro 17:30 isatipasa cinyindiro: ‘Nthawi zire zikhasowa anthu ndzeru, Mulungu hadazilandza tayu.’ Mphapo ndi cidikhiro cipi ciripo kwa ale adafa mbadzati kudziwa Mulungu?

Ntawiro usagumanika pa mafala adalonga Yezu kuna m’bodzi wa mapanga adafa pabodzi na iye. Mamuna unoyu aphemba Yezu: “Undikumbukire, male ungapita mu Umambo wako.” Kodi Yezu antawira tani? “Andedi, lero ndinakupanga kuti unadzakhala mu Paradizu pabodzi na ine pano.”​—Luka 23:39-43, Tradução do Novo Mundo.

Kodi Yezu akhalonga kuti mamuna unoyu mbadaenda kudzulu? Nkhabe. Mamuna unoyu nee “akhadabalwa papswa” m’madzi na mu nzimu, pyakuti pikhali pinthu pyakutoma toera kupita mu Umambo wakudzulu. (Jwau 3:3-6) Mbuto mwace, Yezu akhapikira kuti phanga unoyu mbadakhala pontho na umaso mu Paradizu. Nakuti akhali Muyuda, mamuna unoyu panango akhadziwa pya Paradizu pa dziko yapantsi—munda wa Edeni unalongwa m’bukhu yakutoma ya Bhibhlya. (Genesi 2:8) Pikiro ya Yezu yampasa cidikhiro cakunyindirika cakulamuswa mu Paradizu ingadzakhazikiswa papswa pa dziko yapantsi.

Mwandimomwene, Bhibhlya isapikira kuti “kunadzaoneka kulamuka muli akufa kwa anthu adidi na kwa akuipambo.” (Machitiro 24:15) ‘Anyakuipa’ ndi ale akuti nee akwanirisa midida yakulungama ya Mulungu thangwi iwo nee akhala na mwai wakudziwa cifuno ca Mulungu. Yezu anadzalamusa mamuna wakuipa adalonga na iye wakuti akhali phanga, kuphatanizambo pikwi na pikwi, panango mabiliyau a anthu anango adafa mbadzati kudziwa Mulungu. Natenepa, mu Paradizu pa dziko yapantsi, iwo anadzapfundziswa pinaphemba Mulungu, pontho anadzakhala na mwai wakupangiza kuti asafuna Mulungu kubulukira mu kubvera matongero ace.

“ANYAKUIPA” ANADZALAMUSWA MULI AKUFA

“Anyakuipa” angadzalamuswa muli akufa, kodi iwo anadzatongwa mwakubverana na macitiro awo akale? Nkhabe. Lemba ya Aroma 6:7 isalonga: “Thangwi munthu adafa apulumuswambo mwa madawo.” “Anyakuipa” anadzalamuswa mbadamala kulipa kale madawo awo mudafa iwo. Natenepa, iwo anadzatongwa mwakubverana na pinafuna iwo kucita angamala kulamuswa muli akufa, tayu pidacita iwo mbadzati kufa mu ndzidzi wakuti nee akhadziwa Mulungu. Kodi anadzaphindula tani?

Pakumala kulamuswa, “anyakuipa” anadzakhala na mwai wakupfundza mitemo ya Mulungu, yakuti inadzaperekwa kubulukira m’mabukhu akuphiphirisa anafuna kudzafungulwa. Natenepa, iwo anadzatongwa ‘mwakubverana na pidacita iwo,’ pyenepi pisabveka kuti, khala iwo abvera mitemo ya Mulungu peno nkhabe. (Apokalipse 20:12, 13, NM) Kwa anyakuipa azinji, unoyu nee unadzakhala mwai waciwiri, mbwenye mwai wakutoma toera kuwina umaso wakukhonda mala pa dziko yapantsi, kubulukira mu kupfundza kucita cifuno ca Mulungu.

Cipfundziso ca Bhibhlya caphedza anthu azinji toera kukhulupira pontho Mulungu. Yeong Sug ndi m’bodzi wa iwo. Nkazi unoyu akuzwa mu uphemberi wa Katolika. Anango mwa acibale ace akhali mapadre. Nakuti akhadikhira kukhala mamere [freira,] aenda kakhala ku mbuto inakhala amamere. Mukupita kwa ndzidzi iye abuluka thangwi atsukwala kakamwe na pikhaona iye kweneku. Pontho iye nee akhatawira cipfundziso ca djendje ya moto, thangwi akhaona kuti kuthabusa anthu mu djendje ya moto nee mbapidakhala pyakulungama na pyaufuni.

Buluka penepo, nkazi unango wakuti ndi m’bodzi wa Mboni za Yahova apangiza Yeong Sug mafala awa a m’Bhibhlya: “Ali maso asadziwa kuti anadzafa; mbwenye anyakufa nkhabe cinadziwa iwo, iwo nkhabebve muoni, thangwi kunyerezera kwawo kwaduwalika.” (Koelete 9:5, NM) Mboni unoyu amphedza toera kudziwa kuti makolo ace nee akuthabuswa mu djendje ya moto. Mbuto mwace, iwo akugona mu citulo ca kufa, mbadikhira kulamuswa muli akufa.

Mu kudziwa kuti anthu azinji nee abva undimomwene wa Bhibhlya, Yeong Sug akhulupira mafala a Yezu anagumanika pa Mateo 24:14: ‘Mphangwa zadidi za Umambo zinadzamwazwa pantsi ponsene, toera mukhale amboni anga pakati pa anthu a mitundu yonsene. Pingamala ipi, inadzabwera nthawi ya kumalisa.’ Lero, iye asamwaza mphangwa zadidi mbalonga kwa anango pya cidikhiro cace cadidi cakubulukira m’Bhibhlya.

“MULUNGU HANAYANG’ANA NKHOPE TAYU”

Bhibhlya isalonga: “Mulungu hanayang’ana nkhope tayu. Mbwenye pa mitundu yonsene Mulungu anakomerwa na ale anangopa mbachita pyadidi.” (Machitiro 10:34, 35) Unoyu ndi ulungami wandimomwene wakuti tonsene tinakwanisa kudikhira kuti Mulungu ‘wakufuna ulinganiri na cilungamo’ anadzaucita kwa ife.​—Masalmo 33:5.