Yezu Acita Mabasa Akudzumatirisa Ku Kafarnau

Yezu acemera anyakupfundza anai—Pedhru, Andreya, Tiyago na Juwau toera kukhala anyakusodza anthu. Natenepa, pa ntsiku ya Sabudu onsene aenda ku Sinagoga ya ku Kafarnau. Yezu apfundzisa mu Sinagoga, natenepa anthu adzumatirwa pontho na njira ineyi yakupfundzisa. Iye acita pyenepi ninga munthu wa cidzo tayu ninga apfundzisi a mwambo.

Pa ntsiku ineyi ya Sabudu, mamuna wakuti akhali na Dimonyo akhalipombo. Mwenemu, mamuna akhuwa mbalonga: ‘Yezu wa ku Nazareti, musafunanji na ife? Mwabwera kudzatifudza? Ine ndisadziwa mwadidi kuti ndimwe Ntumiki Wakucena wa Mulungu!’ Mbwenye Yezu asandika dimonyo ikhathabusa mamuna unoyu, mbalonga: ‘Matama, buluka muna iye!’—Marko 1:24, 25.

Natenepa, nzimu wakuipa wagwisa mamuna unoyu pantsi mbapfukunyuka-pfukunyuka, pontho mbakhuwa kakamwe. Mbwenye Dimonyo yabuluka ‘mbikhonda kum’phekesa.’ (Luka 4:35) Anthu a mu sinagoga adzumatirwa kakamwe! Iwo abvundza: ‘Ninji pyenepi? Iye ali na mphambvu zakubulusa madimonyo, iwo mbambvera.’ (Marko 1:27) Mwakukhonda penula, mphangwa zikhalonga pya cirengo zamwazika ku Galileya konsene.

Pidabuluka Yezu ku sinagoga, iye na anyakupfundzace aenda kunyumba kwa Simau, peno Pedhru. Pidafika iwo kweneko, agumana kuti mebzwala wa Pedhru akhadaferuka kakamwe. Iwo adembetera Yezu toera amphedze. Natenepa Yezu aenda kuna iye mbaphata nkono wace mbamulamusa. Mu ndzidzi ubodzi ene, iye awanga mbapanga Yezu na anyakupfundzace kuti adikhire, panango toera kuaphikira cakudya.

Pikhadoka dzuwa, anthu a mbuto zonsene abweresa atenda panyumba ya Pedhru. Mwakukhonda dembuka, pikhaoneka ninga anthu onsene a mu nzinda akhali panyumba pace. Thangwi yanji? Iwo akhafuna kuwangiswa. Mwandimomwene, ‘ale akhali na atenda akusiyana-siyana aenda nawo kuna Yezu. Pontho iye akhasandzika manjace kuna m’bodzi na m’bodzi, mbaawangisa.’ (Luka 4:40) Inde, Yezu awangisa onsene mwakukhonda tsalakana utenda ukhali na iwo mwakubverana na pikhadalonga Malemba. (Izaiya 53:4) Iye akhakwanisambo kubulusa madimonyo mwa anthu. Mu ndzidzi ukhabuluka mizimu yakuipa, ikakhuwa: ‘Imwe ndimwe Mwana wa Mulungu.’ (Luka 4:41) Mbwenye Yezu aasandika toera akhonde pontho kulonga. Iwo akhadziwa kuti Yezu ndi Kristu, mbwenye Yezu nee akhafuna kuti madimonyo aoneke ninga asatumikira Mulungu wandimomwene.