Pitirizani Na ‘Kubala Misapo Mizinji’

¹ Mukuphatisira mafala aciphipiriso, Yezu alandanisika na muti wandimomwene wa vinyu, Babace ninga Nyakulima na atowereri ace akudzodzwa na nzimu ninga nthawi za miti ya vinyu zakubala misapo. Mu kufokotoza basa ya Nyakulima waciphipiriso, Yezu agomezera kufunika kwa kupitiriza kuphatirira pa muti wa vinyu. (Jwau 15:1-4) Pfunziro ndi yakuti anthu onsene akuti ali na uxamwali wa pantima na Yahova asafunika kukhala ninga nthawi yakubala misapo ya ‘muti wadidi peno wandimomwene,’ Yezu Kristu. Ife tisafunika kupitiriza kubala misapo mizinji ya “nzimu” na misapo ya Umambo.—Agal. 5:22, 23; Mat. 24:14; 28:19, 20.

² Misapo Ya Nzimu: Kuthambaruka kwathu kwauzimu kungakwanise kuoniwa kakamwe na mapangiziro athu misapo ya nzimu. Kodi imwe musawangisira towera kusakulira misapo ya nzimu wa Mulungu mu kupfunza nzidzi onsene na kunyerezera Mafala a Mulungu? (Afil. 1:9-11) Lekani kunyinyirika tayu kuphemba nzimu wakucena, wakuti ungakwanise kukucitisani kukhala na makhaliro akuti asapasa mbiri Yahova na akuti angakwanise kukuphedzani kupitiriza kuthambaruka mwauzimu.—Luka 11:13; Jwau 13:35.

³ Kukulisa misapo ya nzimu kunadzatiphedzambo kukhala atumiki a phinga kakamwe. Mwacitsanzo, kufuna na cikhulupiro pisaticitisa kugula nzidzi pakati pa mabasa athu akuinjipa towera kucita khundu mokhonda phonya mu utumiki. Makhaliro ninga ntendere, kupirira, udidi, kupfulika na kudzitonga asatiphedza towera kucita mwanzeru pa kuyang’anizana na apingizi. Kukomerwa kusaticitisa kugumana citsanzayo mu utumiki ngakhale tingagumana anthu akukhonda funa kubva.

⁴ Misapo Ya Umambo: Ife tisafunikambo kubala misapo ya Umambo. Misapo ineyi isaphataniza kupereka “ntsembe ya kunsimba; iyi ndi nsapo wa [milomo] ya ale anabvekesa mbiri ya dzina ya [Yahova].” (Aheb. 13:15) Ife tisacita pyenepi mu kumwaza mphangwa zadidi mwaphinga na mwakukhonda gopa. Kodi imwe musawangisira towera kubala misapo mizinji ya Umambo mu kuthimizira utumiki wanu?

⁵ Yezu alonga kuti atowereri ace akukhulupirika anadzabala misapo mizinji yakusiyana-siyana. (Mat. 13:23) Natenepa, ife nee tisafunika kulandanisa mabasa athu na mabasa a anango tayu mbwenye tisafunika kucitira Yahova pyonsene pinakwanisa ife. (Agal. 6:4) Kudinga mwakuona ntima makhaliro athu ene mukuphatisira Mafala a Mulungu kunadzatiphedza kupitiriza kupasa mbiri Yahova na ‘kubala misapo mizinji.’—Jwau 15:8.