‘Ndokoni Chitani Anyakupfundza’

1-3. (a) Kodi mulimi asacitanji khala pinthu pidalimwa ndi pizinji kakamwe kwakuti iye nkhabe kwanisa kupigumanyiza ekhene? (b) Kodi ndi nyatwa ipi idatamba Yezu pakutoma kwa nzidzi wa malimwe wa 33 E.C., na iye aimalisa tani?

MULIMI akutamba nyatwa ikulu. Nthanda zingasi ndulimu, iye alima minda yace mbabzwala mbeu. Iye akhayang’ana na citsalakano cikulu mukhabuluka masamba akutoma, na akomerwa mukhakula miti. Cincino basa yace yonsene yaphinga yapaswa nkhombo, thangwi nzidzi wa kubvuna wafika. Mbwenye nyatwa yace ndi iyi: Pinthu pidalimwa ndi pizinji kakamwe kwakuti iye nkhabe kwanisa kupigumanyiza ekhene. Towera kumalisa nyatwa ineyi, mwanzeru iye atonga kuphemba anyabasa angasi mbaatuma ku minda yace. Undimomwene ndi wakuti pali na nzidzi wakucepa basi towera kugumanyiza pinthu pyakufunika pidalima iye.

² Pakutoma kwa nzidzi wa malimwe wa 33 E.C., wakulamuswa Yezu atambambo nyatwa ibodzibodzi. Nkati mwa utumiki wace wa pa dziko yapantsi, iye adzwala mbeu za undimomwene. Uno ndi nzidzi wakubvuna, na pinthu pidalimwa ndi pizinji. Anthu azinji akutawira mphangwa asafunika kugumanywa ninga anyakupfunza. (Jwau 4:35-38) Kodi Yezu amalisa tani nyatwa ineyi? Pa phiri ku Galileya, nzidzi pang’ono mbasati kuenda kudzulu, iye apasa basa anyakupfunzace towera agumane anyabasa azinji, mbalonga: “Ndokoni kuna anthu a madziko onsene mbamuachita anyakupfundza anga. Abatizarini. . . . Apfundziseni kupichita pyonsene pidakupangani ine.”​—Mateo 28:19, 20, MZ.

³ Basa ineyi ndiyo inacitisadi munthu kukhala ntowereri wandimomwene wa Kristu. Natenepa, tendeni tidinge mphapo mabvunzo matatu. Thangwi yanji Yezu apasa basa ineyi anyabasa azinji? Kodi iye apfunzisa tani anyakupfunzace towera agumane anyabasa azinji? Kodi ife taphatanizwa tani m’basa ineyi?

4, 5. Thangwi yanji Yezu nee mbadamalisa basa idatoma iye, na mbani akhafunika kupitiriza na basa pidamala iye kubwerera kudzulu?

⁴ Mudatoma Yezu utumiki wace m’caka 29 E.C., iye akhadziwa kuti ali kutoma basa yakuti nee mbadaimalisa ekha tayu. M’nzidzi wakucepa ukhadansalira pa dziko yapantsi, pakhali pisa pyakucepa na cilengeso cakucepa ca anthu akuti iye mbadakwanisa kuafikira na mphangwa za Umambo. Inde, iye akhamwaza makamaka mphangwa zace kwa Ayuda na adapita m’ciyuda, “ana [peno mabira] akutayika a Israele basi.” (Mateo 15:24) Natenepa, ‘mabira anewa akutayika’ akhagumanika m’Israele onsene, dziko yakukhala na pikwi pya makilometru. Kusiyapo pyenepi, dziko yonsene yapantsi pakumalisira ikhafunika kudziwiswa pya mphangwa zadidi.​—Mateo 13:38; 24:14.

⁵ Yezu akhadziwa kuti basa izinji mbidasala towera icitwe pakumala kufa kwace. Kwa apostolo ace akukhulupirika 11, iye alonga: “Andedi, andedi, ndinakupangani: ananditawira ine, anadzachitambo pinthu pinachita ine pano, ande anadzachitambo pinthu pikulu kupita ipi, thangwi ine ndinenda kuna Baba.” (Jwau 14:12) Nakuti Mwana akabwerera kudzulu, atowereri ace​—tayu basi apostolo mbwenyembo anyakupfunza onsene akutsogolo—​akhafunika kupitiriza na basa ya kumwaza mphangwa na kupfunzisa. (Jwau 17:20) Mwakucepeseka Yezu akhadziwa kuti mabasa awo anadzakhala ‘makulu kupita’ ace. M’njira ipi? M’njira zitatu.

6, 7. (a) Kodi ndi m’njira zipi zakuti mabasa anacitwa na atowereri a Yezu mbadakhala makulu kupita ace? (b) Kodi tinakwanisa tani kupangiza kuti cinyindiro ca Yezu kwa atowereri ace cikhali candimomwene?

⁶ Yakutoma, atowereri a Yezu mbadafika ku pisa pizinji. Lero kupereka kwawo umboni kwafika m’makhundu onsene a dziko yapantsi, kupiringana madziko adamwaza Yezu mphangwa. Yaciwiri, iwo mbadafikira anthu azinji. Nsoka ung’ono wa anyakupfunza udasiya Yezu mokhonda dembuka wakula mbudzakhala pikwi. (Machitiro 2:41; 4:4) Cincino cilengeso cawo ciri m’mamiliyau, na madzana a pikwi a anyakupfunza apswa asabatizwa caka na caka. Yacitatu, iwo mbadamwaza mphangwa m’nzidzi uzinji​—kutomera nzidzi uneule mpaka ntsiku zino, cifupi na piaka 2.000 pyapita Yezu mbadamala kale utumiki wace wa piaka pitatu na hafu.

⁷ Yezu akhapangiza cinyindiro kwa atowereri ace m’nzidzi udalonga iye kuti iwo mbadacita “pinthu pikulu kupita ipi.” Iye aapasa basa yakuti ikhali yakufunika kakamwe kwa iye, basa ya kumwaza mphangwa na kupfunzisa “mphangwa zadidi za dziko [peno umambo] ya Mulungu.” (Luka 4:43) Iye akhali na cinyindiro cakuti iwo mbadacita basa ineyi mwakukhulupirika. Kodi pyenepi pisabvekanji kwa ife lero? Munacita ife utumiki unoyu mwaphinga na ntima onsene, tisapangiza kuti cinyindiro ca Yezu kwa atowereri ace cikhali candimomwene. Kodi unoyu si mwai okhonda landanisika tayu?​—Luka 13:24.

8, 9. Kodi ndi citsanzo cipi cidaikha Yezu m’utumiki, na tinakwanisa tani kusangizira citsanzo cace m’utumiki wathu?

⁸ Yezu apasa anyakupfunzace cipfunziso cadidi kakamwe ca utumiki. Pakutoma, iye aikha citsanzo cadidi kakamwe kwa iwo. (Luka 6:40) M’nsolo wa nduli, talonga pya maonero ace utumiki. Nyerezera pang’ono pya anyakupfunza adaenda na Yezu m’maulendo ace akumwaza mphangwa. Iwo aona kuti iye amwaza mphangwa ku mbuto zonsene zikhagumanika anthu​—nkhundu-khundu mwa nyanza na mapiri, m’mizinda na m’misika, na m’zinyumba zawo. (Mateo 5:1, 2; Luka 5:1-3; 8:1; 19:5, 6) Iwo aona kuti iye akhali nyabasa waphinga, wakuthanga kulamuka mbatumikira mpaka namasiku. Utumiki nee ukhali cibalangazo kwa iye tayu! (Luka 21:37, 38; Jwau 5:17) Mokhonda penula iwo akhadziwa kuti iye akhakulumizwa na kufuna kukulu kakamwe kukakhala na iye kwa anthu. Panango iwo aona nkhope yace mbipangiza ntsisi zikhabva iye m’ntima mwace. (Marko 6:34) Kodi musanyerezera kuti anyakupfunza a Yezu akhala na phindu yanji thangwi ya citsanzo cace? Kodi imwe mbumudakhuyiwa tani?

⁹ Ninga atowereri a Kristu, ife tisasangizira citsanzo cace m’utumiki wathu. Natenepa, tisabanza mwai onsene towera “[kuchita] umboni” wakukwana. (Machitiro 10:42) Ninga Yezu, tisacezera anthu m’zinyumba zawo. (Machitiro 5:42) Pingafunika, tisacinja ndandanda wathu, towera kuacezera m’nzidzi wakuti iwo angakwanise kugumanika panyumba. Pontho tisasaka mwacidikhodikho kumwaza mphangwa kwa anthu m’mbuto zapakweca​—m’miseu, m’maparki, m’maloja, na m’mbuto za basa. Tisapitiriza na “kuphata mabasa athu” m’utumiki, thangwi tisaona utumiki wathu ninga basa yakufunika. (1 Timoti 4:10) Kufuna kukulu kwakubulukira m’ntima kuna ife kwa anango, kusatikulumiza kusaka miyai towera kumwaza mphangwa m’midzidzi yonsene na mbuto zonsene zakuti anthu angakwanise kugumanika.​—1 Atesalonika 2:8.

10-12. Kodi ndi pipfunziso pipi pyakufunika pidapasa Yezu anyakupfunzace mbasati kuatuma kuenda kamwaza mphangwa?

¹⁰ Njira inango idapfunzisa Yezu anyakupfunzace ndi kuapasa pipfunziso pyakuthimizirika. Mbasati kutuma apostolo akutoma 12 na patsogolo pace anyakupfunza 70 towera kamwaza mphangwa, Yezu aagumanya mbaapasa pipfunziso pya basa ya kumwaza mphangwa. (Mateo 10:1-15; Luka 10:1-12) Kupfunzisa kweneku kwakhala na maphindu adidi, thangwi Luka 10:17 isalonga: ‘Makumanomwe abwerera akukomerwa.’ Tendeni tidinge pipfunziso piwiri pyakufunika pidapfunzisa Yezu, mbitinyerezera kuti mafala ace mbadaoniwa ninga akusiyana na makhaliro a makuziro a Ayuda m’midzidzi ya Biblya.

¹¹ Yezu apfunzisa anyakupfunzace kuti anyindire Yahova. Iye aapanga: “Lekani kusaka nee ndalama, nee prata, nee kobiri towera kuziyika mu chikwama [‘ca ncunu,’ NM] mwanu. Lekani kufamba na ntolo, nee na nguwo ziwiri, nee na nsapatu, nee na ndodo, thangwi pa basa ndi pana chakudya cha nyamabasa.” (Mateo 10:9, 10) Pikhali pyakudzoloereka kwa anyakucita ulendo kukwata kobiri m’cikhwama, kukwata budu towera kuikha mikhuce, na nsapatu zinango.a M’kupfunzisa anyakupfunzace kuti akhonde dzudzumika na pinthu pyenepi, mwandimomwene, Yezu akhalonga: “Ikhani cinyindiro canu consene kwa Yahova, thangwi iye anadzatsalakana pyakufuna pyanu.” Yahova mbadaatsalakana m’kucitisa kuti ale akhatawira mphangwa zadidi akhale akutambira alendo, pyakuti pikhali pyakudzoloereka m’Israele.​—Luka 22:35.

¹² Yezu apfunzisambo atowereri ace kuti acalire pidzudzumiso pyokhonda funika. Iye alonga: “Pa njira lekani kumwenyika nee munthu mbodzi tayu.” (Luka 10:4) Nkhubveka kuti Yezu akhaapanga kuti akhonde cita uxamwali peno akhale akusiyana na anango? Nkhabe. M’midzidzi ya Biblya, kumwanyika kazinji kene kukhaphataniza pizinji kusiyapo kumwanyika kwene basi. Mamwanyikiro akudziwika akhaphataniza cilemedzo cakusiyana-siyana na makani akulapha. Nyakudziwa unango wa pya Biblya alonga: “Mamwanyikiro a anthu Akumabulukiro a dzuwa si akulandana na anthu Akumadokero a dzuwa tayu, akugodama pang’ono, peno kuthambiza manja, mbwenye [akhacitwa] na mikhumbatiro mizinji na kukotamisa nsolo, ngakhale kugodama na manungo onsene pantsi. Pyonsene ipi pikhabvunga nzidzi uzinji.” M’kupanga anyakupfunzace kuti akhonde kucita mamwanyikiro acidzoloero, Yezu mwandimomwene akhalonga: “Musafunika kuphatisira nzidzi wanu m’njira yakuthema, thangwi mphangwa zina imwe zisafunika kuperekwa mwakucimbiza.”b

13. Kodi tinakwanisa tani kupangiza kuti tisakoya m’ntima pipfunziso pidapereka Yezu kwa anyakupfunzace a piaka dzana yakutoma?

¹³ Ife tisakoya m’ntima pipfunziso pidapereka Yezu kwa anyakupfunzace a piaka dzana yakutoma. Munacita ife utumiki wathu, tisaikha cinyindiro cathu consene kwa Yahova. (Misangani 3:5, 6) Ife tisadziwa kuti cipo tinadzasowa pyakufuna pyathu pya umaso ‘tingatoma kusaka umambo.’ (Mateo 6:33) Kumwaza mphangwa za Umambo m’nzidzi onsene pa dziko yonsene yapantsi kungakwanise kupangiza kuti ngakhale m’midzidzi ya nyatwa, dzanja ya Yahova cipo inadzabvira. (Masalmo 37:25) Pontho tisadziwa kufunika kwa kucalira pidzudzumiso. Tingakhonda cita mpholemphole, makhaliro ano a pinthu angakwanise kutipeusa mokhonda nensa. (Luka 21:34-36) Natenepa, uno si nzidzi wakudzudzumika na pinthu pya dziko tayu. Nakuti ­umaso wa anthu uli pangobzi, mphangwa zathu zisafunika kuperekwa mwakucimbiza. (Aroma 10:13-15) Kupitiriza kunyerezera kucimbiza kweneku m’mitima yathu kunadzaticitisa kukhonda tawirisa pidzudzumiso pya dziko ino kudya nzidzi na mphambvu yakuti mbidakhala pyadidi kuibvunga m’utumiki. Kumbukani, nzidzi udasala ndi wakucepa na kubvuna ndi kukulu.​—Mateo 9:37, 38.

14. Kodi ndi ninji cinapangiza kuti mafala a Yezu adalembwa pa Mateo 28:18-20 asaphataniza atowereri onsene a Kristu? (Onanimbo cidzindikiro capantsi)

¹⁴ Na mafala akuti ‘Ndokoni chitani anyakupfundza,’ wakulamuswa Yezu apereka kupitawirira kukulu kwa atowereri ace. Iye akhanyerezera anyakupfunza anango azinji kupiringana ale akhali pa ntsiku ineyi ya kutoma kwa nzidzi wa malimwe pa phiri ku Galileya.c Basa idapereka iye isaphataniza kudziwisa “anthu a madziko onsene,” na inapitiriza “mpaka kumala kwa pantsi pano [peno makhaliro a pinthu].” Mwapakweca, basa ineyi isaphataniza atowereri onsene a Kristu, kuphataniza ife lero. Tendeni tidinge mwapaduzi mafala a Yezu adalembwa pa Mateo 28:18-20.

15. Thangwi yanji tinakhala anthu anzeru tingabvera ntemo wa Yezu wakucita anyakupfunza?

¹⁵ Mbasati kupereka basa, Yezu alonga: “Mulungu andipasa mphambvu za kutonga pyonsene kudzulu na pantsi.” (Vesi 18) Kodi Yezu akhalidi na utongi unoyu ukulu? Inde! Iye ndi arkanju, wakutonga pikwi na pikwi pya aanju. (1 Atesalonika 4:16; Apokalipse 12:7) Ninga “nsolo wa anthu a mu igreja [peno mpingo],” iye ali na utongi kwa atowereri ace pa dziko yapantsi. (Aefesi 5:23) Kutomera caka 1914, iye akutonga ninga Mambo Waumesiya kudzulu. (Apokalipse 11:15) Utongi wace usafika ngakhale m’nthumbi, thangwi iye ali na mphambvu ya kulamusa anyakufa. (Jwau 5:26-28) M’kulonga pakutoma pya utongi wace ukulu, Yezu apangiza kuti mafala anagumanika pa vesi 19 na 20 si akupenula tayu mbwenye ndi akutonga. Tinakhala anthu anzeru tingabvera, thangwi utongi wace si wakupasika ekha tayu mbwenye apaswa na Mulungu.​—1 Akorinto 15:27.

16. M’kutipanga kuti “ndokoni,” kodi Yezu akhatitonga kucitanji, na tisakwanirisa tani khundu ineyi ya basa?

¹⁶ Cincino Yezu apangiza basa ineyi, yakuti asaitoma na fala ibodzi: “Ndokoni.” (Vesi 19) Natenepa iye atitonga kuti ­tilamuke towera tikapange anango pya mphangwa za Umambo. ­M’kukwanirisa khundu ineyi ya basa, tingakwanise kuphatisira njira zakusiyana-siyana. Kumwaza mphangwa ku nyumba na nyumba ndi njira yadidi kakamwe towera kugumanikana na anthu. (Machitiro 20:20) Pontho tisasaka miyai towera ­kupereka umboni wantsusukano; tiri akufunisisa kutomesa makani a pya mphangwa zadidi m’mbuto zonsene zakuthema m’makhaliro athu a umaso a ntsiku na ntsiku. Njira zathu zakumwaza mphangwa mokhonda nensa zingakwanise kucinja, mbitizibveranisa na pyakufuna na makhaliro a pa mbuto. Mbwenye cinthu cibodzi cisapitiriza kukhala cibodzi cene: Ife ‘tisaenda’ ­mbitisaka anthu akukwana-kwana peno akufuna kubva.​—Mateo 10:11.

17. Kodi ‘tisachita tani anyakupfunza’?

¹⁷ Buluka penepo Yezu asafokotoza cifuno ca basa ineyi, makamaka towera kuenda “kuna anthu a madziko onsene mbamuachita anyakupfundza.” (Vesi 19) Kodi ‘tisachita tani anyakupfunza’? M’kulonga mokhonda nensa, nyakupfunza ndi ule anapfunza, munthu anapfunziswa. Kucita anyakupfunza, nee pisafunika kupasa basi anango cidziwiso tayu. Munapfunza ife Biblya na anthu akufuna, cifuno cathu ndi cakuaphedza kuti akhale atowereri a Kristu. Pingakwanisika, tisagomezera citsanzo ca Yezu towera anyakupfunza athu apfunze kunnyindira ninga Mpfunzisi na Citsanzo cawo, mbakhala maso ninga iye na kucita basa idacita iye.​—Jwau 13:15.

18. Thangwi yanji ubatizo ndi cakucitika cakufunika kakamwe m’umaso wa nyakupfunza?

¹⁸ Khundu yakufunika ya basa yapangizwa na mafala awa: “Abatizarini na dzina ya Baba na ya Mwana na ya Nzimu wa Mulungu.” (Vesi 19) Ubatizo ndi cakucitika cakufunika kakamwe m’umaso wa nyakupfunza, thangwi iwo ndi cidzindikiro cakuthema ca kuperekeka na ntima onsene kwa Mulungu. Natenepa, iwo ndi wakufunika towera kupulumuswa. (1 Pedro 3:21) Inde, m’kupitiriza kucita pinthu pyadidi m’kutumikira kwace Yahova, nyakupfunza wakubatizwa angakwanise kudikhira nkhombo zokhonda mala m’dziko ipswa inabwera. Kodi imwe mwaphedza kale munthu kukhala nyakupfunza wakubatizwa wa Kristu? M’utumiki Wacikristu, nkhabe cinthu cinango cinabweresa kutsanzaya kukulu kupiringana ceneci.​—3 Jwau 4.

19. Kodi ndi ninji pinapfunzisa ife anyakupfunza apswa, na thangwi yanji kupfunzisa kusafunika kupitiriza pakumala ubatizo wawo?

¹⁹ Yezu afokotoza khundu inango ya basa ineyi, m’kulonga: “Apfundziseni kupichita pyonsene pidakupangani ine.” (Vesi 20) Tisapfunzisa anyakupfunza apswa kubvera mitemo ya Yezu, kuphataniza ntemo wa kufuna Mulungu, kufuna nyakuendekana na kukhala akucita anyakupfunza. (Mateo 22:37-39) Pang’ono na pang’ono tisaapfunzisa towera afokotoze undimomwene wa Biblya na kutsidzikiza cikhulupiro cawo. Munakhala iwo akukhunganyika towera kucita khundu m’basa ya kumwaza mphangwa kwa anthu onsene, tisaphata nawo basa pabodzi, mbitiapfunzisa m’mafala na m’citsanzo kuti anacita tani basa ineyi m’njira yadidi. Kupfunzisa anyakupfunza apswa nee kusamala m’nzidzi wa kubatizwa kwawo tayu. Anthu akumala kwene kubatizwa angafune cipfunziso cakuthimizirika towera ciaphedze kuthimbana na pinenso pinaphataniza kutowerera Kristu.​—Luka 9:23, 24.

20, 21. (a) M’kukwanirisa basa ya Yezu, thangwi yanji nee tisafunika kugopa? (b) Thangwi yanji uno si nzidzi wakubwerera nduli, na tisafunika kukhala akudzitonga kucitanji?

²⁰ Mafala akumalisa a basa ya Yezu ndi akuwangisa kakamwe: “Ine ndinakhala na imwe ntsiku zonsene mpaka kumala kwa pantsi pano!” (Mateo 28:20) Yezu akhadziwa kuti basa ineyi ikhali yakufunika kakamwe. Iye akhadziwambo kuti kukwanirisa basa ineyi m’midzidzi inango mbukudasosa ukali wa apingizi. (Luka 21:12) Mbwenye, nkhabepo thangwi towera kugopa. Ntsogoleri wathu nee asadikhira kuti ticite basa ineyi tekhene peno mwakusowa ciphedzo tayu. Kodi si pyakuwangisa tayu kudziwa kuti Ule wakuti ali na “mphambvu za kutonga pyonsene kudzulu na pantsi” ali na ife towera kutiphedza kukwanirisa basa ineyi?

²¹ Yezu apasa cibaso anyakupfunzace kuti iye mbadadzakhala na iwo m’utumiki wawo m’madzana onsene a piaka mpaka “kumala kwa pantsi pano.” Mpaka nzidzi unafuna mala makhaliro ano a pinthu, tisafunika kupitiriza na basa idatipasa Yezu. Uno si nzidzi wakubwerera nduli tayu. Kubvuna kwauzimu kuli kuenda kutsogolo! Anyakutawira ali kugumanyizwa m’cilengeso cikulu. Ninga atowereri a Kristu, tendeni tikhale akudzitonga kuti tikwanirise basa ineyi yakufunika idapaswa ife. Tendeni tikhale akudzitonga kubvunga nzidzi, mphambvu na mpfuma zathu towera kubvera ntemo wa Kristu: ‘Ndokoni chitani anyakupfundza.’