Muoni Ukulu Kakamwe wa Mulungu​—Thangwi Yanji Ndi Wakufunika?

Miyoni inango isakhala yakufunika kakamwe kwa ife thangwi tapaswa na munthu wacidzo peno wakuti tisamulemedza kakamwe. M’midzidzi inango muoni usakhala ungo’no, mbwenye usakhala wakufunika kakamwe kwa ife thangwi taupaswa na wacibale wathu peno xamwali wathu wapantima. Pyenepi ndi pidacitika na muoni udapaswa Jordan na Russell ninga pidalongwa mu nsolo udamala. Kodi pyenepi pisabverana tani na ciomboli?

Cakutoma, Bhibhlya isalonga kuti ‘Mulungu atuma Mwanace m’bodzi ekha pa dziko toera tigumane umaso kubulukira mwa iye.’ (1 Jwau 4:9) Pyenepi pisacitisa muoni unoyu kukhala wakufunika kakamwe. Nkhabe munthu ali na utongi ukulu kupiringana Mulungu. Mukulonga pya iye, nyamasalmo alemba: “Imwe, dzina yanu ndi Yahova, imwe mwekha ndimwe Wankulu Kakamwe pa dziko yonsene.” (Masalmo 83:18, Tradução do Novo Mundo) Cipo tinapaswa na munthu unango muoni wakufunika kakamwe kupiringana udapaswa ife na Mulungu.

Caciwiri, Mulungu ndi “Baba wathu.” (Izaiya 63:16) Munjira ipi? Ndiye adatipasa umaso. Pontho iye asatitsalakana ninga baba waufuni asatsalakana anace. Thangwi ya atumiki ace anango akale akhacemera Iye Efrayimu, Mulungu abvundza: ‘Efrayimu si mwananga wakufunika tayu? Ntima wanga uli palupalu thangwi ya iye, Ine mbandimbvera ntsisi.’ (Yeremiya 31:20) Mulungu asapibva munjira ibodzi ene thangwi ya alambiri ace lero. Iye nee ndi Nciti wathu wamphambvu zonsene basi tayu, mbwenye ndi Baba na Xamwali wathu wakukhulupirika. Kodi pyenepi nee pisacitisa kuti miyoni inatipasa Iye ikhale yakufunika kakamwe?

Miyoni inango isakhala yakufunika kakamwe kwa ife thangwi ule adatipasa acita pyenepi mwaufuni tayu mwakukakamizwa. Munthu anapasa ndzace muoni mwaufuni, nee asadikhira kubwezerwa cinthu.

Mulungu atipasa Mwanace thangwi asatifuna. Bhibhlya isalonga: ‘Mulungu ationesa kutifuna kwace pa kutitumira Mwanace.’ Thangwi yanji iye acita pyenepi? ‘Toera tigumane umaso kubulukira mwa iye.’ (1 Jwau 4:9) Kodi Mulungu akakamizwa toera kucita pyenepi? Nkhabe! ‘Ciomboli ca Kristu Yezu’ ndi cipangizo ca “nkhombo za Mulungu,” peno udidi wace kwa ife.—Aroma 3:24.

Thangwi yanji tisalonga kuti muoni unoyu wa Mulungu ndi “nkhombo,” peno udidi wace kwa ife? Bhibhlya isalonga: ‘Mulungu apangiza kutifuna kwace, thangwi pa ndzidzi ukhali ife anyakudawa, Kristu atifera.’ (Aroma 5:8) Ufuni ndi udakulumiza Mulungu toera kutiphedza ife anthu akufewa na akusowa ungwiro, mbakhonda kudikhira kubwezerwa cinthu. Ife nee tathema kutambira muoni unoyu, pontho nee tinakwanisa kuubwezera. Muoni unoyu ndi cipangizo cikulu kakamwe ca ufuni mu mbiri yonsene.

Miyoni inango isakhala yakufunika kakamwe thangwi iyo isapangiza kuwangisira kudacita munthu adaupereka. Munthu angatipasa na ntima onsene cinthu cakuti ndi cakufunika kakamwe kwa iye, ife tisakomerwa naco kakamwe thangwi ya kuwangisira kwace.

Mulungu ‘atipasa Mwanace m’bodzi ekha.’ (Jwau 3:16) Pakutoma, iye akhafunika kusankhula munthu toera abwere kudzatiombola. Pyaka pyonsene pikhacita Mulungu kudzulu na pantsi, Yezu aphata basa pabodzi na Babace, pontho “ntsiku zonsene” Babace akhakomerwa naye. (Misangani 8:30) Yezu ndi ‘Mwana wapantima’ wa Mulungu, pontho ndi ‘cithundzi ca Mulungu wakukhonda kuoneka.’ (Akolose 1:13-15) Cipo paoneka uxamwali wa ponda ndipondembo ninga ukhali na Mulungu na mwanace.

Ngakhale tenepo, ‘Mulungu nee awandzira Mwanace.’ (Aroma 8:32) Yahova atipasa Mwanace wakufunika kakamwe. Nkhabepo muoni unango wakufunika kakamwe kupiringana umaso wa Yezu.

Miyoni inango isakhala yakufunika kakamwe thangwi isakuphedzani toera kukwanirisa pifuno pyanu. Mwacitsandzo, nyerezerani kuti imwe musafuna ukondzi wakucimbiza, mbwenye nkhabe kobiri toera kulipa, natenepa, munthu unango aperekeka toera kulipa. Mwakukhonda penula, imwe munapereka takhuta wankulu kakamwe, si tenepo tayu?

‘Sawasawa ninga anthu onsene asafa thangwi ya munthu m’bodzi, anthu anadzakhala na umaso thangwi ya Kristu.’ (1 Akorinto 15:22) Ninga mbeu ya Adhamu, nkhabe anakwanisa kucalira utenda na kufa, thangwi tonsene ‘tisafa.’ Kusiyapo pyenepi, nkhabe anakwanisa kukhala xamwali peno wakutawirika kwa Mulungu mwakusowa ciphedzo cace. Pontho, ninga anthu akusowa ungwiro, ife nkhabe kwanisa kupasika ‘umaso’ peno kuupasa anthu anango. Bhibhlya isalonga: ‘Nkhabe munthu anakwanisa kudziombola, peno kupasa Mulungu ntengo wa umaso wace. Pyonsene pinapasa iye pinakwana tayu.’ (Masalmo 49:7, 8) Natenepa, tisafuna kakamwe ciphedzo thangwi ife nee tinakwanisa kulipa ntengo wa ciomboli. Mulungu mbadatisiya tekhene, ife nee mbitidakhala na cidikhiro.

Yahova asatifuna kakamwe, natenepa iye aperekeka toera kulipa “ukondzi” ukhafuna ife, kuti kubulukira mwa Yezu ‘anthu adzakhale na umaso.’ Kodi ciomboli cakwanirisa tani pyenepi? ‘Ciropa ca Yezu, cisacenesa pyakuipa pyonsene.’ Natenepa tingakhulupira ntsembe ya Yezu tinadzalekererwa madawo athu mbitikhala na cidikhiro ca umaso wakukhonda mala. (1 Jwau 1:7; 5:13) Mphapo, ciomboli cinadzacitanji kwa anyakufunika athu adamala kufa? ‘Thangwi ya munthu m’bodzi kufa kwabwera pantsi pano, thangwimbo ya munthu m’bodzi, Yezu, kulamuka muli akufa kwadzambo.’—1 Akorinto 15:21.a

Nkhabe muoni unango udapaswa ife na munthu wacidzo cikulu, peno wakukulumizwa na ufuni ukulu kupiringana ntsembe ya Yezu. Kusiyapo pyenepi, nkhabe munthu adacita pizinji kwa ife kupiringana Yahova Mulungu. Pontho, kusiyapo ntsembe ya Yezu, nkhabepo muoni unango wakuti unatiphedza kukwanirisa cifuno cathu cikulu ca kusudzulwa ku madawo na kufa. Inde, nkhabe muoni unango wakufunika kakamwe wakuti unapiringana ntsembe ya ciomboli.