Nkhabe Anakwanisa Kuphatira Ambuya Awiri

‘Nkhabe munthu anakwanisa kuphatira basa ambuya awiri . . . Munacimwana kutumikira Mulungu na kobiri pabodzi pene.’​—MAT. 6:24. Mphangwa Zadidi

NDI UPI NTAWIRO WANU?

Kodi midida ya Bhibhlya isatiphedza tani toera kukhala na maonero akulinganira thangwi yakutsalakana banja?

Kodi pisankhulo pyathu pinapangiza tani kuti tisatumikira Yahova basi?

Ndi munjira zipi Yahova asapasa nkhombo pisankhulo pyathu tingamuikha pa mbuto yakutoma?

1-3. (a) Ndi nyatwa zanji za kobiri zinathimbana na anthu azinji lero? (Onani cithundzithundzi cakutoma.) Anango asasaka kumalisa tani nyatwa zenezi? (b) Ninji pinadzudzumisa anyakubala thangwi ya kukuza anawo?

NTSIKU zonsene mamunace Marilyn, James, asabwerera kunyumba wakuneta na basa. Mbwenye asabweresa pinthu pyakucepa kupiringana pinafuna iwo pa ntsiku toera kutsalakana umaso.a Marilyn alonga, “Ndikhafuna kuphedza mamunanga na kugulira mwanathu Jimmy, pinthu pingasi pyadidi pyakuti axamwali ace akuxikola akhali napyo.” Marilyn akhafunambo kuphedza acibaleace na kukoya kobiri toera kuiphatisira kutsogolo. Axamwaliace azinji akhaphata basa ku madziko akunja toera kuwina kobiri yakunjipa. Mbwenye pa ndzidzi ukhafunambo iye kucita pyenepi, akhala na maonero akugawika. Thangwi yanji?

² Pikhali pyakunentsa kwa Marilyn kusiya banjace na ndandanda yawo yauzimu. Mbwenye iye anyerezera, anango akhadenda kaphata basa kutali, pontho mabanja awo akhaoneka ninga akhali mwadidi mwauzimu. Mbwenye iye akhabvundzika kuti mbadakwanisa tani kukuza Jimmy nakutali. Kodi mbadakwanisa kulera mwanace ‘na kumpfundzisa ninga munafunira Yahova’ mu kuphatisira Interneti?​—Aef. 6:4.

³ Marilyn asaka ciphedzo. Mamunace nee akhafuna kuti aende kapata basa kutali, maseze alonga kuti nee mbadankhondesa khala akhafuna kuenda. Akulu a mpingo na anango m’mpingo amphedza kuti nee akhafunika kuenda, mbwenye alongo azinji ankulumiza toera kuenda. Iwo ampanga, “Khala usafuna banjako, ndoko. Iwe unakwanisa kupitiriza kutumikira Yahova.” Maseze akhapenula, Marilyn apangana James na Jimmy mbayenda kaphata basa ku dziko inango. Iye alonga, “nee ndinakhalako pyaka pizinji.”

KUTSALAKANA BANJA NA MIDIDA YA BHIBHLYA

 4. Thangwi yanji anthu azinji asaenda kaphata basa kutali, mphapo kazinji kene mbani anatsalakana anawo?

⁴ Yahova nee asafuna kuti atumiki ace athabuke na utcerengi, pontho kutomera kale kufulukira kudziko inango kusaoniwa ninga ntombwe toera kumalisa utcerengi. (Sal. 37:25; Mis. 30:8) Toera kucalira kufa na njala, kholo Yakobe atuma anace toera kuenda kagula cakudya ku Ejito.b (Gen. 42:1, 2) Lero, azinji anasankhula kuenda kudziko inango nee asacita pyenepi thangwi ya njala. Panango iwo ali na mangawa makulu. Anango basi ene asafuna athimizire makhaliro a umaso wa banja yawo. Toera kukwanirisa pifuno pyawo, anango asamalisira kukhala kutali na anthu a pabanja yawo, kunja peno nkati mwa dziko yawo. Kazinji kene ana ang’ono asasala na baba peno mama, mwanawo wankulu, ambuya awo, acibale anango peno axamwali. Ngakhale kuti pisapha kusiya mamuna peno nkazi na ana, azinji anaenda kaphata basa kutali asaona kuti nkhabebve cakucita.

5, 6. (a) Kodi Yezu apfundzisanji thangwi ya kutsandzaya na citsidzikizo? (b) Kodi Yezu apfundzisa atowereri ace toera kuphemba pinthu pipi pyakumanungo? (c) Ndi mu njira ipi Yahova asatipasa nkhombo?

⁵ Mu ntsiku za Yezu, anthu azinji akhali akutcerenga. Panango mbadanyerezera kuti toera kukhala akutsandzaya na akutsidzikizika basi ene akhafunika kukhala na kobiri izinji. (Mko. 14:7) Mbwenye Yezu nee akhafuna kuti anthu aikhe cinyindiro cawo ku pinthu pyenepi pya ndzidzi wakucepa. Iye akhafuna kuti iwo anyindire Yahova anapasa mpfuma yakukhonda mala. Mu Nkhani yace ya Paphiri, Yezu afokotoza kuti kutsandzaya kwandimomwene na citsidzikizo nee kusanyindira pinthu pyampfuma, peno kuwangisira kwathu, mbwenye kusanyindira uxamwali wathu na Babathu wakudzulu.

⁶ Mu phembero yace yacitsandzo, Yezu nee atipfundzisa toera kuphemba citsidzikizo ca mpfuma, mbwenye pyakufuna pyathu pya ntsiku na ntsiku, ‘cakudya cathu ca lero.’ Iye apanga anyakubvesera ace: “Lekani kugumanya pinthu pyakupfumisa . . . Mbwenye sakani mpfuma ya kudzulu.” (Mat. 6:9, 11, 19, 20) Tisanyindira kuti Yahova anadzatipasa nkhombo ninga mudapikira iye. Nkhombo za Mulungu zisaphataniza pizinji kupiringana uxamwali wathu na iye, iye asatipasa cinyindiro cakuti anadzatipasa pyonsene pyakuti ndi pyakufunikadi kwa ife. Mwandimomwene, njira ibodzi basi toera kugumana kutsandzaya kwandimomwene na citsidzikizo ndi kunyindira Babathu wacitsalakano, tayu kobiri.​—Lerini Mateo 6:24, 25, 31-34.

 7. (a) Kodi Yahova apasa ani basa ya kukuza ana? (b) Thangwi yanji baba na mama asafunika kucita khundu mwakukwana mu umaso wa anawo?

⁷ ‘Kusaka pakutoma cilungamo ca Mulungu’ kusaphataniza kuona basa yakutsalakana banja m’maonero a Yahova. Mwambo wa Mose ukhali na n’dida uyu wakuti usaphatisirwa kwa Akristu: Anyakubala asafunika kupfundzisa anawo pinthu pyauzimu. (Lerini Deuteronomyo 6:6, 7.) Basa yakupfundzisa ana mwauzimu Mulungu aipasa baba na mama ninga anyakubala, tayu ambuya peno munthu unango. Mambo Salomau alonga: “Mwananga, bvesera malangiro a babako mbuleka kupwaza pinakupanga mako.” (Mis. 1:8) Yahova akhafuna kulonga kuti baba na mama asafunika akhale pabodzi pene toera kutsogolera na kupfundzisa anawo. (Mis. 31:10, 27, 28) Kazinji kene ana asapfundza pizinji kubulukira kwa anyakubalawo, makamaka angaabva mbakacedza pya Yahova na kuona citsandzo cawo ca kuntumikira.

PIDIKHIRO NEE PISADZAKWANIRISIKA

8, 9. (a) Ninji pinacitika kazinji kene nyakubala angakhala kutali na banjace? (b) Kodi ndi ngozwi ipi ya makhaliro na mabvero isaoneka kazinji kene anyakubala angakhala kutali na anawo?

⁸ Mbadzati kuenda kaphata basa kudziko inango, azinji asanyerezera pya ngozwi yakucita pyenepi, mbwenye azinji nee asaona mwanyapantsi ngozwi yakukhala kutali na mabanja awo. (Mis. 22:3)c Pidabuluka Marilyn mbaenda kaphata basa kutali, mwakukhonda dembuka atoma kunentseka m’mabvero ace thangwi yakukhala kutali na banjace. Mamunace na mwanace anentsekambo. Mwanawo Jimmy akhapitiriza kubvundza: “Mwandisiyiranji?” Marilyn anyerezera kuti mbadabwerera mu nthanda zingasi, mbwenye adzamala pyaka pizinji, mwakutsukwalisa, akhaona kuti makhaliro a banjace akhadacinja kakamwe. Jimmy akhali na makhaliro akusiyana kakamwe na akhandziwa na iye. Mwakutsukwala iye asakumbuka: “Ufuni wace kwa ine ukhadamala.”

⁹ Khala anyakubala na anawo nee asakhala pabodzi ninga banja, iwo asathabuka m’manyerezero, pontho asathimbana na maonero akuphonyeka.d Ana ang’ono angakhala kutali na anyakubalawo mu ndzidzi uzinji makhaliro asadzanentsa kakamwe. Marilyn akhadapanga Jimmy kuti akhathabukira iye. Mbwenye Jimmy akhaona ninga mai wace akhadanthawa. Pakutoma iye akhatsukwala thangwi yakukhala kwace kutali na mai wace. Mbwenye pidabwera mai wace, nee akhali wakutsandzaya na mai wace. Ninga ana anango anasiyiwa na anyakubalawo, Jimmy akhanyerezera kuti nee akhafunikabve kufuna na kubvera mai wace.​—Lerini Misangani 29:15.

10. (a) Kodi nyakubala angakhala kutali na anace basi ene toera kutumiza miyoni pisakhuya tani ana? (b) Ninji pinacimwanika nyakubala angayesera kukuza anace nakutali?

¹⁰ Maseze Marilyn akhatumiza miyoni na kobiri toera kusasanyira makhaliro a banjace, iye akhaona kuti akhacitisa mwace kukhala kutali na iye, thangwi pyenepi pikhapfundzisa mwanace kuikha pinthu pyampfuma pa mbuto yakutoma mbuto mwa pinthu pyauzimu na uxamwali wa banja. (Mis. 22:6) Jimmy apanga mai wace: “Lekani kubwererabve. Pitirizani kutumiza miyoni.” Marilyn atoma kudzindikira kuti nee mbadakwanisa kukuza mwanace kubulukira mu “kucedza naye mu ntokodzi” kutumiza matsamba, peno kulonga naye mu vidyu ya Interneti. Iye afokotoza: “Kubulukira mu Interneti, nkhabe kwanisika kukhumbatira mwana peno kumpswompswona angafuna kuenda kagona.”

11. (a) Kodi anyakumanga banja angakhala kutali na kutali thangwi ya basa pisakhuya tani banja yawo? (b) Kodi mulongo unango adzindikira tani kuti akhafunika kukhala pabodzi na banjace?

¹¹ Uxamwali wa Marilyn na Yahova pabodzi na mamunace ukhali pangozwi. Basi ene akhaenda ku misonkhano na mu utumiki kabodzi pa sumana peno sumana yamumphu nee kuenda. Iye akhayeserwa na patrau wace toera kucita pyaulukwali. Mwakusowa ndzace wa m’banja toera kuphedzana pangaoneka nyatwa, Marilyn na James adzaphatana uxamwali na anthu anango, natenepa iwo akhali cifupi na kugwa mu ulukwali. Marilyn adzaona kuti maseze iye na mamunace nee acita upombo, kukhala pace na pace nee kukhabverana na citsogolero ca Bhibhlya cakutsalakana mabvero a unango na ndzace, na kukwanirisa pifuno pyawo pyakupita m’mabonde. Nakuti akhali kutali na kutali, iwo nee akhacedza pabodzi pene mbayang’anisana, peno kumwetulirana, kuphatana manja, peno kukhumbatirana, na kulonga ‘mafala akufunana.’ (Nyimbo Ikulo 1:2; 1 Akor. 7:3, 5) Pontho nee akhakwanisa kulambira Yahova pabodzi na mwanawo. Marilyn asakumbuka: “Pidabva ine pa nsonkhano wa gawo kuti kulambira kwa banja kwakukhonda phonya ndi kwafunika toera kupulumuka pa ntsiku ikulu ya Yahova, ndaona kuti ndikhafunika kubwerera kunyumba. Ndikhafunika kutoma papswa umaso wanga wauzimu na banja yanga.”

UPHUNGU WADIDI NA WAKUIPA

12. Ndi uphungu upi wa Bhibhlya wakuti unaphedza ale anakhala kutali na mabanja awo?

¹² Mudanyerezera Marilyn pya kubwerera kunyumba, anango ampasa uphungu wadidi, anango ampasa uphungu wakuipa. Akulu a mpingo a kudziko ikhaphata iye basa ansimba thangwi ya cikhulupiro na cipapo cace. Mbwenye anango akuti akhaphatambo basa kutali na andzawo a m’banja nee ansimba. Mbuto mwakutowezera citsandzo cace cadidi, iwo ayesera kunfewesa manungo. Iwo alonga: “Iwe unabwerera pontho kuno cincino pano. Ungabwerera kunyumba, unakwanisa tani kutsalakana banja yako?” Mbuto mwakulonga mafala anewa akufewesa manungo, Akristu asafunika ‘kupasa uphungu akazi apswa toera kufuna amunawo, kufuna anawo, aphate mabasa panyumba pawo pene toera mafala a Mulungu akhonde kulongwa mwakuipa.’​—Lerini Tito 2:3-5.

13, 14. Thangwi yanji pisaphemba cikhulupiro toera kuikha Yahova patsogolo pa pire pinadikhira acibale? Perekani citsandzo.

¹³ Azinji anasiya mabanja awo mbaenda kaphata basa kutali akula m’makhaliro akuti anthu asalemedza kakamwe miyambo na acibale, makamaka anyakubala, kupiringana pinthu pinango. Nkristu asafunika kukhala na cikhulupiro cakuwanga toera kucita pinthu mwakusiyana na maonero a acibale ace toera kukomeresa Yahova.

¹⁴ Dingani citsandzo ca Carin: “Pidabalwa mwananga Don, ine na mamunanga tikhaphata basa ku dziko yakunja, pontho tikhadatoma kupfundza Bhibhlya. Acibale anga onsene akhadikhira kuti ndinatumiza Don kunyumba toera kukuzwa na anyakubala anga mpaka tingadzakhala na kobiri yakukwana.” Mudapitiriza Carin kulonga kuti mbadakuza ekha mwanace, acibale ace pabodzi na mamunace, akhanseka mbamulonga kuti ndi nyakupolola. Carin afokotoza: “Mwandimomwene, pa ndzidzi unoyu, nee ndikhabvesesa thangwi yanji pikhali pyakuipa kusiya Don na anyakubala anga mu pyaka pingasi. Basa ya kukuza mwanathu, Yahova aipasa ife​—anyakubalace.” Pidakhala iye pontho na mimba inango, mamunace wakuti nee akhali Mboni, amphemba toera kubulusa mimba. Cisankhulo cadidi cidacita Carin pakutoma, cawangisa cikhulupiro cace, mbasankhula kukomeresa Yahova. Lero, iye, mamunace na anawo ali akutsandzaya thangwi yakukhala pabodzi. Carin mbadatumiza mwanace m’bodzi peno awiri ene toera kukuzwa na anango, makhaliro mbadakhala akusiyana kakamwe.

15, 16. (a) Longani citsandzo ca mulongo Vicky pikhakhala iye mwana. (b) Thangwi yanji iye asankhula kucita pinthu mwakusiyana toera kukuza mwanace?

¹⁵ Mulongo unango anacemerwa Vicky alonga: “Mu pyaka pingasi ndikhali na mbuyanga wankazi, mu ndzidzi wakuti anyakubalanga akhali na ng’ono wanga wankazi. Mu ndzidzi udaenda ine kakhala na anyakubalanga, mabvero anga kwa iwo akhadacinja. M’bale wanga akhali wakusudzuka toera kucedza, kukhumbatira na kukhala na uxamwali wapaduzi na iwo. Ndikhabva kuti ndikhali kutali na anyakubalanga, ngakhale mudakula ine, pikhanentsa kuapangiza mabvero anga andimomwene. Ine na m’bale wanga tapasa cinyindiro anyakubala athu kuti tinadzaatsalakana angadzagwesera. Mbwenye ndinadzacita pyenepi ninga basa yanga, mbwenye m’bale wanga anadzaatsalakana mwaufuni.”

¹⁶ Vicky alonga: “Cincino, mai wanga asafuna kuti nditumize mwananga kuna iye ninga mukhadanditumiza iye kuna mai wace. Mbwenye ndakhonda mwandzeru. Ine na mamunanga tisafuna tikuze mwanathu mu njira za Yahova. Pontho nkhabe funa kuikha pangozwi uxamwali wanga na mwananga ntsogolo.” Vicky aona kuti njira ibodzi basi toera kupembera ndi kuikha Yahova na midida yace pa mbuto yakutoma mbuto mwa pifuno pyampfuma na pinadikhira acibale. Yezu alonga pakweca: “Nkhabe munthu anakwanisa kuphatira basa ambuya awiri,” Mulungu na Mpfuma.​—Mat. 6:24, NM; Eks. 23:2.

YAHOVA ASAPASA NKHOMBO KUWANGISIRA KWATHU

17, 18. (a) Kodi Akristu ndzidzi onsene asathimbana na pisankhulo pyanji? (b) Ndi mibvundzo ipi inafuna ife kudinga mu nsolo unafuna kudza?

¹⁷ Babathu, Yahova, apikira kuti tingaikha Umambo wa Mulungu na cilungamo cace pa mbuto yakutoma mu umaso wathu, iye anatiphedza toera kugumana pinthu pyakuti ndi pyakufunika kwa ife. (Mat. 6:33) Natenepa, Akristu andimomwene, ndzidzi onsene ali na pisankhulo. Yahova asapikira ‘kutipasa ndzeru’ zakuti nee zisaphemba kuswa midida ya Bhibhlya, mwakukhonda tsalakana pinentso pinathimbana na ife. (Lerini 1 Akorinto 10:13.) ‘Tingadikhira pinthu pinacita Yahova, mbatiikha umaso wathu m’manja mwace’ mu kuphemba udziwisi, citsogolero, na kutowezera mitemo na midida yace, ‘iye anadzatiphedza.’ (Sal. 37:5, 7) Iye anadzapasa nkhombo kakamwe kuwangisira kwathu toera kutumikira iye basi ninga Mbuya wandimomwene. Tingaikha Yahova pa mbuto yakutoma, iye anadzacitisa kuti mabasa onsene mu umaso wathu ‘afambe mwadidi.’​—Landanisani na Genesi 39:3.

¹⁸ Tinacitanji toera kusasanyira nyatwa idaoneka thangwi ya kukhala pace na pace? Tinacitanji toera kutsalakana umaso wa acibale athu mbatikhonda kukhala kutali na iwo? Tinakwanisa tani kuwangisa anango toera kucita pisankhulo pyadidi mu nkhani ineyi? Nsolo unatowerera unadzatawira mibvundzo ineyi.

[Pidzindikiro pyapantsi]