Thawani Cidima Mbamupitiriza mu Ceza

1-2. (a) Paulu akhali kupi mu ndzidzi udalembera iye tsamba Akristu a ku Efeso? (b) Ndi mibvundzo ipi inafuna ife kutawira mu nsolo uno?

NGAKHALE mu ndzidzi ukhali mpostolo Paulu nkaidi ku Roma, iye acita pyonsene pikhakwanisa iye toera kuwangisa abale ace. Nakuti nee mbadakwanisa kuenda kaaona, iye aalembera matsamba. Ibodzi mwa matsamba anewa yalemberwa Akristu a ku Efeso mu caka 60 peno 61 Pakumala Kubalwa Kwa Kristu.—Aef. 1:1; 4:1.

² Pyaka 10 nduli, mbadzati kualembera tsamba, Paulu akhala pabodzi na abale anewa ku Efeso mbamwaza mphangwa zadidi na kupfundzisa anthu. (Mabasa 19:1, 8-10; 20:20, 21) Iye akhafuna kakamwe abale na alongo anewa, pontho akhafuna kuaphedza toera apitirize kukhala akukhulupirika kuna Yahova. Mphapo thangwi yanji mu tsamba idalemba Paulu alonga pya cidima na ceza? Pontho ife tinapfundzanji na uphungu udapereka iye? Nsolo uno unatawira mibvundzo ineyi.

KUBULUKA NCIDIMA

 3. Ndi mafala api adaphatisira Paulu mu tsamba idalembera iye Akristu a ku Efeso?

³ Paulu alembera Akristu a ku Efeso kuti: “Kale imwe mukhali cidima, mbwenye cincino ndimwe ceza.” (Aef. 5:8) Paulu aphatisira mafala akuti cidima na ceza toera kupangiza kuti Aefesi akhadasiya makhaliro akuipa. Tendeni tione kuti thangwi yanji Paulu alonga kuti Akristu a ku Efeso akhali “cidima.”

 4. Ndi munjira ipi Akristu a ku Efeso akhali ncidima cauzimu?

⁴ Uphemberi wauthambi. Mbadzati kukhala Akristu, abale na alongo a ku Efeso akhakhulupira kakamwe pinthu pyakuphonyeka na pyamizimu. Mu nzinda wa Efeso mukhali na templo ya Artemi, mulungu wankazi Wacigerego, pontho anthu azinji akhaona mbuto ineyi ninga ibodzi mwa mbuto zakubalika kakamwe pa dziko. Anthu akhaenda pa templo ineyi toera kalambira alungu awo. Pontho anthu akhacita madzimunthu a mulungu Artemi na kuagulisa akhawina kobiri izinji. (Mabasa 19:23-27) Kusiyapo pyenepi, nzinda unoyu ukhadziwika na pinthu pyamizimu.—Mabasa 19:19.

 5. Ndi munjira ipi inango Akristu a ku Efeso akhali ncidima?

⁵ Makhaliro aulukwali. Anthu a mu nzinda wa Efeso akhakomerwa kakamwe na makhaliro aulukwali, pontho iwo nee akhali na manyadzo thangwi yakucita pyenepi. Anthu kazinji kene akhacedza makani aulukwali m’mbuto za masendzekero na m’mbuto za uphemberi. (Aef. 5:3) Anthu azinji ku Efeso ‘nee akhakwanisabve kusiyanisa cadidi na cakuipa.’ Mafala anewa asabveka kuti “iwo akhadasiya kubva kupha” muntima angacita pinthu pyakuipa. (Aef. 4:17-19) Thangwi mbadzati kudziwa Yahova na kupfundza kusiyanisa cadidi na cakuipa, pikhali ninga iwo nee akhabva kupha, peno cikumbuntima cawo nee cikhaakhondesa kucita pinthu pyakuipa. Pontho iwo nee akhali napyo basa khala pikhacita iwo pikhatsukwalisa Yahova peno nkhabe. Na thangwi ineyi, Paulu alonga kuti iwo ‘akhali ncidima, pontho akhali kutali na umaso unapereka Mulungu.’

 6. Thangwi yanji Paulu alonga kuti Aefesi ‘cincino ndi ceza’?

⁶ Mwakutsandzayisa, Aefesi anango abuluka ncidima. Paulu alonga kuti ‘cincino iwo ndi ceza thangwi yakuphatana kwawo na Mbuya.’ (Aef. 5:8) Iwo asankhula kucita pinthu mwakubverana na Mafala a Yahova, akuti akhali ninga ceza cikhaatsogolera. (Mas. 119:105) Anthu anewa a ku Efeso asiya pyonsene pya uphemberi wauthambi na makhaliro aulukwali. Iwo atoma ‘kutowezera Mulungu’ mbawangisira toera kulambira Yahova na ntima wawo onsene na kunkomeresae.—Aef. 5:1.

 7. Pinacita Akristu lero pyalandana tani na pikhacita Akristu a ku Efeso?

⁷ Munjira ibodzi ene, mbatidzati kupfundza undimomwene, anango a ife akhali ncidima cauzimu, anango akhakomerwa na makhaliro aulukwali. Anangombo panango akhacita maphwando a uphemberi wauthambi. Mbwenye pidapfundza ife pinalonga Yahova thangwi ya pinthu pyadidi na pyakuipa, tacinja mbatitoma kucita pinthu pinafuna iye. Pyenepi pisatibweresera nkhombo zizinji. (Iza. 48:17) Mbwenye tisafunika kuwangisira toera tipitirize kukhala kutali na cidima cidasiya ife, ‘mbatipitiriza kufamba ninga ana a ceza.’ Mphapo tinacita tani pyenepi?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

BULUKANI NCIDIMA

 8. Mwakubverana na Aefesi 5:3-5, Akristu a ku Efeso akhafunika kucitanji?

⁸ Lerini Aefesi 5:3-5. Toera kukhala kutali na cidima, Akristu a ku Efeso akhafunika kucalira pinthu pikhatsukwalisa Yahova. Pinthu pyenepi nee pikhaphataniza basi ene kucita ulukwali, mbwenye pikhaphatanizambo kucedza pyaulukwali. Paulu akumbusa Akristu a ku Efeso kuti akhafunika kucalira pinthu pyenepi toera akwanise kupita “mu Umambo wa Kristu na wa Mulungu.”

 9. Thangwi yanji tisafunika kucalira pinthu pyonsene pinaphataniza makhaliro aulukwali?

⁹ Ife tisafunikambo kucita mphole-mphole toera tikhonde kucita “mabasa a ncidima akukhonda bala misapo.” (Aef. 5:11) Mwandimomwene munthu angayang’ana pinthu pyaulukwali, angabvesera peno angacedza kazinji kene pinthu pyenepi, pisakhala pyakukhonda nentsa kuna iye toera kucita pinthu pyakuipa. (Gen. 3:6; Tiya. 1:14, 15) Mu dziko inango, abale atoma kucedza pabodzi mu rede social mbakhala “axamwali.” Mwakutsukwalisa, mukupita kwa ndzidzi iwo akhacedza pinthu pyaulukwali. Pidapita ndzidzi ungasi, azinji mwa abale anewa alonga kuti makani akhacedza iwo aacitisa kucita ulukwali.

10. Sathani asayesera tani kutinyengeza? (Aefesi 5:6)

¹⁰ Dziko ya Sathani ndzidzi onsene isayesera kutinyengeza toera kuticitisa kunyerezera kuti pinalonga Yahova kuti ndi pyaulukwali na pyakuipa, nee ndi pyakuipadi. (2 Ped. 2:19) Ife nee tisafunika kudzumatirwa na pyenepi! Thangwi ibodzi mwa njira zinaphatisira Sathani kutomera kale kakamwe toera kupeusa anthu ndi kuafunga manyerezero toera akhonde kwanisa kudzindikira cadidi na cakuipa. (Iza. 5:20; 2 Akor. 4:4) Na thangwi ineyi, mafilimu mazinji, maprogramu a televizau na masaiti asalonga pinthu pyakuti nee pisabverana na mitemo ya Yahova. Sathani asafuna tikhulupire kuti pinthu pyakuipa na pyaulukwali pinacita anthu azinji lero mwandimomwene nee ndi pyakuipa, pontho nee pinatiphekesa.—Lerini Aefesi 5:6.

11. Pidacitikira Angela pisapangiza tani kuti tisafunika kuphatisira uphungu unagumanika pa Aefesi 5:7? (Onanimbo foto.)

¹¹ Sathani asafuna ticite uxamwali na anthu akuti nee anatiphedza toera kucita pinafuna Yahova. Na thangwi ineyi, Paulu acenjeza Akristu a ku Efeso kuti ‘lekani kubvungazikana pabodzi na’ anthu anacita pinthu pyakuipa pamaso pa Mulungu. (Aef. 5:7) Lero, ife tisafunikambo kucita mphole-mphole kakamwe kupiringana Akristu a ku Efeso, thangwi nee tisacedza basi ene na anthu nkhope na nkhope, mbwenye tisacedzambo nawo mukuphatisira maredhi sociais. Angela,a mulongo anakhala ku Azya adzindikira kuti maredhi sociais anakwanisa kukhala akugopswa kakamwe. Iye alonga: “Maredhi sociais akhala ninga nsampha unamanga mwakututumusa. Ine ndafika pakucita uxamwali na anthu akuti nee akhabvera midida ya Bhibhlya. Pakumalisa, ine ndatoma kunyerezera kuti nee ndi pyakuipa kukhala na umaso wakuti nee usakomeresa Yahova.” Mbwenye akulu a mpingo aphedza Angela mwaufuni toera acite macinjo. Iye alonga: “Cincino ndisanyerezera kakamwe pinthu pyauzimu, pontho nee ndisanyerezerabve pinthu piri m’maredhi sociais.”

12. Ninji pinafuna kutiphedza toera tipitirize kubvera mitemo ya Yahova?

¹² Nee tisafunika kunyengezwa na manyerezero a anthu a dziko akuti pinthu pyaulukwali nee ndi pyakuipa. Ife tisadziwa kuti manyerezero anewa ndi authambi. (Aef. 4:19, 20) Na thangwi ineyi, musafunika kubvundzika: ‘Kodi ndisacita mphole-mphole toera ndikhonde kucita uxamwali na andzanga akubasa, akuxikola peno anthu anango akuti nee asalemedza midida ya Yahova? Kodi ndiri na cipapo toera kutsidzikiza midida ya Yahova, maseze anthu anango akhonde kuphedzera pyenepi peno anyerezere kuti ndine wakunentsa?’ Pontho tisafunika kucita mphole-mphole pakusankhula axamwali mu mpingo. (2 Tim. 2:20-22) Tisafunikambo kukumbuka kuti anthu anango mu mpingo panango nee anatiphedza toera tipitirize kukhala akukhulupirika kuna Yahova.

PITIRIZANI KUFAMBA “NINGA ANA A CEZA”

13. Kodi mafala akuti “pitirizani kufamba ninga ana a ceza” asabvekanji? (Aefesi 5:7-9)

¹³ Paulu akulumiza Akristu a ku Efeso toera abuluke ncidima ‘mbapitiriza kufamba ninga ana a ceza.’ (Lerini Aefesi 5:7-9.) Kodi mafala anewa asabvekanji? Mwacigwagwa, mafala anewa asabveka kuti tisafunika kucita pinthu ninga Akristu ndzidzi onsene. Pontho njira ibodzi toera kucita pyenepi ndi kuleri na kupfundza Bhibhlya ndzidzi onsene na ciphedzo ca mabukhu athu. Kusiyapo pyenepi, ndi pyakufunikambo kakamwe kubvesesa citsandzo ca Yezu na pinthu pidapfundzisa iye, thangwi iye ndi “ceza ca dziko.”—Juw. 8:12; Mis. 6:23.

14. Nzimu wakucena unatiphedza tani?

¹⁴ Khala tisafuna kupitiriza kufamba “ninga ana a ceza” tisafunikambo kukhala na ciphedzo ca nzimu wakucena. Thangwi yanji? Thangwi ndi pyakunentsa kakamwe kupitiriza na makhaliro adidi mu dziko ino inakhala ife. (1 Ates. 4:3-5, 7, 8) Nzimu wakucena unatiphedza toera kucalira manyerezero a dziko akuti asaphataniza udziwisi wa anthu na maonero akuti nee asabverana na manyerezero a Yahova. Nzimu wakucena unatiphedzambo toera kucita “ntundu onsene wa udidi, ulungami na undimomwene.”—Aef. 5:9.

15. Ndi pinthu pipi pinango pinafunika ife kucita toera titambire nzimu wakucena? (Aefesi 5:19, 20)

¹⁵ Njira inango toera titambire nzimu wakucena ndi kucita phembero. Yezu alonga kuti Yahova ‘anapasa nzimu wakucena ale anam’phemba.’ (Luka 11:13) Kusiyapo pyenepi, tingasimba Yahova pa misonkhano, tinakwanisambo kutambira nzimu wakucena. (Lerini Aefesi 5:19, 20.) Tingakhala na nzimu wakucena, iwo unatiphedza toera kucita pinthu pinakomeresa Yahova.

16. Ninji pinafuna kutiphedza toera kucita pisankhulo pyadidi? (Aefesi 5:10, 17)

¹⁶ Tingafuna kucita cisankhulo cakufunika kakamwe, tisafunika kubvesesa kuti “ninji pinafuna Yahova,” buluka penepo mbaticita pinthu pyenepi. (Lerini Aefesi 5:10, 17.) Tingagumana midida ya Bhibhlya yakuti isabverana na pinthu pinaticitikira, mwandimomwene tagumana pinthu pinanyerezera Yahova. Natenepa tingaphatisira midida ya Yahova, tinakwanisa kucita pisankhulo pyadidi.

17. Tinaphatisira tani mwadidi kakamwe ndzidzi wathu? (Aefesi 5:15, 16) (Onanimbo foto.)

¹⁷ Paulu apangambo Akristu a ku Efeso toera aphatisire mwadidi ndzidzi wawo. (Lerini Aefesi 5:15, 16.) “Nyakuipa” peno nyamalwa wathu Sathani, asafuna kuti ndzidzi onsene ticite pinthu pya dziko ino mbatikhonda kukhala na ndzidzi wakutumikira Yahova. (1 Juw. 5:19) Natenepa Nkristu angakhonda kucita mphole-mphole anatoma kufuna kakamwe kobiri, kupfundza kakamwe na basa, m’mbuto mwakusaka miyai toera kutumikira Yahova. Pyenepi pingacitika, pinapangiza pakweca kuti iye atoma kunyerezera ninga anthu a dziko. Ndimomwene kuti kobiri, kupfundza na pinthu pinango pyakumanungo nee ndi pyakuipa. Mbwenye pinthu pyenepi nee pisafunika kukhala pa mbuto yakutoma mu umaso wathu. Khala tisafuna kupitiriza kufamba “ninga ana a ceza” tisafunika ‘kuphatisira mwadidi kakamwe ndzidzi wathu,’ mbaticita pinthu pyakufunika kakamwe.

18. M’bale Donald acitanji toera aphatisire mwadidi ndzidzi wace?

¹⁸ Sakani miyai toera kuthimizira utumiki wanu. Ndi pyenepi pidacita m’bale Donald anakhala ku Afrika do Sul. Iye alonga: “Ine ndanyerezera pinthu pikhacita ine mu umaso wanga, buluka penepo ndacita phembero kuna Yahova toera andiphedze kucita pizinji mu utumiki. Pontho ndamphemba toera andiphedze kugumana basa yakuti mbidandipasa ndzidzi toera kumwaza mphangwa. Na ciphedzo ca Yahova, pyenepi pyakwanisika. Buluka penepo, ine na nkazanga tatoma kutumikira m’basa ya ndzidzi onsene.”

19. Tinapitiriza tani kufamba “ninga ana a ceza”?

¹⁹ Tsamba idalembera Paulu Akristu a ku Efeso yaaphedza toera apitirize kukhala akukhulupirika kuna Yahova. Pontho tsamba ineyi inakwanisambo kutiphedza. Mwacitsandzo, iyo inatiphedza toera kusankhula mwadidi axamwali athu na ubalangazi. Iyo isatikulumiza kupfundza Bhibhlya ndzidzi onsene toera ceza ca undimomwene cipitirize kutsogolera umaso wathu. Kusiyapo pyenepi, tsamba ineyi isalonga kufunika kwa nzimu wakucena wakuti usatiphedza toera kukhala na makhaliro adidi. Kuphatisira pidalemba Paulu mu tsamba ineyi kunatiphedza toera kucita pisankhulo pyadidi, pyakuti pisabverana na pinafuna Yahova. Kucita pyenepi kunatiphedza toera kubuluka ncidima ca dziko ino mbatipitiriza mu ceza!