Khalani Mu Ufuni Wa Mulungu

1, 2. Tinagumana kupi mbuto yakuthawira lero?

NYEREZERANI kuti mukufamba mu nseu pa ntsiku ya condzi. Thambo ikupswipa kakamwe. Njazi zikutoma kulira, kudhima kukutomambo, na pakumalisira madzi akubvumba mwamphambvu. Mwakusowa cidikhiro musathamanga toera kusaka pakuthawira. N’khundu mwa nseu musaona khumbi yakuti munathawiramo. Khumbi ineyi ndi yakuwanga, nkhabe thotha, pontho nkati mwace ndi mwadidi kakamwe. Musatsandzaya thangwi yakugumana mbuto ineyi yacitsidzikizo!

² Ife tisakhala m’midzidzi ya condzi ceneci. Makhaliro a dziko akupitiriza kutekera. Mbwenye pana khumbi yacitsidzikizo, yakuti tinakwanisa kuthawiramo toera tikhonde kuphekeswa. Kodi khumbi ineyi ndi ninji? Onani pinapfundzisa Bhibhlya: ‘Ndinakwanisa kulonga kuna Yahova tenepa: Ndimwe pakuthawira panga, na Mulungu wanga anakhulupira ine.’​—Masalmo 91:2.

 3. Tinacitanji toera Yahova akhale pakuthawira pathu?

³ Nyerezerani pyenepi! Yahova, Nciti na Mambo wakudzulu na pantsi, anakwanisa kukhala pakuthawira pathu pakutsidzikizika. Iye anakwanisa kutikoya, thangwi iye ndi wamphambvu kakamwe kupiringana anthu onsene peno pinthu pyonsene pyakuti pinakwanisa kutiphekesa. Ngakhale tingaphekeswa, Yahova anakwanisa kutipolesa. Tinacitanji toera Yahova akhale pakuthawira pathu? Tisafunika kun’nyindira. Pontho, Mafala a Mulungu asatikulumiza: ‘Khalani mu ufuni wa Mulungu.’ (Yuda 21) Inde, tisafunika kukhala mu ufuni wa Mulungu, mbatikoya kufunana kwathu na Babathu wakudzulu. Natenepa, tinakwanisa kukhala na cinyindiro cakuti iye ndi pakuthawira pathu. Kodi tinakhazikisa tani kufunana kweneku?

4, 5. Ndi njira zipi zingasi zinapangiza kuti Yahova asatifuna?

⁴ Toera tikhale mu ufuni wa Mulungu, tisafunika kudziwa kuti Yahova apangiza tani kuti iye asatifuna. Nyerezerani pipfundziso pingasi pya m’Bhibhlya pidapfundza imwe na ciphedzo ca bukhu ino. Ninga Nciti, Yahova atipasa dziko yapantsi ninga mudzi wathu wakutsandzayisa toera kukhalamo. Iye aidzadza na pyakudya pizinji, madzi, pinyama pyakutsandzayisa, mbuto zakubalika na pinthu pinango pyakucitwa. Ninga Nsasanyi wa Bhibhlya, Mulungu atipangiza dzina yace na makhaliro ace. Pontho, Mafalace asapangiza kuti iye atuma Mwanace wakufunika kudza pa dziko yapantsi, mbatawirisa kuti Yezu athabuke na kufa thangwi ya ife. (Jwau 3:16) Kodi muoni unoyu usabvekanji kwa ife? Usatipasa cidikhiro cadidi ca ntsogolo.

⁵ Cidikhiro cathu ca ntsogolo cisanyindirambo cinthu cinango cidacita Mulungu. Yahova akhazikisa utongi wakudzulu, Umambo Waumesiya. Mwakukhonda dembuka unadzamalisa pinentso pyonsene na kucitisa dziko yapantsi kukhala paradizu. Nyerezerani basi! Tinakwanisa kukhala mwenemo kwenda na kwenda mwantendere na mwakutsandzaya. (Masalmo 37:29) Mbwenye cincino, Mulungu asatipasa pitsogolero pyakuti tinakhala tani na umaso wadidi. Iye atipasambo muoni wa phembero, njira yakufunguka yakulonga na iye. Izi ndi zingasi mwa njira zinapangiza Yahova kufuna kwace anthu onsene pabodzi na imwe.

 6. Munabwezera tani ufuni udapangiza Yahova kwa imwe?

⁶ Mbvundzo unafunika imwe kudinga ndi uyu: Kodi ndinabwezera tani ufuni wa Yahova? Azinji anadzalonga: “Ndisafunikambo kufuna Yahova.” Kodi musapibvambo tenepa? Yezu alonga kuti ntemo uyu ndi ukulu kupiringana yonsene: ‘Funa Yahova, Mulungu wako, na ntima wako wonsene, na umaso wako onsene, na ndzeru zako zonsene.’ (Mateo 22:37) Mwandimomwene imwe muna mathangwi mazinji toera kufuna Yahova Mulungu. Kodi kupibva kukhala na ufuni unoyu ndi pyonsene pinaphatanizwa mukufuna Yahova na ntima wanu onsene, umaso na ndzeru?

 7. Kodi kupibva basi kuti musafuna Mulungu mphyakukwana? Fokotozani.

⁷ Mwakubverana na Bhibhlya, kufuna Mulungu ndi pizinji kupiringana kupibva basi kuti musanfuna. Mwandimomwene, maseze kupibva kuti musafuna Yahova ndi kwakufunika, kupibva kweneku ndi kutoma basi kwa kunfuna kwandimomwene. Mwacitsandzo, khala musafuna nsapo, kodi mbumudakomerwa na kupaswa basi mbeu ya nsapo unoyu? Nkhabe! Mbeu ya nsapo basi ene ndi yakufunika toera kukhala na muti wakubala misapo. Munjira ibodzi ene, kupibva kuti musafuna Yahova Mulungu ndi kutoma basi. Bhibhlya isapfundzisa: ‘Kufuna Mulungu ndi kutawira matongero ace. Matongero ace hananentsa tayu.’ (1 Jwau 5:3) Toera kufuna kwanu Mulungu kukhale kwandimomwene, kusafunika kubala misapo yadidi. Kusafunikambo kupangizwa na mabasa.​—Lerini Mateo 7:16-20.

8, 9. Tinapangiza tani ufuni na kupereka takhuta kuna Mulungu?

⁸ Tisapangiza ufuni wathu kwa Mulungu mukubvera matongero ace na kuphatisira midida yace. Pyenepi si pyakunentsa kupicita tayu. M’mbuto mwa kukhala yakunentsa, miyambo ya Yahova yaikhwa toera kutiphedza kukhala na umaso wadidi na wakutsandzayisa. (Izaiya 48:17, 18) Mukuphatisira pitsogolero pya Yahova, tisapangiza Babathu wakudzulu kuti tisaperekadi takhuta thangwi ya pyonsene pinaticitira iye. Mbwenye mphyakutsukwalisa kuti anthu akucepa basi mu dziko ino ndiwo anapereka takhuta. Nee tisafunika kukhala ninga anthu anango adakhala maso mu ndzidzi ukhakhala Yezu pa dziko yapantsi akuti nee apereka takhuta. Yezu awangisa anyamatanya khumi, mbwenye adabwerera kapereka takhuta kwa iye ndi m’bodzi basi. (Luka 17:12-17) Mwandimomwene, tisafuna kukhala ninga m’bodzi adapereka takhuta, tayu ninga apfemba adakhonda pereka takhuta!

⁹ Ndi api mphapo matongero a Yahova anafunika ife kuabvera? Tadinga mazinji m’bukhu ino, mbwenye tendeni tibwerezere mangasi a iwo. Kubvera matongero a Mulungu kunadzatiphedza kukhala mu ufuni wa Mulungu.

10. Fokotozani thangwi yanji ndi kwakufunika kupitiriza kupfundza pya Yahova Mulungu.

¹⁰ Kupfundza pya Yahova ndi thanyo yakufunika toera kunfendedzera. Nee musafunika kulimira kucita pyenepi. Nyerezerani kuti mukuotha moto panja namasiku, mbwenye kukuthondola kakamwe, kodi mbamudasiya moto kuthowa na kuthima? Nkhabe. Imwe mbamudathimizira nkhuni toera upitirize kugaka. Umaso wanu usafunika kukhala ninga moto unoyu! Ninga nkhuni zisacitisa kuti moto ugake, munjira ibodzi ene ‘cidziwiso ca Mulungu’ cisawangisa kufuna kwathu Yahova.​—Misangani 2:1-5.

11. Kodi cipfundziso ca Yezu cakhuya tani atowereri ace?

¹¹ Yezu akhafuna kuti ufuni wa atowereri ace kwa Yahova na Mafalace akufunika a undimomwene upitirize kugaka. Mudamala iye kulamuswa muli akufa, Yezu apfundzisa awiri a anyakupfundzace pya maprofesiya mangasi a Malemba Acihebheri akuti akwanirisika mwa iye. Kodi iwo akhuiwa tani? Patsogolo pace iwo alonga: ‘Simo tayu kuti ife tikhabva kupisa muntima mwathu, pikhalonga iye na ife munjira, mbatitcululira pya m’bukhu ya Mulungu?’​—Luka 24:32.

12, 13. (a) Ndi ninji pinacitika kwa anthu azinji lero thangwi yakufuna Mulungu na Bhibhlya? (b) Tinacita tani toera ufuni wathu ukhonde thowa?

¹² Mudapfundza imwe pakutoma pinapfundzisadi Bhibhlya, kodi mwaona kuti ntima wanu watoma kupisa thangwi yakukomerwa, phinga, na kufuna Mulungu? Inde. Azinji apibva munjira ibodzi ene. Basa yakunentsa cincino ndi kucitisa kuti ufuni unoyu upitirize kukhala wakuwanga, pontho kuti ukule. Ife nkhabe funa kutowerera makhaliro a dziko yalero. Yezu alongeratu: ‘Anthu azinji anadzaneta kufuna Mulungu.’ (Mateo 24:12) Kodi munacita tani kuti ufuni wanu kwa Yahova na undimomwene wa Bhibhlya kukhonde thowa?

¹³ Pitirizani kupfundza pya Yahova Mulungu na Yezu Kristu. (Jwau 17:3) Nyerezerani mwacidikhodikho pinthu pinapfundza imwe m’Mafala a Mulungu, mbamubvundzika: ‘Kodi pyenepi pisandipfundzisanji thangwi ya Yahova Mulungu? Kodi pyenepi pisandipasa mathangwi api anango toera kunfuna na ntima wanga onsene, ndzeru na umaso?’ (Lerini 1 Timoti 4:15.) Kunyerezera kweneku kunadzacitisa kuti ufuni wanu kwa Yahova ukhale wakuwanga.

14. Kodi phembero isatiphedza tani toera ufuni wathu kwa Yahova ukhale wakuwanga?

¹⁴ Njira inango yakucitisa kuti ufuni wathu kwa Yahova ukhale wakuwanga ndi kuphembera mwakukhonda phonya. (1 Atesalonika 5:17) Mu Nsolo 17 wa bukhu ino, tapfundza kuti phembero ndi muoni wakufunika wakubuluka kwa Mulungu. Ninga uxamwali wa anthu usawanga thangwi yakucedza ndzidzi onsene mwakusudzuka, uxamwali wathu na Yahova usakhala wakuwanga munaphembera ife kwa iye mwakukhonda phonya. Mphyakufunika kucalira cita maphembero akubwerezera mafala mabodzi ene akukhonda khala na mabvekero andimomwene. Tisafunika kulonga na Yahova ninga mwana asalonga na baba waufuni. Tisafunika kulonga na cilemedzo, mbwenye mwakusudzuka, mwakuona ntima na mwakubulukira muntima. (Masalmo 62:8) Pfundziro ya Bhibhlya ya munthu paekha na phembero yakubulukira muntima ndi makhundu akufunika kakamwe a ulambiri wathu, na pisatiphedza kukhala mu ufuni wa Mulungu.

15, 16. Thangwi yanji mphyakuthema kuona basa yakumwaza mphangwa za Umambo ninga mwai na mpfuma?

¹⁵ Pfundziro ya Bhibhlya ya munthu paekha na phembero ndi makhundu a ulambiri akuti tinakwanisa kuacita tekhene. Mbwenye tendeni tione cincino khundu inango ya ulambiri yakuti tisaicita pakweca: kulonga na anango pya cikhulupiro cathu. Kodi mwapanga kale anango undimomwene wa m’Bhibhlya? Khala ndi tenepo, mwakomerwa na mwai unoyu wakutsandzayisa. (Luka 1:74) Munapanga ife anango undimomwene udapfundza ife unalonga pya Yahova Mulungu, tisakwanirisa basa yakufunika kakamwe idapaswa Akristu onsene andimomwene yakumwaza mphangwa zadidi za Umambo wa Mulungu.​—Lerini Mateo 24:14; 28:18, 19.

¹⁶ Mpostolo Paulu akhaona utumiki wace kukhala cinthu cakufunika kakamwe, mbaucemera mpfuma. (2 Akorinto 4:7) Kulonga na anthu pya Yahova Mulungu na pifuniro pyace ndi basa yadidi kakamwe yakuti munakwanisa kuicita. Ndi basa yakutumikira Patrau wadidi kakamwe, pontho ndi yakupasa maphindu adidi. Mu ndzidzi unacita imwe basa ineyi, mukuphedza anthu akuona ntima kufendedzera Babathu wakudzulu na kuaphedza toera atome kufamba munjira ya ku umaso wakukhonda mala! Kodi pana basa inango yakutsandzayisa ninga ineyi? Kukhundu inango, kupereka umboni thangwi ya Yahova na Mafalace kusakulisa cikhulupiro canu, pontho kusawangisa ufuni wanu. Yahova asakomerwa na kuwangisira kwanu. (Ahebere 6:10) Kupitiriza kucita basa ineyi mwaphinga kunakuphedzani kukhala mu ufuni wa Mulungu.​—Lerini 1 Akorinto 15:58.

17. Thangwi yanji utumiki Wacikristu ndi wakucimbiza lero?

¹⁷ Mphyadidi kukumbuka kuti basa yakumwaza Mphangwa ndi yakucimbiza. Bhibhlya isalonga: ‘Mwaza mafala a Mulungu, cimbiza kuafokotoza.’ (2 Timoti 4:2) Thangwi yanji kucita pyenepi ndi kwakucimbiza lero? Mafala a Mulungu asatipanga: ‘Ntsiku ya Yahova, iri cifupi kakamwe.’ (Sofoniya 1:14) Inde, ntsiku iri kufika mwakucimbiza toera Yahova adzamalise makhaliro onsene a pinthu. Anthu asafunika kucenjezwa! Iwo asafunika kudziwa kuti uno ndi ndzidzi toera asankhule Yahova ninga Ntongi wawo Wankulu. Kumala ‘kunadzadembuka tayu.’​—Habakuki 2:3, NM.

18. Thangwi yanji tisafunika kulambira Yahova pakweca mukugumanyikana na Akristu andimomwene?

¹⁸ Yahova asafuna kuti timulambire pakweca mukugumanyikana na Akristu andimomwene. Na thangwi ineyi Mafalace asalonga: ‘Tendeni tibalangazane na andzathu toera tifunane, mbaticita pinthu pyadidi pizinji. Lekani kucalira misonkhano yathu, ninga munacitira anango, mbwenye tiwangisane, makamaka pa kuona kuti ntsiku iri dhuzi.’ (Ahebere 10:24, 25) Tingagumanyikana na anyakukhulupira andzathu m’misonkhano Yacikristu, tisakhala na mwai wakutsandzayisa toera kusimba na kulambira Mulungu wathu. Pontho, tisawangisana na kubalangazana unango na ndzace.

19. Tinacitanji toera kuwangisa ufuni m’mpingo Wacikristu?

¹⁹ Munagumanyikana ife na alambiri anango a Yahova, tisawangisa ufuni na uxamwali m’mpingo. Mphyakufunika kuti tisake pinthu pyadidi kwa anango, ninga Yahova asasaka pinthu pyadidi kwa ife. Lekani kudikhira ungwiro kwa anyakukhulupira andzanu. Kumbukani kuti tonsene tiri m’mathanyo akusiyana a kukula mwauzimu, pontho tonsene tisadodoma. (Lerini Akolose 3:13.) Sakani kucita uxamwali na ale anafuna kakamwe Yahova, na munadzaona kuti munakula mwauzimu. Inde, kulambira Yahova pabodzi na abale na alongo anu auzimu kunadzakuphedzani kukhala mu ufuni wa Mulungu. Kodi Yahova asapasa tani nkhombo ale anamulambira mwakukhulupirika mbakhala mu ufuni wace?

20, 21. Ndi ninji ‘umaso wandimomwene’, na thangwi yanji ceneci ndi cidikhiro cakutsandzayisa?

²⁰ Yahova asapasa muoni wa umaso kwa atumiki ace akukhulupirika. Mbwenye umaso wa ntundu wanji? Kodi umaso uli na imwe cincino ndi wandimomwene? Azinji a ife anakwanisa kulonga kuti inde. Ife tisapuma, tisadya na tisamwa. Mwandimomwene tiri maso. Pontho midzidzi inango tingakomerwa, tinakwanisa kulonga: “Uyu ndi umaso wandimomwene!” Mbwenye Bhibhlya isapangiza kuti, mwandimomwene, nee munthu m’bodzi lero ali na umaso wandimomwene.

²¹ Mafala a Mulungu asatikulumiza toera ‘kuphatisisa umaso wandimomwene.’ (1 Timoti 6:19, NM) Mafala anewa asapangiza kuti ‘umaso wandimomwene’ ndi cinthu cinadikhira ife ntsogolo. Tingadzakhala aungwiro, tinadzakhaladi na umaso wandimomwene, thangwi tinadzakhala maso ninga mukhafunira Mulungu pakutoma. Tingadzakhala mu paradizu pa dziko yapantsi na ungumi wadidi, ntendere na kutsandzaya, pakumalisira tinadzakomerwa na ‘umaso wandimomwene’​—umaso wakukhonda mala. (1 Timoti 6:12) Kodi ceneci si cidikhiro cakutsandzayisa tayu?

22. Munakwanisa tani ‘kuphatisisa umaso wandimomwene’?

²² Tinakwanisa tani ‘kuphatisisa umaso wandimomwene’? Na maonero mabodzi ene, Paulu akulumiza Akristu kuti ‘acite pinthu pyadidi’ na ‘apfume na mabasa adidi.’ (1 Timoti 6:18) Natenepa, kazinji kene pisanyindira kuphatisira kwathu undimomwene unapfundza ife m’Bhibhlya. Kodi Paulu akhafuna longa kuti tinawina ‘umaso wandimomwene’ mukucita mabasa adidi? Nkhabe, thangwi cidikhiro ceneci cakutsandzayisa cisanyindiradi kutambira kwathu ‘nkhombo zakukhonda kutithema’ zakubuluka kwa Mulungu. (Aroma 5:15) Natenepa, Yahova asakomerwa kupasa muoni ale anantumikira mwakukhulupirika. Iye asafuna kuti mukhale na ‘umaso wandimomwene.’ Ale anakhala mu ufuni wa Mulungu anadzagumana umaso unoyu wakukhonda mala, wakutsandzayisa na wantendere.

23. Thangwi yanji ndi kwakufunika kukhala mu ufuni wa Mulungu?

²³ Mphyadidi kuti m’bodzi na m’bodzi wa ife abvundzike: ‘Kodi ndiri kulambira Mulungu munjira idaikha iye m’Bhibhlya?’ Tingadingika ntsiku na ntsiku mbitiona kuti tisalambira Mulungu munjira ineyi, tenepa tiri munjira yadidi. Tinakwanisa kukhala na cinyindiro cakuti Yahova ndi pakuthawira pathu. Iye anadzakoya mwadidi mbumba yace yakukhulupirika mu ntsiku zino zakumalisa za nyatwa za makhaliro ano akale a pinthu. Yahova anadzatipulumusambo mbatipitisa m’makhaliro mapswa a pinthu akuti ali cifupi. Tinadzakomerwa kakamwe kukhala mu ndzidzi unoyu! Pontho tinadzakomerwa kakamwe thangwi yakucita pisankhulo pyadidi mu ntsiku zino zakumalisa! Mungacita pisankhulo pyenepi cincino, munadzakomerwa na ‘umaso wandimomwene,’ umaso ukhafuna Yahova Mulungu kuti ukhalepo, kwenda na kwenda!