Towezerani Cikhulupiro Ca Mose

‘Pakukhala wacikhulupiro, Mose, pidakula iye, akhonda kuthulwa mwana wa mwana wacikazi wa Farao.’​—AHEB. 11:24.

KODI CITSANDZO CA MOSE CISATIPFUNDZISANJI THANGWI YA  . . .

kusiyana kwa pinthu pyaunyama na mpfuma yauzimu?

njira inatiphedzera Yahova toera kukwanirisa mabasa Acikristu?

kufunika ‘kuona’ maphindu anafuna ife kutambira ntsogolo?

1, 2. (a) Ndi cisankhulo canji cidacita Mose pikhakhala iye na pyaka 40 pyakubalwa? (Onani cithundzithundzi cakutoma.) (b) Thangwi yanji Mose asankhula kuthabuswa pabodzi na mbumba ya Mulungu?

MOSE akhadziwa udidi wakuti mbadakhala nawo mu Ejito. Iye akhaona nyumba zikulu za anyakupfuma. Iye akhali panyumba ya mambo. ‘Mose apfundziswa ndzeru zonsene za Aejito,’ panango ninga mabasa, kupfundza pyakudzulu ninga nyenyezi, matemática, na mabukhu anango a siyensiya. (Mach. 7:22) Natenepa, iye akhali na mwai wakukhala na upfumi, utongi, na pinango pyakuti Aejito anango mbadapiona ninga ndoto!

² Mbenye pikhali iye na pyaka 40 pyakubalwa, Mose acita cisankhulo cakuti cadzudzumisa onsene pa banja ya mambo idankuza ninga mwanawo. Iye nee asankhula umaso “wadidi” ninga ukhali na Aejito onsene, mbwenye umaso pakati pa mabitcu! Thangwi yanji? Mose akhali na cikhulupiro. (Lerini Ahebere 11:24-26.) Thangwi ya cikhulupiro, Mose akhaona kutali kupiringana pinthu pya n’dziko ikhali iye. Ninga munthu wa maonero auzimu, Mose akhakhulupira ule “anakhonda kuoneka,” Yahova, na kukwanirisika kwa mapikiro a Mulungu.​—Ahebere 11:27.

 3. Ndi mibvundzo ipi mitatu inafuna kudzatawirwa mu nsolo uno?

³ Ifembo tisafunika kuona pizinji kupiringana pinaona ife na maso athu. Tisafunika kukhala ‘anthu a cikhulupiro.’ (Aheb. 10:38, 39) Toera kutiphedza kuwangisa cikhulupiro cathu, tendeni tidinge pidalembwa pa Ahebere 11:24-26 thangwi ya Mose. Munacita ife pyenepi, sakani matawiro a mibvundzo iyi: Kodi cikhulupiro cakulumiza tani Mose toera kukhonda pifuno pyaunyama? Pikhatikanwa iye, kodi cikhulupiro camphedza tani toera kupasa ntengo miyai yace yakutumikira? Thangwi yanji Mose ‘akhayang’ana maphindu anafuna iye kudzabwezerwa’?

IYE AKHONDA PIFUNO PYAUNYAMA

 4. Kodi Mose adzindikiranji thangwi ya ‘maphindu akutsandzayisa a madawo’?

⁴ Na maso acikhulupiro, Mose adzindikira kuti ‘maphindu akutsandzayisa a madawo’ ndi a ndzidzi wakucepa. Panango, anango mbadanyerezera kuti maseze dziko ya Ejito ikhadadzala na ulambiri wa madzimunthu na kukhulupira mizimu, iyo yadzakhala tsinde ya utongi wa dziko yonsene yapantsi, mu ndzidzi wakuti mbumba ya Yahova ikhathabuka ninga mabitcu! Mbwenye Mose akhadziwa kuti Mulungu mbadacinja pinthu. Maseze pinthu pikhaoneka ninga pyakutundusa, Mose akhali na cikhulupiro cakuti dziko yakuipa mbidamala. Ninga maphindu, iye nee anyengererwa na ‘maphindu akutsandzayisa a ndzidzi wakucepa a madawo.’

 5. Ninji pinafuna kutiphedza toera kucalira ‘maphindu akutsandzayisa a ndzidzi wakucepa a madawo’?

⁵ Munakwanisa tani kucalira ‘maphindu akutsandzayisa a ndzidzi wakucepa a madawo’? Cipo, lekani kuduwala kuti tsendzo ya madawo ndi ninga madzi akupita. Na maso a cikhulupiro, onani kuti ‘dziko na pifuno pyayo pikupita.’ (1 Jwau 2:15-17) Nyerezerani pinafuna kudzacitika kwa anyakudawa akuti nkhabe funa tcinyuka. Iwo ali “pa kutherezeka, . . . mbamalisira kufudziwa mwakugopswa!” (Sal. 73:18, 19) Mungayeserwa toera kucita madawo, bvundzikani: ‘Ninji pinafuna kundicitikira ntsogolo?’

 6. (a) Thangwi yanji Mose akhonda ‘kuthulwa mwana wa mwana wacikazi wa Farao’? (b) Thangwi yanji musanyerezera kuti Mose acita cisankhulo cadidi?

⁶ Cikhulupiro ca Mose cakhuyambo maonero ace pakusankhula basa. ‘Pakukhala [wacikhulupiro,] Mose, pidakula iye, akhonda kuthulwa mwana wa mwana wacikazi wa Farao.’ (Aheb. 11:24) Mose nee anyerezera kuti mbadakwanisa kutumikira Mulungu ninga nyabasa wa utongi, mu ndzidzi ubodzi ene mbaphatisira upfumi wace na miyai yace toera kuphedza abaleace, Aisraele. Mbuto mwace, Mose akhadatonga kufuna Yahova na ntima wace onsene, na moyo wace onsene, na mphambvu zace zonsene. (Deut. 6:5) Cisankhulo ca Mose camphedza toera kucalira nyatwa zizinji. Mpfuma zizinji za Ejito zidakhonda iye, mwakukhonda dembuka zadzatapatwa na Aisrale! (Eks. 12:35, 36) Farao adzacepeswa mbafudzwa. (Sal. 136:15) Mwakusiyana, Mose atsidzikizwa na aphatisirwa na Mulungu toera kutsogolera mbumba yonsene ya Aisraele toera kubuluka mwakutsidzikizika. Umaso wace ukhali na cifuniro candimomwene.

 7. (a) Mwakubverana na Mateo 6:19-21, thangwi yanji tisafunika kuyang’ana kutali kupiringana tsogolo ya ndzidzi wakucepa? (b) Longani cakugumana naco cinapangiza kusiyana kwa pinthu pyaunyama na mpfuma yauzimu.

⁷ Khala ndimwe mphale peno ntsikana wakutumikira Yahova, cikhulupiro cinakuphedzani tani toera kusankhula basa? Mphyandzeru kucita masasanyiro a ntsogolo. Kodi cikhulupiro ku mapikiro a Mulungu cinadzakukulumizani toera kugumanya pinthu pya tsogolo ya ndzidzi wakucepa peno ya kwenda na kwenda? (Lerini Mateo 6:19-21.) Nyakubvina wa luso kakamwe anacemerwa Sophie athimbana na mbvundzo unoyu. Iye atambira mwai toera kupfundza mwakukhonda lipa na pidzo pinango pya misoka ya anyakubvina ku Estados Unidos. Iye alonga: “Ndikhakomerwa kakamwe na kusimbwa. Mwandimomwene, ndikhaona kuti ndine wankulu kupita andzanga onsene. Mbwenye nee ndikhali wakutsandzaya.” Buluka penepo, Sophie aona vidyu yakuti, Os Jovens Perguntam—O Que Fazer da Minha Vida? Iye alonga: “Ndadzindikira kuti dziko yandipasa mbiri na kubvekera mbuto mwakulambira Yahova na ntima wanga onsene. Ndacita phembero mwakuwanga kwa iye. Buluka penepo, ndasiya basa yanga yakubvina.” Kodi iye asabva tani thangwi ya cisankhulo cace? “Ine nkhabe kutsumbikika thangwi ya umaso wanga wakale. Lero, ndiri wakutsandzaya kakamwe. Ine na mamunanga ndife apainiya. Nee ndife akubvekera, pontho tiri na pinthu pyakucepa. Mbwenye tiri na Yahova, anyakupfundza a Bhibhlya, na pifuno pyauzimu. Ine nkhabe kutsumbikika.”

 8. Ndi uphungu upi wa Bhibhlya wakuti unaphedza mphale peno ntsikana toera kusankhula kuti anaphatisira tani umaso wace?

⁸ Yahova asadziwa pinthu pyadidi pinafunika kwa imwe. Mose alonga: “Kodi Yahova Mulungu wanu asafunanji kwa imwe? Asafuna kuti mugope Yahova Mulungu wanu, toera kufamba mu njira zace, kunfuna, kutumikira Yahova Mulungu wanu na ntima wanu onsene, na moyo wanu onsene, na kukoya matongero na mitemo ya Yahova inakupasani ine lero toera umaso wanu ufambe mwadidi.” (Deut. 10:12, 13, Tradução do Novo Mundo) Mbumuciri mphale peno ntsikana, sankhulani basa yakuti inakuphedzani kufuna Yahova na kuntumikira “na ntima wanu onsene, na moyo wanu onsene.” Khalani na cinyindiro cakuti pyenepi pinadzaphedza kuti “umaso wanu ufambe mwadidi.”

IYE AKHAPASA NTENGO MIYAI YACE YAKUTUMIKIRA

 9. Fokotozani, thangwi yanji pikhali pyakunentsa kuti Mose akwanirise basa yace.

⁹ Mose akhaona “kuti kunyozeka thangwi ya Kristu kuli ninga mpfuma yakupita upfumi wa mu Ejito.” (Aheb. 11:26) Mose akhadapaswa basa ninga “Kristu” peno “Nyakudzodzwa,” mu njira yakuti akhadasankhulwa na Yahova toera kutsogolera Aisraele toera kubuluka mu Ejito. Mose akhadziwa kuti basa ineyi ikhali yakunentsa, kuphatanizambo kutikanwa peno “kunyozwa.” M’bodzi wa Aisraele akhadampwaza mbalonga: ‘Mbani adakusankhula kuti ukhale ntongi na nyandzeru wathu?’ (Eks. 2:13, 14) Mukupita kwa ndzidzi Mose abvundza Yahova: “Farao anandibvera tani?” (Eks. 6:12) Toera kukhunganyika kuti anathimbana tani na kunyozwa, Mose alonga na Yahova thangwi yakugopa na kudzudzumika kwace. Kodi Yahova aphedza tani Mose toera kukwanirisa basa yace yakunentsa?

10. Kodi Yahova akhunganya tani Mose toera kucita basa yace?

¹⁰ Cakutoma, Yahova apasa Mose cinyindiro: “Ine ndinadzakhala na iwe.” (Eks. 3:12) Caciwiri, Yahova ampasa cinyindiro mu kufokotoza khundu ibodzi ya mabvekero a dzina yace: “Ndinadzapangiza Kukhala Pinafuna Ine Kukhala.”a (Eks. 3:14, NM) Cacitatu, Yahova apasa Mose mphambvu yacirengo idapangiza kuti mwandimomwene akhadatumwa na Mulungu. (Eks. 4:2-5) Cacinai, Yahova asankhula Aroni toera akhale nyakulonga wa Mose, toera kumphedza kucita basa yace. (Eks. 4:14-16) Cifupi na kunkhomo kwa umaso wace, Mose akhali na cinyindiro cakuti Mulungu asakhunganya atumiki Ace toera kukwanirisa basa yonsene inaapasa Iye, natenepa iye alonga na cinyindiro kuna Yoswa wakuti mbadasala pa mbuto yace: “Yahova anadzaenda patsogolo pako mbakhala na iwe; hanadzakusiya tayu. Leka kugopa peno kupswipa ntima.”​—Deut. 31:8, NM.

11. Thangwi yanji Mose apasa ntengo kakamwe basa yace?

¹¹ Na ciphedzo ca Yahova, Mose apasa ntengo kakamwe basa yace yakunentsa, mbaiona ninga yakufunika kakamwe kupiringana ‘mpfuma ya upfumi wa mu Ejito.’ Kusiyapo pyenepi, kuphatira basa Farao kukhali kwakusiyana tani na kutumikira Mulungu Wamphambvu Zonsene? Kodi kukhala mwana wa ntongi wa Ejito kukhali na maphindu anji kupiringana kukhala “Kristu,” peno wakudzodzwa wa Yahova? Mose apaswa nkhombo thangwi ya maonero ace akupereka takhuta. Iye akhala na uxamwali wapantima na Yahova, wakuti wamphedza kupangiza “mphambvu” yakudzumisa mu ndzidzi udatsogolera iye Aisraele toera kuenda ku Dziko Yakupikirwa.​—Deut. 34:10-12.

12. Ndi miyai ipi inatipasa Yahova yakuti tisafunika kuipasa ntengo?

¹² Ifembo tapaswa basa. Kubulukira mwa Mwanace, Yahova atipasa basa ya utumiki, ninga pidacita iye kuna Paulu na anango. (Lerini 1 Timoti 1:12-14.) Tonsene tiri na mwai wakumwaza mphangwa zadidi. (Mat. 24:14; 28:18, 19) Anango ndi atumiki a ndzidzi onsene. Abale akukola mwauzimu asatumikira anango m’mipingo ninga akulu a mpingo na atumiki akutumikira. Ngakhale tenepo, panango acibale anu akukhonda khulupira na anango nee anaona ntengo wa miyai ineyi, ngakhale kukunyozani thangwi ya nzimu wanu wakudzimana. (Mat. 10:34-37) Angakwanisa kukufewesani, panango munatoma kupenula khala basa inacita imwe ndi yakuthema peno khala munakwanisadi kuicita. Kodi pyenepi pingakucitikirani, cikhulupiro cinakuphedzani tani toera kupirira?

13. Kodi Yahova asatiphedza tani toera kukwanirisa mabasa Acikristu?

¹³ Na cikhulupiro, phembani ciphedzo ca Yahova. Longani na iye thangwi ya kugopa kwanu na pinakudzudzumisani. Mwandimomwene, ndi Yahova adakupasani basa ineyi, iye anadzakuphedzani toera kuikwanirisa. Munjira ipi? Munjira ibodzi ene ninga mudaphedzera iye Mose. Cakutoma, Yahova asakupasani cinyindiro: ‘Ndinakuwangisa mbandikuphedza; ndinakubvunulira mbandikupulumusa. Ndinadzakuphata na djanja yanga ya madyo yacilungamo.’ (Iza. 41:10) Caciwiri, iye asakukumbusani kuti mapikiro ace ndi akunyindirika: “Ine ndapilonga, natenepa ndinadzapicita. Ndatonga kupicita, natenepa ndinadzapikwanirisa.” (Iza. 46:11, NM) Cacitatu, Yahova asakupasani ‘mphambvu yakupiringana yacibaliro’ toera kukwanirisa utumiki wanu. (2 Akor. 4:7) Cacinai, toera kukuphedzani kupirira m’basa yanu, Baba wathu wacitsalakano, asakupasani ubale wa dziko yonsene yapantsi wa alambiri andimomwene akuti asapitiriza ‘kubalangazana na kuwangisana unango na ndzace.’ (1 Ates. 5:11) Munakuphedzani Yahova toera kukwanirisa mabasa anu, cikhulupiro canu kwa iye cisathimizirika, pontho munadzapasa ntengo miyai inatambira imwe m’basa yace ninga mpfuma yakufunika kakamwe kupiringana mpfuma yonsene ya dziko.

‘IYE AKHAYANG’ANA MAPHINDU ANAFUNA IYE KUDZABWEZERWA’

14. Thangwi yanji Mose akhali na cinyindiro cakuti mbadapaswa maphindu?

¹⁴ Mose ‘akhayang’ana maphindu anafuna iye kudzabwezerwa.’ (Aheb. 11:26) Inde, Mose atawirisa kuti cidziwiso cace thangwi ya tsogolo citsogolere maonero ace, maseze cidziwiso ceneci cikhali na madire. Ninga kholo yace, Abrahamu, Mose akhanyindira kuti Yahova anakwanisa kulamusa anyakufa. (Luka 20:37, 38; Aheb. 11:17-19) Cidikhiro ca nkhombo za ntsogolo caphedza Mose mu pyaka 40 pidamala iye ninga nyakuthawa na pinango pyakukwana 40 pidamala iye nthando, mbakhonda kuona ninga akhabvunga umaso wace. Maseze nee akhali na mphangwa zonsene zinalonga pya kukwanirisika kwa mapikiro a Mulungu, maso ace acikhulupiro akhakwanisa kuona maphindu akukhonda kuoneka na maso.

15, 16. (a) Thangwi yanji tisafunika kuikha manyerezero athu ku maphindu anafuna kudzatambira ife? (b) Ndi nkhombo zipi zinadikhira imwe kakamwe pantsi pa utongi wa Umambo?

¹⁵ Kodi imwe ‘musayang’ana maphindu anafuna imwe kudzabwezerwa’? Ninga Mose, nee tisadziwa unyomonyomo onsene wa mapikiro a Mulungu. Mwacitsandzo, ife nkhabe dziwa ‘ntsiku na ndzidzi’ unafuna kutoma nyatwa ikulu. (Mko. 13:32, 33) Mbwenye tisadziwa pizinji thangwi ya Paradizu ya ntsogolo kupiringana pikhadziwa Mose. Ngakhale nee tiri na mphangwa zonsene, tiri na mapikiro mazinji a Mulungu analonga pya umaso pantsi pa Umambo wa Mulungu akuti tinakwanisa ‘kuayang’ana’ mwacidikhodikho. Tingaona mwakuphiphirisa nkhombo za dziko ipswa m’manyerezero mwathu, pinatikulumiza toera kuikha Umambo unoyu pa mbuto yakutoma mu umaso wathu. Munjira yanji? Nyerezerani: Kodi imwe mbamudagula nyumba yakuti nee musaidziwa mwadidi? Mwandimomwene nkhabe! Mu njira ibodzi ene, ife nee mbatidabvunga umaso wathu toera kukwanirisa cidikhiro capezi. Na cikhulupiro, tisafunika kuona maphindu a umaso pantsi pa utongi wa Umambo.

¹⁶ Toera kusasanyira maonero anu thangwi ya Umambo wa Mulungu, ‘yeserani kuona’ umaso wanu mu Paradizu. Phatisira manyerezero anu. Mwacitsandzo, munapfundza imwe umaso wa anthu analongwa m’Bhibhlya adakhala maso kale Yezu mbadzati kudza, nyerezerani pinafuna imwe kuabvundza angadzalamuswa. Nyerezerani pinafuna iwo kukubvundzani thangwi ya umaso wanu mu ntsiku zakumalisa. Yeserani kuona kuti munadzakomerwa tani kuonana pontho na makolo anu adamala kufa kale nduli na kuapfundzisa pinthu pyonsene pidacita Mulungu kwa iwo. Nyerezerani kutsandzaya kunafuna kudzakhala na imwe mungadzapfundza pinyama pizinji pya ntsanga mu kupiona mbapikhala mwantendere pa dziko. Nyerezerani kuti munadzabva kuti muli cifupi tani na Yahova mu ndzidzi wakuti mwapang’ono na pang’ono mukukhala waungwiro.

17. Kodi kuona mwanyapantsi maphindu adidi a nkhombo za ntsogolo kusatiphedza tani lero?

¹⁷ Kuona mwanyapantsi nkhombo za maphindu adidi a ntsogolo, kusatiphedza toera kupirira, kukhala akutsandzaya, na kucita pisankhulo mbatidziwa kuti tinadzakhala maso kwenda na kwenda. Paulu alembera Akristu akudzodzwa: “Tingakhulupira pinakhonda ife kuona, tinadikhira na phinga [mwakupirira].” (Arom. 8:25) Pyenepi pisaphata basa kwa Akristu onsene akuti ali na cidikhiro ca umaso wakukhonda mala. Maseze tidzati kutambira maphindu athu, cikhulupiro cathu ndi cakuwanga cakuti cisatiphedza toera kupitiriza kudikhira mwakupirira ‘maphindu anafuna ife kudzatambira.’ Ninga Mose, ife nee tisaona pyaka pinaphatisira ife m’basa ya Yahova ninga tikubvunga ndzidzi wathu. Mbuto mwace, tiri na cinyindiro cakuti ‘pinthu pinaoneka na maso mphya ndzidzi wakucepa, mbwenye pinthu pyakukhonda kuoneka na maso, mphyakukhonda mala.’​—Lerini 2 Akorinto 4:16-18.

18, 19. (a) Thangwi yanji tisafunika kuwangisira toera kupitiriza na cikhulupiro cakuwanga? (b) Tinadzadinganji mu nsolo unafuna kudza?

¹⁸ Cikhulupiro cisatiphedza toera kudzindikira undimomwene wa ‘pinthu pinacimwana ife kuona.’ (Aheb. 11:1) Munthu wa maonero aunyama nkhabe kuona maphindu makulu akutumikira Yahova. Kwa iye, mpfuma yauzimu ‘isaoneka ninga pya upswiru.’ (1 Akor. 2:14) Mbwenye ife tisadikhira kukhala maso kwenda na kwenda na kuona kulamuswa kwa anyakufa, pinthu pyakuti anthu nkhabe kwanisa kupiona lero. Ninga anthu a mu ntsiku za Paulu adancemera ‘khungubwe,’ anthu azinji lero asanyerezera kuti cidikhiro cinamwaza ife ndi upswiru.​—Mach. 17:18.

¹⁹ Nakuti tisakhala mu dziko yakusowa cikhulupiro, tisafunika kuwangisira toera kupitiriza na cikhulupiro cakuwanga. Phembani Yahova toera ‘cikhulupiro canu cikhonde kufewa.’ (Lk. 22:32) Ninga Mose, nyerezerani mwadidi ngozwi ya madawo, nkhombo yakutumikira Yahova, na cidikhiro ca umaso wakukhonda mala. Mbwenye cikhulupiro ca Mose camphedza toera kuona kutali piringana pinthu pyenepi. Mu nsolo unafuna kudza, tinadzadinga kuti cikhulupiro caphedza tani Mose toera kuona ‘Ule anakhonda kuoneka.’​—Aheb. 11:27.

[Cidzindikiro capantsi]