Yahova Asapasa Nkhombo Anthu Anansaka na Ntima Onsene

1, 2. (a) Kodi ufuni na cikhulupiro pisabverana tani? (b) Ndi mibvundzo ipi inafuna kudzadinga ife?

BABATHU Yahova, apikira kupasa nkhombo atumiki ace akukhulupirika. Ineyi ndi njira ibodzi inapangiza Yahova ufuni wace kwa ife, pontho tisanfuna ‘thangwi ndiye adatoma kutifuna.’ (1 Jwau 4:19) Munathimizira ife ufuni wathu kwa Yahova, cikhulupiro cathu kuna iye cisakhala cakuwanga, mbitinyindira na ntima onsene kuti Yahova anadzapasa nkhombo ale ananfuna.—Lerini Ahebere 11:6, NM.

² Yahova asakomerwa na kupasa nkhombo ale anansaka na ntima onsene. Pyenepi pisacita khundu ya umunthu wace. Mbwenye khala tisapenula kuti Yahova anatipasa nkhombo peno nkhabe, tisafunika kuthimizira cikhulupiro cathu. Thangwi yanji? Thangwi ‘cikhulupiro ndi cidikhiro candimomwene ca pinthu pinadikhirwa.’ (Ahebere 11:1) Natenepa, cikhulupiro cisabveka kukhala na cinyindiro cakukwana cakuti Yahova anadzapasa nkhombo atumiki ace akukhulupirika. Mphapo, cidikhiro cakutambira nkhombo cinatiphedza tani? Kodi Yahova apasa tani nkhombo atumiki ace akale na a lero? Tendeni tione.

 3. Ndi pikiro ipi idacita Yahova pa lemba ya Malakiya 3:10?

³ Yahova Mulungu apikira kupasa nkhombo atumiki ace akukhulupirika. Iye asatiphemba toera timpase pinthu pyathu pyadidi mbitinyindira kuti iye anatipasa nkhombo. Yahova alonga: ‘Ndaphata miyendo, ndiyesereni.’ Mbathimiza: ‘Toera muone khala nee ndinadzakufungulirani misuwo yakudzulu na kukupasani nkhombo mpaka kukhonda kuoneka cakusowa.’ (Malakiya 3:10) Ife tinapangiza kuti tisanyindira Yahova mukutawira phembo yace.

 4. Thangwi yanji tinakwanisa kunyindira mafala adalonga Yezu pa Mateo 6:33?

⁴ Yezu apikira anyakupfundzace kuti angaikha Umambo pa mbuto yakutoma, Mulungu mbadaaphedza. (Lerini Mateo 6:33, NM.) Yezu alonga pyenepi thangwi akhadziwa kuti pinalonga Mulungu ndzidzi onsene pisakwanirisika. (Izaiya 55:11) Natenepa, ife tinakwanisambo kunyindira kuti tingakhulupira mwakukwana Yahova, iye anadzakwanirisa pikiro iyi kwa ife: ‘Cipo ndinadzakusiya, nee kukukhonda.’ (Ahebere 13:5) Pikiro ineyi ya Yahova isatiphedza toera kunyindira mafala a Yezu anagumanika pa Mateo 6:33.

 5. Thangwi yanji ntawiro wa Yezu kuna Pedhru ndi wakuwangisa kwa ife?

⁵ Mu ndzidzi unango mpostolo Pedhru abvundza Yezu: ‘Ife tasiya pyonsene mbatikutowerani; tinadzapaswanji?’ (Mateo 19:27) Yezu nee asumula Pedhru thangwi yakucita mbvundzo unoyu. M’mbuto mwace, Yezu apanga anyakupfundzace kuti anadzapaswa nkhombo thangwi ya pinthu pidasiya iwo. Apostolo na Akristu anango akukhulupirika anadzatonga na Yezu kudzulu ntsogolo. Mbwenye Yezu aapangambo kuti ngakhale cincino anapaswa nkhombo: ‘Onsene adasiya nyumba, abale acimuna na acikazi, baba, mai, ana, peno minda thangwi ya dzina yanga, anadzatambira pizinji kupiringana pyenepi na ntsogolo umaso wakukhonda mala.’ (Mateo 19:29) Ife lero mu mpingo tisagumana baba, mai, abale acimuna na acikazi na ana. Mwandimomwene pyenepi ndi pizinji kakamwe kupiringana pyonsene pidasiya ife thangwi ya Umambo wa Mulungu.

 6. Thangwi yani Yahova apikira kupasa nkhombo atumiki ace?

⁶ Yahova apikira kuti anadzapasa nkhombo atumiki ace onsene. Iye acita pyenepi toera kutiphedza kupirira nyatwa zinathimbana na ife lero. Ndimomwene kuti Yahova asatipasa pizinji lero, mbwenye ife tisafuna kakamwe kutambira nkhombo zizinji ntsogolo. (1 Timoti 4:8) Kunyindira mwakukwana kuti Yahova ‘asapasa nkhombo ale anansaka na ntima onsene,’ kusatiphedza toera kupitiriza kukhala akukhulupirika.—Ahebere 11:6.

 7. Kodi cidikhiro calandana tani na nangula?

⁷ Pa Nkhani ya Paphiri, Yezu alonga: ‘Sekerani mbamukomerwa, thangwi muoni wanu ndi ukulu kudzulu. Thangwi iwo atcinga kale aprofeta imwe mbamudzati kukhalapo.’ (Mateo 5:12) Atumiki anango a Mulungu anadzatambira nkhombo toera kakhala kudzulu. Anango anadzatambira umaso wakukhonda mala mu paradhizu pa dziko yapantsi. Ineyi ndi thangwi inango isaticitisa ‘kusekera na kukomerwa.’ (Masalmo 37:10; Luka 18:30) Mwakukhonda tsalakana nkhombo zinafuna kutambira ife, izo ndi ninga ‘nangula ya umaso, yakunyindirika na yakuwanga.’ (Ahebere 6:17-20) Ninga nangula yakuti isatsidzikiza bote toera ikhonde kulobzweka mu ndzidzi wa condzi, cidikhiro cathu cakuwanga cinatiphedza toera tipitirize kukhala akuwanga mu undimomwene mbatipirira nyatwa zinathimbana na ife.

 8. Kodi cidikhiro cathu cisapungula tani kudzudzumika?

⁸ Cidikhiro ku mapikiro a Mulungu ndi ninga ntombwe toera kukhurudza ntima wathu. Kunyerezera cidikhiro ceneci kunakwanisa kupungula kudzudzumika. Mphyakubalangaza kakamwe kudziwa kuti Yahova anatitsalakana tingasiya nyatwa zathu kuna iye. (Masalmo 55:22) Tisanyindira mwakukwana kuti Mulungu ali na mphambvu ‘zakucita pizinji kupiringana pyonsene pidaphemba ife.’ (Aefesi 3:20) Yahova anakwanisa kutiphedza munjira yakuti cipo tikhaidikhira!

 9. Tinakhala tani na cinyindiro cakuti tinadzatambira nkhombo za Yahova?

⁹ Toera kutambira nkhombo, tisafunika kukhala na cikhulupiro cakuwanga kwa Yahova na kubvera pitsogolero pyace. Mose apanga mbumba ya Israeli: ‘Yahova anadzakupasani nkhombo n’dziko idakupasani Yahova Mulungu wanu, toera kukhala, anadzacita pyenepi basi ene mungabvera mafala a Yahova Mulungu wanu na kubvera mwakukwana matongero anakupasani ine lero. Yahova Mulungu wanu anadzakupasani nkhombo ninga mudalongera iye.’ (Deuteronomyo 15:4-6) Kodi musanyindira na ntima onsene kuti Yahova anadzakupasani nkhombo mungapitiriza kuntumikira mwakukhulupirika? Khala ndi tenepo, imwe muli na mathangwi adidi.

10, 11. Kodi Yahova apasa tani nkhombo Zuze?

¹⁰ Bhibhlya yalembwa toera kutiphedza. Iyo iri na pitsandzo pizinji pinapangiza kuti Mulungu apasa tani nkhombo atumiki ace akukhulupirika akale. (Aroma 15:4) Zuze akhali m’bodzi wa iwo. Pakutoma, iye aguliswa na abale ace ninga bitcu. Buluka penepo, nkazi wa patrau apambizira Zuze, mbaikhwa n’kaidi ku Ejito. Kodi Yahova akhadaduwala Zuze pikhali iye n’kaidi? Nkhabe! Bhibhlya isalonga: ‘Yahova apitiriza kukhala na Zuze mbampangiza ufuni wakukhonda mala, pontho Yahova akhali na Zuze mbapasa nkhombo pyonsene pikhacita iye.’ (Genesi 39:21, 23) Maseze athimbana na pinthu pizinji pyakunentsa, Zuze akhadikhira mwakupirira kwa Mulungu wace.

¹¹ Pakupita pyaka pingasi, Farao abulusa Zuze n’kaidi mbankhazikisa ninga ntongi waciwiri mu Ejito. (Genesi 41:1, 37-43) Pidamanga banja Zuze mbabala ana awiri, lemba ya Genesi 41:51, 52 isalonga: ‘Zuze athula mwana wakutoma Manase, thangwi iye alonga, Mulungu andiduwalisa nyatwa zanga zonsene na nyumba yonsene ya babanga.’ Iye athulambo mwana waciwiri dzina yakuti Efrayimu, thangwi iye alonga, ‘Mulungu andipasa ana n’dziko ya nyatwa zanga.’ Yahova apasa nkhombo kukhulupirika kwa Zuze, pontho iye akhali dzololo toera kumalisa njala kwa Aisraeli na Aejito ene. Zuze akhadziwa kuti ndi Yahova adampasa nkhombo.—Genesi 45:5-9.

12. Kodi Yezu apitiriza tani kukhala wakukhulupirika m’mayesero?

¹² Yezu Kristu apitirizambo kubvera Mulungu m’mayesero mazinji, pontho Yahova ampasa nkhombo. Ninji cidaphedza Yezu toera kupitiriza kukhala wakukhulupirika? Bhibhlya isalonga: ‘Thangwi ya kutsandzaya kukhali patsogolo pace iye apirira muti wakusikimiza, mbapwaza manyadzo.’ (Ahebere 12:2) Mwandimomwene Yezu akhali wakutsandzaya kakamwe thangwi yakucenesa dzina ya Mulungu. Mphapo apaswa nkhombo zipi? Yahova akomerwa naye mbampasa miyai mizinji. Bhibhlya isalonga kuti iye ‘akhala ku nkono wa madyo pa mpando waumambo wa Mulungu.’ Kusiyapo pyenepi, ‘Mulungu amuikha pa mbuto yapadzulu, mbampasa dzina yakupiringana madzina onsene.’—Afilipi 2:9.

13, 14. Kodi Yahova asaona tani pinancitira ife?

¹³ Ife tisanyindira kuti Yahova asapasa ntengo pyonsene pinacita ife toera kuntumikira. Iye asadziwa kuti midzidzi inango tisapenula peno tisakhala na cipendamiro cakuti nkhabe kwanisa kucita pyadidi. Panango tisathimbana na makhaliro akunentsa peno tisadzudzumika kuti tinatsalakana tani banja yathu. Mbwenye lekani dzudzumika, Yahova ali na imwe. Kusiyapo pyenepi, khala mukubva kupha peno muli wakutsukwala mbamucimwana kucita pizinji m’basa ya Yahova ninga pikhacita imwe kale, kumbukani kuti iye asadziwa pyenepi. Natenepa, tinakwanisa kukhala na cinyindiro cakuti Yahova asapasa ntengo kukhulupirika kwathu mwakukhonda tsalakana nyatwa zathu.—Lerini Ahebere 6:10, 11.

¹⁴ Pontho kumbukani kuti mungacita phembero ndzidzi onsene kuna Yahova, iye anakubveserani. Thangwi iye ndi ‘Nyakubvesera maphembero.’ (Masalmo 65:2) ‘Baba anabvera ntsisi anthu na Mulungu anabalangaza anthu onsene’ anadzatiphedza toera tipitirize kukhala cifupi na iye. Midzidzi inango iye asaphatisira abale na alongo athu toera kutiphedza. (2 Akorinto 1:3) Yahova asakomerwa tingabvera ntsisi anango. ‘Munthu anaphedza nyakutcerenga akubwerekesa Yahova, iyembo anadzabwezera munthu unoyu pinacita iye.’

15. Ndi nkhombo zipi zisadikhira ife kutambira? (Onani cithundzithundzi cakutoma.)

¹⁵ Akristu akudzodzwa asadikhira kutambira ‘nthimba yakulungama’ yakubuluka kwa Yezu. (2 Timoti 4:7, 8) Mbwenye imwe nee ndimwe akupwazika kwa Mulungu khala musadikhira kukhala pa dziko yapantsi. Pikwi na pikwi pya ‘mabira anango’ a Yezu asadikhira na ntima onsene kutambira umaso wakukhonda mala mu paradhizu pa dziko yapantsi. ‘Iwo anadzakomerwa na ntendere ukulu kakamwe.’—Jwau 10:16; Masalmo 37:10.

16. Kodi lemba ya 1 Jwau 3:19, 20 inatiphedza tani?

¹⁶ Midzidzi inango panango tinaona kuti nee tikucita pizinji m’basa ya Yahova, peno khala Yahova asakomerwadi na pinacita ife. Panango tinanyerezera kuti nee tathema kutambira nkhombo za Yahova. Mbwenye tisafunika kukumbuka kuti ‘Mulungu ndi wankulu kupiringana mitima yathu na asadziwa pinthu pyonsene.’ (Lerini 1 Jwau 3:19, 20.) Tingakhulupira Yahova na kunfuna, tinakwanisa kunyindira kuti anadzatipasa nkhombo, maseze pinacita ife pisaoneka ninga ndi pyakucepa kakamwe.—Marko 12:41-44.

17. Ndi nkhombo zipi zinango ziri na ife lero?

¹⁷ Maseze tikukhala mu ntsiku zakumalisa za makhaliro akuipa a Sathani, Yahova asapasa nkhombo atumiki ace. Iye asacita pyonsene toera tikhale na cidziwiso cakukwana na ntendere thangwi yakucita khundu ya nsoka wa abale pa dziko yonsene. (Izaiya 54:13) Ninga mudalonga Yezu, lero tiri na abale na alongo pa dziko yonsene. (Marko 10:29, 30) Pontho ale anasaka Mulungu na ntima onsene asapaswa nkhombo za ntendere wa m’manyerezero na kutsandzaya.—Afilipi 4:4-7.

18, 19. Kodi atumiki a Yahova asapibva tani thangwi ya nkhombo zinatambira iwo?

¹⁸ Pa dziko yonsene yapantsi, abale na alongo athu asatsandzaya na nkhombo za Yahova. Mwacitsandzo: Bianca wa ku Alemanya alonga: “Ine nkhabe dziwa kuti ndinapereka tani takhuta kuna Yahova. Iye asandiphedza ndingathimbana na nyatwa, pontho ndzidzi onsene asakhala na ine. Pinacitika n’dziko lero ndi pinthu pyakusowa basa. Mbwenye ndingawangisa uxamwali wanga na Yahova, ndisapibva kuti ndiri wakutsidzikizika. Pisakhala ninga Yahova andiphata nkono. Pyonsene pinacita ine kwa iye nkhabe kulandaniswa na nkhombo zinatambira ine.”

¹⁹ Onani pontho citsandzo ca Paula wa pyaka 70 wa ku Kanada, wakuti asathimbana na utenda wakugopswa wa nsana unacemerwa espinha bífida. Iye alonga kuti pisakhala pyakunentsa kucita pinthu pizinji, mbwenye nee pisabveka kuti asiya kumwaza mphangwa. Iye athimiza: “Ndisabandza miyai yonsene toera kupereka umboni mukuphatisira ntokodzi na kupereka umboni wantsusukano. Cinthu cinandiphedza ndi kulemba pa kadhernu mavesi na mphangwa zinango za m’mabukhu athu toera kuzileri ndzidzi unango. Kadhernu unoyu ndisancemera ‘Kadhernu Wanga Wakundipulumusa.’ Kutsukwala kusakhala kwakucepa tingaikha manyerezero ku mapikiro a Yahova. Iye ndzidzi onsene asatiphedza, mwakukhonda tsalakana nyatwa zathu.” Panango makhaliro anu ndi akusiyana kakamwe na Bianca peno Paula. Mbwenye munakwanisa kunyerezera njira inakutsalakanani Yahova na ale anafuna imwe. Kunyerezera nkhombo ziri na ife lero na zinafuna kutambira ife ntsogolo, kunatiphedza kakamwe!

20. Kodi tinadzatambiranji tingapitiriza kucita cifuniro ca Yahova mwakukhulupirika?

²⁰ Lekani kuduwala kucita phembero na ntima onsene kwa Yahova. Nyindirani kuti munadzatambira nkhombo zizinji, mungapitiriza kucita cifuniro ca Mulungu. (Ahebere 10:35, 36) Natenepa, tendeni tipitirize kuwangisa cikhulupiro cathu na kucita pyonsene pinakwanisa ife toera kutumikira Yahova. Mwandimomwene Yahova anadzatipasa nkhombo!—Lerini Akolose 3:23, 24, NM.