Tinapfundzanji na Matsamba Mawiri Adalemba Pedhru?

 1. Pikhali Pedhru cifupi na kufa, Yahova am’phatisira toera kucitanji?

MPOSTOLO Pedhru atumikira Yahova mwakukhulupirika mu pyaka pizinji. Iye amwaza mphangwa pabodzi na Yezu, atomesa basa yakumwaza mphangwa pakati pa anthu akuti nee akhali Ayuda, pontho atumikira ninga m’bodzi wa mathubo akutonga. Pikhali iye dhuzi na kufa, Yahova ampasa mabasa mazinji toera kucita. Cifupi na caka 62-64 Pakumala Kubalwa Kwa Kristu, Yahova am’phatisira toera kulemba matsamba mawiri akuti ndi bukhu ya Pedhru wakutoma na Pedhru waciwiri. Pedhru akhali na cinyindiro cakuti matsamba anewa mbadaphedza Akristu iye angafa.—2 Ped. 1:12-15.

 2. Thangwi yanji matsamba adalemba Pedhru ndi akufunika kakamwe?

² Pedhru alemba matsamba ace mu ndzidzi wakuti abale na alongo ace akhathimbana na “pinentso pyakusiyana-siyana.” (1 Ped. 1:6) Anthu akuipa atoma kupfundzisa pinthu pyauthambi na makhaliro akuipa mu mpingo Wacikristu. (2 Ped. 2:1, 2, 14) Akristu akhakhala mu Yerusalemu mwakukhonda dembuka mbadaona “kumala kwa pinthu pyonsene.” Pyenepi pisabveka kuti anyankhondo Aciroma mbadafudza nzinda unoyu na templo. (1 Ped. 4:7) Mwakukhonda penula matsamba anewa aphedza Akristu toera kudziwa kuti mbadapitiriza tani kukhala akukhulupirika mwakukhonda tsalakana pinentso pikhali na iwo, pontho mbadakhunganyika tani toera kupirira pinentso pya ntsogolo.b

 3. Thangwi yanji tisafunika kupfundza matsamba adalemba Pedhru?

³ Maseze Pedhru alembera matsamba anewa Akristu a mu ndzidzi wace, Yahova acitisa kuti matsamba anewa agumanikembo m’Bhibhlya. Natenepa ife tinakwanisambo kuphedzeka na matsamba anewa. (Aroma 15:4) Nakuti tikukhala mu dziko yakuti isakulumiza anthu toera kucita pinthu pyakuipa, tisathimbana na pinentso pyakuti pisaticitisa kukhala pyakunentsa toera kutumikira Yahova. Kusiyapo pyenepi, mwakukhonda dembuka tinathimbana na nyatwa ikulu kupiringana nyatwa idacitisa kuti nzinda wa Yerusalemu na templo ifudzwe. Ife tisagumana mphangwa zakufunika kakamwe m’matsamba mawiri adalemba Pedhru. Mphangwa zenezi zinatiphedza toera kupitiriza kudikhira ntsiku ya Yahova, kukhonda kugopa anthu na kufuna kakamwe abale na alongo athu. Mphangwa zenezi zinaphedzambo akulu a mpingo toera kuona kuti anatsalakana tani abale na alongo mu mpingo toera akhale na cikhulupiro cakuwanga.

 4. Mwakubverana na 2 Pedhru 3:3, 4, ndi pinthu pipi pyakuti pinafewesa cikhulupiro cathu?

⁴ Mu dziko ino ife tisakhala na anthu akuti nee asakhulupira pinalonga Bhibhlya thangwi ya ntsogolo. Anyakutcinga panango anatisingirira thangwi kutomera kale kakamwe tisalonga kuti dziko inamala. Anthu anango asalonga kuti dziko cipo inamala. (Lerini 2 Pedhru 3:3, 4.) Tingabva mafala anewa na anthu anamwazira ife mphangwa, andzathu akubasa, peno acibale athu panango cikhulupiro cathu cinafewa. Mbwenye Pedhru alonga kuti ninji pinafuna kutiphedza.

 5. Ninji pinafuna kutiphedza toera kupitiriza kukhala na maonero adidi mu ndzidzi unadikhira ife kumala kwa dziko ino? (2 Pedhru 3:8, 9)

⁵ Kuna anango panango pinaoneka ninga Yahova akudembuka toera kumalisa dziko ino yakuipa. Mafala a Pedhru anatiphedza thangwi iwo asatikumbusa kuti njira inaona Yahova ndzidzi ndi yakusiyana kakamwe na inaona anthu. (Lerini 2 Pedhru 3:8, 9.) Kuna Yahova, pyaka cikwi ndi ninga ntsiku ibodzi. Yahova ndi wakupirira, pontho nkhabe funa kuti anthu afudzwe. Mbwenye ntsiku yace ingafika, dziko ino inafudzwa. Ndi mwai ukulu kakamwe kuna ife kuphatisira ndzidzi udasala toera kumwazira mphangwa anthu pa dziko yonsene yapantsi.

 6. Tinapitiriza tani ‘kukumbuka’ ntsiku ya Yahova? (2 Pedhru 3:11, 12)

⁶ Pedhru aticenjeza toera ‘tikumbuke’ kubwera kwa ntsiku ya Yahova. (Lerini 2 Pedhru 3:11, 12.) Tinacita tani pyenepi? Ntsiku zonsene, ife tinakwanisa kunyerezera kuti umaso unadzakhala wadidi kakamwe mu dziko ipswa. Nyerezerani kuti muli kupuma muya wadidi kakamwe, muli kudya cakudya cadidi, mukutambira anthu analamuswa muli akufa, pontho mukupfundzisa anthu adakhala m’maso pyaka pizinji nduli kukwanirisika kwa maprofesiya a Bhibhlya. Kunyerezera pyenepi kunakuphedzani toera kupitiriza kudikhira, pontho toera kukhala na cinyindiro cakuti ife tikukhala mu ntsiku zakumalisa. Tingadziwa “pinthu pyenepi mwanyapantsi,” nee ‘tinapeuswa’ na apfundzisi authambi.—2 Ped. 3:17.

 7. Kugopa anthu kunatikhuya tani?

⁷ Nakuti tisadziwa kuti ntsiku ya Yahova iri dhuzi, tisafunika kucita pyonsene pinakwanisa ife toera kumwaza mphangwa zadidi kuna anango. Mbwenye midzidzi inango panango ife tinagopa kucita pyenepi. Thangwi yanji? Thangwi panango tinagopa pinthu pinanyerezera anthu peno pinacita iwo. Pyenepi pyacitikambo kuna Pedhru. Ntsiku idamangwa Yezu namasiku, Pedhru agopa kulonga kuti akhali m’bodzi wa anyakupfundza a Yezu, pontho an’khonda katatu. (Mat. 26:69-75) Mbwenye Pedhru asiya kugopa anthu, pontho mukupita kwa ndzidzi iye alemba kuti: “Lekani kugopa pinagopa iwo, pontho lekani kudzudzumika.” (1 Ped. 3:14) Mafala anewa a Pedhru asatipasa cinyindiro cakuti ife tinakwanisa kusiya kugopa anthu.

 8. Ninji pinafuna kutiphedza toera tisiye kugopa anthu? (1 Pedhru 3:15)

⁸ Ninji cinafuna kukuphedzani toera kusiya kugopa anthu? Pedhru alonga: “Lemedzani Kristu ninga Mbuya m’mitima yanu.” (Lerini 1 Pedhru 3:15.) Pyenepi pisaphataniza kunyerezera cidzo na mphambvu iri na Kristu Yezu ninga Mbuya wathu na Mambo wathu. Natenepa mungagopa mu ndzidzi unakhala imwe na mwai wakumwaza mphangwa zadidi kuna anango, kumbukani Mambo wathu. Kumbukani kuti iye akutonga kudzulu, pontho azungulirwa na aanju azinji kakamwe. Kumbukani kuti iye apaswa “mphambvu zonsene kudzulu na pa dziko yapantsi . . . pontho kuti iye ali “na imwe ntsiku zonsene mpaka kumala kwa makhaliro a dziko.” (Mat. 28:18-20) Pedhru alonga kuti tisafunika kukhala “akukhunganyika ndzidzi onsene” toera tikwanise kutsidzikiza cikhulupiro cathu. Kodi imwe musafuna kumwaza mphangwa kubasa, kuxikola peno ku mbuto inango? Nyerezerani mwanyapantsi ndzidzi unafuna imwe kucita pyenepi, buluka penepo nyerezerani pinafuna imwe kulonga. Citani phembero toera mukhale acipapo, pontho nyindirani kuti Yahova anakuphedzani toera musiye kugopa anthu.—Mabasa 4:29.

 9. Ntsiku inango, Pedhru acimwana tani kupangiza ufuni? (Onanimbo foto.)

⁹ Pedhru apfundza kuti anakwanisa tani kupangiza ufuni. Iye akhali na anthu mu ndzidzi udalonga Yezu kuti: “Ine ndinakupasani matongero mapswa kuti: Funanani unango na ndzace; ninga mudakufunani ine, imwembo mufunane unango na ndzace.” (Juw. 13:34) Maseze Pedhru abva mafala anewa, mukupita kwa ndzidzi iye akhonda kudya na abale na alongo ace akuti nee akhali Ayuda thangwi yakugopa Akristu Aciyuda. Mpostolo Paulu alonga kuti Pedhru acita pinthu “mwaciphamaso” peno mwaumpfakafaka. (Agal. 2:11-14) Pedhru atawira kusandikwa kweneku, pontho apfundza pinthu. M’matsamba mawiri adalemba iye, iye alonga kuti nee tisafunika basi ene kufuna abale na alongo athu, mbwenye tisafunikambo kupangiza ufuni unoyu.

10. Ninji pinafuna kutiphedza toera kupangiza “kuna abale ufuni wakusowa umpfakafaka”? Fokotozani. (1 Pedhru 1:22)

¹⁰ Pedhru alonga kuti tisafunika kupangiza “ufuni wakusowa umpfakafaka” kuna abale na alongo athu. (Lerini 1 Pedhru 1:22.) Ife tisapangiza ufuni unoyu tingabvera pinapfundza ife mu “undimomwene.” Undimomwene unoyu usaphataniza cipfundziso cakuti “Mulungu nkhabe tsankhulo.” (Mabasa 10:34, 35) Ife nee tinakwanisa kubvera ntemo wa Yezu wakupangiza ufuni khala basi ene tisapangiza ufuni kuna anthu angasi mu mpingo mbwenye kuna anango nkhabe. Ndimomwene kuti panango tinakhala na uxamwali wa ponda ndi pondembo na anango kupiringana anango, ninga pidacita Yezu. (Juw. 13:23; 20:2) Mbwenye Pedhru alonga kuti tisafunika kuwangisira toera kufuna abale na alongo athu onsene, thangwi iwo ndi ninga anthu a pabanja pathu.—1 Ped. 2:17.

11. Kodi mafala akuti ‘kufunana kakamwe unango na ndzace na ntima onsene’ asabvekanji?

¹¹ Pedhru alonga kuti “funanani kakamwe unango na ndzace, na ntima onsene.” Mafala akuti “kufuna kakamwe” asabveka kufuna munthu maseze pikhale pyakunentsa toera kupangiza ufuni kuna munthu unoyu. Mwacitsandzo, ndiye tani khala m’bale peno mulongo atitsukwalisa? Pakutoma panango tinafuna kum’bwezera pinthu pyakuipa pidacita iye, m’mbuto mwakupangiza ufuni. Mbwenye Pedhru apfundza na Yezu kuti kucita pyenepi nee kusakomeresa Mulungu. (Juw. 18:10, 11) Natenepa mukupita kwa ndzidzi iye alemba: “Lekani kubwezera pyakuipa kuna munthu adakucitirani pyakuipa, peno kutikana munthu adakutikanani. Mbwenye pakutawira, longani mafala adidi.” (1 Ped. 3:9) Mungafuna kakamwe abale na alongo anu, imwe munakhala wakukoma ntima na wacitsalakano kuna ale anakutsukwalisani.

12. (a) Kufuna kakamwe anango kunatikulumiza toera kucitanji? (b) Muli wakutonga toera kucitanji mwakubverana na vidhyu idaona imwe ya nsolo wakuti Mantenha a União Ciristã?

¹² Mu tsamba yace yakutoma, Pedhru aphatisira mafala akuti “funanani kakamwe.” Ufuni unoyu usaphimbira tayu basi madawo akucepa, mbwenye “madawo mazinji kakamwe.” (1 Ped. 4:8) Panango Pedhru akumbuka pinthu pidapfundzisa Yezu pyaka pingasi nduli thangwi yakulekerera. Pa ndzidzi unoyu, pisaoneka kuti Pedhru akhanyerezera kuti mbadakhala munthu wadidi kakamwe angalekerera m’bale wace “kanomwe.” Mbwenye Yezu alonga kuti tisafunika kulekerera “mpaka 77.” Pyenepi pisabveka kuti tisafunika kulekerera mwakusowa madire. (Mat. 18:21, 22) Khala musaona kuti ndi pyakunentsa kubvera uphungu unoyu, lekani kutsukwala! Atumiki onsene a Yahova akusowa ungwiro midzidzi inango asaona kuti ndi pyakunentsa toera kulekerera. Mbwenye pinafunika ife kucita ndi kuwangisira toera kulekerera m’bale peno mulongo mbatikhazikisa ntendere na iye.c

13. Thangwi yanji panango pinakhala pyakunentsa kuna akulu a mpingo kucedzera abale na alongo awo?

¹³ Mwakukhonda penula, Pedhru nee aduwala mafala adampanga Yezu pidamala iye kulamuswa muli akufa kuti: “Kumbiza anamabira anga.” (Juw. 21:16) Khala ndimwe nkulu wa mpingo, imwe musadziwa kuti musafunikambo kubvera mafala anewa. Panango pinakhala pyakunentsa kuna nkulu wa mpingo toera kugumana ndzidzi wakucita basa ineyi yakufunika kakamwe. Akulu a mpingo pakutoma asafunika kutsalakana anthu a panyumba pawo mu pinthu pyakumanungo na pyauzimu. Iwo asafunikambo kumwaza mphangwa mwaphinga, kukhunganyika na kucita mwadidi makhundu awo pa misonkhano ya mpingo, ya cisa na ya gawo. Kusiyapo pyenepi, anango asacita khundu ya Komiti Inapita Ncibverano na Nyumba za Ungumi peno asaphedzera Departamento Local de Desenho/Construção. Mwandimomwene akulu a mpingo ali na mabasa mazinji toera kucita!

14. Ninji pinafuna kuphedza akulu a mpingo toera kukumbiza nkumbi wa mabira? (1 Pedhru 5:1-4)

¹⁴ Pedhru apanga akulu a mpingo andzace kuti: “Kumbizani nkumbi wa mabira a Mulungu.” (Lerini 1 Pedhru 5:1-4.) Khala ndimwe nkulu wa mpingo, ife tisadziwa kuti imwe musafuna abale na alongo anu, pontho musafuna kuatsalakana. Mbwenye midzidzi inango panango munakhala akuphatika kakamwe na mabasa anango peno munakhala akuneta mbamucimwana kucita basa ineyi. Pyenepi pingacitika munacitanji? Dziwisani Yahova pinthu pinakudzudzumisani. Pedhru alemba: “Khala munthu ali kutumikira, iye asafunika kunyindira mphambvu za Mulungu.” (1 Ped. 4:11) Panango abale na alongo anu asathimbana na nyatwa zakuti nee zinamala zonsene mu dziko ino. Mbwenye kumbukani kuti “nkumbizi wankulu,” Yezu Kristu, anaaphedza mwadidi kupiringana imwe. Iye anakwanisa kucita pyenepi cincino na mu dziko ipswa. Yahova asafuna kuti akulu a mpingo afune abale na alongo awo, aakumbize, pontho akhale ‘citsandzo cadidi kuna nkumbi wa mabira.’

15. M’bale William asakumbiza tani mabira a Yahova? (Onanimbo foto.)

¹⁵ William, wakuti asatumikira ninga nkulu wa mpingo mu pyaka pizinji asabvesesa kufunika kwa kucedzera abale na alongo. Pidatoma utenda wa COVID-19, iye na akulu a mpingo andzace atoma kumenyera ntokodzi m’bodzi na m’bodzi wa abale na alongo a m’misoka yawo masumana onsene. Thangwi yanji akhacita pyenepi? Iye alonga: “Abale na alongo azinji akhali m’manyumba mwawo, pontho mwakukhonda dembuka iwo mbadatoma kunyerezera pinthu pyakuipa.” Khala pana m’bale peno mulongo anathimbana na nyatwa, William asambvesera mwadidi toera kudziwa pinandzudzumisa. Buluka penepo, iye asasaka mabukhu athu peno mavidhyu anagumanika mu saiti yathu toera kuwangisa nawo m’bale peno mulongo unoyu. Iye alonga: “Kucedzera abale na alongo ndi kwakufunika kakamwe cincino. Ife tisawangisira kakamwe toera kuphedza anthu akuti nee ndi abale na alongo athu toera adziwe Yahova; natenepa tisafunikambo kuwangisira toera kuphedza abale na alongo athu kuti apitirize mu undimomwene.”

16. Tinaphatisira tani pidapfundza ife m’matsamba mawiri a Pedhru?

¹⁶ Ife basi ene tapfundza pinthu pingasi kubulukira m’matsamba mawiri adalemba Pedhru. Panango imwe mwaona pinthu pyakuti musafuna kupicita. Mwacitsandzo, kodi imwe musafuna kunyerezera kazinji kene nkhombo zinafuna kukhala na ife mu dziko ipswa? Kodi imwe musafuna kumwaza mphangwa kuxikola, kubasa peno ku mbuto inango? Kodi imwe musaona njira zakuti munapangiza ufuni kakamwe kuna abale na alongo anu? Akulu a mpingo, muli dzololo toera kukumbiza mabira a Yahova na ntima onsene? Yeserani kutawira mibvundzo ineyi, pontho mungaona kuti piripo pinafunika imwe kusasanyira, lekani kutsukwala. “Mbuya ndi wakukoma ntima,” pontho iye anakuphedzani toera mucite mwadidi mabasa anu. (1 Ped. 2:3) Pedhru atipasa cinyindiro cakuti: “Mulungu . . . anadzamalisira kupfundziswa kwanu. Iye anadzakuwangisani, iye anadzakupasani mphambvu, pontho anadzakuikhani pa mbuto yakuwanga.”—1 Ped. 5:10.

17. Ndi nkhombo zipi zinafuna kudzakhala na ife tingapitiriza kutumikira Yahova na kutawira kupfundziswa na iye?

¹⁷ Pakutoma Pedhru akhapibva kuti nee ndi wakuthema kukhala pabodzi na Yezu. (Luka 5:8) Mbwenye na ciphedzo ca Yahova na ca Yezu, Pedhru apitiriza kutowera Yezu mwakukhulupirika. Na thangwi ineyi, Yahova atawirisa Pedhru toera kupita “mu Umambo wakukhonda mala wa Mbuyathu na Mpulumusi wathu Yezu Kristu.” (2 Ped. 1:11) Pyenepi ndi pyakutsandzayisa kakamwe! Mungapitiriza kutumikira Yahova mwakukhulupirika ninga pidacita Pedhru mbamutawira kupfundziswa na Yahova, imwe munadzatambirambo umaso wakukhonda mala. Munadzakwanirisa “cifuniro ca cikhulupiro canu, cakuti ndi kupulumuswa kwanu.”—1 Ped. 1:9.