KUTAWIRWA KWA MIBVUNDZO YA BHIBHLYA

Mwandimomwene Mbani Akutonga Dziko Ino?

Anthu azinji asakhulupira kuti Mulungu wandimomwene ndiye anatonga dziko ino. Mbwenye khala pyenepi ndipyodi, kodi dziko mbidadzala kakamwe na nyatwa? (Deuteronomyo 32:4, 5) Mwakubverana na Bhibhlya, dziko ino iri pantsi pa utongi wa nyakuipa.​—Lerini 1 Jwau 5:19.

Kodi nyakuipa unoyu akwanisa tani kukhala na mphambvu yakutonga anthu? Pakutoma kwene kwa mbiri ya anthu, anju m’bodzi apandukira Mulungu mbakulumiza banja yakutoma toera kupandukirambo Mulungu. (Genesi 3:1-6) Banja ineyi yasankhula kubvera anju unoyu wakuipa, Sathani, mbancitisa kukhala ntongi wawo. Mulungu Wamphambvu Zonsene ndiye basi adathema toera Kutonga, mbwenye iye asafuna kuti anthu asankhule utongi wace mu kukulumizwa na ufuni kwa iye. (Deuteronomyo 6:6; 30:16, 19) Mwakutsukwalisa, anthu azinji asapitiriza kunyengezwa toera kucita cisankhulo cibodzi cene cakuipa ninga cidacita banja yakutoma.​—Lerini Apokalipse 12:9.

Mbani Anafuna Kudzamalisa Nyatwa za Anthu?

Kodi Mulungu anadzatawirisa Sathani toera kupitiriza na utongi wace wakuipa? Nkhabe! Mulungu anadzaphatisira Yezu toera kufudza uipi unabwereswa na Sathani.​—Lerini 1 Jwau 3:8.

Na mphambvu za Mulungu, Yezu anadzafudza Sathani. (Aroma 16:20) Buluka penepo, Mulungu anadzatonga anthu na kuacitisa pontho kukhala na umaso wakutsandzayisa na wa ntendere ninga mukhafunikira iye pakutoma.​—Lerini Apokalipse 21:3-5.

Toera kudziwa pizinji, onani nsolo 3 wa bukhu iyi, Kodi Mwandimomwene Bhibhlya Isapfundzisanji?, yakubuluswa na Mboni za Yahova

Isagumanikambo mu site www.jw.org