Armajedhoni Ndi Mphangwa Zadidi!

1-2. (a) Thangwi yanji Armajedhoni ndi mphangwa zadidi kuna anthu? (b) Ndi mibvundzo ipi inafuna ife kutawira mu nsolo uno?

“ARMAJEDHONI.” Anthu angabva fala ineyi asanyerezera nkhondo inacemerwa guerra nuclear peno cidengwa cacibaliro. Mbwenye pinalonga Bhibhlya thangwi ya Armajedhoni pisaphataniza mphangwa zadidi, zakuti zisatitsandzayisa! (Apok. 1:3) Nkhondo ya Armajedhoni nee inadzapha anthu, mbwenye inadzaapulumusa! Munjira ipi?

² Bhibhlya isapangiza kuti nkhondo ya Armajedhoni inadzapulumusa anthu ingafudza mautongi a anthu. Nkhondo ineyi inadzapulumusa anthu, thangwi inadzapha anthu akuipa mbipulumusa anthu akulungama. Pontho inadzapulumusa anthu thangwi inadzatsidzikiza dziko yathu toera ikhonde kufudzwa. (Apok. 11:18) Toera kubvesesa mwadidi ntsonga zenezi, tendeni titawire mibvundzo minai: Armajedhoni ninji? Ndi pinthu pipi pinafuna kucitika Armajedhoni mbidzati kutoma? Tisafunika kucitanji toera tipulumuswembo pa Armajedhoni? Tinapitiriza tani kukhala akukhulupirika mpaka ntsiku ya Armajedhoni?

 3. (a) Kodi fala yakuti “Armajedhoni” isabvekanji? (b) Mwakubverana na Apokalipse 16:14, 16, thangwi yanji tisalonga kuti Armajedhoni nee ndi mbuto yandimomwene?

³ Lerini Apokalipse 16:14, 16. Fala yakuti “Armajedhoni” isagumanika kabodzi basi m’Bhibhlya, pontho ndi fala Yacihebheri yakuti isabveka “Phiri ya Mejidho.” (Apok. 16:16; cidzindikiro capantsi) Mejidho ukhali nzinda mu Izraeli wakale. (Yos. 17:11) Mbwenye Armajedhoni nee ndi dzina ya mbuto yandimomwene ya pa dziko yapantsi. Mwandimomwene Armajedhoni ndi makhaliro akuti “amambo a pa dziko yonsene yapantsi” anagumanyikana toera kumenyana na Yahova. (Apok. 16:14) Mbwenye nsolo uno usaphatisirambo fala yakuti “Armajedhoni” toera kulonga pya nkhondo inafuna kucitika mwakukhonda dembuka amambo a pa dziko yapantsi angamala kugumanyikana. Tisadziwa tani kuti Armajedhoni ndi mbuto yakuphiphirisa? Cakutoma, nkhabepo phiri ya Mejidho. Caciwiri, mbuto ya Mejidho ndi yakucepa kakamwe toera akwane “amambo a pa dziko yonsene yapantsi,” anyankhondo awo pabodzi na pida pyawo pya nkhondo. Cacitatu, ninga pinafuna ife kuona mu nsolo uno, nkhondo ya Armajedhoni inadzatoma mu ndzidzi wakuti “amambo” a pa dziko yapantsi anadzapomokera mbumba ya Mulungu yakuti iri pa dziko yonsene yapantsi.

 4. Thangwi yanji Yahova alandanisa nkhondo ikulu yakumalisa na Mejidho?

⁴ Thangwi yanji Yahova alandanisa nkhondo ikulu yakumalisa na Mejidho? Mu ndzidzi wakale, nkhondo zizinji zikhacitwa pa Mejidho na cifupi na gowa ya Yezereeli. Midzidzi inango Yahova akhaphedza atumiki ace toera kuwina mu nkhondo zenezi. Mwacitsandzo, “dhuzi na madzi a Mejidho,” Mulungu aphedza nyakutonga miseru wa Aizraeli anacemerwa Bharaki toera kukunda anyankhondo a Akanani akuti akhatsogolerwa na Sizera. Bharaki na mprofeta wankazi anacemerwa Dhebhora apereka takhuta kuna Yahova thangwi yakuwina kwawo mwacirengo. Iwo alonga: ‘Nyenyezi zacita nkhondo kudzulu . . . zamenyana na Sizera. Iwo akwatwa na nkulo wa Kisoni.’—Aton. 5:19-21.

 5. Nkhondo ya Armajedhoni inadzasiyana tani na nkhondo idacita Bharaki?

⁵ Bharaki na Dhebhora amalisa nyimbo yawo na mafala awa: ‘Natenepa Yahova, mbaphiwe anyamalwa anu onsene, mbwenye tawirisani kuti ale anakufunani akhale ninga cedza ca dzuwa.’ (Aton. 5:31) Pa nkhondo ya Armajedhoni, anyamalwa a Mulungu anadzaphiwa, mbwenye ale anafuna Mulungu anadzapulumuswa. Nkhondo zenezi ziwiri zasiyana kakamwe. Pa nkhondo ya Armajedhoni, atumiki a Mulungu nee anadzamenya nkhondo. Pontho iwo nee anadzakhala na pida pya nkhondo! ‘Mphambvu zawo zinabulukira pa kukhala akupfulika mbanyindira’ Yahova na anyankhondo ace akudzulu.—Iza. 30:15; Apok. 19:11-15.

 6. Kodi Yahova panango anaphatisiranji toera kupha anyamalwa ace pa nkhondo ya Armajedhoni?

⁶ Kodi Mulungu anakunda tani anyamalwa ace pa nkhondo ya Armajedhoni? Panango iye anaphatisira njira zizinji. Mwacitsandzo, panango iye anaphatisira piteketeke, matalala na piphaliwali. (Yobe 38:22, 23; Ezek. 38:19-22) Panango iye anacitisa anyamalwa ace aphane okha-okha. (2 Pya dziko. 20:17, 22, 23) Pontho panango iye anaphatisira aanju ace toera kupha anthu akuipa. (Iza. 37:36) Mwakukhonda tsalakana njira zinafuna kuphatisira Mulungu, iye anadzawina. Anyamalwa ace onsene anadzaphiwa. Mbwenye anthu onsene akulungama anadzapulumuswa.—Mis. 3:25, 26.

7-8. (a) Mwakubverana na 1 Atesalonika 5:1-6, ndi cidziwiso cipi cinafuna kucita atsogoleri a dziko? (b) Thangwi yanji mafala anewa anadzakhala uthambi ukulu kakamwe?

⁷ Mbidzati kufika “ntsiku ya Yahova,” anthu anadzalonga “ntendere na citsidzikizo.” (Lerini 1 Atesalonika 5:1-6.) Pa lemba ya 1 Atesalonika 5:2, “ntsiku ya Yahova” isabveka “nyatwa ikulu.” (Apok. 7:14) Tinadziwa tani ndzidzi unafuna kutoma nyatwa ineyi? Bhibhlya isalonga kuti kunadzaoneka cidziwiso cakuti cipo cabviwa kale. Cidziwiso ceneci cinadzakhala ninga cidzindikiro ca nyatwa ikulu.

⁸ Ceneci cinadzakhala cidziwiso ca “ntendere na citsidzikizo” cidalongwa kale. Thangwi yanji atsogoleri a dziko anadzalonga pyenepi? Kodi atsogoleri a mauphemberi anadzacitambo khundu pa cidziwiso ceneci? Panango. Mbwenye cidziwiso ceneci cinadzakhala uthambi unango wa dimonyo. Mbwenye uthambi unoyu unadzakhala ukulu kakamwe, thangwi unadzacitisa anthu kunyerezera kuti ali akutsidzikizika mu ndzidzi wakuti nyatwa ikulu iri cifupi toera kutoma. Ninga pinalonga Bhibhlya, “kufudzwa kwawo kunafika mwakututumusa, ninga kubva kupha kunakhala na nkazi pakubala.” Mphapo ninji pinafuna kucitika kuna atumiki akukhulupirika a Yahova? Nakuti iwo nkhabe kudziwa mwadidi ndzidzi unafuna kutoma nyatwa ikulu, panango iwo anadzudzumika pyenepi pingacitika, mbwenye anagumanika kuti ali akukhunganyika.

 9. Kodi Mulungu anadzafudza tani dziko ya Sathani?

⁹ Yahova nee anadzafudza dziko ya Sathani kabodzi kene ninga pidacita iye mu ntsiku za Nowa. Mbwenye anadzaifudza munjira ziwiri. Pakutoma, iye anadzafudza Bhabhilonya Wankulu, wakuti ndi mauphemberi onsene authambi. Buluka penepo, pa Armajedhoni, iye anadzafudza dziko yonsene ya Sathani kuphatanizambo anyandale, anyankhondo na anyamalonda. Cincino tinadinga mwadidi pinthu pyenepi pinafuna kucitika.

10. Mwakubverana na Apokalipse 17:1, 6, na Apokalipse 18:24, thangwi yanji Yahova anadzafudza Bhabhilonya Wankulu?

¹⁰ “Kutongwa kwa puta wankulu.” (Lerini Apokalipse 17:1, 6; 18:24.) Bhabhilonya Wankulu asacitisa kuti anthu azinji akhonde kulemedza dzina ya Mulungu. Iye asapfundzisa uthambi thangwi ya Mulungu. Ninga nkazi waulukwali, uphemberi wauthambi usakhala wakukhonda khulupirika kuna Yahova thangwi yakuphedzera mautongi a dziko. Iwo usaponderera anthu awo mbukwata kobiri zawo. Pontho uphemberi wauthambi usapha anthu azinji, kuphatanizambo atumiki a Mulungu. (Apok. 19:2) Kodi Yahova anadzafudza tani Bhabhilonya Wankulu?

11. Kodi “cikala cakufuira” cisaimiriranji, pontho Mulungu anaciphatisira toera kucitanji na Bhabhilonya Wankulu?

¹¹ Yahova anadzafudza “puta wankulu” mukuphatisira “nyanga khumi” za “cikala cakufuira.” Cikala ceneci cisaimirira Nações Unidas. Nyanga khumi zisaimirira mautongi anaphedzera Nações Unidas. Ungafika ndzidzi udakhazikisa Mulungu, mautongi anewa anadzapomokera Bhabhilonya Wankulu. “Iwo anadzansakaza mbansiya cipezipezi” angadzankwatira mpfuma yace mbapangiza anthu onsene kuti iye ndi wakuipa. (Apok. 17:3, 16) Kufudzwa kweneko kunadzaoneka ninga kwacitika ntsiku ibodzi basi, thangwi kunadzacitika mwakucimbiza. Natenepa, ale anaphedzera uphemberi wauthambi anadzatsukwala, makamaka thangwi iye akhagaya mbalonga: “Ine ndiri nawa ninga mambo wankazi, sine nzice tayu; pontho cipo ndinadzatsukwala.”—Apok. 18:7, 8.

12. Ndi cinthu cipi cakuti Yahova nee anadzatawirisa kuti anthu acicite, pontho thangwi yanji?

¹² Mulungu nee anadzatawirisa anthu toera afudze mbumba yace. Thangwi mbumba yace isakomerwa na kudziwika na dzina yace, pontho isabvera mafala adalonga iye toera kubuluka m’Bhabhilonya Wankulu. (Mabasa 15:16, 17; Apok. 18:4) Pontho iwo asaphata basa mwaphinga toera kuphedza anango abuluke mwenemo. Na thangwi ineyi, atumiki a Yahova nee anadzaona “nyatwa za miliri yace.” Ngakhale tenepo, cikhulupiro cawo cinadzayeserwa.

13. (a) Goge mbani? (b) Mwakubverana na Ezekyele 38:2, 8, 9, ninji cinafuna kucitisa Goge toera kupomokera atumiki a Mulungu?

¹³ Kupomokera kwa Goge. (Lerini Ezekyele 38:2, 8, 9.) Mauphemberi onsene authambi angamala kufudzwa, basi ene kunadzaoneka uphemberi ubodzi basi pa dziko yapantsi. Ndi atumiki a Yahova basi anafuna kusala. Mwandimomwene, Sathani anadzaipirwa. Iye anadzapangiza kuipirwa kweneko mukuphatisira ‘mafala akunyanyasa a nzimu,’ akuti ndi mphangwa zauthambi za madimonyo zinafuna kucitisa misoka ya madzindza kupomokera atumiki a Yahova. (Apok. 16:13, 14) Misoka ineyi ya madzindza isacemerwa ‘Goge wa dziko ya Magoge.’ Misoka ineyi ingapomokera atumiki a Yahova, nkhondo ya Armajedhoni inatoma.—Apok. 16:16.

14. Kodi Goge anadzadzindikiranji?

¹⁴ Goge anadzanyindira ‘mphambvu zace,’ zakuti ndi anyankhondo ace. (2 Pya dziko. 32:8) Ife tinadzanyindira Yahova Mulungu wathu, mbwenye pyenepi pinadzaoneka ninga pyakusowa ndzeru kuna anthu. Thangwi yanji? Thangwi maseze Bhabhilonya Wankulu akhali wamphambvu, alungu ace nee ampulumusa kuna “cikala” na ‘nyanga zace khumi!’ (Apok. 17:16) Natenepa Goge ananyerezera kuti anatifudza mwakukhonda nentsa. ‘Ninga makole anaphimbira dziko,’ iye anadzapomokera atumiki a Yahova. (Ezek. 38:16) Buluka penepo, Goge anadzadzindikira kuti nee anapulumuka. Ninga Farau pa Bara Yakufuira, iye anadzadzindikira kuti akumenyana na Yahova—Eks. 14:1-4; Ezek. 38:3, 4, 18, 21-23.

15. Yezu anacitanji pa nkhondo ya Armajedhoni?

¹⁵ Kristu na anyankhondo akudzulu anadzatsidzikiza atumiki a Mulungu, mbafudza misoka ya madzindza na anyankhondo awo. (Apok. 19:11, 14, 15) Mphapo ninji pinafuna kudzacitika kuna nyamalwa wankulu wa Yahova, Sathani, adalonga uthambi kuna misoka ya madzindza toera kupomokera atumiki a Mulungu pa nkhondo ya Armajedhoni? Yezu anadzaponya iye pabodzi na madimonyo ace mu djenje yakuzika kakamwe, mbaafungira mwenemo mu pyaka cikwi.—Apok. 20:1-3.

16. (a) Tinapangiza tani kuti ‘tisadziwa Mulungu’? (b) Ninji pinafuna kucitika kuna anthu anadziwa Yahova pa nkhondo ya Armajedhoni?

¹⁶ Mwakukhonda tsalakana khala tadziwa kwene cincino undimomwene peno nkhabe, toera tipulumuswe pa nkhondo ya Armajedhoni, tisafunika kupangiza kuti ‘tisadziwa Mulungu,’ pontho tisabvera “mphangwa zadidi zinalonga pya Mbuyathu Yezu.” (2 Ates. 1:7-9) Tinapangiza kuti ‘tisadziwa Mulungu,’ tingadziwa pinthu pinakomerwa na iye na pinthu pinaipirwa na iye, kuphatanizambo mitemo yace. Tinapangizambo kuti tisandziwa tinganfuna na kumbvera, pontho mbatilambira iye basi. (1 Juw. 2:3-5; 5:3) Tingapangiza kuti tisadziwa Mulungu, tinakhala na nkhombo ya ‘kudziwika na iye,’ kwakuti kunatipulumusa pa nkhondo ya Armajedhoni. (1 Akor. 8:3) Thangwi yanji? Thangwi ‘kudziwika na iye,’ pisabveka kuti ndife akutawirika kuna iye.

17. Kodi pisabvekanji kubvera “mphangwa zadidi zinalonga pya Mbuyathu Yezu”?

¹⁷ “Mphangwa zadidi zinalonga pya Mbuyathu Yezu,” zisaphataniza undimomwene onsene udapfundzisa Yezu unagumanika m’Bhibhlya. Tinapangiza kuti tisabvera mphangwa zadidi tingaziphatisira mu umaso wathu. Kubvera kweneko kusaphataniza kuikha pa mbuto yakutoma Umambo wa Mulungu, kukhala maso mwakubverana na mitemo ya Mulungu mbatimwaza mphangwa za Umambo wa Mulungu. (Mat. 6:33; 24:14) Pyenepi pisaphatanizambo kuphedzera abale akudzodzwa a Kristu mu ndzidzi unatsalakana iwo mabasa awo akufunika kakamwe.—Mat. 25:31-40.

18. Kodi abale akudzodzwa a Kristu anadzacitanji toera kubwezera udidi unacitirwa iwo?

¹⁸ Mwakukhonda dembuka, atumiki akudzodzwa a Mulungu anadzabwezera “mabira anango” thangwi ya kuaphedza kunacita iwo. (Juw. 10:16) Munjira ipi? Nkhondo ya Armajedhoni mbidzati kutoma, onsene akukwana 144.000 anadzakwatwa mbaenda kudzulu ninga ana auzimu akukhonda kufa a Mulungu. Buluka penepo iwo anadzacita khundu ya anyankhondo akudzulu anafuna kufudza Goge mbatsidzikiza “mwinji ukulu” wa atumiki a Yahova. (Apok. 2:26, 27; 7:9, 10) Mwinji ukulu unadzatsandzaya kakamwe thangwi yakuphedzera atumiki akudzodzwa a Yahova mu ndzidzi ukhali iwo pa dziko yapantsi!

19-20. Mwakukhonda tsalakana nyatwa zathu, tinapitiriza tani kukhala akukhulupirika mpaka ntsiku ya Armajedhoni?

¹⁹ Mu ntsiku zino zakumalisa, atumiki azinji a Yahova asathimbana na nyatwa. Ngakhale tenepo, ife tinakwanisa kupirira mwakutsandzaya. (Tiya. 1:2-4) Cinthu cibodzi cinafuna kutiphedza kakamwe ndi kupitiriza kucita maphembero. (Luka 21:36) Nee tisafunika kucita maphembero basi, mbwenye tisafunikambo kupfundza Bhibhlya ntsiku zonsene na kunyerezera mwadidi pinapfundza ife, kuphatanizambo maprofesiya analonga pinthu pinafuna kucitika mwakukhonda dembuka. (Masal. 77:12) Tingacita pyenepi, mbatiwangisira mu utumiki, cikhulupiro cathu na cidikhiro cathu pinakhala pyakuwanga!

²⁰ Tinadzatsandzaya kakamwe Bhabhilonya Wankulu angadzafudzwa, pontho nkhondo ya Armajedhoni ingamala. Nyerezerani basi kutsandzaya kunafuna kukhala na ife, anthu onsene angalemedza dzina ya Mulungu na kuthema kwace toera kutonga. (Ezek. 38:23) Mwakukhonda penula, Armajedhoni ndi mphangwa zadidi kuna ale anadziwa Mulungu, anabvera Mwanace mbapirira mpaka kunkhomo.—Mat. 24:13.