‘Njira Na Undimomwene Na Moyo’

1, 2. Thangwi yanji kufendedzera Yahova nkhabe kwanisika mwa ife tekhene, na ndi ninji pidaticitira Yezu Kristu thangwi ya pyenepi?

KODI imwe mwatoma kale tayika? Panango musakumbuka nzidzi ukhacita imwe ulendo towera kaona xamwali peno acibale mbumutayika. Mukhapitiriza imwe m’njira yokhonda kuidziwa, kodi imwe mwalimira mbamubvunza munthu unango kuti akupangizeni njira? Nyerezerani kuti mbumudapibva tani, mbuto mwakukupangisani njira, munthu unoyu wantsisi alonga: “Nditowerereni basi. Ndinenda kakuperekerani.” Munakhala wakusudzuka tani!

² Tingakwanise kulonga kuti Yezu Kristu acita pinthu ninga pyenepi kwa ife. Mwakusowa ciphedzo, nee mbitidakwanisa tayu kufendedzera Mulungu. Thangwi ya kutambira madawo na kusowa ungwiro, dziko ya anthu yatayika, iri “kutali na moyo wa Mulungu.” (Aefesi 4:17, 18) Tisafuna ciphedzo towera kugumana njira yathu. Yezu, nyantsisi wathu Wacitsanzo, hadatipasa basi uphungu na pitsogolero tayu; iye acita pizinji. Ninga taona m’Nsolo 1, Yezu aticemera, mbalonga: “Bwera dzanditowera.” (Marko 10:21) Mbwenye, iye atipasambo mathangwi adidi towera kutawira ncemerero unoyu. M’nzidzi unango, Yezu alonga: “Ine ndine njira na udidi [‘undimomwene,’ NM] na moyo. Nkhabepo munthu mbodzi anafika kuna Baba mbakhonda kupita pana ine.” (Jwau 14:6) Tendeni tidinge mathangwi mangasi akuti thangwi yanji kufendedzera Baba ndi kwakukwanisika m’kuphatisira Mwana basi. Buluka penepo, na mathangwi anewa m’manyerezero, tinadzadinga kuti Yezu ndiyedi tani ‘njira na undimomwene na moyo.’

 3. Thangwi yanji mphyakufunika kufendedzera Mulungu kubulukira mwa Yezu?

³ Cakutoma na cakufunika kakamwe ndi cakuti kufendedzera Mulungu kusakwanisika kubulukira mwa Yezu thangwi Yahova asankhula kupasa Mwanace basa yakufunika kakamwe.a Baba amuikha ninga munthu wakutoma peno mfungulo m’kukwanirisa mapikiro Ace onsene. (2 Akorinto 1:20; Akolose 1:18-20) Towera kubvesesa basa yakufunika ya Mwana, tisafunika kudinga pidacitika m’munda wa Edeni, m’nzidzi wakuti banja yakutoma pabodzi na Sathani apandukira Yahova.​—Genesi 2:16, 17; 3:1-6.

 4. Kodi upanduki m’Edeni watomesa nseru upi, na Yahova atonga kucitanji towera kumalisa nseru unoyu?

⁴ Upanduki m’Edeni watomesa nseru wakuti mbudakhuya pyakucitwa pyonsene pya Mulungu: Kodi Yahova Mulungu akhatonga pyakucitwa pyace m’njira yadidi? Towera kumalisa nseru unoyu, Yahova atonga kuti mwana wauzimu waungwiro abwere pa dziko yapantsi. Basa ikhafuna cita mwana unoyu ikhali yakufunika kakamwe​—kupereka umaso wace towera kubwezera utongi ukulu wa Yahova na kukhala ninga ciomboli kwa anthu. M’kukhala wakukhulupirika mpaka kufa, mwana wakusankhulwa mbadakwanisa kumalisa nyatwa zonsene zidatomeswa na upanduki wa Sathani. (Ahebere 2:14, 15; 1 Jwau 3:8) Mbwenye Yahova akhali na pikwi na pikwi pya ana auzimu aungwiro. (Danyele 7:9, 10) Kodi ndi upi adasankhula iye towera kucita basa ineyi yakufunika kakamwe? Yahova asankhula “Mwana wache mbodzi ekha,” ule adadzadziwika ninga Yezu Kristu.​—Jwau 3:16.

5, 6. Kodi Yahova apangiza tani kuti akhanyindira Mwanace, na cinyindiro cace cikhabuluka kupi?

⁵ Kodi tisafunika kudzuma na cisankhulo ca Yahova? Nkhabe! Baba akhanyindira kakamwe Mwanace mbodzi ekha. Madzana a piaka mwanyapantsi Mwana mbasati bwera pa dziko yapantsi, Yahova alongeratu kuti Mwana unoyu mbadapitiriza kukhala wakukhulupirika maseze athimbane na ntundu onsene wa nyatwa. (Izaiya 53:3-7, 10-12; Machitiro 8:32-35) Nyerezerani kunensa kwa pyenepi. Mwana, ninga pyakucitwa pinango pyonsene, akhali na ufulu wakukwanisa kusankhula pikhafuna iye. Mbwenye Yahova akhali na cinyindiro ceneci, ndi thangwi yace alongeratu pya kukhulupirika kwa Mwanace. Kodi cinyindiro ceneci cikhabuluka kupi? M’mafala okhonda nensa, cikhabuluka m’cidziwiso. Yahova asadziwa mwadidi Mwanace na asadziwa kuti Mwanace asanfuna tani Kunkomeresa. (Jwau 8:29; 14:31) Mwana asafuna Babace, na Yahova asafunambo Mwanace. (Jwau 3:35) Kufunana kwa Baba na Mwana kusawangisa cibverano cawo na cinyindiro cokhonda fudzika.​—Akolose 3:14.

⁶ Mwakubverana na basa yakufunika ya Mwana, cinyindiro cina Baba kwa iye, na kufuna kunawangisa cibverano ca Baba na Mwana, kodi mphyakudzumisa kuti kufendedzera Mulungu kusakwanisika basi kubulukira mwa Yezu? Mwakuthimizira, pana thangwi inango inapangiza kuti thangwi yanji Mwana ekha angakwanise kutitsogolera kwa Baba.

7, 8. Thangwi yanji Yezu mbadakwanisa kulonga mwakulinganira kuti nkhabepo munthu anadziwadi Baba “mbwenye anandziwa ndi Mwana ekha”?

⁷ Pana pinthu pyakuti tisafunika kupicita towera tikhale akutawirika kwa Yahova. (Masalmo 15:1-5) Kodi mbani anadziwa mwadidi kupiringana Mwana pinafunika towera kudziwa midida ya Mulungu na kukhala wakutawirika kwa Iye? Yezu alonga: “Ine ndapabswa pyonsene na Babanga. Nkhabepo munthu anadziwa Mwana, mbwenye anandziwa ndi Baba ekha. Nkhabepombo munthu anadziwa Baba, mbwenye anandziwa ndi Mwana ekha na uyu anafuna kupichululirwa na Mwana.” (Mateo 11:27) Tendeni tione kuti thangwi yanji Yezu mbadakwanisa kulonga mwakulinganira mbakhonda thimizira kuti nkhabepo munthu anadziwa mwadidi Baba “mbwenye anandziwa ndi Mwana ekha.”

⁸ Ninga “[wakubalwa] wakutoma, mbachidzati kuchitwa chinthu chibodzi,” Mwana akhali na uxamwali wakupambulika na Yahova. (Akolose 1:15) Nyerezerani uxamwali wa ponda ndipondembo wa Baba na Mwana udakulisa iwo nkati mwa piaka pyokhonda lengeseka mukhakhala iwo awiri basi​—kutomera pakubalwa kwace mpaka nzidzi udacitwa pyakucitwa pinango pyauzimu. (Jwau 1:3; Akolose 1:16, 17) Nyerezerani basi pya mwai wakupambulika ukhali na Mwana mukhakhala iye na Babace, kupfunza na Babace njira yakucita pinthu na kupfunza cifuno, midida na macitiro Ace. Inde, si kuthimizira tayu kulonga kuti Yezu asadziwa Babace mwadidi kupiringana munthu unango onsene. Mwandimomwene uxamwali unoyu wacitisa Yezu kupangiza Babace m’njira yakuti nee unango mbadaikwanisa.

9, 10. (a) Kodi ndi m’njira zipi Yezu apangiza Babace? (b) Towera kukhala akutawirika kwa Yahova, kodi tisafunika kucitanji?

⁹ Pipfunziso pya Yezu pyapangiza cifuno cace cikulu ca kudziwa pinanyerezera Yahova, mabvero na pinafuna Iye kwa alambiri Ace.b Yezu apangizambo Babace m’njira inango ikulu. Yezu alonga: “Uyu anandiona ine pano, anaonambo Baba.” (Jwau 14:9) Yezu asangizira Babace m’pinthu pyonsene pidalonga na pidacita iye. Natenepa munaleri ife m’Biblya pya Yezu​—mphambvu na mafala akukomeresa adaphatisira iye m’kupfunzisa kwace, ntsisi zidancitisa kuwangisa anango na zidancitisa kubulusa misozi—​tingakwanise kunyerezera Yahova mbakalonga na kucita pinthu pyenepi pyadidi. (Mateo 7:28, [7:28, 29, NM]; Marko 1:40-41, [1:40-42, NM]; Jwau 11:32-36) Macitiro na cifuno ca Baba pisapangizwa mwadidi m’mafala na m’mabasa a Mwana. (Jwau 5:19; 8:28; 12:49, 50) Natenepa, towera tikhale akutawirika kwa Yahova, tisafunika kubvesera pipfunziso pya Yezu na kutowerera citsanzo cace.​—Jwau 14:23.

¹⁰ Nakuti Yezu asadziwadi Yahova na ansangizira m’pyonsene, si pyakudzumisa tayu kuti Yahova asankhula Mwana unoyu kuti akhale njira yakufendedzera nayo Baba. Na cidziwiso ceneci cakuti thangwi yanji tingakwanise kufika kwa Yahova kubulukira mwa Yezu basi, tendeni tidinge cincino mabvekero a mafala a Yezu: “Ine ndine njira na udidi [peno undimomwene] na moyo. Nkhabepo munthu mbodzi anafika kuna Baba mbakhonda kupita pana ine.”​—Jwau 14:6.

11. (a) Thangwi yanji tingakwanise kukhala na uxamwali na Mulungu kubulukira mwa Yezu basi? (b) Kodi mafala anagumanika pa Jwau 14:6 asagomezera tani kupambulika kwa ciimiriro ca Yezu? (Onani cidzindikiro capantsi.)

¹¹ Ife tamala kupfunza kuti nkhabe kwanisika kufendedzera Mulungu mbitikhonda pita na pana Yezu. Dingani, mwapaduzi, kuti pyenepi pisabvekanji kwa ife. Yezu ndi “njira” yakuti kubulukira mwa iye basi tingakwanise kukhala na uxamwali wakutawirika na Mulungu. Thangwi yanji piri tenepo? M’kukhala wakukhulupirika mpaka kufa, Yezu apereka umaso wace ninga ntsembe yaciomboli. (Mateo 20:28) Mwakusowa masasanyiro anewa a ciomboli, mbipidakhala pyakucimwanika kwa ife kufika kwa Mulungu. Madawo aikha madire pakati pa anthu na Mulungu, nakuti Yahova ndi wakucena ndi thangwi yace iye nkhabe tawirisa madawo. (Izaiya 6:3; 59:2) Mbwenye ntsembe ya Yezu yabulusa madire; yacitisa kuti kuphimbirwa kwa madawo kukwanisike. (Ahebere 10:12; 1 Jwau 1:7) Tingatawira masasanyiro a Mulungu kubulukira mwa Kristu na kunkhulupira, tingakwanise kukhala akutawirika kwa Yahova. Nkhabepo njira inango kwa ife towera tikhale ‘akusekerana na iye.’c​—Aroma 5:6-11.

12. Kodi Yezu ndi “njira” m’makhaliro api?

¹² Yezu ndi “njira” mwakubverana na phembero. Ife tingakwanise kufika kwa Yahova m’phembero kubulukira mwa Yezu basi mbitikhala na cibaso cakuti maphembo athu akubuluka m’ntima anadzabviwa. (1 Jwau 5:13, 14) Yezu ene alonga: “Pyonsene pinadzaphemba imwe Baba na dzina yanga, iye anadzakupipasani. . . . Phembani, mphapo, penepo munadzapabswa towera kusekera kwanu kufike ku nkhomo.” (Jwau 16:23, 24) Mwakuthema, m’dzina ya Yezu, tingakwanise kufendedzera Yahova m’phembero na kuthula Iye “Baba wathu.” (Mateo 6:9) Yezu ndi “njira” m’makhaliro anangombo​—citsanzo cace. Ninga taona kale, Yezu asangizira Babace m’pinthu pyonsene. Natenepa citsanzo ca Yezu cisatipangiza kuti tinakhala tani maso towera kukomeresa Yahova. Mbwenye towera kufendedzera Yahova, tisafunika kulonda manyalo a Yezu.​—1 Pedro 2:21.

13, 14. (a) Kodi Yezu akhalonga undimomwene m’njira ipi? (b) Nakuti Yezu akhali ‘undimomwene,’ kodi iye akhafunika kucitanji, na thangwi yanji?

¹³ M’nzidzi onsene Yezu akhalonga pya maso peno undimomwene wa mafala aciprofesiya a Babace. (Jwau 8:40, 45, 46) Nkanwa mwa Yezu hamudabuluka mafala a uthambi tayu. (1 Pedro 2:22) Ngakhale apingizi ace adzindikira kuti iye apfunzisa “pya maso njira ya Mulungu.” (Marko 12:13, 14) Mbwenye, mudalonga Yezu kuti ‘ine ndine undimomwene,’ iye nee akhalonga kuti adziwisa undimomwene m’mafala, m’kumwaza mphangwa na m’kupfunzisa kwace basi tayu. Pizinji​—pizinji kakamwe—​kupiringana kulonga pikhaphatanizwa.

¹⁴ Kumbukani kuti madzana mazinji a piaka mwanyapantsi, Yahova apepesera alembi a Biblya towera kulemba maprofesiya mazinji a pya Mesiya, peno Kristu. Maprofesiya anewa alongeratu unyomonyomo wa pya umaso, utumiki na kufa kwace. Mwakuthimizira, Mwambo wa Mose ukhali na pipangizo pyaciprofesiya, pikhathonya kwa Mesiya. (Ahebere 10:1) Kodi Yezu mbadakhala wakukhulupirika mpaka kufa, mbakwanirisa tenepa pinthu pyonsene pidalongwa thangwi ya iye? M’njira ineyi basi Yahova mbadapangizika kukhala Mulungu wa maprofesiya andimomwene. Kupitawirira kweneku kukulu kukhali m’manja mwa Yezu. M’njira idakhala iye maso​—m’mafala onsene adalonga iye na m’pinthu pyonsene pidacita iye—​Yezu apangiza kuti citsanzo caciprofesiya cikhali candimomwene. (2 Akorinto 1:20) M’njira ineyi, Yezu akhali ‘undimomwene.’ Yezu akhali undimomwene m’njira yakuti mafala aciprofesiya a Yahova akwanirisikadi mudafika iye.​—Jwau 1:17; Akolose 2:16, 17.

15. Kodi pisabvekanji kukhulupira Mwana, na kucita pyenepi kusatsogolera kupi?

¹⁵ Yezu ndi “moyo,” thangwi ndi kubulukira mwa iye basi tingakwanise kutambira umaso​—nkhulonga kuti, “moyo wakukhonda kumala [‘wandimomwene,’ NM].” (1 Timoti 6:19) Biblya isalonga: “Uyu anakhulupira Mwana, ndi ana moyo wakukhalirathu mbwenye uyu anakhonda kunkhulupirira hanadzaona moyo tayu, anaona ukali wa Mulungu wakukhalika pana iye.” (Jwau 3:36) Kodi pisabvekanji kukhulupira Mwana wa Mulungu? Pisabveka kuti tisafunika kukhala na cikhulupiro cakuti ife nkhabe kwanisa kukhala na umaso mwakusowa iye. Kusiyapo pyenepi, pisabveka kuti tisapangiza cikhulupiro cathu na mabasa, kupitiriza kupfunza kubulukira mwa Yezu na kucita pinakwanisa ife towera titowerere pipfunziso na citsanzo cace. (Tyago 2:26) Natenepa, kukhulupira Mwana wa Mulungu kusatsogolera ku umaso okhonda mala​—umaso okhonda kufa wauzimu kudzulu kwa ‘nkumbi ung’ono’ wa Akristu akudzodzwa na nzimu na umaso waungwiro waumunthu m’paradizu pa dziko yapantsi kwa “[mwinji] ukulu” wa “mabira anango.”​—Luka 12:32; 23:43; Apokalipse 7:9-17; Jwau 10:16.

16, 17. (a) Kodi Yezu anadzapangiza tani kukhala “moyo” ngakhale kwa ale adafa? (b) Kodi tingakwanise kukhala na cinyindiro canji?

¹⁶ Kodi ndiye tani mphapo pya ale adamala kufa? Yezu ndi “moyo” kwa iwombo. Nzidzi wakucepa mbasati kulamusa xamwali wace Lazaro muli akufa, Yezu apanga Marta, mwanankazi wa Lazaro: “Ine ndine kulamuka na moyo. Munthu munthu ananditawira, ngakhala iye amala kufa kale, anadzakhala na moyo.” (Jwau 11:25) Yahova anyindira Mwanace m’kumpasa “pifungulo pya dziko ya anyakufa na pya inferno [‘Hade,’ NM],” mbampasa mphambvu yakulamusa anthu muli akufa. (Apokalipse 1:17, 18) Na pifungulo pyenepi, Yezu wakulemedzeka anadzafungula misuwo ya Hade na kubulusa onsene anagona m’nthumbi ya anthu onsene.​—Jwau 5:28, 29.

¹⁷ ‘Ine ndine njira na undimomwene na moyo’​—na mafala anewa akucepa, Yezu alonga mwacigwagwa cifuno ca umaso na utumiki wace pa dziko yapantsi. Mafala anewa ali na mabvekero mazinji kwa ife lero. Kumbukani kuti Yezu apitiriza na kulonga kuti: “Nkhabepo munthu mbodzi anafika kuna Baba mbakhonda kupita pana ine.” (Jwau 14:6) Mafala a Yezu aciri akufunika lero ninga m’nzidzi udaalonga iye. Natenepa tingakwanise kukhala na cinyindiro cakukwana cakuti tingatowerera Yezu, nee tinadzatayika tayu. Iye, ndiye basi, anadzatipangiza njira ya kufika “kuna Baba.”

18. Kodi kukhala atowereri andimomwene a Yezu kusaphatanizanji?

¹⁸ M’kudziwa basa yakufunika ya Yezu na kudziwa kwace mwadidi Baba, tiri na mathangwi adidi kuti titowerere Mwana. Ninga taona m’nsolo wa nduli, kukhala atowereri andimomwene a Yezu kusaphataniza mabasa, tayu basi mafala peno mabvero. Kutowerera Kristu kusaphataniza kubveranisa umaso wathu m’kutowerera pipfunziso na citsanzo cace. (Jwau 13:15) Bukhu ino inaleri imwe cincino ingakwanise kukuphedzani m’kuwangisira kweneku.

19, 20. Kodi ndi ninji piri m’bukhu ino pyakuti pingakwanise kukuphedzani m’kuwangisira kwanu kutowerera Kristu?

¹⁹ M’misolo yakutowerera, tinadzacita pfunziro yacidikhodikho ya umaso na utumiki wa Yezu. Misolo ineyi yagawiwa m’makhundu matatu. Yakutoma, tinadzadinga mwacigwagwa makhaliro na macitiro ace pinthu. Yaciwiri, tinadzadinga citsanzo cace caphinga m’kumwaza mphangwa na kupfunzisa. Yacitatu, tinadzadinga kuti iye apangiza tani kufuna. Nsolo 3, uli na bokosi ya pipfunziso yakuti: “Kodi Munakwanisa Tani Kutowerera Yezu?” Malemba na mabvunzo anagumanika mwenemo acitwa towera kutiphedza kunyerezera kuti tinakwanisa tani kusangizira Yezu m’mafala na m’pyakucita.

²⁰ Na ciphedzo ca Yahova Mulungu, imwe nee munadzatayika peno kukhala kutali na iye thangwi ya madawo adatambira imwe tayu. Ngakhale kuti pyamupha ntima, mwakufuna Yahova atuma Mwanace towera kudzatipangiza njira yakukhala na uxamwali wakutawirika na Mulungu. (1 Jwau 4:9, 10) Musafunika kuti muende kutsogolo, inde mukulumizike, towera kucita pinthu mwakubverana na kufuna kweneku kukulu m’kutawira na kucita pinthu mwakubverana na ncemerero wa Yezu: ‘Bwera unditowere.’​—Jwau 1:43.