Yahova Asatipasa Cinyindiro Cakuti Anadzacinja Dziko Mbikhala Paraizu

 1. Ndi mphangwa zipi zidalonga mprofeta Izaiya kuna Aizraeli?

MPROFETA Izaiya alonga kuti Yahova ndi “Mulungu wandimomwene.” Fala yakuti ‘undimomwene’ isabveka “ameni.” (Iza. 65:16, cidzindikiro capantsi.) Fala yakuti “ameni” isabveka “inde,” peno “ndimomwene.” Fala yakuti “ameni” ingaphatisirwa m’Bhibhlya toera kulonga pya Yahova na Yezu, isatipasa cinyindiro cakuti pidalonga iwo pinacitikadi. Natenepa, mafala adalonga Izaiya kuna Aizraeli asapangiza kuti ndzidzi onsene unalonga Yahova pinthu pisacitikadi. Mwandimomwene, ndzidzi onsene Yahova asakwanirisa mapikiro ace.

 2. Thangwi yanji tisanyindira mapikiro a Yahova analonga pya tsogolo yathu, pontho ndi mibvundzo ipi inafuna ife kutawira mu nsolo uno?

² Kodi ife tinakwanisambo kunyindira mapikiro a Yahova analonga pya tsogolo yathu? Pakupita pyaka cifupi na 800 pidamala Izaiya kulonga mafala anewa, mpostolo Paulu afokotoza kuti thangwi yanji tisafunika kunyindira kuti ndzidzi onsene mapikiro a Mulungu anakwanirisika. Iye alonga: “Nkhabe kwanisika kuti Mulungu alonge uthambi.” (Aheb. 6:18) Ninga ncera wakuti nkhabe bulusa madzi adidi na madzi a munyu mu ndzidzi ubodzi ene, Yahova wakuti ndi Mwanaciro undimomwene nkhabe kulonga uthambi. Natenepa tinakwanisa kunyindira na ntima onsene pinthu pinalonga iye, kuphatanizambo mapikiro ace thangwi ya ntsogolo. Mu nsolo uno tinatawira mibvundzo iyi: Yahova apikira kutipasanji ntsogolo? Pontho asatipasa tani cinyindiro cakuti pidalonga iye pinacitikadi?

 3. (a) Ndi pikiro ipi yakufunika kakamwe kuna atumiki a Mulungu? (Apokalipse 21:3, 4) (b) Anango asatawira tani tingaapanga pikiro ineyi?

³ Pikiro inafuna ife kupfundza ndi yakufunika kakamwe kuna atumiki a Mulungu pa dziko yapantsi. (Lerini Apokalipse 21:3, 4.) Yahova apikira kuti unafika ndzidzi wakuti “nkhabe kudzaonekabve kufa, nee kutsukwala, nee kulira, nee kubva kupha.” Azinji a ife tisaphatisira vesi ineyi toera kubalangaza anthu anamwazira ife mphangwa na kuapangiza kuti umaso unakhala tani Mparaizu. Mphapo anthu anango asatawira tani tingaapanga pikiro ineyi? Panango iwo analonga kuti: “Pinthu pyenepi ndi pyakutsandzayisa, mbwenye nee ndisatawira kuti pinacitikadi.”

 4. (a) Pidapikira Yahova Paraizu, ninji pikhadziwa iye thangwi ya ntsiku zino? (b) Kusiyapo kucita pikiro, ndi pinthu pipi pinango pidacita Yahova?

⁴ Mwandimomwene, pidatsogolera Yahova mpostolo Juwau toera kulemba pikiro ineyi ya umaso Mparaizu, iye akhadziwa kuti lero mbatidapangambo anthu anango pikiro ineyi pakumwaza mphangwa za Umambo. Yahova akhadziwambo kuti mbapidakhala pyakunentsa kuna anthu anango toera kukhulupira kuti pinthu pyenepi pinadzacitikadi. (Iza. 42:9; 60:2; 2 Akor. 4:3, 4) Mphapo tinakhala tani na cinyindiro cakuti pikiro ya Yahova inalongwa pa Apokalipse 21:3, 4 inakwanirisikadi, pontho tinaphedza tani anango toera akhale na cinyindiro cibodzi cene? Yahova apereka mathangwi adidi kakamwe anatipasa cinyindiro cakuti iye anakwanirisa pikiro ineyi. Ndi mathangwi api adapereka iye?

 5. Ndi mathangwi api ali na ife toera kunyindira pikiro ya Mulungu thangwi ya Paraizu, pontho tinaagumana kupi?

⁵ Ife tisagumana mathangwi toera kunyindira pikiro ya Yahova thangwi ya Paraizu pa vesi 5 na 6. Iwo asalonga: “Ule akhali pa mpando waumambo alonga: ‘Ona! Ine ndiri kucita pinthu pyonsene kudza pipswa.’ Iye alongambo: ‘Lemba, thangwi mafala anewa ndi akunyindirika na andimomwene.’ Pontho iye andipanga: ‘Pyamala kucitika! Ine ndine Alfa na Omega, wakutoma na wakumalisa.’”—Apok. 21:5, 6a.

 6. Thangwi yanji mafala anagumanika pa Apokalipse 21:5, 6 asatiphedza toera kunyindira kakamwe pikiro ya Mulungu?

⁶ Thangwi yanji mafala anewa asatiphedza toera kunyindira kakamwe mapikiro a Mulungu? Bukhu Clímax de Revelação yalonga tenepa thangwi ya mavesi anewa: “Pyakhala ninga Yahova asinari dhokumento inapangiza kuti mwakukhonda penula, iye anakwanirisa mapikiro adacita iye kuna anthu akukhulupirika.”b Pa Apokalipse 21:3, 4 tisaleri mapikiro a Mulungu, mbwenye pa vesi 5 na 6, tisagumana cinyindiro cakuti mapikiro anewa anadzakwanirisika. Natenepa tendeni tidinge mavesi anewa toera tione kuti thangwi yanji tinakwanisa kunyindira Yahova.

 7. Mbani adatoma kulonga mafala anagumanika pa vesi 5, pontho thangwi yanji mafala anewa ndi akupambulika?

⁷ Vesi 5 isatoma na mafala awa: “Ule akhali pa mpando waumambo alonga.” (Apok. 21:5a) Mafala anewa ndi akupambulika thangwi unoyu ndi ubodzi mwa maulendo matatu anagumanika m’bukhu ya Apokalipse akuti Yahova alonga mukuphatisira masomphenya. Mafala anewa nee alongwa na anju, nee na Yezu, mbwenye ndi Yahova adaalonga! Pyenepi pisapangiza kuti tinakwanisa kunyindira na ntima onsene mafala anango adalonga iye pa vesi ineyi. Thangwi yanji? Thangwi Yahova “nkhabe kulonga uthambi.” (Tito 1:2) Natenepa, mafala anagumanika pa Apokalipse 21:5, 6 ndi akunyindirika.

 8. Yahova apangiza tani kuti anadzakwanirisa pikiro yace? (Izaiya 46:10)

⁸ Buluka penepo Yahova alonga: “Ona!” (Apok. 21:5) Fala Yacigerego yakuti “ona!” yaphatisirwa kazinji kene m’bukhu ya Apokalipse. Bukhu inango yalonga kuti fala ineyi isaphatisirwa “toera kucitisa nyakuleri kukhala na cifuno cakuleri mwadidi mphangwa zinatowera.” Ndi mafala api anatowera? Mulungu alonga: “Ine ndiri kucita pinthu pyonsene kudza pipswa.” Mwandimomwene Yahova ali kulonga pinthu pinafuna kucitika ntsogolo, mbwenye kuna iye pikiro ineyi iri kukwanirisika, thangwi mwakukhonda penula inakwanirisikadi.—Lerini Izaiya 46:10.

 9. (a) Mafala akuti “ndiri kucita pinthu pyonsene kudza pipswa” asapangiza pinthu pipi piwiri? (b) Ninji pinafuna kudzacitika na “kudzulu kwakale” na “dziko yapantsi yakale”?

⁹ Tendeni tione mafala anagumanika pa Apokalipse 21:5 akuti: “Ine ndiri kucita pinthu pyonsene kudza pipswa.” Kapitulu ineyi ya Bhibhlya isalonga pinthu piwiri pinafuna kucita Yahova: Cakutoma, Yahova anadzafudza dziko ino yakale. Caciwiri, iye anadzabweresa dziko ipswa. Lemba ya Apokalipse 21:1 isalonga: “Kudzulu kwakale na dziko yapantsi yakale pikhadapita.” “Kudzulu kwakale” ndi mautongi anatsogolerwa na Sathani na madimonyo ace. (Mat. 4:8, 9; 1 Juw. 5:19) M’Bhibhlya, fala yakuti “dziko” isaphatisirwa toera kulonga anthu anakhala pa dziko yapantsi. (Gen. 11:1; Mas. 96:1) Natenepa mafala akuti “dziko yapantsi yakale” ndi anthu anakhonda kutumikira Mulungu ntsiku zino. Yahova nee anasasanyira basi ene “kudzulu” na “dziko,” mbwenye anadzapifudza. Kudzulu kwakale na dziko yapantsi yakale pinadzapitirwa mbuto na “kudzulu kupswa na dziko yapantsi ipswa;” pyenepi pisabveka utongi upswa na anthu akulungama.

10. Ndi pinthu pipi pinafuna kudzacita Yahova kudza pipswa?

¹⁰ Ndi munjira ipi Yahova anacita pinthu pyonsene kudza pipswa? (Apok. 21:5) Yahova anamalisa uipi pa dziko yapantsi mbacitisa anthu kukhala aungwiro. Pontho iye anadzacitisa dziko yapantsi kukhala yakubalika ninga munda wa Edheni. Kusiyapo pyenepi, iye anadzaticitisa kukhala na ungumi wadidi kakamwe. Anyakulamala, maboliboli, anyakukhonda kubva anadzawangiswa, pontho ale adafa anadzalamuswa muli akufa.—Iza. 25:8; 35:1-7.

11. Ndi pinthu pipi pidapangwa Juwau toera kucita, pontho thangwi yanji?

¹¹ Ndi pinthu pipi pinango pidalonga Mulungu toera kutipasa cinyindiro? Iye apanga Juwau: “Lemba, thangwi mafala anewa ndi akunyindirika na andimomwene.” (Apok. 21:5) Yahova nee apereka ntemo basi ene toera ‘alembe.’ Mbwenye iye alongambo mathangwi toera kucita pyenepi. Iye alonga: “Thangwi mafala anewa ndi akunyindirika na andimomwene.” Pyenepi pisabveka kuti mafala a Mulungu ndi akunyindirika na andimomwene. Ife tisapereka takhuta thangwi Juwau abvera ntemo unoyu ‘mbalemba.’ Na thangwi ineyi, ife tinakwanisa kuleri mapikiro a Mulungu thangwi ya Paraizu mbatinyerezera nkhombo zinafuna kukhala na ife ntsogolo.

12. Thangwi yanji Yahova alonga kuti ‘mafala anewa akwanirisika’?

¹² Buluka penepo Mulungu alonga: ‘Amala kukwanirisika!’ (Apok. 21:6) Thangwi yanji Yahova alonga kuti mapikiro anewa amala kukwanirisika? Thangwi nkhabe cinthu cinafuna kumpingiza toera kucita pinafuna iye. Yahova alongambo cinthu cinango cinatipasa cinyindiro cakuti pikiro yace inakwanirisika. Ndi cipi cinthu ceneci?

13. Thangwi yanji Yahova alonga kuti “ine ndine Alfa na Omega”?

¹³ Mu ndima zakutoma taona kuti Yahova alonga na Juwau katatu kubulukira m’masomphenya. (Apok. 1:8; 21:5, 6; 22:13) M’maulendo anewa matatu Yahova alonga: “Ine ndine Alfa na Omega.” Alfa ndi letra yakutoma ya alfabheto Wacigerego, pontho Omega ndi letra yakumalisa. Pidaphatisira iye mafala akuti “Alfa na Omega,” Yahova apangiza kuti angalonga cinthu, asacicita.

14. (a) Ndi mu ndzidzi upi udalonga Yahova “Alfa,” pontho ndi mu ndzidzi upi unafuna iye kudzalonga “Omega”? (b) Mafala anagumanika pa Genesi 2:1-3 asatipasa cinyindiro cipi?

¹⁴ Yahova apanga Adhamu na Eva cifuniro cace kuna anthu na dziko yapantsi. Bhibhlya isalonga: “Mulungu aapasa nkhombo mbaapanga: ‘Balanani, munjipe, dzadzani dziko yapantsi mbamuitsalakana.’” (Gen. 1:28) Pidalonga Yahova mafala anewa pikhali ninga alonga “Alfa.” Unadzafika ndzidzi wakuti anthu aungwiro na akubvera anadzadza dziko yapantsi mbaicitisa kukhala paraizu. Pa ndzidzi unoyu pinadzakhala ninga Yahova alonga “Omega.” Pidamala iye kucita “kudzulu, dziko yapantsi na pinthu pyonsene piri mwenemu” Yahova atipasa cinyindiro cakuti anakwanirisa cifuniro cace. Cinyindiro ceneci cisagumanika pa Genesi 2:1-3. (Lerini.) Yahova alonga kuti ntsiku yacinomwe mbidakhala yakucena kuna iye. Pyenepi pisabvekanji? Pisabveka kuti cifuniro ca Yahova kuna anthu na dziko yapantsi cinadzakwanirisika pakumala kwa ntsiku yacinomwe.

15. Thangwi yanji Sathani anyerezera kuti mbadakwanisa kupingiza Yahova toera kukwanirisa cifuniro cace?

¹⁵ Pidakhonda bvera Adhamu na Eva, iwo akhala anyakudawa mbabweresambo madawo na kufa kuna anawo. (Aroma 5:12) Na thangwi ineyi, pikhaoneka ninga Yahova nee mbadakwanirisa cifuniro cace ca kudzadza dziko yapantsi na anthu aungwiro na akubvera. Kodi Sathani akwanisa kupingiza Yahova toera akhonde kukwanirisa cifuniro cace? Panango iye akhanyerezera kuti Yahova nee mbadakwanirisa cifuniro cace. Kusiyapo pyenepi, iye akhanyerezera kuti Mulungu mbadapha Adhamu na Eva mbacita banja inango yaungwiro toera kukwanirisa cifuniro Cace. Mbwenye Mulungu mbadacita pyenepi, Sathani mbadalonga kuti iye ndi nyauthambi. Thangwi yanji? Thangwi pa Genesi 1:28, Yahova akhadapanga Adhamu na Eva toera abalane mbadzadza dziko yapantsi. Na thangwi ineyi, pikhaoneka ninga Yahova nee mbadakwanirisa cifuniro cace.

16. Thangwi yanji Sathani panango anyerezera kuti mbadalonga kuti Yahova acimwana kukwanirisa pikiro yace?

¹⁶ Ndi cisankhulo cipi cinango cikhanyerezera Sathani kuti panango Mulungu mbadacicita? Panango akhanyerezera kuti Yahova mbadatawirisa Adhamu na Eva kubala ana akusowa ungwiro akuti cipo mbadakhala aungwiro. (Ekle. 7:20; Aroma 3:23) Ana a Adhamu na Eva mbadakhonda kukhala aungwiro, Sathani mbadalonga kuti Yahova acimwana kukwanirisa cifuniro cace, pontho dziko yapantsi nee mbidadzala na anthu aungwiro.

17. Yahova acitanji pidakhonda kubvera Sathani, Adhamu na Eva, pontho ninji pinafuna kudzacitika thangwi ya pyenepi? (Onanimbo foto.)

¹⁷ Sathani nee akhadziwa pikhafuna kucita Yahova. Yahova akhali na njira yadidi toera kukwanirisa cifuniro cace maseze Sathani, Adhamu na Eva nee ambvera. (Mas. 92:5) M’mbuto mwakupangiza kuti ndi nyauthambi, Yahova apangiza kuti ndi waundimomwene mukutawirisa Adhamu na Eva toera akhale na ana. Pontho Yahova apangiza kuti angalonga kuti anacita cinthu nkhabe cinafuna kumpingiza toera acite cinthu ceneci. Iye acita pyonsene toera akwanirise cifuniro cace mukucitisa kuti paoneke “dzindza” yakuti mbidapulumusa ana akubvera a Adhamu na Eva. (Gen. 3:15; 22:18) Sathani panango adzumatirwa na masasanyiro a ciomboli adacita Yahova. Thangwi yanji? Thangwi ciomboli cisapangiza ufuni wandimomwene wa Yahova. (Mat. 20:28; Juw. 3:16) Sathani nee ali nawo n’khaliro unoyu. Iye ndi wakusowa ufuni. Mphapo ninji pinafuna kucitika thangwi ya masasanyiro a ciomboli? Kunkhomo kwa Pyaka Cikwi, anthu aungwiro na akubvera anadzakhala pa dziko yapantsi ninga pikhafuna Yahova pakutoma. Pa ndzidzi unoyu pinadzakhala ninga Yahova alonga “Omega.”

18. Ndi mathangwi api matatu anatipasa Yahova toera kunyindira mapikiro ace? (Onanimbo bokosi ya nsolo wakuti “Mathangwi Matatu Toera Kunyindira Pikiro ya Yahova.”)

¹⁸ Mu nsolo uno taona mathangwi anaticitisa kunyindira kuti dziko yapantsi inadzakhala Paraizu. Mphapo tinalonganji kuna anango toera akhalembo na cinyindiro cakuti pyenepi pinacitikadi? Cakutoma, adacita pikiro ineyi ndi Yahova. Bukhu ya Apokalipse isalonga: “Ule akhali pa mpando waumambo alonga: ‘Ona! Ine ndiri kucita pinthu pyonsene kudza pipswa.’” Yahova ali na udziwisi, mphambvu na cifuno cakukwanirisa pikiro yace. Kusiyapo pyenepi, Yahova asadziwa kuti anacita pidalonga iye. Na thangwi ineyi iye alonga: ‘Mafala anewa ndi akunyindirika na andimomwene. Iwo akwanirisika kale.’ Pontho nkhabe cinthu cinafuna kucimwanisa Yahova kucita pinafuna iye. Na thangwi ineyi, iye alonga: “Ine ndine Alfa na Omega.” Yahova anapangiza kuti Sathani ndi nyauthambi, pontho iye nee anakwanisa kupingiza Yahova toera kukwanirisa cifuniro cace.

19. Munacitanji anthu angapenula pikiro ya Mulungu thangwi ya Paraizu?

¹⁹ Kumbukani, mungapanga anthu pidalonga Yahova toera kutipasa cinyindiro cakuti iye anakwanirisa mapikiro ace, imwe munan’nyindira kakamwe. Natenepa, munacitanji mungaleri thangwi ya pikiro yakuwangisa inalonga pya Paraizu inagumanika pa Apokalipse 21:4, munthu mbalonga kuti pyenepi nee ndi pyandimomwene? Imwe munakwanisa kuleri na kufokotoza vesi 5 na 6 kuna anthu anewa. Pangizani kuti Yahova atipasa cinyindiro cakuti anakwanirisa pikiro yace ninga kuti alemba asinatura yace pa dhokumento.—Iza. 65:16.