Ntundu Upswa Wa Cakudya

KODI mungakwanise kulonga kuti ndi ninji pinalokota anthu awa pantsi? Pyenepi pyalandana na nkhungu. Mphyakucena, na pyakuphaphatika, na pyakunyedzeka. Mbwenye si nkhungu tayu; ndi pinthu pyakudya.

Pakhadapita mwezi ubodzi basi kutomera nzidzi udabuluka Aisrayeli ku Ijitu. Iwo ali m’thando. Mwenemo mukhali na pyakudya pyakucepa, na thangwi ineyi mbumba ikhadungunya, mbilonga: ‘Mbukudakhala mwadidi Yahova mbadatiphera m’Ijitu. Mwenemule mbwenyebve tikhali na pyakudya pyonsene pikhafuna ife.’

Natenepa Yahova alonga: ‘Ndinadzagwesa cakudya kubulukira kudzulu.’ Pyenepi ndipyo pidacita Yahova. Namacibese mwace mudaona Aisrayeli pinthu pyenepi pyakucena pikhadagwa, iwo abvunzana: ‘Kodi ndi ninji pyenepi?’

Mozese alonga: ‘Ici ndi cakudya cidakupasani Yahova kuti mudye.’ Mbumba yacicemera MANA. Ceneci cinaudzipi ninga mabulaxa akucitwa na uci.

Mozese apanga mbumba: ‘Musafunika kulokota akukwana kudya munthu mbodzi na mbodzi.’ Natenepa namacibese onsene iwo acita pyenepi. Mbwenye mukapisa dzuwa, mana akusala pantsi akhanyunguluka.

Mozese alongambo: ‘Nee mbodzi asafunika kukoya mana mpaka mangwana mwace.’ Mbwenye anthu anango hadabvera tayu. Kodi musadziwa pikhacitika? Namacibese mwace, mana akukoiwa ale akhadzala na mboza, mbatoma kununkha!

Mbwenye ikhalipo ntsiku ibodzi pa sumana, idapanga Yahova mbumba kuti ikwate mana mwakuphindikiza. Ineyi ndi ntsiku yacitanthatu. Na Yahova aipanga kuti ikoye anango towera mangwana mwace, thangwi iye nee mbadadzagwesa mana pa ntsiku yacinomwe tayu. Mukhakoya iyo mana mpaka pa ntsiku yacinomwe, nee akhadzala na mboza pina nee akhanunkha tayu! Ici ndi cirengo cinango!

M’piaka pyonsene pidakhala Aisrayeli m’thando Yahova akhaadyesa na mana.