Mardi 23 décembre
Mbi leke ti sara ni awe, mbi yeke sara ni.—És. 46:11.
Na ndoye Jéhovah atokua kozo Molenge ti lo na sese ti fa na azo tënë na ndö ti Royaume ni nga ti mû fini ti lo tongana ye so a futa ti zi e na gbe ti siokpari nga na kuâ. Na pekoni, Jéhovah azingo Jésus na kuâ ti gue na yayu ti komande tongana Gbia ti Royaume ti Nzapa. Kota mama-tene ti Bible ayeke so: A yeke zi ande zonga so a bi na ndö ti iri ti Jéhovah na ngoi so lo yeke sara si ye so lo leke na bê ti lo ti sara ndali ti sese aga tâ tënë na lege ti Royaume ti lo na gbe ti komandema ti Christ. Ye so Jéhovah aleke ti sara apeut ti changé ape. Lo tene so ye kue ayeke si tâ gï tongana ti so lo tene (És. 46:10, kete tënë na gbe ni; aHéb. 6:17, 18). Sese ayeke ga ande Paradis, ndo so ahale ti Adam na Ève so ayeke mbilimbili-kue nga so ayeke sara ye na lege ni ayeke “ngbâ na fini lakue lakue” dä (Ps. 22:26). Me ye kue so Jéhovah ayeke sara ande la ape. Lo yeke sara ande nga si awakua ti lo kue so ayeke na yayu nga na sese aduti beoko. Na pekoni, ala kue ayeke mä ande yanga ti Jéhovah so ayeke Gbia ti ala (aÉph. 1:8-11). Pendere fason so Jéhovah asara si ye so lo leke na bê ti lo ti sara aga tâ tënë apika bê ti mo ape? w23.10 20 par. 7-8
Mercredi 24 décembre
“Ala sara ye tongana koli, . . . biani, mbi yeke na ala,” tënë ti yanga ti Jéhovah ti aturugu la.—Ag. 2:4.
Kete na peko ti so aJuif so alondo na Babylone asi na Jérusalem, ala komanse ti wara kpale ti bâ lege ti azo ti sewa ti ala. Wusuwusu ayeke lani na yâ ti kodro-togbia ti Perse, nga amara so angoro ala ake ala. A yeke lani ngangu na ambeni ti zia li ti ala na ndö ti kua ti lekengo peko ti temple ti Jéhovah. Tongaso, Jéhovah atokua aprophète use, Aggée na Zacharie, ti aidé azo ni ti kiri ti yapu na yâ ti kua ni so aga na nzoni ye (Ag. 1:1; Zach. 1:1). Me, nduru na ngu 50 na pekoni, aJuif so akiri lani ayeke na bezoin ti tene a kiri a kpengba ala. Esdras, so ahinga ti sû peko ti Ndia ni pendere mingi, alondo na Babylone ti gue na Jérusalem ti wa awakua ti Nzapa ti zia vorongo Jéhovah kozo na yâ ti fini ti ala (Esdras 7:1, 6). Legeoko tongana ti so aprophétie ti Aggée na Zacharie a-aidé awakua ti Jéhovah ti ândö ti ngbâ ti sara confiance na Jéhovah na ngoi so a kanga lege na ala, aprophétie so apeut ti aidé nga e laso ti ngbâ ti duti na confiance so Jéhovah ayeke aidé e na angoi ti kpale.—aProv. 22:19. w23.11 14-15 par. 2-3
Jeudi 25 décembre
Ala yü ndoye, ndali ti so ndoye ayeke kamba so abungbi ye mbilimbili.—aCol. 3:14.
Tongana nyen la e yeke fa so e ye aita ti e? Mbeni lege ni ayeke ti dë bê ti ala (1 aThes. 4:18). E yeke wara lege ti “ngbâ ti dë bê ti mba” tongana e bâ mawa ti mba. Tongana nyen la e peut ti ngbâ ti ye terê ngangu? Tongana e pardonné afaute ti aita ti e même tongana a yeke ngangu na e ti sara ni. Ngbanga ti nyen la a yeke mbilimbili kota ye laso ti fa so e ye aita ti e? Bâ raison so Pierre afa, lo tene: “Nda ti aye kue aga nduru awe. Tongaso, . . . ala ndoye terê ngangu na popo ti ala.” (1 Pi. 4:7, 8). Na ngoi so hunzingo ti sioni dunia so ayeke pusu nduru nduru, nyen la e peut ti ku ti tene a si? Jésus atene na ndö ti adisciple ti lo, lo tene: “Amara kue ayeke ke ala ndali ti iri ti mbi.” (Mat. 24:9). Ti ngbâ be-ta-zo na Jéhovah atâa so azo ake e, e bezoin ti ngbâ ti duti beoko. Tongana e sara tongaso, Satan ayeke wara lege lâ oko ape ti kangbi popo ti e ndali ti so ndoye la abungbi e oko.—aPhil. 2:1, 2. w23.11 13 par. 18-19