Awakua ti mungo maboko ayeke sara akota kua mingi na yâ ti congrégation. Bazengele Paul abâ akoli so, so ayeke be-ta-zo, na nene ni mingi. Na tapande, na ngoi so lo yeke sû lani mbeti na aChrétien ti Philippes, lo bara awakua ti mungo maboko nga na a-ancien (aPhil. 1:1). Aita-koli mingi so awara batême awe, atâa so ala yeke maseka wala ala ga mbakoro, ayeke na ngia mingi ti sara kua tongana awakua ti mungo maboko. Na tapande, Devan ayeke lani na ngu 18 na ngoi so lo ga wakua ti mungo maboko. Me Luis aga lani wakua ti mungo maboko na ngoi so lo hon ngu 50. Lo fa na nduru tënë atënë ti bê ti awakua ti mungo maboko mingi na lege ti tënë so: “Mbi bâ so a yeke mbeni kota pasa ti sara kua tongana wakua ti mungo maboko, mbilimbili tongana mbi gbu li na ndö ti aye kue so aita ti congrégation asara na mbi na ndoye.” Tongana mo yeke mbeni ita-koli so awara batême awe me ade mo ga wakua ti mungo maboko ape, eskê mo peut ti gi ti ga ni? w24.11 14 par. 1-3

Na ngoi so Ézéchias, gbia ti Juda, ayeke lani na ngu 39, terê ti lo ason ngangu. Jéhovah atokua prophète Ésaïe ti tene na Ézéchias so kobela ni ayeke fâ lo (2 aGbia 20:1). Na bango ni, ti lo ahunzi awe. Vundu asara lo mingi na lo toto ngangu. Lo voro yanga na Jéhovah ti aidé lo. Na ngoi so Jéhovah amä sambela ti Ézéchias nga lo bâ ngu ti lê ti lo, mawa ti lo asara lo na lo tene na lo: “Mbi mä sambela ti mo ni awe. Mbi bâ ngu ti lê ti mo so ayuru. Mbi yeke sara si mo sava.” Na lege ti Ésaïe, na nzoni bê Jéhovah amû zendo ti zia ambeni ngu na ndö ti lango ti fini ti Ézéchias nga ti sö Jérusalem na maboko ti azo ti Assyrie (2 aGbia 20:​4-6). Eskê mo yeke na mbeni kpale ti seni so na bango ni mo yeke wara sava ape? Fa na Jéhovah tënë ti bê ti mo, lo yeke mä mo même tongana mo yeke toto na ngoi so mo yeke sambela lo. Bible atene na e so “Babâ so ayeke sara nzoni bê mingi na zo nga Nzapa ti dengo bê kue” ayeke dë bê ti e na yâ ti atara kue so e wara.—2 aCor. 1:​3, 4. w24.12 24 par. 15-17

Terê ti e ayeke nzere ande mingi ti yamba azo so a zingo ala na kuâ. Imaginé nga tongana nyen la a yeke nzere ande na mo ti manda ye mingi na ndö ti Jéhovah na bango gbâ ti aye so lo créé (Ps. 104:24; És. 11:9). Ye so ayeke pendere mingi ayeke so a yeke nzere ande na e mingi ti voro Jéhovah na ti bâ so tënë ayeke na li ti e ape. Eskê mo yeke dö apendere ye so kue ti zia ti “wara ngia na yâ ti siokpari gï ndali ti kete ngoi”? (aHéb. 11:25). Oko ape! Atufa so ayeke nzoni ahon sacrifice kue so e peut ti sara laso. Girisa ape so Paradis ayeke duti lakue ye so e yeke ku ni kungo ape, me a yeke ga tâ ye. E peut ti wara aye so kue ndali ti so Jéhovah aye e mingi nga lo mû Molenge ti lo tongana ye so a futa ti zi azo. w25.01 29 par. 12