Lyo rhuyoboha Yehova bwenene, rhushinganine rhukalonza okumusimisa omu ngasi muhigo rhurhôzire. Amango oli wasoma emyanzi y’Ebibliya, okacidosa ntya: ‘Ncibage mw’aka kanga, muhigo guhi nakarhôzire?’ Kwa lwiganyo, ocibone omu bwenge oli wayumvirhiza abakulu ikumi Baisraheli amango bali bahâna eraporo y’obunywesi enyuma z’okuyenja ecihugo Yehova al’ilaganyize okuha Abaisraheli. Ka wakayemire eyo raporo n’okuyoboha bene bantu, erhi k’obuzigire bwawe kuli Yehova n’irala ly’okumusimisa byakarhumire wahima oboba bwa bene bantu? Er’iburha lyoshi ly’Abaisraheli lyayabirwa okumanya oku Yozwe na Kalebu bal’idesire okuli. Enyanya z’oko, baheza obulyo bw’okuja omu Cihugo c’Amalaganyo.​—Mib. 14:10, 22, 23. w24.07 buk. 10 cif. 7

Gomeri, muka omulebi Hozeya, aleka Hozeya ashimba abandi balume. Ka birhankacihashikine ashanje? Yehova ojira obuhashe bw’okusoma emirhima, abwira Hozeya ntya: “Genda kandi, ozigire omukazi ozigirwa n’iba n’obwo eri mbaraga, nka kula niono Nyakasane [Yehova, NWT] nzigira bene Israheli n’obwo bàshizire abandi bandi banyamuzinda.” (Hoz. 3:1; Mig. 16:2) Obwine oku muka Hozeya acikag’ijira ecaha cizibu. Cikone, Yehova abwira Hozeya ajimulonza, amubabalire anashub’iyumvikana naye. Ko n’oko, Yehova arhalekaga abantu bage bali ba cikanyi cirhagomba. Ciru akaba bakag’ijira ebyaha bizibu bwenene, agendekire abazigira anagendekera acihangana okubarhabala lyo baciyunjuza n’okushanja enjira zabo. Olo lwiganyo luyerekine oku, bulya “emirhima yohe Nyakasane [Yehova, NWT] oyirhangula” agendekera acihangana okurhabala omuntu ocigendekire ajira ecaha cizibu ly’aciyunjuza. w24.08 buk. 10 cif. 7

Abayahudi b’omu myaka igana mirhanzi bahikiraga okuba Bakristu bal’igwasirwe bajire empindulo nnene, n’okujira ntyo kurhali kulembu. Mango malebe Abayahudi lo lwali lubaga Yehova al’icishozire. Evile y’e Yeruzalemu mwo mwali abami bakag’irhegeka omu izino lya Mungu, n’ehekalu yalimwo ho hali hantu h’obulagirire h’enterekêro ecîre. Abayahudi bishwekerezi boshi bakag’ikulikira Irhegeko lya Musa n’amarhegeko gakag’iyigirizibwa n’ebirongozi byabo by’amadîni. Hali amarhegeko lugenda ebiryo, okukembulwa, na lugenda oku bal’igwasirwe bakajirira abantu barhali Bayahudi. Cikone, enyuma z’okufâ kwa Yezu, Yehova arhacigendekeraga ayemera enterekêro z’Abayahudi. Co cirhumire kurhali kulembu oku Bayahudi babaga Bakristu, okushanja enjira yabo y’okuharamya. (Hb. 10:1, 4, 10) Ciru n’Abakristu bal’ikuzire kiroho, nk’entumwa Petro, bal’igwerhe amazibu g’okucipatanisa na mpindulo ndebe. (Ebj. 10:9-14; Gl. 2:11-14) Enyanya z’obuyemere bwabo buhyahya, abo Bakristu barhondera okulibuzibwa n’ebirongozi by’idîni ly’Eciyahudi. w24.09 buk. 9 cif. 4