Lwa Kabirhi, Nsiku 4 Mwezi gwa 8
Banankuze n’akanwa kône, n’obwo omurhima gwabo guli kuli na nani.—Iz. 29:13.
Omuntu olonzize ayemerwe na Yehova, agwasirwe ‘akaderha eby’okuli nk’oku binali omu murhima gwage.’ (Enna. 15:2) Oko kuhugwîre binji ahanyuma n’okurhaderha obunywesi. Yehova alonzize rhube bikubagirwa omu bintu byoshi. (Hb. 13:18) Oko kuli kwa bulagirire “bulyala abahalanjisi [abarhali bikubagirwa] Nyakasane [Yehova, NWT] arhababâkwo, abantu nkana bwo arhonya.” (Mig. 3:32) Abantu baderha ‘eby’okuli nk’oku binali omu murhima gwabo’ barhayerekana nka baba ba kurhumikira amango bali omu bantu banji n’obu banavune amarhegeko ga Mungu amango bali bo nnene. Banayake okujira ebintu omu njira erhali ya bwikubagwirwa. Omuntu orhali mwikubagwirwa anarhondera arhanya oku marhegeko maguma na maguma ga Yehova garhaba ga bwenge. (Yk. 1:5-8) Anabula burhumikira Yehova omu bintu arhanyize oku birhali bya bulagirire bwenene. Muli ntyo, erhi byakabonekana nka okurharhumikira kwage kurhamulerhere amazibu, anagendekera avuna amarhegeko ga Mungu n’enterekêro yage yanaba ya bulyalya. (Muh. 8:11) Cikone, rhulonzize rhube bikubagirwa omu ngasi kantu. w24.06 buk. 10 cif. 7-8
Lwa Kasharhu, Nsiku 5 Mwezi gwa 8
Muyimangire kuli gombi! Okuli gube gwo mukaba gwinyu.—Ef. 6:14.
Abantu ba Yehova baba bazigire okuli kuba omu Kanwa kage. Obuyemere bwirhu buba buyimangire oku Kanwa kage. (Rm. 10:17) Rhwahikire aha rhwayemera oku Yehova ahizireho ecigamba c’Ecikristu nka go “mutungo co na ciriba c’okuli.” (1 Tm. 3:15) Nta kandi kantu Shetani akacifinja kulusha okurhujira rhuleke okulangalira Ebibliya erhi obulongozi rhuhâbwa n’ikubuliro lya Mungu. (Ef. 4:14) Hano hofi-hofi, Ibilisi akolesa emyanzi midarhi y’obunywesi ly’arheba amashanja goshi gahagalike Yehova. (Maf. 16:13, 14) Kandi rhumanyire oku Shetani ayushula obushiru bwage ly’alonza okurheba abantu ba Yehova. (Maf. 12:9) Co cirhumire, kuli kwa bulagirire rhucikomereze okumanya olubero egarhi k’okuli n’enyigirizo z’obunywesi n’okurhumikira okuli. (Rm. 6:17; 1 Pt. 1:22) Okujira ntyo kwayish’irhuma rhwayokoka amango g’amalibuko madarhi! w24.07 buk. 8 cif. 1-3
Lwa Kani, Nsiku 6 Mwezi gwa 8
Okukenga aga marhegeko, kurhankamuyabira, bulya garhamuli kuli.—Lush. 30:11, Mashi Bible.
Erhi Yehova apanga Abaisraheli lyo baba ishanja, ajira endagano haguma nabo banayiyemera. Bacigendekerage bakenga amarhegeko gage, akabalanzire n’okubagisha. Cikone bacimugomerage, kwa lwiganyo omu kucishoga okuharamya abandi bamungu, akabayimire emigisho yage, na ntyo bakalibusire. Cikone oko kurhali kuderha oku Yehova akabakabulire loshi-loshi. ‘Bakagalusire bashubîrire Nyamubaho, Nyamuzinda wabo, n’okuyumvirhiza izu lyage.’ (Lush. 30:1-3, 17-20) Kuli kuderha oku bakaciyunjuzize. Erhi bakajijire ntyo, Yehova akabayegerire n’okucib’ibagisha. Abantu bishogwa ba Yehova bamugomire kanji-kanji. Enyanya z’oko, balibuka. Cikone Yehova arhalekaga abantu bage bamugomeraga. Arhuma abalebi kanji-kanji lyo bayinginga abantu bage baciyunjuze banamugalukire.—2 Bam. 17:13, 14. w24.08 buk. 9 cif. 4-5