යොහන්

20 සතියේ පළමුවෙනිදා උදා විය.+ එළිය වැටෙන්නත් කලින් මරියා මග්දලේනා සොහොන් ගෙය ළඟට ගියාය. සොහොන් ගෙයින් ගල ඉවත් කර තිබූ ආකාරය ඇයට දැකගත හැකි විය.+ 2 එහෙයින් ඇය දුව ගොස් සීමොන් පේතෘස්වද යේසුස් බොහෝ සෙයින් ප්‍රේම කළ අනික් ගෝලයාවද+ හමු වී ඔවුන්ට මෙසේ කීවාය. “කවුරු හරි අපේ ස්වාමීන්ව සොහොන් ගෙයින් ඉවත් කර තිබෙනවා.+ ඔහුව කොහේ තැන්පත් කළාද කියා අපි දන්නේ නැහැ.”

3 එවිට පේතෘස්+ සහ ඒ අනික් ගෝලයාද සොහොන් ගෙය දෙසට ගියෝය. 4 ඔවුන් දෙදෙනාම එකට දුවන්න පටන්ගත්තත් අනික් ගෝලයා පේතෘස්ට වඩා වේගයෙන් දුව ගොස් ඔහුට පළමුවෙන් සොහොන් ගෙය ළඟට පැමිණියේය. 5 ඔහු එබී බැලූ විට එහි රෙදි පටි බිම තිබෙන ආකාරය දුටුවේය.+ නමුත් ඔහු ඇතුළට ගියේ නැත. 6 ඔහු පසුපසින් පැමිණි සීමොන් පේතෘස් සොහොන් ගෙය ඇතුළටම ගියේය. ඔහු එම රෙදි පටි දුටු අතර,+ 7 යේසුස්ගේ හිසට දමා තිබූ රෙදිකඩ, රෙදි පටි සමඟ නොව වෙනම තැනක අකුළා තිබෙන ආකාරයද දුටුවේය. 8 ඉන්පසු සොහොන් ගෙය ළඟට පළමුවෙන් පැමිණි අනික් ගෝලයාද ඇතුළට ගියේය. ඔහු දුටු දේ නිසා ඔහු තුළ තිබූ සැකය නැති විය. 9 ඒ වන තුරු ශුද්ධ ලියවිල්ලේ සඳහන් ආකාරයට යේසුස් මරණයෙන් නැවත නැඟිටිය යුතු බව ඔවුහු වටහාගෙන සිටියේ නැත.+ 10 ඉන්පසු එම ගෝලයෝ නැවත තම නිවෙස් බලා ගියෝය.

11 කෙසේවෙතත් සොහොන් ගෙය ළඟ සිටි මරියා ඉන් පිටත සිටගෙන හඬමින් සිටියාය. ඇය මෙසේ හඬමින් සොහොන් ගෙය තුළට එබී බැලූ විට, 12 යේසුස්ගේ දේහය තැන්පත් කර තිබූ ස්ථානයේ සුදු වස්ත්‍ර පැළඳ සිටි දේවදූතයන් දෙදෙනෙකු+ ඉඳගෙන සිටින ආකාරය දුටුවාය. එක් කෙනෙක් ඔහුගේ හිස තැබූ පැත්තෙහි සිටි අතර අනික් තැනැත්තා ඔහුගේ පාද තිබුණු පැත්තෙහිද සිටියේය. 13 එවිට ඔවුහු, “ඔබ හඬන්නේ ඇයි” කියා ඇගෙන් ඇසුවෝය. “කවුරු හරි මගේ ස්වාමීන්ව අරගෙන ගිහිල්ලා. ඔවුන් ඔහුව දැන් කොහේ තැන්පත් කළාද කියා මම දන්නේ නැහැ” කියා ඇය ඔවුන්ට පිළිතුරු දුන්නාය. 14 ඉන්පසු ඇය හැරී බැලූ විට යේසුස් සිටගෙන සිටිනවා දුටුවාය. නමුත් ඒ යේසුස් බව ඇය වටහාගත්තේ නැත.+ 15 යේසුස්, “ඔබ හඬන්නේ ඇයි? ඔබ සොයන්නේ කාවද”+ කියා ඇගෙන් ඇසුවේය. ඔහු උයනේ සේවකයෙකු කියා සිතූ ඇය, “මහත්මයාණෙනි, ඔබ ඔහුව ගෙන ගියා නම් ඔහුව තැන්පත් කළේ කොහේද කියා මට කියන්න. එතකොට මට පුළුවන් ඔහුව රැගෙන යන්න” කියා ඔහුට කීවාය. 16 එවිට යේසුස්, “මරියා”+ කියා ඇයට පැවසුවේය. ඇය හැරී ඔහුට හෙබ්‍රෙව් බසින්, “රබ්බෝනි”+ (එනම්, “ගුරුතුමනි”) කියා කීවාය. 17 යේසුස් තමාව අල්ලාගෙන සිටි ඇයට මෙසේ කීවේය. “මම දැන්මම පියාණන් ළඟට යන්නේ නැහැ. ඒ නිසා මාව දැන් අතහරින්න. දැන් මෙතැනින් පිටත් වී මගේ සහෝදරයන් ළඟට ගිහින්,+ ‘මම මගේ පියාණන් හා ඔබේ පියාණන් ළඟටත්+ මගේ දෙවි+ හා ඔබේ දෙවි ළඟටත් යනවා’+ කියා ඔවුන්ට කියන්න.” 18 පසුව මරියා මග්දලේනා ගෝලයන්ව හමු වී, “මම අපේ ස්වාමීන්ව දැක්කා” කියා පවසමින් යේසුස් ඇයට පැවසූ සියල්ල ඔවුන්ට දැන්වූවාය.+

19 සතියේ පළමුවෙනි දවස වූ එදින සවස් වූ විට+ යුදෙව්වරුන්ට* බියෙන් සිටි ගෝලයෝ+ තමන් සිටි ස්ථානයේ දොරවල්වලට අගුලු දමාගෙන සිටියෝය. නමුත් යේසුස් එතැනට ඇවිත්+ ඔවුන් මැද සිටගෙන, “ඔබට සමාදානය වේවා”+ කියා ඔවුන්ට කීවේය. 20 ඉන්පසු ඔහු තම අත්ද ළයට පහළින් ඇති පෙදෙසද ඔවුන්ට පෙන්වූවේය.+ එවිට ගෝලයෝ ස්වාමීන්ව දැකීම නිසා ප්‍රීති වූහ.+ 21 යේසුස් නැවතත් ඔවුන්ට මෙසේ කීවේය. “ඔබට සමාදානය වේවා! පියාණන් මාව එවූ ආකාරයටම+ මමත් ඔබව යවනවා.”+ 22 ඉන්පසු ඔහු ඔවුන් මතට හුස්ම හෙළා ඔවුන්ට මෙසේ කීවේය. “ඔබට දෙවිගේ බලය ලැබෙයි.+ 23 ඒ අනුව ඔබ ඕනෑම කෙනෙකුගේ පව්වලට සමාව දුන්නොත්+ ඔවුන්ට සමාව ලැබෙයි. නමුත් ඔබ යම් කෙනෙකුගේ පව්වලට සමාව නොදුන්නොත් ඔවුන්ට සමාවක් ලැබෙන්නේ නැහැ.”+

24 යේසුස් පැමිණි ඒ අවස්ථාවේදී, දොළොස්දෙනාගෙන් කෙනෙකු වූ නිවුන් දරුවා ලෙස හැඳින්වූ තෝමස්+ ඔවුන් සමඟ සිටියේ නැත. 25 එහෙයින් අනික් ගෝලයෝ ඔහුව හමු වූ විට, “අපි ස්වාමීන්ව දැක්කා” කියා ඔහුට කීවෝය. නමුත් ඔහු, “මම ඒ දේ විශ්වාස කරන්නේ+ ඔහුගේ අත්වල ඇණ සලකුණු දැක, ඔහුගේ ළයට පහළින් ඇති පෙදෙසට මගේ අත තබා බැලුවාට පසුව විතරයි”+ කියා ඔවුන්ට කීවේය.

26 දවස් අටකට පසු යේසුස්ගේ ගෝලයෝ නැවතත් නිවසක රැස්ව සිටියෝය. ඒ අවස්ථාවේදී තෝමස්ද ඔවුන් සමඟ සිටියේය. එම නිවසේ දොරවල්වලට අගුලු දමා තිබුණත් යේසුස් ඇවිත් ඔවුන් මැද සිටගෙන, “ඔබට සමාදානය වේවා”+ කියා කීවේය. 27 ඊළඟට ඔහු තෝමස්ට මෙසේ කීවේය. “ඇවිත් ඔබේ අත් දෙකෙන්ම මගේ අත් අල්ලා බලන්න. ඔබේ අත මගේ ළයට පහළින් ඇති පෙදෙසටත් තබා බලන්න.+ දැන් අවිශ්වාස කරන්නේ නැතුව විශ්වාස කරන්න” කියා කීවේය. 28 තෝමස් පිළිතුරු දෙමින්, “මගේ ස්වාමීනි, මගේ දෙවියනි”*+ කියා ඔහුට කීවේය. 29 යේසුස් ඔහුට මෙසේ කීවේය. “ඔබ විශ්වාස කරන්නේ මාව දුටු නිසාද? ඒත් දකින්නේ නැතුව විශ්වාස කරන අය කොතරම් සන්තෝෂවත්ද!”+

30 ඇත්තෙන්ම මේ ලියවිල්ලෙහි ලියා නැති වෙනත් බොහෝ පුදුම දේවල්ද යේසුස් තම ගෝලයන් ඉදිරියෙහි සිදු කළේය.+ 31 නමුත් මේ දේවල් ලියා තිබෙන්නේ+ යේසුස් දෙවිගේ පුත්‍රයා බවත් ක්‍රිස්තුස් බවත් ඔබට විශ්වාස කිරීමට හැකි වීම සඳහාය. ඒ විශ්වාසය නිසා+ ඔබට ඔහුගේ නාමය මාර්ගයෙන් ජීවනය ලබාගත හැකිය.