ගීතාවලිය

26 යෙහෝවා දෙවියනි, මා ඔබට විශ්වාසවන්තව සිටින බැවින්+ මට යුක්තිය ඉටු කර දෙන්න.+

නොසෙල්වී ස්ථිරව සිටින පිණිස මම යෙහෝවා දෙවි වන ඔබ කෙරෙහි විශ්වාසය තැබුවෙමි.+

 2 යෙහෝවා දෙවියනි, මාව සෝදිසි කරන්න. මා කෙබඳු කෙනෙක්දැයි සෝදිසි කර බලන්න.+

මාගේ ඇතුළාන්ත හැඟීම් සහ සිතුවිලි* තව තවත් පවිත්‍ර කරන්න.+

 3 ඔබේ ප්‍රේමය* නිතරම මා ඉදිරියේ තිබේ.

සත්‍යය නමැති ඔබේ මාර්ගයේ මම ගමන් කරන්නෙමි.+

 4 වංක මිනිස්සුන් සමඟ හිඳ නොගත්තෙමි.+

තමන් කවුදැයි සඟවන අය සමඟ ඇසුරු නොකළෙමි.+

 5 නපුරු මනුෂ්‍යයන්ගේ ආශ්‍රයට මම ද්වේෂ කළෙමි.+

දුෂ්ටයන් සමඟ හිඳ නොගන්නෙමි.+

 6 මාගේ නිදොස් බව පෙන්වීමට මම මාගේ දෑත් සෝදාගන්නෙමි.+

යෙහෝවා දෙවියනි, මම ඔබේ පූජාසනය වටා ඇවිදින්නෙමි.+

 7 මාගේ ස්තුති ප්‍රශංසා සියල්ලන්ට ඇසෙන පිණිසත්+

ඔබේ සියලු පුදුම ක්‍රියා ප්‍රකාශ කරන පිණිසත් එසේ කරන්නෙමි.+

 8 යෙහෝවා දෙවියනි, ඔබ වාසය කරන ඔබේ ගෘහයටද+

ඔබේ තේජස තිබෙන ස්ථානයටද මම බොහෝ සෙයින් ඇලුම් කරමි.+

 9 පව්කාරයන් සමඟ මාගේ ජීවිතය විනාශ නොකරන්න.+

ලේ වැගිරවූ අය සමඟ මාගේ ජීවිතය නැති නොකරන්න.+

10 ඔවුන්ගේ දෑත්වල දුෂ්ටකම* ඇත.+

ඔවුන්ගේ දකුණත අල්ලස්වලින් පිරී ඇත.+

11 නමුත් මම ඔබට විශ්වාසවන්තව ජීවත් වුණෙමි.+

අනේ, මට කරුණාව පෙන්වා+ මාව මුදවාගන්න.+

12 එවිට සමතලා බිමක ගමන් කිරීමට මට හැකි වනු ඇත.+

රැස්ව සිටින සෙනඟ සමඟ මමද යෙහෝවා දෙවි වන ඔබට ප්‍රශංසා කරන්නෙමි.+