පළවෙනි රාජාවලිය
17 ගිලියද් දේශයේ+ තිෂ්බේවල කෙනෙක් වුණ එලියා*+ ආහබ්ට මෙහෙම කිව්වා. “මම සේවය කරන ඊශ්‍රායෙල්වරුන්ගේ ජීවමාන දෙවි වන යෙහෝවා ඉස්සරහා දිවුරලා මම මේ දේ කියනවා. මං අණ කළොත් මිසක් ඊළඟ අවුරුදු කීපයේදී පිනි වැටෙන්නෙවත් වහින්නෙවත් නැහැ.”+
2 ඊටපස්සේ යෙහෝවා දෙවියන් එලියාට මෙහෙම කිව්වා. 3 “දැන් මෙහෙන් යන්න. නැඟෙනහිර පැත්තට ගිහින් යොර්දාන් ගඟෙන් නැඟෙනහිරට වෙන්න තියෙන කේරිත් නිම්නයේ හැංගෙන්න. 4 ඔයාට එතන තියෙන දිය පාරෙන් වතුර බොන්න පුළුවන්. ඔයාට කෑම ගෙනත් දෙන්න කියලා මම කපුටන්ට අණ කරන්නම්.”+ 5 එලියා ඉක්මනින්ම එතනින් ගිහින් යෙහෝවා කියපු විදිහටම කළා. එයා යොර්දාන් ගඟට නැඟෙනහිරෙන් තිබුණ කේරිත් නිම්නයට ගිහින් එහේ හිටියා. 6 කපුටෝ උදේ හවස එයාට රොටියි, මසුයි ගෙනාවා. එයා දිය පාරෙන් වතුර බිව්වා.+ 7 ඒත් දේශයට වැස්ස ලැබුණේ නැති නිසා ටික දවසකට පස්සේ දිය පාර හිඳිලා ගියා.+
8 එතකොට යෙහෝවා එයාට මෙහෙම කිව්වා. 9 “දැන් මෙහෙන් පිටත් වෙලා සීදොන්වල තියෙන සාරෆෙත් නගරෙට ගිහින් එහෙට වෙලා ඉන්න. ඔයාට කෑම දෙන්න කියලා එහේ ඉන්න වැන්දඹුවකට මම කියන්නම්.”+ 10 ඉතින් එලියා සාරෆෙත්වලට ගියා. එයා ඒ නගරයේ දොරටුව ළඟට ආවාම එයා දැක්කා දර අහුල අහුල හිටපු ගෑනු කෙනෙක්ව. එයා වැන්දඹුවක්. එලියා එයාගෙන් මෙහෙම ඇහුවා. “අනේ, මට බොන්න වතුර ටිකක් දෙන්න පුළුවන්ද?”+ 11 එයා වතුර ගේන්න යද්දී එලියා එයාට ආපහු කතා කරලා “අනේ, මට කන්න රොටි කෑල්ලකුත් ගේන්න පුළුවන්ද” කියලා ඇහුවා. 12 එතකොට එයා මෙහෙම කිව්වා. “ඔයාගේ ජීවමාන දෙවි වන යෙහෝවා ඉස්සරහා දිවුරලා මං මේ කියන්නේ, ඔයාට දෙන්න මං ළඟ රොටි නෑ. ලොකු භාජනේක පිටි අහුරකුයි, පුංචි බෝතලේක තෙල් ටිකකුයි විතරයි මං ළඟ තියෙන්නේ.+ මං මේ දර කෝටු ටිකක් අහුලන්නේ පුතාටයි, මටයි කෑම ටිකක් හදාගන්න. ඒක කෑවාට පස්සේ අපි දෙන්නාට වෙන්නෙත් බඩගින්නේ මැරෙන්න.”
13 එලියා එයාට මෙහෙම කිව්වා. “කිසි දේකට බය වෙන්න එපා. ඔයා දැන් ගෙදර ගිහින් ඔයා කරන්න හිතපු දේ කරන්න. හැබැයි මුලින්ම මට කන්න පොඩි රොටියක් ඔයාට තියෙන දේවල්වලින් හදාගෙන එන්න. ඊටපස්සේ ඔයාටයි, පුතාටයි මොනවා හරි හදාගන්න පුළුවන්. 14 මොකද ඊශ්‍රායෙල්වරුන්ගේ දෙවි වන යෙහෝවා මෙහෙම කියනවා. ‘යෙහෝවා ආපහු වැස්ස ගේන කල් ඔයා ළඟ තියෙන ලොකු භාජනේ පිටි ඉවර වෙන්නෙවත් පුංචි බෝතලේ තියෙන තෙල් හිඳිලා යන්නෙවත් නැහැ.’”+ 15 ඉතින් එයා ගිහිල්ලා එලියා කියපු විදිහටම කළා. එයාටයි, එයාගේ පවුලේ අයටයි, එලියාටයි සෑහෙන කාලෙකට කන්න කෑම තිබුණා.+ 16 එලියා මාර්ගයෙන් යෙහෝවා කියපු විදිහටම ලොකු භාජනයේ තිබුණ පිටි ඉවර වුණේවත් පුංචි බෝතලේ තිබුණ තෙල් හිඳිලා ගියේවත් නැහැ.
17 ඒ දේවල් වුණාට පස්සේ එලියාට නවාතැන් දුන්න ඒ ස්ත්‍රියගේ පුතා අසනීප වුණා. ඒ අසනීපය කොච්චර දරුණු වුණාද කියනවා නම් අන්තිමේදී පුතා මැරුණා.+ 18 එතකොට එයා එලියාට මෙහෙම කිව්වා. “සැබෑ දෙවියන්ගේ පණිවිඩකරුවෙක් වන ඔයාට මං මොකක්ද කරපු වරද? ඔයා මෙහෙට ආවේ මගේ පුතාව මරන්නද? මං කරපු වැරදි මට මතක් කරලා දෙන්නද?”+ 19 එතකොට එලියා “ඔයාගේ පුතාව මට දෙන්න” කියලා එයාට කිව්වා. එයාගේ අතේ හිටපු දරුවාව අරගෙන එලියා එයා නවාතැන් ගත්ත උඩුමහල් කාමරේට ගියා. එලියා එයාගේ ඇඳ උඩින් දරුවාව තිබ්බා.+ 20 ඊටපස්සේ එයා කෑගහලා යෙහෝවාට මෙහෙම යාච්ඤා කළා. “අනේ මගේ දෙවි යෙහෝවා,+ මට නවාතැන් දුන්න මේ වැන්දඹුවට දුක් විඳින්න ඔයා ඉඩ දෙනවාද? ඔයා එයාගේ පුතාට මැරෙන්න ඉඩහැරියේ ඇයි?” 21 ඊටපස්සේ එයා නැමිලා දරුවාව තුන් පාරක් බදාගෙන යෙහෝවාට මෙහෙම කන්නලව් කළා. “අනේ මගේ දෙවි යෙහෝවා, මේ දරුවාට ආයෙත් ජීවිතේ දෙන්න.” 22 යෙහෝවා එලියාගේ ඉල්ලීමට සවන් දුන්නා.+ දරුවාට ආයෙත් ජීවිතේ ලැබුණා.+ 23 එලියා දරුවාව වඩාගෙන උඩුමහල් කාමරේ ඉඳන් පහළට ඇවිල්ලා “මේ බලන්න, ඔයාගේ පුතා ජීවත් වෙනවා”+ කියලා දරුවාව අම්මාට දුන්නා. 24 එතකොට ඒ ස්ත්‍රිය එලියාට මෙහෙම කිව්වා. “ඔයා ඇත්තටම දෙවියන්ගේ පණිවිඩකරුවෙක්.+ ඔයා මාර්ගයෙන් යෙහෝවා දෙවියන් කියන දේවල් ඇත්ත කියලා මට දැන් හොඳටම විශ්වාසයි.”