බයිබල් පොත් අංකය 46—1 කොරින්ති
ලේඛකයා: පාවුල්
ලියූ ස්ථානය: එපීසය
ලිවීම සම්පූර්ණ කළේ: පො.යු. 55දී පමණ
කොරින්තිය, “නැඟෙනහිර හා බටහිර යන දෙදිශාවෙහි පැවති දුෂ්චරිතයන් ඒකරාශි වූ සුප්‍රසිද්ධ එමෙන්ම සල්ලාලකම්වලින් ගහන නගරයක්” විය.a පිලපොනිසොස් හා යුරෝපා මහද්වීපයේ පිහිටි ග්‍රීසිය අතර පටු දේශ සන්ධියක පිහිටි කොරින්තිය, එම මහා භූමිය හරහා යන ගොඩබිම් ගමන් මාර්ගය කෙරෙහි බලය පැවැත්තුවේය. ප්‍රේරිත පාවුල්ගේ දවස්වලදී, එහි 4,00,000ක් පමණ වූ ජනගහනය ඉක්මවා ගියේ රෝමය, අලෙක්ෂන්ද්‍රියාව හා සිරියානු අන්තියෝකිය යන දේශ පමණි. කොරින්තියේ නැඟෙනහිර දෙසින් ඊජියන් මුහුදද බටහිරින් කොරින්තියේ බොක්ක හා අයෝනියන් මුහුදද පිහිටා ඇත. එමනිසා කෙංක්‍රය හා ලෙකේයම් යන වරායන් දෙකක් පිහිටා තිබූ අකායේ අගනගරය වූ කොරින්තිය වාණිජ්‍යමය අතින් වැදගත් ස්ථානයක් වෙයි. එය ග්‍රීක් භාෂාව ඉගෙනගැනීමේ මධ්‍යස්ථානයක්ද විය. “එහි ධනය මොන තරම් සුප්‍රකටව පැවතියාද කිවහොත් එහි ප්‍රසිද්ධිය පිරුළක් ලෙස යොදාගැනුණා; එමෙන්ම එහි වැසියන්ගේ දුෂ්චරිතය හා සල්ලාලකම පුළුල්ව පැතිරී තිබුණා” කියා පවසා තිබේ.b එහි පැවති මිථ්‍යාදෘෂ්ටික ආගමික ව්‍යවහාර අතර ඇෆ්‍රඩයිට්ට (රෝමයේ වීනස්ගේ ප්‍රතිරූපය) නමස්කාර කිරීම පැවතිණ. ඉන්ද්‍රීයයන් පිනවීම කොරින්තීය නමස්කාරයේ පලයක් විය.
2 ප්‍රේරිත පාවුල් පො.යු. 50දී පමණ ගමන් කළ රෝමානු ලෝකයෙහි සමෘද්ධිමත් වුවත් සදාචාරාත්මක ලෙස පිරිහුණු අගනුවර එය විය. ඔහු එහි නතර වී සිටි මාස 18ක කාලයේදී ක්‍රිස්තියානි සභාවක් එහි පිහිටුවන ලදි. (ක්‍රියා 18:1-11) ක්‍රිස්තුස් පිළිබඳ ශුභාරංචිය ඔහු මුල් වතාවට ගෙන ගිය එම ඇදහිලිවන්තයන් කෙරෙහි ඔහුට මොන තරම් මහත් ප්‍රේමයක් දැනුණාද! මෙසේ පවසමින් ඔහු ලිපියක් මගින් තමන් අතර පැවති ආත්මික බැඳීම ඔවුන්ට සිහිපත් කළේය: “[ක්‍රිස්තුස්] තුළ නුඹලාට දසදහසක් ගුරුවරු ඇතත් නුඹලාට බොහෝ පියවරු නැත. මක්නිසාද ශුභාරංචිය කරණකොටගෙන ක්‍රිස්තුස් [යේසුස්] තුළ මම නුඹලා ජනිතකෙළෙමි.”—1 කොරි. 4:15.
3 තම තුන්වන මිෂනාරි ගමනේ යෙදී සිටියදී කොරින්තියේ විසූ ක්‍රිස්තියානීන්ට තම පළමු ලිපිය ලිවීමට ඔවුන්ගේ ආත්මික ශුභසිද්ධිය සඳහා ඔහු තුළ තිබුණු දැඩි සැලකිල්ල පාවුල්ව පෙලඹුවේය. ඔහු කොරින්තියේ පදිංචි වූ දා සිට අවුරුදු කිහිපයක් ගත වී තිබිණ. මේ කාලය වන විට එය පො.යු. 55වන වසර පමණ වූ අතර පාවුල් එපීසයේ සිටියේය. පෙනෙන විදිහට, කොරින්තියේ පිහිටි තරමක් අලුත් සභාවෙන් පිළිතුරක් ඉල්ලා ඒවා තිබූ ලිපියක් ඔහුට ලැබී තිබිණ. එපමණක්ද නොව, අපහසුතාවට පත් කරන වාර්තාද පාවුල්ට ලැබී තිබිණ. (7:1; 1:11; 5:1; 11:18) ඒවා මොන තරම් මානසික පීඩනයක් ගෙන දෙන ඒවාද කියනවා නම්, තමාගේ ලිපියේ 7වන පරිච්ඡේදයේ ආරම්භක 1වන වගන්තිය ලියන තෙක් පවා ප්‍රේරිතවරයා ඔවුන්ගේ විමසුම් ලිපියට අවධානය යොමු නොකළේය. විශේෂයෙන්ම ඔහුට ලැබී තිබූ වාර්තා නිසා කොරින්තියේ විසූ සෙසු ක්‍රිස්තියානීන්ට ලියන්න ඔහු තුළ ඉමහත් පෙලඹීමක් ඇති විය.
4 නමුත් පාවුල් එපීසයේ සිට පළමුවන කොරින්ති ලියූ බව අප දන්නේ කෙසේද? එක් හේතුවක් නම්, ප්‍රේරිතවරයා සුභපැතුම් සමඟින් තම ලිපිය අවසන් කරමින් අකිලාගේ සහ ප්‍රිස්කාගේ (ප්‍රිස්කිලාගේ) නම් එම ලිපියට ඇතුළත් කිරීමයි. (16:19) ඔවුන් කොරින්තියේ සිට එපීසයට ගමන් කර තිබුණු බව ක්‍රියා 18:18, 19 පැහැදිලි කරයි. අකිලා සහ ප්‍රිස්කිලා එහි පදිංචි වී සිටි නිසාත්, පළමුවන කොරින්ති අවසන් කරමින් කරන සුබපැතුම්වලදී ඔවුන්ගේ නම් පාවුල් ඇතුළත් කළ නිසාත්, ඔහු මෙම ලිපිය ලියූ කාලයේදී එපීසයේ සිටියා විය හැකියි. කෙසේවෙතත්, කිසිම අනුමානයකට ඉඩ නොතබන කරුණක් නම්, 1 කොරින්ති 16:8හි සඳහන් පාවුල්ගේ මෙම ප්‍රකාශයයි: “නුමුත් පෙන්තකොස්තය වෙන තුරු [මම] එපීසයෙහි නවතින්නෙමි.” (ඇල අකුරු අපේය) එමනිසා පාවුල් විසින් එපීසයේදී පෙනෙන විදිහට ඔහු එහි නතර වී සිටි කාලය අවසානයේදී පළමුවන කොරින්ති ලියන ලදි.
5 කොරින්තිවරුන්ට ලියූ පළමු මෙන්ම දෙවන ලිපිවල නිරවද්‍යතාව පිළිබඳව කිසිම සැකයක් නැත. මේ ලිපිවල කතුවරයා ලෙස පාවුල්ට යොමු දක්වා තිබෙන අතර, ඒවා පිළිගත් ශුද්ධ ලියවිලි සමූහයට අයත් බව මුල් ක්‍රිස්තියානීන් විසින් පිළිගන්නා ලදි; ඔවුහු එම ලිපි තමන්ගේ පොත් සංග්‍රහයට ඇතුළත් කළහ. රෝමයේ සිට කොරින්තියට යවන ලද පළමුවන ක්ලෙමන්ට් යනුවෙන් හඳුන්වනු ලබන පො.යු. 95 පමණ ලෙස දාතම යෙදූ ලිපියක වක්‍රාකාරව පළමුවන කොරින්තියට යොමු දක්වමින් අවම වශයෙන් හය වතාවක්වත් උපුටා දක්වනු ලබන බවට පැවසේ. එහි ලේඛකයා පෙනෙන විදිහට පළමුවන කොරින්තියට කෙරෙන යොමු දැක්වීමක් සමඟින් “ආශීර්වාද ලත් ප්‍රේරිත පාවුල්ගේ හසුන පිළිගන්න” කියා එම ලිපිය ලබන්නන්ගෙන් උදක්ම ඉල්ලා සිටියේය.c ජස්ටින් මාට’, ඇතනෑගරස්, අයිරීනියස් හා ට’ටූලියන් යන අය විසින් පළමුවන කොරින්තියෙන් කෙළින්ම උපුටා දක්වනු ලබයි. කොරින්තිවරුන්ට ලියූ පළමු හා දෙවන ලිපි ඇතුළු පාවුල්ගේ ලිපිවලින් සමන්විත සංග්‍රහයක් නැතහොත් එකතුවක් “සාදා පළමු සියවසේ අවසන් දශකයේදී ප්‍රකාශයට පත් කළ” බවට ප්‍රබල සාක්ෂි තිබේ.d
6 කොරින්තිවරුන්ට ලියූ පාවුල්ගේ පළමු ලිපිය මගින් කොරින්ති සභාවේ පැවති තත්වය සොයාබැලීමට අපට ප්‍රස්තාවක් ලබා දෙයි. මෙම ක්‍රිස්තියානීන්ට මුහුණ දීමට ගැටලුද විසඳීමට ප්‍රශ්නද තිබිණ. සමහරුන් මිනිසුන්ව අනුගමනය කරමින් සිටි නිසා සභාව ඇතුළත බෙදීම් පැවතිණ. ලිංගික දුරාචාරය හා සම්බන්ධ තැතිගන්වනසුලු සිද්ධියක් පැනනැඟී තිබිණ. සමහරු ආගමික වශයෙන් බෙදුණු නිවෙස්වල ජීවත් වෙමින් සිටියහ. ඔවුන් තම නොඇදහිලිවන්ත කලත්‍රයන් සමඟ දිගටම ජීවත් විය යුතුද, නැත්නම් වෙන් විය යුතුද? එමෙන්ම පිළිමවලට පුදන ලද මස් අනුභව කිරීම ගැන කුමක් කිව හැකිද? ඔවුන් ඒවා අනුභව කළ යුතුද? ස්වාමීන්ගේ සන්ධ්‍යා භෝජනය සැමරීම ඇතුළු තමන්ගේ රැස්වීම් පැවැත්වීම සම්බන්ධයෙන් කොරින්තිවරුන්ට උපදෙස් අවශ්‍ය විය. සභාවේ සිටි ස්ත්‍රීන්ට හිමි තැන කුමක් විය යුතුද? ඊට අමතරව, නැවත නැඟිටීම ප්‍රතික්ෂේප කළ අයද ඔවුන් අතර සිටියහ. ගැටලු බොහොමයක් තිබිණ. කෙසේවෙතත් ප්‍රේරිතවරයා විශේෂයෙන්ම උනන්දු වූයේ කොරින්තිවරුන්ව ආත්මිකව යළි පිහිටුවීම ගැනයි.
7 සභාව ඇතුළත පැවති තත්වයන්හි හා සමෘද්ධිමත් මෙන්ම සල්ලාලකම්වලින් පිරුණු පුරාණ කොරින්තියේ පැවති වාතාවරණයෙහි නවීන දින සමාන්තරයන් තිබෙන නිසා දිව්‍ය ආනුභාවය යටතේ ලියන ලද පාවුල්ගේ අනගි උපදෙස් අපේ අවධානය කෙරෙහි බලපවත්වයි. පාවුල් පැවසූ දේවල අපේ දවසට තිබෙන අර්ථය මොන තරම්ද කිවහොත්, ඔහුගේ ප්‍රේමවන්ත සහෝදර සහෝදරියන්ට ලියූ පළමු ලිපියෙහි දැක්වෙන කාරුණික සැලකිල්ල සැබවින්ම ප්‍රයෝජනවත් දෙයක් බව සනාථ වනු ඇත. කාලයේ හා ස්ථානයේ ස්වභාවය දැන් සිහියට නඟන්න. පාවුල්ගේ කාවදිනසුලු, පොලඹවනසුලු වදන් අප යළි සලකා බලන විට, කොරින්තියේ විසූ ක්‍රිස්තියානීන් කළ යුතුව තිබුණාක් මෙන් පරෙස්සමින් සිතා බලන්න.
ප්‍රයෝජනවත් වීමට හේතු
23 හෙබ්‍රෙව් ශුද්ධ ලියවිලි පිළිබඳ අපේ අවබෝධය පුළුල් කිරීමේදී, එයින් උපුටා දැක්වීම් රාශියක් කරන ප්‍රේරිත පාවුල්ගේ මෙම ලිපිය ඉතාමත් ප්‍රයෝජනදායකය. මෝසෙස් යටතේ සිටි ඊශ්‍රායෙල්වරුන් ආත්මික පර්වතයකින් පානය කළ බව පාවුල් දහවන පරිච්ඡේදයේදී පෙන්වා දෙයි; එම පර්වතය ක්‍රිස්තුස්ය. (1 කොරි. 10:4; ගණන්. 20:11) අනතුරුව ඔහු මෝසෙස් යටතේ සිටි ඉශ්‍රායෙල්වරුන් විසින් ආදර්ශයක් කොට දැක්වූ හානිකර දේවලට ආශාවීමෙන් ඇති වන විනාශකාරි ප්‍රතිවිපාක ගැන සඳහන් කරමින් ඊට මෙසේ එකතු කරයි: “ඒ සියල්ල ආදර්ශයක් වශයෙන් ඔවුන්ට සිද්ධවුණේය; ඒවා ලියා තිබෙන්නේ කාලවල කෙළවරට පැමිණ සිටින්නාවූ අපට අවවාද පිණිසය.” අප වැටෙන්නේ නැහැ කියා සිතමින් කිසිදාක අපි ආත්ම-විශ්වාසය ඇති කර නොගනිමු. (1 කොරි. 10:11, 12; ගණන්. 14:2; 21:5; 25:9) නැවතත් ඔහු ව්‍යවස්ථාවෙන් නිදසුනක් ගෙනහැර දක්වයි. ස්වාමීන්ගේ සන්ධ්‍යා භෝජනයට පංගුකාරයන් වන අය ගෞරවනීය ලෙස යෙහෝවාගේ මේසයට පංගුකාරයන් වන අන්දම පැහැදිලි කිරීම සඳහා ඔහු ඊශ්‍රායෙල්හි පැවති ශාන්ති පූජාවලට යොමු දක්වයි. අනතුරුව, මස් කඩේ විකුණන සෑම දෙයක්ම අනුභව කිරීම යෝග්‍ය දෙයක් බවට වූ තම තර්කයට අනුබල දීම සඳහා ඔහු “පොළොවත් එහි සම්පූර්ණකමත් [යෙහෝවාගේය]” කියා පවසමින් ගීතාවලිය 24:1 උපුටා දක්වයි.—1 කොරි. 10:18, 21, 25; නික්. 32:6; ලෙවී. 7:11-15.
24 ‘දෙවි තමන් විසින් ප්‍රේම කරන්නන්ට සූදානම් කර තිබෙන දේවල’ ශ්‍රේෂ්ඨත්වය හා මේ ලෝකයේ ‘ප්‍රඥාවන්තයන්ගේ තර්කවල’ නිෂ්ඵලත්වය පැහැදිලි කරමින් පාවුල් නැවතත් හෙබ්‍රෙව් ශුද්ධ ලියවිලිවලින් ගෙනහැර දක්වයි. (1 කොරි. 2:9; 3:20 NW; යෙසා. 64:4; ගීතා. 94:11) වැරදිකරුවාව සභා ඇසුරෙන් කපාහැරීම සම්බන්ධයෙන් 5වන පරිච්ඡේදයෙහි සඳහන් උපදෙස් සැපයීමේදී ඔහු අධිකාරිය වශයෙන් ‘නුඹලා අතරෙන් ඒ නපුර පහ කරන්න’ කියා පැවසූ යෙහෝවාගේ ව්‍යවස්ථාවෙන් උපුටා දක්වයි. (ද්වි. 17:7) දේවසේවය මගින් ජීවිකාව සපයාගැනීමේ අයිතිය සාකච්ඡා කරමින් පාවුල් නැවතත් මෝසෙස්ගේ ව්‍යවස්ථාවට යොමු දක්වයි; වැඩ කරන සතුන්ට ආහාර අනුභව කළ නොහැකි වන සේ උන්ගේ කට බැඳීම නොකළ යුතු බවත්, දේවමාලිගාවේ සේවය කළ ලෙවීවරුන්ට පූජාසනයෙන් තමන්ගේ කොටස ලැබිය යුතු බවත් එහි පවසා තිබිණ.—1 කොරි. 9:8-14; ද්වි. 25:4; 18:1.
25 කොරින්තියේ විසූ ක්‍රිස්තියානීන්ට ප්‍රේරිත පාවුල් ලියූ පළමු ලිපියෙන් අපට මොන තරම් ප්‍රයෝජනවත් දේවානුභාවය ලත් තොරතුරු ලැබී තිබෙනවාද! බෙදීම් හා මිනිසුන් අනුගමනය කිරීමට එරෙහිව දී තිබෙන උපදෙස් මෙනෙහි කරන්න. (1-4 පරිච්ඡේද) දුරාචාරය හා සම්බන්ධ සිද්ධිය හා සභාව ඇතුළත සුචරිතය මෙන්ම පවිත්‍රතාව සඳහා තිබෙන අවශ්‍යතාව පාවුල් අවධාරණය කරන අන්දම සිහියට නඟන්න. (5, 6 පරිච්ඡේද) තනිකඩභාවය, විවාහය හා වෙන්වීම සම්බන්ධයෙන් ඔහුගේ දේවානුභාවය ලත් උපදෙස් සලකා බලන්න. (7වන පරිච්ඡේදය) පිළිමවලට පුදන ලද ආහාර ගැන මෙන්ම අන්‍යයන්ව බාධාවට පත් කිරීමට එරෙහිව සිටීමේ අවශ්‍යතාව පිළිබඳ පාවුල්ගේ සාකච්ඡාව හා පිළිම වන්දනාවට ඇදවැටීම ප්‍රබල ලෙස ඉදිරිපත් කරන අයුරු සිතා බලන්න. (8-10 පරිච්ඡේද) යෝග්‍ය ලෙස යටත් වීම සම්බන්ධයෙන් අවවාදානුශාසනා, ආත්මික දීමනා කෙරෙහි සැලකිල්ල දැක්වීම, විඳදරාගැනීමේ වටිනාකම, ප්‍රේමයේ කල්පවතින ගුණය පිළිබඳ ඉතාමත් ප්‍රායෝගික සාකච්ඡාව යනාදිය කලින් සැලකිල්ලට ගෙන ඇත. එමෙන්ම ක්‍රිස්තියානි රැස්වීම්වල නිසි පිළිවෙළ තිබීමේ අවශ්‍යතාව ප්‍රේරිතවරයා මොන තරම් කදිම ලෙස අවධාරණය කරනවාද! (11-14 පරිච්ඡේද) දේවානුභාවය යටතේ ඔහු ලියූ නැවත නැඟිටීමේ බලාපොරොත්තුව මොන තරම් මවිතකර ආරක්ෂාවක් සපයයිද! (15වන පරිච්ඡේදය) මේ සියල්ල හා තවත් දේවල් මනස නමැති ඇස ඉදිරියෙන් ගමන් කර තිබේ; එමෙන්ම එය අපේ කාලයේ ජීවත් වන ක්‍රිස්තියානීන්ට බෙහෙවින් වටී!
26 දේවරාජ්‍යය නමැති බයිබලයේ තේජවත් තේමාව සම්බන්ධයෙන් අපේ අවබෝධයට, මේ ලිපිය මගින් විශේෂ ලෙස යමක් එක් කරයි. අධර්මිෂ්ඨයන් රාජ්‍යයට ඇතුල් නොවන බවට එය දැඩි අනතුරු ඇඟවීමක් සපයන අතර, පුද්ගලයෙකුගේ වරප්‍රසාද අහිමි කරවන දුෂ්චරිත බොහොමයක් එය ලැයිස්තුගත කරයි. (1 කොරි. 6:9, 10) නමුත්, වඩාත්ම වැදගත් දෙය වන්නේ එය නැවත නැඟිටීම හා දේවරාජ්‍යය අතර තිබෙන සම්බන්ධතාව පැහැදිලි කිරීමයි. නැවත නැඟිටීමේ “නාඹුල් ඵලය” වන ක්‍රිස්තුස්, ‘දෙවි සියලු සතුරන් ඔහුගේ පාද යට දමන තුරු රජකම්’ කළ යුතු බව එය පැහැදිලි කරයි. අනතුරුව මරණය ඇතුළු සියලුම සතුරන්ව නැති කර දැමීමෙන් පසු, ‘දෙවි සියල්ලන් තුළ සියල්ල වන පිණිස ඔහු තම දෙවිට මෙන්ම පියාට රාජ්‍යය බාර දෙයි.’ අවසානයේදී, ඒදන්හිදී කළ රාජ්‍යය පිළිබඳ පොරොන්දුවේ ඉටුවීමක් හැටියට නැවත නැඟිටුවා තිබෙන තම ආත්මික සහෝදරයන් සමඟ එක්ව ක්‍රිස්තුස් සර්පයාගේ හිස සම්පූර්ණයෙන්ම පොඩි කරයි. ස්වර්ග රාජ්‍යයේ යේසුස් ක්‍රිස්තුස් සමඟ නොදිරන ස්වභාවයට පංගුකාරයන් වන අය සඳහා තිබෙන නැවත නැඟිටීමේ බලාපොරොත්තුව ඇත්තෙන්ම මවිතකරයි. පාවුල් මෙම දැනමුතුකම සපයන්නේ නැවත නැඟිටීමේ බලාපොරොත්තුව නමැති පදනම මතයි: “එහෙයින්, මාගේ ප්‍රේමවන්ත සහෝදරයෙනි, [ස්වාමීන්] කෙරෙහි නුඹලාගේ මෙහෙය නිෂ්ඵල නොවන බව නුඹලා දන්නා බැවින් ස්ථිරවව්, නිශ්චලවව්, නිතරම [ස්වාමීන්ගේ] මෙහෙයෙහි වඩ වඩා පවතිව්.”—1 කොරි. 15:20-28, 58; උත්. 3:15; රෝම 16:20.
[පාදසටහන්වල]
a හේලීස් බයිබල් හෑන්ඩ්බුක්, 1988, එච්. එච්. හේලී, 593වන පිටුව.
b ඩික්ෂනරි ඔෆ් ද බයිබල්, 1863, ස්මිත් විසින්, 1 කාණ්, 353වන පිටුව.
c දි ඉන්ටප්‍රීට’ස් බයිබල්, 10වන කාණ්, 1953, 13වන පිටුව.
d දි ඉන්ටප්‍රීට’ස් බයිබල්, 9වන කාණ්, 1954, 356වන පිටුව.