යෙහෝවාගේ වචනය ජීවමානයි

එස්රාගේ පොතෙන් විශේෂාංග

එස්රා නම් පූජකයා ලියූ එස්රා පොත ආරම්භ වන්නේ දෙවෙනි ලේකම් පොතට පසුවයි. මෙහි මුලින්ම සඳහන් වන්නේ පර්සියාවේ කෝරෙෂ් හෙවත් සයිරස් රජ බැබිලෝනියේ සිටි යුදෙව්වන්ට නැවතත් තමන්ගේ මව් රටට යෑමට ඉඩ දෙමින් නිකුත් කළ ආඥාව ගැනයි. එස්රා පොතේ වාර්තාව අවසන් වන්නේ වෙනත් ජාතීන්ව අනුකරණය කිරීමේ ප්‍රතිඵලයක් ලෙස දූෂ්‍ය වී සිටි යුදෙව්වන්ව නැවත පිරිසිදු තත්වයකට ගෙන ඒමට එස්රා දරන වෑයම ගැන සඳහන් කිරීමෙනුයි. මේ පොතේ ක්‍රි.පූ. 537 සිට ක්‍රි.පූ. 467 දක්වා වූ අවුරුදු 70ක කාලයක් පුරා සිදු වූ සිදුවීම් වාර්තා වෙනවා.

එස්රා මෙම පොත ලිවීමේ අරමුණ වුණේ යෙහෝවා දෙවි බැබිලෝනියේ වහල්භාවයේ සිටි සිය සෙනඟව ඉන් නිදහස් කරගන්නවා කියා දුන් පොරොන්දුව ඉටු කළ ආකාරය ගැනත් යෙරුසලමේ යළිත් සත්‍ය නමස්කාරය පිහිටෙවූ ආකාරය ගැනත් පෙන්වා දීමයි. ඒ නිසා මේ පොතේ ඇතුළත් වන්නේ ඒ අරමුණ හා සම්බන්ධ වාර්තා පමණයි. නොයෙක් විරුද්ධවාදිකම් හා දෙවිගේ සෙනඟගේ පව්කාරකම මධ්‍යයේ දේවමාලිගාව නැවත ගොඩනැඟූ ආකාරය සහ යෙහෝවාට නමස්කාර කිරීම නැවත ආරම්භ වූ ආකාරය මෙහි සඳහන් වෙනවා. මෙම වාර්තාව ගැන අපි උනන්දු විය යුත්තේ අපිත් එස්රාගේ කාලයේ වගේ සියලු දේ නැවත පිහිටුවන කාලයක ජීවත් වන නිසයි. අපි අද ජීවත් වන්නේ බොහෝදෙනෙක් “යෙහෝවාගේ කන්දට” එක් රැස් වන හා ‘යෙහෝවාගේ මහිමය දැනගැන්මෙන් පොළොව පිරී’ යෑමට ආසන්න කාලයකයි.—යෙසායා 2:2, 3; හබක්කුක් 2:14.

දේවමාලිගාව නැවත ගොඩනඟයි

(එස්රා 1:1–6:22)

සයිරස් රජ යුදෙව්වන්ට තම මව් රටට යෑමට අවසර දීමෙන් පසු ආණ්ඩුකාර සෙරුබ්බාබෙල් යටතේ යුදෙව්වන් 50,000ක් නැවත යෙරුසලමට පිටත් වී ගියා. නැවත යෙරුසලමට ගිය යුදෙව්වන් විගස පූජාසනයක් ගොඩනඟා යෙහෝවාට පූජා ඔප්පු කරන්න පටන්ගත්තා.

ඊළඟ වසරේදී ඊශ්‍රායෙල්වරුන් දේවමාලිගාව ගොඩනැඟීමට අත්තිවාරම දැම්මා. විරුද්ධවාදීන් දේවමාලිගාව ගොඩනැඟීමේ කාර්යයට නිතරම බාධා ඇති කළ අතර අවසානයේදී මෙම කාර්යය නතර කිරීම සඳහා රාජ නියෝගයක් ලබාගැනීමට ඔවුන් සමත් වුණා. ඒත් හග්ගයි සහ සෙකරියා දේවමාලිගාවේ වැඩ කරගෙන යන ලෙසට යුදෙව්වන්ට උනන්දු කළ නිසා ඔවුන් තහනම නොතකා දිගටම වැඩ කරගෙන ගියා. දේවමාලිගාව නැවත ගොඩනැඟීම සම්බන්ධයෙන් මුලින්ම ආඥාවක් නිකුත් කළේ සයිරස් රජුයි. පර්සියානු රජෙක් දුන් ආඥාවක් කිසිවෙකුට වෙනස් කළ නොහැකි නිසා ඊට විරුද්ධව ක්‍රියා කිරීමට යුදෙව්වන්ට සතුරුකම් පෑ මිනිසුන් බිය වුණා. “යෙරුසලමේ දෙවිගේ ගෘහය” ගොඩනැඟීමට සයිරස් අණ කර තිබුණු බව නිල මට්ටමින් කළ පරීක්ෂණයකදී හෙළි වුණා. (එස්රා 6:3) දේවමාලිගාව ගොඩනැඟීමේ කාර්යය දිගටම කෙරීගෙන ගිය අතර එය සම්පූර්ණ කිරීමට හැකි වුණා.

ශුද්ධ ලියවිලිමය ප්‍රශ්නෝත්තර:

1:3-6—සමහර ඊශ්‍රායෙලිතයන් නැවත තමන්ගේ මව් බිමට ගියේ නැහැ. මෙයින් අදහස් කරන්නේ ඔවුන්ගේ ඇදහිල්ල අඩු බවද? සමහරුන් තමන්ගේ මව්බිමට නැවත නොයන්න ඇත්තේ ඇතැම් විට ඔවුන් සැප සම්පත්වලට තිබුණු ආශාව නිසා හෝ සැබෑ නමස්කාරය පිළිබඳ අගය කිරීමක් නොතිබුණු නිසා හෝ වෙන්න ඇති. නමුත් නොගිය හැම කෙනාගේම තත්වය මෙය නෙවෙයි. දුර්වල සෞඛ්‍ය තත්වය, මහලු වයස සහ පවුලේ වගකීම් වැනි හේතු නිසා සමහරුන් යෙරුසලමට නොයා ඉන්න තීරණය කරන්න ඇති. මන්ද බැබිලෝනියේ සිට කිලෝමීටර් 1,600ක් පමණ දුරින් පිහිටි යෙරුසලමට යෑම ඉතා වෙහෙසකර ගමනක්. ඒ ගමන යෑම සඳහා මාස හතරක් හෝ පහක් ගත වෙනවා. තවද අවුරුදු 70ක් පුරා පාළු වී තිබුණු නගරයක් නැවත ගොඩනැඟීම සඳහා සෑහෙන ශක්තියක් වැය කරන්නත් අවශ්‍ය වුණා. මේ හේතු නිසා සමහර අයට නැවත යෙරුසලමට යෑම අභියෝගයක් වූවා විය හැකියි.

2:43—නෙතිනීම්වරු කියන්නේ කාටද? මොවුන් ඊශ්‍රායෙල්වරුන්ගෙන් පැවත එන්නන් නොවූවත් ඔවුන් දේවමාලිගාවේ දර කපන්නන් හා දිය අදින්නන් ලෙස සේවය කළ අයයි. යෝෂුවාගේ කාලයේ සිටි ගිබියන්වරුන් මෙන්ම “ලෙවීයයන්ගේ මෙහෙයට දාවිත් සහ අධිපතීන් විසින් නියම කළ” අයද මොවුන් අතර සිටියා.—එස්රා 8:20.

2:55—සලමොන්ගේ මෙහෙකරුවන්ගේ පුත්‍රයෝ කවුරුන්ද? මොවුන් ඊශ්‍රායෙලිතයන් නොවූවද යෙහෝවාගේ සේවය තුළ විශේෂ වරප්‍රසාද දානය කර තිබූ අයයි. ඔවුන් යම් පරිපාලන කටයුතුවල නිරත වූවා කියා හෝ දේවමාලිගාවේ ලියන්නන් හැටියට සේවය කළා කියා සිතිය හැකියි.

2:61-63—ඊශ්‍රායෙල්වරුන් යෙහෝවාගෙන් යමක් දැනගැනීමට අවශ්‍ය වූ විට ඔවුන් එය දැනගත්තේ ඌරීම් හා තුම්මීම් පාවිච්චි කිරීම මගිනුයි. නැවත යෙරුසලමට පැමිණි අය ළඟ ඒවා තිබුණාද? තමන් පූජක පෙළපතට අයත් බව තහවුරු කිරීම සඳහා ඌරීම් හා තුම්මීම් භාවිත කළ හැකි වුණා. නමුත් එස්රා මේ ගැන ස්ථිරවම සඳහන් කරන්නේ නැහැ. ඒ කාලයේදී මෙන්ම ඊට පසුව ඌරීම් හා තුම්මීම් භාවිත වුණු බවක් ශුද්ධ ලියවිල්ලේද සඳහන් වෙන්නේ නැහැ. ක්‍රිස්තු පූර්ව 607දී දේවමාලිගාව විනාශ වන විට ඌරීම් හා තුම්මීම් විනාශ වූ බව විශ්වාස කෙරේ.

3:12—යෙහෝවාගේ ‘පළමු ගෘහය දැක තිබූ මහලු අය’ හඬා වැලපුණේ ඇයි? සලමොන් ගොඩනැඟූ දේවමාලිගාව කොතරම් තේජවත් එකක් වූවාද කියා ඔවුන්ට මතක තිබුණා. නමුත් ඔවුන්ට දැන් දේවමාලිගාවේ අත්තිවාරම පළමු එකත් එක්ක සන්සන්දනය කිරීමේදී මෙය ‘ඔවුන්ගේ ඇස්වලට කිසිම වටිනාකමක් නැත්තාක්’ මෙන් පෙනෙන්ට තිබුණා. (හග්ගයි 2:2, 3) ඔවුන් කොතරම් වෙහෙස මහන්සි වුණත් ඔවුන්ට පළමු දේවමාලිගාව මෙන් මෙයට තේජසක් ලබා දෙන්න පුළුවන් වෙයිද? ඔවුන් මේ ගැන කලකිරී සිටි නිසා හඬා වැලපුණා.

3:8-10; 4:23, 24; 6:15, 16—දේවමාලිගාව නැවත ගොඩනැඟීමට කොතරම් කාලයක් ගත වුණාද? ඔවුන් යෙරුසලමට පැමිණි “දෙවෙනි අවුරුද්දේ” එනම් ක්‍රි.පූ. 536දී දේවමාලිගාවේ අත්තිවාරම දමනු ලැබුවා. ඒත් ක්‍රි.පූ. 522දී අර්තක්ෂස්තා රජුගේ පාලන සමයේදී ගොඩනැඟීමේ වැඩ තහනම් කරනු ලැබුවා. ක්‍රිස්තු පූර්ව 520 වන තෙක් එනම් දාරියුස් රජුගේ පාලන කාලයේ දෙවෙනි වසර දක්වාම මෙම තහනම තිබුණා. දේවමාලිගාවේ ඉදි කිරීමේ වැඩ අවසන් වූයේ දාරියුස් රජුගේ පාලන සමයේ හයවෙනි වසරේදීයි. එනම් ක්‍රි.පූ. 515දීයි. (“පර්සියානු රජවරු (ක්‍රි.පූ. 537 සිට 467 දක්වා)” යන කොටුව බලන්න.) මෙසේ දේවමාලිගාව ගොඩනැඟීමට අවුරුදු 20ක් පමණ ගත වුණා.

4:8–6:18—එස්රා පොතේ මෙම කොටස ලියනු ලැබුවේ ඇරමයික භාෂාවෙන්. එයට හේතුව කුමක්ද?—මෙම කොටසේ වැඩිපුරම සඳහන් වන්නේ රජයේ නිලධාරීන් රජවරුන්ට ලියූ ලිපි හා ඒවාට ලැබුණු පිළිතුරුයි. එස්රා මේවා උපුටාගත්තේ ඇරමයික භාෂාවෙන් ලියා තිබුණු වෙනත් ලියකියවිලිවලින්. ඇරමයික භාෂාව ඒ කාලයේදී රජයේ භාෂාව මෙන්ම ව්‍යාපාරික ගනු දෙනුවලදී භාවිත කළ භාෂාවයි. ඇරමයික භාෂාවෙන් ලියා ඇති බයිබලයේ අනිකුත් තැන් මේවායි. එස්රා 7:12-26, යෙරෙමියා 10:11 සහ දානියෙල් 2:4ආ සිට 7:28 දක්වා.

අපට උගත හැකි පාඩම්:

1:2. යෙසායා අවුරුදු 200කට පමණ කලින් පුරෝකථනය කර තිබූ දේවල් එලෙසම සිදු වුණා. (යෙසායා 44:28) මින් පෙනී යන්නේ බයිබලයේ සඳහන් යෙහෝවාගේ අනාවැකි කවදාත් ඉෂ්ට නොවී තිබෙන්නේ නැති බවයි.

1:3-6. බැබිලෝනියේ නතර වූ සමහර ඊශ්‍රායෙල්වරුන් වගේ යෙහෝවාගේ සාක්ෂිකරුවන්ගෙන් බොහෝදෙනෙකුට පූර්ණ කාලීන සේවයේ නියැලෙන්න හෝ අවශ්‍යතාව වැඩියෙන් තිබෙන ප්‍රදේශයකට ගොස් සේවය කිරීමට හැකියාවක් නැහැ. ඒත් ඔවුන් එසේ සේවය කරන අයට ඔවුන්ගේ පූර්ණ සහයෝගය ලබා දෙනවා. ඒ විතරක් නෙවෙයි ගෝලයන් සෑදීමේ කාර්යය කරගෙන යෑමට හා රාජ්‍ය වැඩකටයුතු දියුණු කිරීමට අවශ්‍ය අරමුදල්ද ලබා දෙනවා.

3:1-6. නැවත පැමිණි ඊශ්‍රායෙල්වරුන් ඔවුන්ගේ පළමුවෙනි පූජාව ක්‍රි.පූ. 537 හත්වෙනි මාසය වන තිෂ්රී මාසයේදී ඔප්පු කළා. (අපේ දිනදර්ශනයට අනුව සැප්තැම්බර් හෝ ඔක්තෝබර් මාසයයි) බැබිලෝනිවරුන් ක්‍රි.පූ. 607 පස්වෙනි මාසය වන ආබ් මාසයේදී (අපේ දිනදර්ශනයට අනුව ජූලි හෝ අගෝස්තු මාසයයි) යෙරුසලමට ඇතුල් වී ඉත් මාස දෙකකට පසු මුළු නුවරම ගිනිබත් කළා. (2 රාජාවලිය 25:8-17, 22-26) කලින් කියා තිබූ විදිහටම යෙරුසලම පාළු වී තිබූ අවුරුදු 70 නියමිත කාලයේදී අවසන් වුණා. (යෙරෙමියා 25:11; 29:10) යෙහෝවා පවසන ඕනෑම දෙයක් ඒ විදිහටම සිදු වෙනවා.

4:1-3. නැවත පැමිණි විශ්වාසවන්ත ඊශ්‍රායෙලිතයන් බොරු දෙවිවරුන්ට නමස්කාර කළ අය තමන්ට එකතු වෙන්න කියා කළ ආරාධනාව ප්‍රතික්ෂේප කළා. එසේ එකතු වූවා නම් ඔවුන් වෙනත් ආගම් සමඟ මිශ්‍රවීමක් වෙනවා. (නික්මයාම 20:5; 34:12) ඒ හා සමානව අද දින යෙහෝවාගේ සාක්ෂිකරුවන්ද වෙනත් ආගමික කණ්ඩායම් සමඟ කිසිසේත් හවුල් වෙන්නේ නැහැ.

5:1-7; 6:1-12. තමන්ගේ සෙනඟට යහපතක් වන අයුරින් දේවල් හසුරුවන්න යෙහෝවාට පුළුවන්.

6:14, 22. යෙහෝවාගේ සේවයේ උද්‍යෝගයෙන් හවුල් වන විට දෙවිගේ අනුමැතිය හා ආශීර්වාද ලැබෙනවා නිසැකයි.

6:21. යෙහෝවාගේ මඟ පෙන්වීම යටතේ දේවමාලිගාව නැවත ගොඩනැඟීමේ වැඩකටයුතු සාර්ථකව කෙරීගෙන යන ආකාරය දුටු සමාරිවරුන් සත්‍ය නමස්කාරයේ හවුල් වීමට පෙලඹුණා. එමෙන්ම බොරු දෙවිවරුන්ව ඇදහූ ජාතීන්ගේ බලපෑමට හසු වූ යුදෙව්වන්ද ඔවුන්ගේ ජීවිතවල වෙනස්කම් කරගැනීමට පෙලඹුණා. එසේනම් අපත් දෙවි අපට බාර දී තිබෙන සේවයේ මෙන්ම රාජ්‍යය දේශනා කිරීමේ කාර්යයෙහි උද්‍යෝගයෙන් නියැලිය යුතු නැද්ද?

එස්රා යෙරුසලමට පැමිණෙයි

(එස්රා 7:1–10:44)

නැවත ගොඩනැඟූ දේවමාලිගාව කැප කර අවුරුදු පනහක් ගත වී තිබුණා. මෙය ක්‍රි.පූ. 468වෙනි අවුරුද්දයි. එස්රා බැබිලෝනියේ සිටි දෙවිගේ සේවකයන්ගෙන් සමහරදෙනෙකු සමඟ අරමුදල්ද රැගෙන යෙරුසලමට පැමිණියා. ඔහුට යෙරුසලමේදී දකින්න ලැබෙන්නේ මොනවාද?

අධිපතීන් එස්රාට මෙසේ පවසනවා. ‘ඊශ්‍රායෙල් සෙනඟත් පූජකයොත් ලෙවීයයොත් පිළිකුල් ක්‍රියා අනුව යමින් දේශවල වර්ගයන්ගෙන් වෙන් නුවූවෝය. අධිපතීහුද මුලාදෑනීහුද මේ අපරාධයට මූලිකයෝය.’ (එස්රා 9:1, 2) ඒ ගැන එස්රා හුඟාක් දුක් වෙනවා. ‘ඉතා ධෛර්යවත් වන්න’ කියා ඔහුව දිරිගන්වනු ලබනවා. (එස්රා 10:4) එස්රා ජනයාගේ වැරදි නිවැරදි කිරීමට පියවර ගන්නා අතර මිනිසුන් ඔහුට සහයෝගය ලබා දෙයි.

ශුද්ධ ලියවිලිමය ප්‍රශ්නෝත්තර:

7:1, 7, 11—මේ සියලුම පදවල සඳහන් දේවල් අදාළ වන්නේ දේවමාලිගාව ගොඩනැඟීමේ කාර්යය නතර කරනු ලැබූ අර්තක්ෂස්තාටද? නැහැ. අර්තක්ෂස්තා කියන්නේ පර්සියාවේ රජවරුන් දෙදෙනෙකුට භාවිත කළ පදවි නාමයි. ඉන් එක් කෙනෙක් නම් ක්‍රි.පූ. 522දී දේවමාලිගාවේ වැඩ නතර කිරීමට අණ කළ බාඩිය හෙවත් ගෝමාටා විය හැකියි. එස්රා යෙරුසලමට පැමිණි අවස්ථාවේදී එහි සිටියේ අර්තක්ෂස්තා ලොංගිමානස්ය.

7:28–8:20—බැබිලෝනියේ සිටි බොහෝ යුදෙව්වන් එස්රා සමඟ යෙරුසලමට යන්න අදි මදි කළේ ඇයි? බැබිලෝනියේ සිටි යුදෙව්වන්ගේ පළමු කණ්ඩායම යෙරුසලමට ගිහින් අවුරුදු 60ක් ගත වී තිබුණත් එය සම්පූර්ණයෙන්ම ජනාවාස වී තිබුණේ නැහැ. නැවත යෙරුසලමට ගොස් අලුත් ජීවිතයක් පටන්ගැනීම බොහෝ දුෂ්කර දෙයක් වුණා. එමෙන්ම විවිධ අනතුරුවලටද මුහුණ දීමට සිදු වුණා. ඒ කාලයේදී යෙරුසලමේ හොඳ සම්පත් තිබුණේ නැහැ. සමහරවිට බැබිලෝනියේ ඔවුන් ඉතා සුඛෝපභෝගී ජීවිතයක් ගත කරන්න ඇති. මෙය එහි නොයෑමට හේතුවක් වෙන්න ඇති. තවද යෙරුසලමට යන්න තිබුණේ ඉතා භයංකර මාර්ගයකයි. මේ නිසා නැවත යෙරුසලමට හැරී යන අයට යෙහෝවා කෙරෙහි දැඩි විශ්වාසයක්, සත්‍ය නමස්කාරය සඳහා ලොකු උද්‍යෝගයක් මෙන්ම ඒ ගමන යෑමට ධෛර්යයක් අවශ්‍ය වුණා. යෙහෝවාගේ ශක්තියෙන් බලය ලැබූ එස්රා යෙරුසලමට යෑමට අන් අයව උනන්දු කළා. මෙහි ප්‍රතිඵලයක් ලෙස පවුල් 1,500ක් යෙරුසලමේ නැවත පදිංචි වීමට කැමති වූ අතර ඔවුන්ගේ මුළු සංඛ්‍යාව 6,000දෙනෙක් වුණා. තවදුරටත් ඔහුගේ දිරිගැන්වීම පරිදි ලෙවීවරුන් 38දෙනෙක් හා නෙතිනීම්වරු 220දෙනෙක් නැවත යෙරුසලමට යෑමට කැමති වුණා.

9:1, 2—වෙනත් ජාතීන් සමඟ විවාහ වීම සැබෑ නමස්කාරයට මොන තරම් තර්ජනයක් වුණාද? නැවත පදිංචි වූ ජාතිය මෙසියස් හෙවත් ගැලවුම්කරු පැමිණෙන තුරු යෙහෝවාගේ නමස්කාරය පිරිසිදුව තබාගැනීමට වගකීමෙන් බැඳී සිටියා. වෙනත් ජාතීන් සමඟ විවාහ වීම සැබෑ නමස්කාරයට ලොකු තර්ජනයක් වුණා. සමහරුන් රූප නමස්කාරයේ යෙදෙන අය සමඟ විවාහ වී සිටියා. මෙහි ප්‍රතිඵලයක් හැටියට මුළු ඊශ්‍රායෙල් ජාතියම බොරු දෙවිවරුන්ව නමස්කාර කළ ජාතීන්ගේ ජීවන රටාවට අනුව හැඩගැසෙන්න ඉඩ තිබුණා. සත්‍ය නමස්කාරය මුළුමනින්ම නැතිවීමටද එය හේතුවක් විය හැකි වුණා. එසේ වූවා නම් පොරොන්දු කරන ලද ගැලවුම්කරු පැමිණෙන්නේ කවුරුන් වෙනුවෙන්ද? මේ නිසා එස්රා දේශයේ සිදු වී තිබෙන දේවල් ගැන පුදුමයට පත්වීම තේරුම්ගන්න අපහසු දෙයක් නෙවෙයි.

10:3, 44—භාර්යාවන් සමඟ දරුවන්වද අත්හැරියේ ඇයි? දරුවන්ව ළඟ තබාගත්තා නම් අත්හැරිය ඒ දරුවන්ගේ මව්වරුන් නිතර නිතර දරුවන්ව බැහැදැකීමට පැමිණීමට ඉඩ තිබුණා. තවද කුඩා දරුවන්ට තමන්ගේ මවගේ රැකවරණය අවශ්‍යයි.

අපට උගත හැකි පාඩම්:

7:10. ඉතා වුවමනාවෙන් දේවවචනය අධ්‍යයනය කළ කෙනෙකු මෙන්ම දෙවිගේ වචනය හොඳින් උගන්වන්නෙකු හැටියට එස්රා අපිට කදිම ආදර්ශයක් සපයනවා. යෙහෝවා මෝසෙස් මාර්ගයෙන් දෙන ලද නීතිය දැනගැනීමට ඔහු යාච්ඤාපූර්වකව තමන්ගේ සිත සූදානම් කරගත්තා. එස්රා නීතියේ සඳහන් කාරණා හොඳින් විමසා බලා යෙහෝවා පැවසූ දේවල්වලට ඔහුගේ සිත සම්පූර්ණයෙන් යොමු කළා. එස්රා ඉගෙනගත් දේවල් ඔහුගේ ජීවිතයට අදාළ කරගත් අතර එය අන් අයට ඉගැන්වීමටද මහත් වෑයමක් දැරුවා.

7:13. යෙහෝවා කැමති තමන්ට කැමැත්තෙන් සේවය කරන අයටයි.

7:27, 28; 8:21-23. යෙරුසලමට යන ගමන ඉතා භයංකර දිගු ගමනක් වුණා. එස්රා ගමන පිටත් වීමට කලින් යෙහෝවාට ගෞරවය හා ප්‍රශංසාව දුන් අතර ඉතා යටහත් පහත්ව ආයාචනා කළා. දෙවිව මහිමයට පත් කිරීමට තමන්ගේ ජීවිතය පරදුවට තැබීමට පවා එස්රා කැමති වුණා. ඔහු අපිට කදිම ආදර්ශයක් සැපයුවා.

9:2. අපිත් “ස්වාමීන් තුළ” පමණක් විවාහ වෙන්න කියා දී තිබෙන උපදෙස හොඳින් සිතට ගත යුතුයි.—1 කොරින්ති 7:39.

9:14, 15. නරක ආශ්‍රය අපිව යෙහෝවාගෙන් ඈත් කරයි.

10:2-12, 44. වෙනත් ජාතිවලට අයත් ස්ත්‍රීන්ව විවාහ කරගෙන සිටි පුරුෂයන් අවංකව පසුතැවිලි වූ අතර ඔවුන්ගේ වැරදි ක්‍රියාමාර්ගය නිවැරදි කරගත්තා. ඔවුන්ගේ ආකල්පය හා ක්‍රියාව අපිට කදිම ආදර්ශයක්.

යෙහෝවා ඔහුගේ පොරොන්දු ඉටු කරයි

එස්රා පොත අපට කොතරම් ප්‍රයෝජනවත් පොතක්ද! යෙහෝවා නියමිත කාලයේදී ඔහුගේ සෙනඟව බැබිලෝනියෙන් නිදහස් කරගත් අතර යෙරුසලමේ සැබෑ නමස්කාරය යළි පිහිටෙව්වා. යෙහෝවා ගැනත් ඔහුගේ පොරොන්දු ගැනත් අපේ විශ්වාසය ඒ මගින් තව තවත් ශක්තිමත් වෙනවා නිසැකයි.

එස්රාගේ පොතේ සඳහන් වී තිබෙන සමහර ආදර්ශ ගැන සිතා බලන්න. යෙරුසලමේ නැවත සත්‍ය නමස්කාරය පිහිටුවීමට එස්රා හා ඔහු සමඟ ඉතිරි අය පැමිණීමෙන් ඔවුන්ගේ පරිත්‍යාගශීලී කැපවීම හා භක්තිය පෙන්නුම් කළා. ඒ වගේම වෙනත් ජාතිවලට අයත් අය දෙවි කෙරෙහි විශ්වාසයක් තැබූ සැටිත් වැරදි කළ අය නිහතමානීව තමන්ගේ වැරදි හදාගත් සැටිත් මේ පොතේ පෙන්වා තිබෙනවා. දේවානුභාවයෙන් ලියන ලද එස්රාගේ වදන්වලින් පැහැදිලි වන්නේ ‘දෙවිගේ වචනය ජීවමාන මෙන්ම බලවත්’ බවයි.—හෙබ්‍රෙව් 4:12.

[18වන පිටුවේ වගුව⁄පින්තූරය]

පර්සියානු රජවරු (ක්‍රි.පූ. 537 සිට 467 දක්වා)

මහා සයිරස් (එස්රා 1:1) මිය ගියේ ක්‍රි.පූ. 530

කැම්බිසස් හෙවත් අහෂ්වේරොෂ් (එස්රා 4:6) ක්‍රි.පූ. 530-522

අර්තක්ෂස්තා (බාඩිය හෙවත් ගෝමාටා කියාද හඳුන්වයි) (එස්රා 4:7) ක්‍රි.පූ. 522 (ඝාතනය කිරීම නිසා පාලනය කිරීමට හැකි වූයේ මාස හතක් පමණි)

පළමුවන දාරියුස් (එස්රා 4:24) ක්‍රි.පූ. 522-486

තක්ෂස්තා හෙවත් අහෂ්වේරොෂ්a ක්‍රි.පූ. 486-475 (ක්‍රි.පූ. 496-486 දක්වා පළමුවන දාරියුස් සමඟ හවුල් පාලකයෙක් ලෙස පාලනය කළා)

අර්තක්ෂස්තා ලොංගිමානස් (එස්රා 7:1) ක්‍රි.පූ. 475-424

[පාදසටහන්වල]

[පින්තූරය]

අහෂ්වේරොෂ්

[17වන පිටුවේ පින්තූරය]

සයිරස්

[17වන පිටුවේ පින්තූරය]

වහලුන් ආපසු තමන්ගේ මව්බිමේ පදිංචි වීම ගැන සයිරස් සඳහන් කළ විස්තර සිලින්ඩරාකාර මැටි ලියවිල්ලක තිබුණා

[හිමිකම් විස්තර]

Cylinder: Photograph taken by courtesy of the British Museum

[20වන පිටුවේ පින්තූරය]

එස්රා දක්ෂ ගුරුවරයෙක් වුණේ කොහොමද කියා ඔබ දන්නවාද?