උත්තරේ දැනගන්නම ඕනෙද?

බයිබලේ කියන දේ: ‘දෙවියන් බොහෝ යහපත් දේවල් කළේ ඔබට වැසි ලබා දීමෙන්, සරු අස්වනු ලබා දීමෙන්, කෑමට අවශ්‍ය තරම් ආහාර ලබා දීමෙන් සහ ඔබේ සිතට සතුට ගෙන දෙන දේවල් ලබා දීමෙනුයි.’—ක්‍රියා 14:17.

ඒකෙන් අදහස් වෙන දේ: අවට පරිසරයේ තියෙන අපි භුක්ති විඳින හැම දෙයක්ම නිර්මාතෘගෙන් අපිට ලැබිලා තියෙන තෑගි. නිර්මාතෘ ඔයා ගැන කොච්චර සැලකිලිමත්ද කියලා තේරුම්ගද්දී ඔහු දීලා තියෙන දේවල් ගැන ඔයාට තියෙන අගය තවත් වැඩි වෙයි.

බයිබලේ කියන දේ: “යහපත් ජීවිතයක් ගත කිරීමට ඇතුළත් වන සියල්ල එනම්, ධර්මිෂ්ඨකම, යුක්තිය සහ අවංකකම ගැන ඔබට හොඳ අවබෝධයක් ලැබෙනු ඇත.”—හිතෝපදේශ 2:9.

ඒකෙන් අදහස් වෙන දේ: සතුටින් ඉන්න ඔයා කරන්න ඕනෙ මොනවාද කියලා ඔයාගේ නිර්මාතෘ දන්නවා. ඔයා බයිබලේ කියෙව්වොත් ජීවිතේට ප්‍රයෝජනවත් වෙන හුඟක් මඟ පෙන්වීම් හොයාගන්න පුළුවන්.

බයිබලේ කියන දේ: ‘ඔබ දෙවිව දැන හඳුනා ගනු ඇත.’—හිතෝපදේශ 2:5.

ඒකෙන් අදහස් වෙන දේ: ‘ජීවිතේ අරමුණ මොකක්ද? ඇයි අපි දුක් විඳින්නේ? මැරුණාට පස්සේ වෙන්නේ මොනවාද?’ ඒ ප්‍රශ්නවලට උත්තර බයිබලෙන් හොයාගන්න ඔයාට පුළුවන්. නිර්මාතෘ කෙනෙක් ඉන්නවා කියලා දැනගන්න එක ඒ වගේ වැදගත් ප්‍රශ්නවලට උත්තර හොයාගන්න ඔයාට උදව් වෙයි.

බයිබලේ කියන දේ: “යෙහෝවා දෙවි මෙසේද පැවසුවේය. ‘මාගේ අරමුණ වන්නේ ඔබ පිටට විපත්ති ගෙන ඒම නොවේ. නමුත් සාමයෙන් පිරුණු ප්‍රීතිමත් ජීවිතයක් ගැන බලාපොරොත්තුවක් ඔබට ලබා දීමය.’”—යෙරෙමියා 29:11.

ඒකෙන් අදහස් වෙන දේ: අද අපි අද්දකින දුක, වේදනාව, මරණය වගේ හැම දෙයක්ම ළඟදීම නැති කරනවා කියලා දෙවියන් පොරොන්දු වෙලා තියෙනවා. ඔයා ඒ දේවල් විශ්වාස කරද්දී අනාගතය ගැන ප්‍රීතිමත් බලාපොරොත්තුවක් තියාගන්න ඔයාට පුළුවන්. හැම දවසකම අද්දකින්න වෙන ප්‍රශ්නවලට සාර්ථකව මුහුණ දෙන්න ඒක ඔයාට උදව් වෙයි.