පළිගන්න එක ගැන බයිබලයේ කියන්නේ මොනවාද?

සමහරවිට කෙනෙක්ට හිතෙන්න පුළුවන් එයාට වරදක් කරපු කෙනෙක්ගෙන් පළිගන්න අයිතියක් තියෙනවා කියලා. ඒත් බයිබලයේ එහෙම කියන්නේ නැහැ. ඒකේ මෙහෙම කියනවා. “‘ඔහු මට විරුද්ධව යමක් කළොත් මමත් ඔහුට ඒ දේම කරමි. අනුන් මට කරන ලෙසම මමත් ඔවුන්ට කරන්නෙමි’ යයි නොකියන්න.” (හිතෝපදේශ 24:29) පළිගන්න සිතුවිලි අයින් කරගන්න බයිබලයේ තියෙන මඟ පෙන්වීම් ගොඩක්දෙනෙක්ට උදව් වෙලා තියෙනවා.

මේ ලිපියෙන්

• පළිගන්න එක වැරදි ඇයි?

• දෙවියන් දඬුවම් කරන්නේ කොහොමද?

• පළිගන්න සිතුවිලි අයින් කරගන්න පුළුවන් කොහොමද?

• පළිගන්න එක ගැන තියෙන වැරදි මත

කවුරු හරි කෙනෙක් ඔයාගේ හිත රිද්දුවොත්, ඔයාට අනතුරක් කළොත් කේන්ති යන එක සාමාන්‍ය දෙයක්. ඒ වගේ වෙලාවට ඔයාට හිතෙන්න පුළුවන් එයාට මොකක් හරි දඬුවමක් දෙන්න ඕනෙ කියලා. ඒත් බයිබලයේ කියන්නේ පළිගන්න එක වැරදියි කියලා. ඒ ඇයි?

දෙවියන් කැමති නැහැ මිනිස්සු යුක්තිය අතට අරන් වැඩ කරනවාට, පළිගන්නවාට. මොකද “යුක්තිය ඉටු කිරීමේ අයිතිය මා සතුය. දඬුවම් කරන්නේ මමයි” කියලා යෙහෝවාa දෙවියන් කියනවා. (රෝම 12:19) බයිබලයේ කියන්නේ කවුරු හරි අතින් අපිට වරදක් වුණොත් එයාගෙන් පළිගන්නේ නැතුව එයාත් එක්ක සමාදානෙන් ප්‍රශ්නේ විසඳගන්න උත්සාහ කරන්න කියලයි. (රෝම 12:18) ඒත් සාමකාමීව ප්‍රශ්නේ විසඳගන්න කරන්න පුළුවන් හැම දේම කරලත් ප්‍රශ්නේ විසඳගන්න බැරි නම් මොකද කරන්නේ? බයිබලයේ අපිට උනන්දු කරන්නේ ඒ වගේ වෙලාවට යෙහෝවා දෙවියන් ගැන විශ්වාසය තියන්න කියලයි. මොකද ඔහු ඉස්සරහට හැම අසාධාරණයක්ම විසඳන්න යනවා.—ගීතාවලිය 42:10, 11.

දෙවියන් දැනට වැරදි කරන අයට දඬුවම් කරන්න රජයේ බලධාරීන්ට ඉඩ දීලා තියෙනවා. (රෝම 13:1-4) ඒත් ළඟදීම අසාධාරණකම් කරන, අනිත් අයට නපුරුකම් කරන හැමෝටම දෙවියන් දඬුවම් කරනවා. ඊටපස්සේ ආයේ කවදාවත් ඒ වගේ අය නිසා කිසිම කෙනෙක් දුක් විඳින්නේ නැහැ.—යෙසායා 11:4.

• කේන්තියෙන් ඉද්දී දේවල් කරන්න යන්න එපා. (හිතෝපදේශ 17:27) ගොඩක් වෙලාවට කේන්තියෙන් ඉද්දී කරන දේවල් ගැන පස්සේ අපි පසුතැවෙනවා. ඒත් හොඳට හිතලා බලලා වැඩ කරනවා නම් හරි තීරණ ගන්න ඒක අපිට උදව් වෙයි.—හිතෝපදේශ 29:11.

• ඇත්තටම මොකක්ද වුණේ කියලා දැනගන්න. (හිතෝපදේශ 18:13) කෙනෙක් අපිට වරදක් කළාම මේ දේවල් ගැන හිතලා බලන එක හොඳ දෙයක්. ‘ඇයි එයා මට එහෙම කළේ? මං දන්නේ නැති මොකක් හරි හේතුවක් ඒකට තියෙනවාද? එයා හිටියේ ලොකු පීඩනයකින්ද? එයා ඒක එච්චර හිතන්නේ බලන්නේ නැතුව කරපු දෙයක්ද?’ සමහර වෙලාවට අපිට හිතුණත් ඒක හිතාමතාම කරපු දෙයක් කියලා ඒක ඇත්තටම අත්වැරදීමක් වෙන්න පුළුවන්.

වැරදි මතය: බයිබලයේ පළිගන්න අවසර දීලා නැති නිසා අපිට කරදරයක් කරන්න හදන කෙනෙක්ගෙන් බේරෙන්න අපිට මුකුත්ම කරන්න බැහැ.

ඇත්ත මේකයි: අපිට කෙනෙක් අනතුරක් කරන්න එද්දී අපේ ආරක්ෂාව වෙනුවෙන් පියවර ගන්න, බලධාරීන්ගෙන් උදව් ගන්න අපිට අයිතිය තියෙනවා. ඒත් බයිබලයේ අපිට උනන්දු කරන්නේ රණ්ඩු ඇති කරගන්නේ නැතුව පුළුවන් තරම් සාමකාමීව ඉන්න කියලයි.—හිතෝපදේශ 17:14.