රන් ජම්බු මෙනි

ජම්බු—ඒවා නෙත හා තල්ල යන දෙක ම කොතරම් පිනවයි ද! “කලට සුදුසු වචනය රිදී කර්මාන්තවල තිබෙන රන් ජම්බුමෙනි [ඇපල් මෙනි, NW]” යයි පවසන විට, බයිබලය, මෙම ඉතා රසවත් පළතුර චින්තනය පොලඹවන උපමාලංකාරයකට යොදා ගනී. (හිතෝපදේශ 25:11) මෙම ප්‍රකාශයෙන් කුමක් අදහස් කෙරේ ද?

“රිදී කර්මාන්තවල තිබෙන රන් ජම්බු” යන ප්‍රකාශය, රන්වලින් වූ ගෙඩි සහිත ව කැටයම් කරන ලද රිදී තැටියක් වැනි, යම් කැටයම් වැඩක් අඟවන්නට පුළුවන. මෙම පරිච්ඡේදයේ ඊට කලින් ඇති වගන්ති රජ කෙනෙක් වෙතට සමීප වීම ගැන සඳහන් කරන බැවින් හිතෝ 25:2, 3, 5, 6, මෙම වගන්තිය පාලකයෙකුට දෙනු ලැබූ තෑගිවලට—එනම් රිදී තැටි මත තබන ලද ජම්බු නැතහොත් ඇපල් වැනි හැඩයෙන් යුත් රන් සැරසිලිවලට—යොමු දක්වන්නට පුළුවන. (හිතෝපදේශ 25:6, 7) ඉතා කැපී පෙනෙන ලෙසින්, ඇත්ත වශයෙන් ම, අලංකාරයි!

ලිඛිත ඒවා හෝ කථා කරන ඒවා හෝ වේවා, උචිත, ගෞරවනීය, කාලෝචිත වදන්වල සමානාකාර අලංකාරයක් ඇත්තේ ය. ඒවා විවිධ අයුරින් සිත් ගන්නා සුළු ය, දිරිගන්වන සුළු ය, එමෙන් ම ප්‍රයෝජනවත් ය. විශේෂයෙන් දේවානුභාවයෙන් යුක්ත ව බයිබලයේ අඩංගු කර ඇති දේවල් “රිදී කර්මාන්තවල තිබෙන” ලස්සන “රන් ජම්බුමෙනි [ඇපල් මෙනි, NW].”

ඥානවන්ත සාලමොන් රජ විසින් හිතෝපදේශ 25:11 හි විස්තර කරන ලද ආකාරයට, ඔහු ‘ප්‍රිය වූ වචන හා සත්‍යයේ හරි වදන් ලියවීම’ සෙව්වේ ය. (දේශනාකාරයා 12:10; හිතෝපදේශ 25:1) ඉන් සියවස් ගණනාවකට පසු, ප්‍රේරිත පාවුල් “දේවානුභාවයෙන් දුන් මුළු ලියවිල්ල . . . ප්‍රයෝජනවත්ව තිබේ” යයි ලිව්වේ ය. (2 තිමෝති 3:16) එසේ ය, බයිබලයේ අඩංගු ව තිබෙන ප්‍රයෝජනවත් උපදෙස්, අනාවැකි, චිත්‍රයකට නැගිය හැකි වදන් හා සත්‍යයන් කොතරම් ප්‍රභාසම්පන්න හා අලංකාර ද කිවහොත්, ඒවා හොඳ ම ශිල්පීන්ගේ කර්මාන්තයන් අභිබවා යන්නේ ය. මීට අමරත ව, දේව වචනය වන බයිබලයෙන් ප්‍රඥාව අත්කර ගන්නා කවරෙක් නමුත්, මිල කළ නොහැකි සම්පතක් ලබා ගන්නා අතර සදාකාල ජීවිතයේ බලාපොරොත්තුව අත්කරගැනීමට අපේක්ෂාවෙන් සිටී.—හිතෝපදේශ 4:7-9; යොහන් 17:3.