19. යෙහෝවා ඉදිරිපත් කරන හෘදයාංගම ආයාචනය කුමක්ද?

¹⁹ යෙහෝවා ආශා වන්නේ ඔහුගේ සෙනඟ විපත්තියෙන් වැළකී ප්‍රීතියෙන් ජීවිතය භුක්ති විඳිනවා දැකීමටයි. ඒ බව ඊළඟ ඡේදයේ මනාව ප්‍රකාශ කරයි. “අනේ, නුඹ මාගේ ආඥාවලට ඇහුම්කන්දුන්නා නම් නුඹේ සමාදානය ගංගාවක් මෙන්ද නුඹේ ධර්මිෂ්ඨකම මුහුදේ රැළ මෙන්ද වන්නේය.” (යෙසායා 48:18) සර්ව පරාක්‍රම මැවුම්කරුගෙන් ලැබෙන හෘදයාංගම ආයාචනය මොනතරම් හද උණුසුම් කරවයිද! (ද්විතීය කථාව 5:29; ගීතාවලිය 81:13) වහල්භාවයට යනවා වෙනුවට ගඟක ගලන ජලය මෙන් බොහෝ සමාදානය අද්දකින්න ඔවුන්ට පුළුවන් වනු ඇත. (ගීතාවලිය 119:165) ඔවුන්ගේ ධර්මිෂ්ඨ ක්‍රියා මුහුදේ රැළ මෙන් ගැනිය නොහැක. (ආමොස් 5:24) ඉශ්‍රායෙල්වරුන් කෙරෙහි සැබෑ උනන්දුවක් දක්වන තැනැත්තා හැටියට යෙහෝවා මෙලෙස ඔවුන්ගෙන් උදක්ම ඉල්ලා සිටින්නේ ඔවුන් යා යුතු මාර්ගය ප්‍රේමනීය ලෙස පෙන්වමිනි. අනේ, ඔවුන් යෙහෝවාට ඇහුම්කන් දුන්නා නම්!

21. යෙහෝවාගේ උපදෙස් ඉගෙනගතහොත්, අද අප අද්දකිනු ඇති ආශීර්වාද මොනවාද?

²¹ බයිබලයෙහි ඇති මෙම ප්‍රබල වදන් ඇතුළත් කොටසෙහි දක්නට තිබෙන ප්‍රතිපත්ති අද සිටින යෙහෝවාගේ නමස්කාරකයන්ට අදාළ වේ. ජීවිතයේ උල්පත යෙහෝවායි. අප අපේ ජීවිත ගත කළ යුත්තේ කෙසේද කියා වෙන කාටත් වඩා දන්නේ ඔහුයි. (ගීතාවලිය 36:9) ඔහු අපට අවශ්‍ය මඟ පෙන්වීම් ලබා දී ඇත. එසේ කර තිබෙන්නේ අපේ ප්‍රීතිය නැති කිරීමට නොව අපේ දිගු කාලීන ප්‍රයෝජනය තකාය. සැබෑ ක්‍රිස්තියානීන් මීට ප්‍රතිචාරය දක්වන්නේ දෙවිගෙන් ඉගෙනගැනීමට උනන්දුවක් දැක්වීමෙනි. (මීකා 4:2) ඔහුගේ මඟ පෙන්වීම් අපේ ආත්මිකත්වය මෙන්ම ඔහු සමඟ ඇති අපේ සම්බන්ධය ආරක්ෂා කරන අතර, ඒවා අපව සාතන්ගේ දූෂිත බලපෑම්වලින්ද ආරක්ෂා කරයි. දෙවිගේ ව්‍යවස්ථාව පිටුපස ඇති ප්‍රතිපත්ති අගය කරන්න අප ඉගෙනගනිද්දී යෙහෝවා අපට උගන්වන්නේ අපේ යහපතට බව අපි දකින්න පටන්ගන්නෙමු. ඔහුගේ “ආඥා බර [නැති]” බව අපි තේරුම්ගන්නෙමු. ඊට එකඟව ජීවත් වුවහොත් අප විනාශ නොවෙනු ඇත.—1 යොහන් 2:17; 5:3.