16, 17. යෙහෝවඃ වහන්සේ, 1914 දී ස්වකීය ස්ත්‍රියක් බඳු සංවිධානය මත ස්වකීය තේජස උදා කළේ කෙසේ ද, තව ද උන් වහන්සේ ඈට කිනම් ආඥාවක් දුන් සේක් ද?

¹⁶ සෑම තැන ම වෙසෙන ජනයාගේ ප්‍රයෝජනය සඳහා දිව්‍ය ආලෝකය විහිදුවමින් තිබෙන අන්දම ශුද්ධ ලියවිල්ලේ ආත්ම කලතන භාෂාවකින් විස්තර කරයි. යෙහෝවඃ වහන්සේගේ “ස්ත්‍රිය ව,” එනම් ස්වකීය පක්ෂපාත සේවකයන්ගෙන් යුත් ස්වර්ගීය සංවිධානය අමතන යෙසායා 60:1-3 මෙසේ පවසයි: “[අහෝ, ස්ත්‍රිය NW] නැගිට බැබළියන්න, මක්නිසාද නුඹේ ආලෝකය පැමුණුණේය, ස්වාමීන්වහන්සේගේ [යෙහෝවඃ වහන්සේගේ NW] තේජසද නුඹ කෙරෙහි උදාවිය. එසේය, පොළොව අන්ධකාරයෙන්ද ජනයෝ තද අන්ධකාරයෙන්ද වසනු ලබන්නෝය. නුමුත් නුඹ කෙරෙහි ස්වාමීන්වහන්සේ [යෙහෝවඃ වහන්සේ NW] උදාවනසේක. උන්වහන්සේගේ තේජසද නුඹ කෙරෙහි පෙනෙන්නේය. ජාතීන් නුඹේ ආලෝකයටද රජවරුන් නුඹේ උදාවීමේ දීපිතයටද එනවා ඇත.”

18. (අ) යෙසායා 60:2 හි පුරෝකථනය කර තිබෙන පරිදි, අන්ධකාරයෙන් පොළොව වැසී තිබෙන්නේ මන්ද? (ආ) පුද්ගලයන් ව පොළොවේ අන්ධකාරයෙන් ගලවනු ලැබිය හැක්කේ කෙසේ ද?

¹⁸ මීට හාත්පසින් ම වෙනස් ව, පොළොව අන්ධකාරයෙන් ද ජාතීන් තද අන්ධකාරයෙන් ද වැසී තිබේ. මන්ද? මක්නිසාදයත්, මිනිස් පාලනවලට සහයෝගය දෙමින් ජාතීහු දෙවියන් වහන්සේගේ ප්‍රිය පුත්‍රයාණන්ගේ ආණ්ඩුව ප්‍රතික්ෂේප කරති. එක් ආණ්ඩු ක්‍රමයක් වෙනුවට තව ආණ්ඩු ක්‍රමයක් මාරු කිරීමෙන් තමන්ගේ ප්‍රශ්න ගැටලු විසඳිය හැකි යයි ඔවුහු සිතති. එහෙත්, ඔවුන් බලාපොරොත්තු වන සහනය මේ මගින් ගෙන එන්නේ නැත. ආත්ම විෂයේ සිට ජාතීන් ව කූඨ ලෙස හසුරුවමින් සිද්ධීන් පිටුපස සිටින්නේ කවුද කියා දැකීමට ඔවුහු අසමත් වෙති. (2 කොරින්ති 4:4) ඔවුහු සැබෑ ආලෝකයේ ප්‍රභවය ප්‍රතික්ෂේප කරති, එමනිසා ඔවුන් සිටින්නේ අන්ධකාරයේ ය. (එපීස 6:12) කෙසේ වුවද, ජාතීන් කුමක් කළත්, පුද්ගලයන්ට එම අන්ධකාරයෙන් ගැලවිය හැක. කුමන මාර්ගයෙන් ද? දෙවියන් වහන්සේගේ රාජ්‍යය කෙරෙහි සම්පූර්ණ ඇදහිල්ල තබා ඊට යටත්වීමෙනි.

19, 20. (අ) යේසුස් වහන්සේගේ ආලේප ලත් අනුගාමිකයන් මත යෙහෝවඃ වහන්සේගේ තේජස උදා වී ඇත්තේ මන්ද, කෙසේ ද? (ආ) යෙහෝවඃ වහන්සේ ස්වකීය ආලේප ලත් අය ව ආලෝකය දරන්නන් කර ඇත්තේ කිනම් හේතුවක් උදෙසා ද? (ඇ) පුරෝකථනය කළ පරිදි, “රජවරු” සහ “ජාතීන්” දෙවියන් වහන්සේ විසින් දී ඇති ආලෝකයට ඇදී ගොස් ඇත්තේ කෙසේ ද?

¹⁹ ක්‍රිස්තියානි ලෝකය දෙවියන් වහන්සේගේ රාජ්‍යය කෙරෙහි ඇදහිල්ල තබා එයට යටත් වී නැත. එහෙත් යේසුස් ක්‍රිස්තුස් වහන්සේගේ ආත්මයෙන් ආලේප ලත් අනුගාමිකයන් එසේ කර තිබේ. මෙහි ප්‍රතිඵලයක් වශයෙන්, යෙහෝවඃ වහන්සේගේ දිව්‍ය අනුමැතියේ ආලෝකය උන් වහන්සේගේ ස්වර්ගික ස්ත්‍රියගේ මෙම දෘශ්‍යමාන නියෝජිතයන් මත බැබළී තිබෙන අතර, ඔවුන් මත උන් වහන්සේගේ තේජස විද්‍යමාන වී ඇත. (යෙසායා 60:19-21) ලෝකයේ කිසි ම දේශපාලන හෝ ආර්ථිකමය වෙනසක් මගින් ඉවත ලන්නට නොහැකි ආත්මික ආලෝකයක් ඔවුහු භුක්ති විඳිති. මහා බබිලෝනියෙන් යෙහෝවඃ වහන්සේ ඔවුන් ව ගලවා ගෙන තිබීම ඔවුන් අත්දැක තිබේ. (එළිදරව් 18:4) ඔවුන් යෙහෝවඃ වහන්සේගේ හික්මවීම සහ නිවැරදි කිරීම පිළිගෙන, උන් වහන්සේගේ පරමාධිපත්‍යයට පක්ෂ ව ස්ථිර වී සිට තිබෙන නිසා ඔවුහු උන් වහන්සේගේ අනුමැතියේ මද හස භුක්ති විඳිති. ඔවුන්ට අනාගතය උදෙසා දීප්තිමත් අපේක්ෂාවන් තිබෙන අතර, උන් වහන්සේ ඔවුන් ඉදිරියේ තබා තිබෙන රාජ්‍යය බලාපොරොත්තුව තුළ ඔවුහු ප්‍රීති වෙති.