බයිබල් පොත් අංකය 36—ශෙපනියා
ලේඛකයා: ශෙපනියා
ලියූ ස්ථානය: යූදා
ලිවීම අවසන් කළේ: පො.යු.පෙ. 648ට පෙර
යූදාහි රජු වූ යොෂියාගේ පාලන සමයේ මුල්භාගයේදී, (පො.යු.පෙ. 659-629 දක්වා) එනම්, බාල් නමස්කාරය හාත්පස පැතිරෙමින්ද “පූජකයන්” එම අපවිත්‍ර නමස්කාරයේ පෙරමුණ ගෙන ක්‍රියා කරමින්ද සිටි කාලයකදී, අනාගතවක්තෘ ශෙපනියා විසින් ප්‍රකාශ කරනු ලැබූ පණිවිඩයෙන් යෙරුසලමේ ජනයා විස්මයට පත් වූවා විය හැක. ඇතැම්විට, ශෙපනියා යූදාහි රාජකීය ගෘහයේ සිටි හෙසකියා රජුගෙන් පැවතෙන්නෙක් විය හැකි වුවත්, ඔහු ජාතියේ පැවති තත්වයන් දැඩි ලෙස විවේචනය කළේය. (ශෙප. 1:1, 4) ඔහුගේ පණිවිඩය විනිශ්චයේ පණිවිඩයක් විය. දෙවිගේ සෙනඟ අකීකරු වී සිටියහ. තවද ඔවුන්ව නිර්මල නමස්කාරයට යළි පිහිටුවා, “පොළොවේ සියලු ජනයන් අතරෙහි . . . නාමයක්ද ප්‍රශංසාවක්ද” වන සේ ඔවුන්ට ආශීර්වාද කළ හැකිව තිබුණේ යෙහෝවාට පමණි. (3:20) යමෙකුට ‘යෙහෝවාගේ උදහස් දවසේදී’ සැඟවීමට හැක්කේ දිව්‍ය මැදිහත් වීමකින් පමණක් බව ශෙපනියා පෙන්වා දුන්නේය. (2:3) “යෙහෝවා සඟවා තිබේ (නිධානයක් මෙන් තබා ඇත)” යන අර්ථය ඇති ට්සෙෆාන්යාහ් (හෙබ්‍රෙව්) නමැති ඔහුගේ නාමය කොතරම් යෝග්‍යද!
2 ශෙපනියාගේ ප්‍රයත්නයන් ඵලදායක විය. වයස අවුරුදු අටේදී සිංහාසනාරූඪ වූ යොෂියා රජ ඔහුගේ පාලනයේ 12වන අවුරුද්දේදී “යූදා සහ යෙරුසලම පිරිසිදු කරන්ට” පටන්ගත්තේය. ඔහු බොරු නමස්කාරය මුලිනුපුටා දමා, “යෙහෝවාගේ ගෘහය” අලුත්වැඩියා කර පාස්කු මංගල්‍යය යළි පැවැත්වූයේය. (2 ලේක. 34, 35වන පරි.) කෙසේවෙතත්, යොෂියාගේ අනුප්‍රාප්තිකයන් වූ ඔහුගේ පුත්‍රයන් තිදෙනා සහ එක් මුණුපුරෙක් “යෙහෝවාගේ ඇස් හමුයෙහි නපුරුව තිබුණු දේ” කළ බැවින්, ඔහුගේ ප්‍රතිසංස්කරණ වැඩපිළිවෙළ පැවතියේ ටික කාලයකටය. (2 ලේක. 36:1-12) මේ සියල්ල ශෙපනියා පැවසූ මෙම වදන්වල ඉටුවීමකි. “අධිපතීන්ටද රජුගේ පුත්‍රයන්ටද . . . තමුන්ගේ ස්වාමිවරුන්ගේ ගෙවල් බලාත්කාරයෙන්ද ප්‍රයෝගයෙන්ද පුරවන සියල්ලන්ටත් දඬුවම් කරන්නෙමි.”—ශෙප. 1:8, 9.
3 ඉහත සඳහන් කළ කරුණුවලින් පෙනී යන්නේ ඇතැම්විට යොෂියාගේ පාලනයේ 12වන අවුරුද්දේදී, එනම් පො.යු.පෙ. 648ට පෙර, ‘යෙහෝවාගේ වචනය ශෙපනියා වෙතට පැමිණි’ බවයි. ඔහු යුදයේ සිට කතා කරමින් සිටි බව පළමුවන පදයේ සඳහන් දෙයින් පැහැදිලි වේ. එපමණක්ද නොව, යෙරුසලමේ පිහිටි ප්‍රදේශයන් සහ චාරිත්‍ර වාරිත්‍ර ගැන ඔහුට තිබුණු පුළුල් දැනුමෙන්ද තහවුරු වන්නේ ඔහු යූදාහි පදිංචිව සිටි කෙනෙකු බවයි. මෙම පොතෙහි සඳහන් පණිවිඩය කොටස් දෙකකින් සමන්විතයි. එකක් තර්ජනය කිරීම් හා සම්බන්ධ වන අතර අනෙක සැනසිල්ල හා සම්බන්ධයි. එහි වැඩි කොටසක් ඉතා ඉක්මනින් සිදුවීමට නියමිතව තිබූ භයානක දවසක් වූ යෙහෝවාගේ දවස වටා කේන්ද්‍රගත වෙයි. නමුත් ඒ සමඟම ‘යෙහෝවාගේ නාමය කෙරෙහි විශ්වාසය තබන’ නිහතමානී ජනයාව යෙහෝවා යළි පිහිටුවනු ලබන බවද එය පුරෝකථනය කරයි.—1:1, 7-18; 3:12.
4 මේ අනාගතවාක්‍ය පොතේ විශ්වාසවන්තභාවය පිළිබඳව සැක පහළ කිරීම පදනම් විරහිතය. ශෙපනියා යෙරුසලමේ විනාශය ගැන පුරෝකථනය කර වසර 40කට වඩා වැඩි කාලයකට පසු, එනම් පො.යු.පෙ. 607දී එය විනාශ විය. මේ සඳහා අපට තිබෙන්නේ ලෞකික ඉතිහාසයෙහි වාර්තාගත වී තිබෙන සාක්ෂි පමණක් නොව, නමුත් මෙය හරියටම ශෙපනියා පුරෝකථනය කළ පරිදි සිදු වූ බවට බයිබලයේ ද සාක්ෂි අඩංගු වේ. යෙරුසලමේ විනාශයෙන් කෙටි කලකට පසු, තමා අද්දුටු සහ ඒ වන විටත් තමාගේ මනසෙහි මැකී ගොස් නොතිබුණු ශෝකය විස්තර කරමින් යෙරෙමියා විලාප ගී පොත ලීවේය. ශෙපනියා ප්‍රකාශ කළ පණිවිඩය සැබවින්ම “දේවානුභාවයෙන්” බව එහි නොයෙක් කොටස් සැසඳීමෙන් සනාථ වේ. “යෙහෝවාගේ උදහස් දවස නුඹලා පිටට පැමිණෙන්ට පළමුවෙන්,” පසුතැවිලි වීමේ ඇති අවශ්‍යතාව ගැන ශෙපනියා අනතුරු අඟවයි. මීට වෙනස්ව, “යෙහෝවා තම . . . බලවත් උදහස වැගිරෙව්වේය” කියා යෙරෙමියා පවසන විට ඔහු යොමු දක්වන්නේ ඒ වන විටත් සිදු වී තිබෙන දෙයකටයි. (ශෙප. 2:2; විලා. 4:11) යෙහෝවා “මනුෂ්‍යයන් අන්ධයන් මෙන් ඇවිදින හැටියට ඔවුන් පිට විපත්ති පමුණුවන්නේය. ඔවුන්ගේ ලේ ධූලි මෙන් වගුරනු ලබන්නේය” කියා ශෙපනියා පුරෝකථනය කරයි. (ශෙප. 1:17) යෙරෙමියා මේ ගැන කතා කරන්නේ එය ඉටු වූවාක් මෙන්ය. “ඔව්හු අන්ධයන් මෙන් වීථිවල ඔබ මොබ යති. . . . ඔවුහු ලෙයින් කිලුටු වී සිටිති.” (අකුරු ඇල කළේ අපය.)—විලා. 4:14; මේවත් සසඳන්න, ශෙපනියා 1:13—විලාප ගී 5:2; ශෙපනියා 2:8, 10—විලාප ගී 1:9, 16 සහ විලා. 3:61.
5 ශෙපනියා දෙවිගේ මඟ පෙන්වීම යටතේ පුරෝකථනය කළාක් මෙන් කලින් සිදුවීම් හා සමානව මෝවබ්, අම්මොන් සහ අෂූරිය ඇතුළු එහි අගනුවර වන නිනිවය වැනි මිථ්‍යාදෘෂ්ටික ජාතීන්ගේ විනාශයද ඉතිහාසයේ වාර්තා වේ. අනාගතවක්තෘ නාහුම්ද නිනිවයේ විනාශය ගැන පුරෝකථනය කළාක් මෙන් (නාහූ. 1:1; 2:10), යෙහෝවා “නිනිවය කාන්තාරය මෙන් දියසීරා නැති පාළුවක් කරනවා ඇත” කියා ශෙපනියා ප්‍රකාශ කළේය. (ශෙප. 2:13) මේ විනාශය කොතරම් සම්පූර්ණයෙන් සිදු වූවාද කිවහොත් අවුරුදු 200කට ආසන්න කාලයකට පසු ඉතිහාසඥ හෙරොඩටස්, ටයිග්‍රීස් ගඟ ගැන ලියන විට එය “නිනිවය නගරය කලින් පිහිටා තිබුණු ප්‍රදේශයේ තිබෙන ගඟ” වශයෙන් සඳහන් කළේය.a “එහි අංශුමාත්‍රයක්වත් දැන් ඉතිරිව නැහැ” කියා ග්‍රීක ලේඛක ලූෂන් පො.යු. 150දී පමණ ලීවේය.b “නගරයේ පවුරුවලින් විශාල කොටසක් ගසාගෙන ගොස් නගරය අනාරක්ෂිත ස්ථානයක් බවට පත් කළ ටයිග්‍රීස් ගඟේ ජලය හදිසියේම ඉහළ යෑම,” ආක්‍රමණශීලී හමුදාවන්ට “මහත් උපකාරයක් විය. . . . විනාශය කොතරම් මහත්ද කිවහොත් ග්‍රීක සහ රෝම කාලවලදී නිනිවයේ පැවැත්ම බොහෝ දුරට සැලකුවේ මිථ්‍යාවක් ලෙසය. එහෙත් නගරයේ කොටස් කසළ ගොඩක් මෙන් පෙනෙන පස් ගොඩැලි යට වැළලිණ” යයි ද නිව් වෙස්ට්මිනිස්ට’ ඩික්ෂනරි ඔෆ් ද බයිබල් (1970) 669වන පිටුවේ සඳහන් වේ. “නෙබුකද්නෙශර් මෝවබ්වරුන්ව යටත් කරගත්තේය” යනුවෙන් පුරෝකථනය කර තිබූ පරිදි මෝවබ්වරුන්ද විනාශ වූ බව එම කාණ්ඩයේම 627වන පිටුවේ දැක්වේ. අම්මොන්වරුන්ව යටත් කරගැනීම ගැන ජොසීෆස්ද වාර්තා කරයි.c අවසානයේදී මෝවබ්වරුන්ද අම්මොන්වරුන්ද සෙනඟක් වශයෙන් පැවැත්මෙන් තුරන් විය.
6 යුදෙව්වරුන් පිළිගත් දේවානුභාවය ලත් ශුද්ධ ලියවිලි අතර ශෙපනියා පොතට හිමි නිසි තැන කවදත් ලබා දී තිබේ. ඔහුගේ නාමයෙන් කළ ප්‍රකාශයන් විශිෂ්ට ලෙස ඉටු විය. මෙහි අරමුණ යෙහෝවාගේ ස්වාධිපත්‍යය නිදොස් කිරීමයි.
ප්‍රයෝජනවත් වීමට හේතු
10 යොෂියා රජ ශෙපනියාගේ අනතුරු ඇඟවීමේ පණිවිඩයට අවනත වී ඉමහත් ප්‍රයෝජන ලබාගත් අයෙකි. ඔහු ආගමික ප්‍රතිසංස්කරණයන් කිරීම උදෙසා විශාල ව්‍යාපාරයක් දියත් කළේය. යෙහෝවාගේ ගෘහය අලුත්වැඩියා නොකර අත්හැර දමා තිබූ කාලයේදී නැති වී තිබූ ව්‍යවස්ථා පොතද මේ කාලයේදී සොයාගනු ලැබීය. මේ පොතෙන් ඔහුට කියවනු ලැබූ විට අකීකරුකමේ ප්‍රතිවිපාක ගැන ඇසූ යොෂියා මහත් සේ ශෝකයට පත් වූයේය. ඒ වන විටත් අකීකරුකමේ ප්‍රතිවිපාක ගැන අනාවැකි පවසමින් සිටි ශෙපනියාගේ වදන් තවත් සාක්ෂිකරුවෙකු වූ මෝසෙස් විසින් කලකට පෙර තහවුරු කර තිබූ බව එමගින් හෙළි විය. යොෂියා යෙහෝවා ඉදිරියෙහි යටහත් පහත් වූ අතර එහි ප්‍රතිඵලයක් හැටියට පුරෝකථනය කළ විනාශය ඔහුගේ ජීවිත කාලය තුළ නොපැමිණෙන බවට යෙහෝවා පොරොන්දු විය. (ද්වි. 28-30 දක්වා පරි.; 2 රාජා. 22:8-20) දේශය විනාශයෙන් ගැලවිය! නමුත් එය කෙටි කාලයකට පමණි. මන්ද යොෂියාගේ පුත්‍රයන් ඔහුගේ යහපත් ආදර්ශය අනුගමනය කිරීමට අසමත් වූ හෙයිනි. කෙසේවෙතත්, යොෂියා සහ ඔහුගේ සෙනඟ “ශෙපනියා වෙතට පැමිණි යෙහෝවාගේ වචනය[ට]” සවන් දීමෙන් මහත් ප්‍රයෝජන ලැබූහ.—ශෙප. 1:1.
11 දෙවිගේ ශ්‍රේෂ්ඨතම අනාගතවක්තෘවරයා වන යේසුස් ක්‍රිස්තුස් සිය සුප්‍රකට කන්ද උඩ දේශනාවේදී, “දේශයේ මොළොක් ගුණ ඇති සියල්ලෙනි, ඔහු සොයන්න. ධර්මිෂ්ඨකම සොයන්න. මොළොක් ගුණය සොයන්න” යනුවෙන් 2වන පරිච්ඡේදයේ 3වන වගන්තියේ සඳහන් ශෙපනියාගේ උපදේශයට සමාන සිත්ගන්නාසුලු වචන පවසමින් දෙවිගේ සැබෑ අනාගතවක්තෘවරයෙකු වශයෙන් ශෙපනියාට අනුබලය දුන්නේය. යේසුස්ගේ උපදේශය වූයේ මෙයයි. “පළමුකොට ඔහුගේ රාජ්‍යයද ඔහුගේ ධර්මිෂ්ඨකමද සොයන්න.” (මතෙ. 6:33) දේවරාජ්‍යය පළමුකොට සොයන්නන් ශෙපනියා විසින් අනතුරු අඟවන ලද උදාසීනකමට එරෙහිව සිටිය යුතුය. ඔහු මෙම අනතුරු ඇඟවීම කළේ “යෙහෝවා වෙතින් පසුබටවූවන්ද, යෙහෝවා නොසෙවුවාවූ, ඔහුගෙන් විභාග නොකළාවූ අයද . . . යෙහෝවා යහපතවත් නපුරවත් කරන්නේ නැතැයි තමුන්ගේ සිත් තුළ සිතාගන්නාවූ” අය ගැනද කතා කිරීමේදීය. (ශෙප. 1:6, 12) පාවුල් හෙබ්‍රෙව්වරුන්ට ලියූ තම ලිපියේදී පැමිණෙන විනිශ්චය ගැන සමානාකාරයෙන් කතා කරමින් පසුබට වීමට එරෙහිව අනතුරු අඟවයි. ඔහු තවදුරටත් මෙසේ පවසයි. “අපි වනාහි විනාශ වන ලෙස පසුබට වීමට නොව ප්‍රාණය ගැලවෙන ලෙස ඇදහීමට අයිති වමුව.” (හෙබ්‍රෙ. 10:30, 37-39) “සමහරවිට නුඹලා යෙහෝවාගේ උදහස් දවසේදී සඟවනු ලබනවා ඇත” කියා අනාගතවක්තෘවරයා පවසන්නේ පහසුවෙන් වෑයම අත්හරින අයට හෝ අගය නොකරන අයට නොව, නමුත් ඇදහිල්ලෙන් යුතුව යටහත් පහත්ව හා මහත් උනන්දුවෙන් යෙහෝවාව සොයන්නන්ටයි. “සමහරවිට” යනුවෙන් සඳහන් කරන්නේ මන්ද? අවසානයේදී පුද්ගලයාගේ ගැලවීම රඳා පවතින්නේ ඔහු ගන්නා ක්‍රියාමාර්ගය මත වන නිසයි. (මතෙ. 24:13) දෙවිගේ දයාවෙන් අයුතු ප්‍රයෝජනගත නොහැකි බවට එය සිහිගැන්වීමක් වේ. එම දවස නොසලකාහරින්නන් මත එය හදිසියේම පැමිණෙන බවට ශෙපනියාගේ අනාවැකිය මගින් ස්ථිරත්වයක් සපයයි.—ශෙප. 2:3; 1:14, 15; 3:8.
12 මෙය යෙහෝවාට විරුද්ධව පව්කරන්නන් වෙත පැමිණෙන විනාශය පිළිබඳව අනතුරු ඇඟවීමක් ඇතුළත් පණිවිඩයකි. නමුත් එය පසුතැවිලි වීමේ ස්වභාවයකින් යුතුව ‘යෙහෝවාව සොයන’ අයට භුක්ති විඳිය හැකි ආශීර්වාද පිළිබඳව දීප්තිමත් සේයාවන්ද සපයන පණිවිඩයකි. ‘ඊශ්‍රායෙල්හි රජ යෙහෝවා නුඹ අතර සිටින්නේය’ යයි ශෙපනියා පවසන නිසා පසුතැවිලිවන්නන්ට ධෛර්යවත් විය හැක. මෙය සියොන්ට බියවීමටවත් කිසිවක් නොකර අත් පහතට හෙළීමටවත් කාලය නොවේ. මෙය යෙහෝවා කෙරෙහි දැඩි විශ්වාසය තැබීමට කාලයයි. “ඔහු ගලවන්ට බලවත් වූ තැනැත්තාය. ඔහු සන්තෝෂයෙන් නුඹ කෙරෙහි ප්‍රීති වී, තමන්ගේ ප්‍රේමයෙහි නිශ්චලව සිටින්නේය. ප්‍රීති ඝෝෂාවෙන් නුඹ කෙරෙහි ප්‍රීති වන්නේය.” ඔහුගේ ප්‍රේමණීය රැකවරණය සහ සදාකාලික ආශීර්වාද ප්‍රීතියෙන් බලා සිටිමින් ‘පළමුකොට ඔහුගේ රාජ්‍යය සොයන්නෝද’ සන්තෝෂවත් වෙති.—3:15-17.
[පාදසටහන්වල]
a මක්ලින්ටොක් ඇන්ඩ් ස්ට්‍රෝංස් සයික්ලොපීඩියා, 1981 ප්‍රතිමුද්‍රණය, කාණ්. VII, පිටුව 112.
b ඒ. එම්. හාමන් විසින් 1968දී පරිවර්තනය කළ ලූෂන්, කාණ්. II, පිටුව 443.
c ජුවිෂ් ඇන්ටික්විටීස්, X, 181, 182 (ix, 7).