පාලක මණ්ඩලය නීතික සංස්ථාවකින් වෙනස් වන අන්දම
පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටිහි වාර්ෂික රැස්වීම් 1885 ජනවාරි මාසයේ සිට පවත්වා තිබේ. ආලේප ලත් ක්‍රිස්තියානීන්ව එක්රැස් කිරීම සිදු වෙමින් පැවති 19වන සියවසේ අග භාගයේදී, මේ නීතික සංස්ථාවේ අධ්‍යක්ෂක ධුරය සහ නිලතල දැරුවේ ස්වර්ගීය අපේක්ෂාව තිබූ අය විසිනි. ඇත්තවශයෙන්ම, එදා මෙදා තුර සිදු වෙමින් තිබෙන්නේද එයමයි.
එහෙත්, ඊට වෙනස් දෙයක්ද සිදු විය. වර්ෂ 1940දී සමිතියේ එවකට නීති උපදේශක ලෙස සේවය කළ භූමික අපේක්ෂාව තිබූ ‘වෙනත් බැටළුවන්ගෙන්’ කෙනෙක් වූ හේඩ්න් සී. කවිංටන්ව සමිතියේ අධ්‍යක්ෂකවරයෙකු ලෙස තෝරා පත් කරගනු ලැබීය. (යොහන් 10:16) ඔහු 1942 සිට 1945 දක්වා සමිතියේ උපසභාපති ලෙසද සේවය කළේය. වර්ෂ 1945දී සහෝදර කවිංටන් අධ්‍යක්ෂක ධුරයෙන් ඉල්ලා අස් විය. එසේ කළේ, යෙහෝවාගේ කැමැත්ත වශයෙන් එවකට පිළිගැනුණු, පෙන්සිල්වේනියාවේ පිහිටි මෙම නීතික සංස්ථාවේ සියලුම අධ්‍යක්ෂකවරුන් සහ නිලධාරීන් ආලේප ලත් ක්‍රිස්තියානීන් විය යුතුය යන කාරණයට එකඟවය. හේඩ්න් සී. කවිංටන් වෙනුවට ලයිමන් ඒ. ස්විංගල් අධ්‍යක්ෂ මණ්ඩලයට පත් වූ අතර, උපසභාපති ලෙස ෆ්‍රෙඩ්‍රික් ඩබ්. ෆ්‍රාන්ස් පත් විය.
පෙන්සිල්වේනියාවේ පිහිටි වොච් ටවර් බයිබල් ඇන්ඩ් ට්‍රැක්ට් සොසයටිහි සියලුම අධ්‍යක්ෂවරුන් සහ නිලධාරීන් ආලේප ලත් අය විය යුතුය කියා යෙහෝවාගේ සේවකයන් විශ්වාස කළේ මන්ද? එවකට පෙන්සිල්වේනියාවේ පිහිටි මෙම නීතික සංස්ථාවේ සිටි අධ්‍යක්ෂක සහ නිලධාරි මණ්ඩලය, ආත්මයෙන් ආලේප ලත් පුරුෂයන්ගෙන් පමණක් සැදුම් ලත් යෙහෝවාගේ සාක්ෂිකරුවන්ගේ පාලක මණ්ඩලය හා සබැඳිව හඳුන්වනු ලැබූ නිසයි.
ඓතිහාසික වාර්ෂික රැස්වීමක්
වර්ෂ 1944 ඔක්තෝබර් මස දෙවැනිදා පිට්ස්බර්ග්හිදී පැවැත්වූ වාර්ෂික රැස්වීමේදී, පෙන්සිල්වේනියා සංස්ථාව එහි ප්‍රඥප්තිය සංශෝධනය කරමින් සම්මුති හයකට එකඟත්වය පළ කළේය. ප්‍රඥප්තියේ කලින් තිබූ ආකාරයට ඡන්ද දැමීමේ හැකියාව තිබුණේ, සමිතියේ වැඩවලට අරමුදල් සපයන අයටයි. නමුත් එහි තුන්වැනි සංශෝධනයේදී එම අදහස ඉන් ඉවත් කරනු ලැබීය. එම වාර්ෂික රැස්වීමේ වාර්තාවක් මෙසේ සඳහන් කරයි. “සමිතියේ සාමාජිකත්වය 500දෙනෙකුට වඩා ලබා නොදේ. . . . තෝරාගනු ලබන සෑම කෙනෙකුම යෙහෝවාගේ සාක්ෂිකරුවන්ගේ සමිතියේ පූර්ණ කාලීන සේවකයෙකු හෝ සභාවක අර්ධ කාලීන සේවකයෙකු හෝ විය යුතුය. එමෙන්ම ඔවුන් ස්වාමීන්ගේ සේවය තුළ ජ්වලිතයක් පෙන්විය යුතුය.”
එතැන් සිට සමිතියේ අධ්‍යක්ෂකවරුන්ව තනතුරුවලට පත් කරනු ලැබුවේ රාජ්‍ය කටයුතු සඳහා වැඩිම මුදලක් සම්මාදම් කරන අය විසින් නොව, යෙහෝවා වෙනුවෙන් ඇප කැප වී සේවය කළ අය විසිනි. එය යෙසායා 60:17හි පුරෝකථනය කර තිබූ ප්‍රගතිශීලී ශෝධනය කිරීම හා එකඟ විය. “මම පිත්තල වෙනුවට රත්රන් ගෙනෙන්නෙමි, යකඩ වෙනුවට රිදීද ලී වෙනුවට පිත්තලද ගල් වෙනුවට යකඩද ගෙනෙන්නෙමි. මම නුඹේ මුලාදෑනීන් [අවේක්ෂකයන්, NW] සමාදානයද නුඹේ ආණ්ඩුකාරයන් [වැඩ පවරන්නන්, NW] ධර්මිෂ්ඨකමද වෙන්ට සලස්වන්නෙමි.” “අවේක්ෂකයන්” සහ “වැඩ පවරන්නන්” යනුවෙන් යොමු දක්වමින් මෙම අනාවැකිය, යෙහෝවාගේ සෙනඟගේ සංවිධානාත්මක ක්‍රියා පටිපාටිය තුළ යම් දියුණු වීම් ඇති වන බව පෙන්වීය.
දානියෙල් 8:14හි [NW] සඳහන් “රෑ දාවල් දෙදාස් තුන්සියය” කෙළවර වීමත් සමඟම, සංවිධානය දිව්‍යාණ්ඩු පිළිවෙතට අනුකූලව පෙළ ගැස්වීමෙහි වැදගත් පියවර ගනු ලැබීය. එම කාලයේදී “ශුද්ධස්ථානය එයට හිමි තත්වයට ගෙනෙනු” ලැබීය.
කෙසේවෙතත්, 1944 පැවැත්වූ එම ඓතිහාසික වාර්ෂික රැස්වීමෙන් පසු වැදගත් ප්‍රශ්න කිහිපයකට පිළිතුරු අවශ්‍ය විය. පාලක මණ්ඩලය පෙන්සිල්වේනියාවේ පිහිටි මෙම සංස්ථාවේ සිටි සත්දෙනෙකුගෙන් යුත් අධ්‍යක්ෂ මණ්ඩලය හා සබැඳිව හඳුන්වා දුන් නිසා, පාලක මණ්ඩලයට ආලේප ලත් ක්‍රිස්තියානීන් සත්දෙනෙකුට වඩා ඇතුළත් විය නොහැකිය කියා ඉන් අදහස් කළාද? තවදුරටත්, අධ්‍යක්ෂවරුන්ව පත් කරගන්නේ සංස්ථාවේ සිටින සාමාජිකයන් නිසා, සෑම අවුරුද්දේම වාර්ෂික රැස්වීමේදී පාලක මණ්ඩලයේ සාමාජිකයන්වත් තෝරා පත් කළ යුත්තේ සංස්ථාව විසින්මද? පාලක මණ්ඩලය සහ පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටිහි අධ්‍යක්ෂවරුන් සහ නිලධාරීන් කියන්නේ එක් කණ්ඩායමක්ද නැත්නම් ඔවුන් එකිනෙකාට වෙනස්ද?
තවත් අමතක නොවන වාර්ෂික රැස්වීමක්
වර්ෂ 1971 ඔක්තෝබර් මස පළමුවැනිදා පැවැත්වූ වාර්ෂික රැස්වීමේදී එම ප්‍රශ්නවලට උත්තර සපයනු ලැබීය. එම අවස්ථාවේදී, එක් කථිකයෙකු කියා සිටියේ, ‘විශ්වාස වූ නුවණැති දාසයාගේ’ පාලක මණ්ඩලය ක්‍රියාත්මක වීමට පටන්ගත්තේ පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටි ඇරඹෙන්න අවුරුදු සියගණනකට පෙරය කියායි. (මතෙව් 24:45-47) පොදු යුගයේ 33 පෙන්තකොස්ත දිනයේදී පාලක මණ්ඩලය බිහි විය. ඒ පෙන්සිල්වේනියාවේ පිහිටි සංස්ථාව බිහිවීමට සියවස් 18කට පමණ පෙරය. මුලින්ම, පාලක මණ්ඩලයේ සිටියේ පුරුෂයන් සත්දෙනෙකු නොව ප්‍රේරිතයන් 12දෙනෙකි. ‘යෙරුසලමේ සිටි ප්‍රේරිතයන් සහ වැඩිමහල්ලන්’ කාරණා හැසිරවීමේදී මූලිකත්වය ගැනීමත් සමඟම එම සංඛ්‍යාව පසු කාලයේදී වැඩි වූ බව පැහැදිලිය.—ක්‍රියා 15:2, අකුරු ඇල කළේ අපය.
ආලේප ලත් අයගෙන් යුත් පාලක මණ්ඩලයේ සාමාජිකයන්ව පත් කරගැනීම සඳහා වොච් ටවර් සමිතියේ සාමාජිකයන්ට ඡන්දය දැමිය නොහැකි බව 1971දී එම කථිකයාම තවදුරටත් පැහැදිලි කළේය. ඒ මන්ද? ඊට හේතුව “‘දාස’ පංතිය නියෝජනය කරන පාලක මණ්ඩලය මනුෂ්‍යයන් විසින් පත් කරනු ලබන්නේ නැති නිසයි. ඔවුන්ව පත් කරන්නේ . . . සැබෑ ක්‍රිස්තියානි සභාවේ හිස මෙන්ම ‘විශ්වාස වූ නුවණැති දාස’ පංතියේ ස්වාමියා වන යේසුස් ක්‍රිස්තුස් විසිනුයි.” එසේ නම්, නීතික සංස්ථාවක සාමාජිකයන්ට පාලක මණ්ඩලයේ සාමාජිකයන්ව පත් කිරීමට නොහැකි බව පැහැදිලිය.
තවදුරටත්, කථිකයා මෙම වැදගත් කරුණද සඳහන් කළේය. “සභාපති, උපසභාපති, භාණ්ඩාගාරික ලේකම් සහ භාණ්ඩාගාරික උපලේකම් වැනි සමිතියේ අධ්‍යක්ෂක මණ්ඩලය සතු නිලතල පාලක මණ්ඩලය සතු වන්නේ නැත. පාලක මණ්ඩලයට සිටින්නේ මුලසුන දරන්නෙකු පමණි.” කෙසේවෙතත්, වසර ගණනාවක් පුරා පෙන්සිල්වේනියාවේ පිහිටි සංස්ථාවේ සභාපති ධුරය හෙබවූයේ පාලක මණ්ඩලයේ සිටි ප්‍රවීණම සාමාජිකයා විසිනි. නමුත් තවදුරටත් එය එසේ වන්නේ නැත. අද්දැකීම්වලින් සහ හැකියාවන්වලින් එක හා සමාන නැති වුණත්, පාලක මණ්ඩලයේ සාමාජිකයන්ට පැවරී ඇති වගකීම් අතින් බලන කල ඔවුන් එක සමානයි. කථිකයා තවදුරටත් කියා සිටියේ, “පාලක මණ්ඩලයේ ඕනෑම සාමාජිකයෙකුට . . . සමිතියේ සභාපති නොවී පාලක මණ්ඩලයේ මුලසුන දරන්නෙකු විය හැකි අතර, . . . එය සම්පූර්ණයෙන්ම පදනම් වන්නේ, පාලක මණ්ඩලයේ සාමාජිකයන් මාරුවෙන් මාරුවට මුලසුන හෙබවීම මත” බවය.
වර්ෂ 1971දී පැවැත්වූ එම අමතක නොවන වාර්ෂික රැස්වීමේදී, ආත්මයෙන් ආලේප ලත් පාලක මණ්ඩලයේ සාමාජිකයන් සහ පෙන්සිල්වේනියාවේ පිහිටි සංස්ථාවේ අධ්‍යක්ෂකවරුන් අතර තිබෙන වෙනස ගෙනහැර දැක්වීය. එහෙත්, පාලක මණ්ඩලයේ සාමාජිකයන් දිගටම සමිතියේ අධ්‍යක්ෂකවරුන් සහ නිලධාරීන් ලෙස සේවය කිරීමේ නිරත විය. කෙසේවෙතත්, පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටිහි අධ්‍යක්ෂකවරුන් පාලක මණ්ඩලයේ සාමාජිකයන් විය යුතුමයි කියා ශුද්ධ ලියවිල්ල පවසනවාද යන ප්‍රශ්නය මෙහිදී මතු වේ.
ඊට උත්තරය නැත යන්නයි. යෙහෝවාගේ සාක්ෂිකරුවන් තම නීතික සංස්ථාව ලෙස යොදාගන්නේ පෙන්සිල්වේනියාවේ පිහිටි සංස්ථාව පමණක්ම නොවෙයි. වෙනත් සංස්ථාද ඇත. සංස්ථාගත කළ වොච් ටවර් බයිබල් ඇන්ඩ් ට්‍රැක්ට් සොසයටි ඔෆ් නියූ යෝක් ඉන් එකකි. එය, එක්සත් ජනපදය තුළ අපගේ වැඩකටයුතු වඩා පහසු ආකාරයකට කරගෙන යෑමට උපකාර කරයි. එහි අධ්‍යක්ෂකවරුන් සහ නිලධාරීන් මූලිකවම සැකසෙන්නේ ‘වෙනත් බැටළුවන්ගෙන්’ වුණත් යෙහෝවාගේ ආශීර්වාදය එම සංස්ථාවට ලැබී තිබෙන බව පැහැදිලිව දැකගත හැක. බ්‍රිතාන්‍යය පාවිච්චි කරන්නේ ජාත්‍යන්තර බයිබල් ශිෂ්‍යයන්ගේ සමාගම යන නීතික සංස්ථාවයි. මෙවැනි වෙනත් නීතික සංස්ථා වෙනත් රටවල රාජ්‍ය කටයුතු පුළුල් කිරීම සඳහා මේ ආකාරයටම යොදාගැනේ. මේ සංස්ථා සියල්ලම එක්සත්ව පොළොව පුරා ශුභාරංචිය දේශනා කිරීමේදී වැදගත් කාර්යභාරයක් ඉටු කරයි. මේ සංස්ථා ලෝකයේ කොතැනක පිහිටා තිබුණත්, එහි අධ්‍යක්ෂවරුන් සහ නිලධාරීන් කවුරු වුණත්, එම සංස්ථාවලට අවශ්‍ය දිව්‍යාණ්ඩු මඟ පෙන්වීම සපයා ඒවා රිසි ලෙස යොදාගන්නේ පාලක මණ්ඩලයයි. මේ අනුව, රාජ්‍ය කටයුතු පුළුල් කිරීම සඳහා එක් එක් සංස්ථාවට පැවරුම් ලබා දී තිබේ.
නීතික සංස්ථා තිබීම අපට ප්‍රයෝජනදායකය. එමෙන්ම ඒවා පිහිටුවා තිබීම තුළින් දෙවිගේ වචනයේ පවසා තිබෙන ආකාරයට අපි ප්‍රාදේශීය මෙන්ම රටේ නීති රීතිවලටද එකඟ වන්නෙමු. (යෙරෙමියා 32:11; රෝම 13:1) බයිබල්, පොත්, සඟරා, විවරණිකා සහ වෙනත් පොත් පත් මුද්‍රණය කිරීමෙන් රාජ්‍ය පණිවිඩය පැතිරවීමේ අපේ වැඩය පහසු කිරීම සඳහා නීතික සංස්ථාවක් තිබීම උපකාරවත් වෙයි. දේපළ අයිතීන්, සහනාධාර ලබා දීම්, සමුළු පහසුකම් සඳහා අදාළ ගිවිසුම් අත්සන් කිරීම් වැනි කටයුතු හැසිරවීමට නීතික මෙවලමක් සේද එවැනි සංස්ථා යොදාගැනේ. එවැනි නීතික සංස්ථාවන් තිබීම ගැන අපි ඇත්තෙන්ම ස්තුතිවන්ත වෙමු.
යෙහෝවාගේ නාමය මුලට
සංස්ථාවේ මූලික අරමුණු අවධාරණය කිරීමේ අරමුණින්, 1944දී, පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටිහි ප්‍රඥප්තියේ IIවන වගන්තිය සංශෝධනය කරනු ලැබීය. ප්‍රඥප්තියට අනුව, සමිතියේ අරමුණුවලට මේ මූලික අරමුණද ඇතුළත් විය. “යෙහෝවා දෙවිගේ සර්වපරාක්‍රමවත් බවට, නාමයට සහ උත්කෘෂ්ටත්වයට සාක්ෂියක් වශයෙන් ක්‍රිස්තුස් යේසුස් යටතේ තිබෙන දෙවිගේ රාජ්‍යය ගැන සියලුම ජාතීන්ට දේශනා කළ යුතුයි.”
වර්ෂ 1926 සිට ‘විශ්වාස වූ දාසයා’ යෙහෝවාගේ නාමය මුල් තැනට ගෙනැවිත් තිබේ. මේ සම්බන්ධයෙන් විශේෂත්වයක් ඉසිලූ වර්ෂයක් ලෙස 1931 හැඳින්විය හැකියි. ඒ වර්ෂයේදී බයිබල් ශිෂ්‍යයෝ යෙහෝවාගේ සාක්ෂිකරුවන් යන නාමය වැලඳගත්හ. (යෙසායා 43:10-12) “යෙහෝවා” (1934), “ඔබේ නාමය විශුද්ධ කරනු ලැබේවා!” (1961) සහ ‘මා යෙහෝවා බව ජාතීන් දැනගන්නවා ඇත’—ඒ කෙසේද? (1971) වැනි සමිතියේ ප්‍රකාශන (ඉංග්‍රීසියෙන්) තුළ දෙවිගේ නාමය විශේෂ ලෙස කාවද්දවා ඇත.
වර්ෂ 1960දී, ශුද්ධ ලියවිලිවල නව ලෝක පරිවර්තනය (ඉංග්‍රීසියෙන්) සම්පූර්ණයෙන් ප්‍රකාශයට පත් කිරීම විශේෂයෙන්ම සඳහන් කළ යුත්තකි. එහි හෙබ්‍රෙව් ලියවිල්ලේ ගාත්‍රාක්ෂර සතර යෙදෙන සෑම තැනකම යෙහෝවා යන නාමය ඇතුළත් කර ඇත. මෙම පරිවර්තනයේ ක්‍රිස්තියානි ග්‍රීක් ලියවිල්ලෙහි දිව්‍ය නාමය 237 වතාවක් ඇතුළත් කර තිබේ. ඉතා පරෙස්සමින් විශ්ලේෂණය කළ විට, එසේ කර තිබීම නිවැරදි දෙය බව පෙනේ. නීතික සංස්ථා සහ ප්‍රකාශන යොදාගෙන විවිධාකාරයෙන් පොළොව පුරාම දෙවිගේ නාමය දැන්වීමට යෙහෝවා ‘දාසයාට’ සහ එහි පාලක මණ්ඩලයට ඉඩහැරීම ගැන අපි මොනතරම් ස්තුතිවන්ත වන්නෙමුද!
දෙවිගේ වචනය පැතිරවීමට අනුබලයක්
යෙහෝවාගේ සෙනඟ ඔහුගේ නාමයට දිගින් දිගටම සාක්ෂි දරමින් බයිබලය සහ ඒ මත පදනම් දශලක්ෂ ගණන් පොත් පත් ප්‍රකාශයට පත් කර බෙදාහරිමින් දෙවිගේ නම යෙහෝවා බව ප්‍රකාශ කර ඇත. විසිවන සියවසේ මුල් කාලයේදී, දි එම්ෆැටික් ඩයග්ලොට් ලෙස හඳුන්වන, බෙන්ජමින් විල්සන්ගේ ක්‍රිස්තියානි ග්‍රීක් ලියවිල්ලේ ග්‍රීක-ඉංග්‍රීසි පේළි අතර සංස්කරණයෙහි කර්තෘ හිමිකම වොච් ටවර් සමිතිය විසින් ලබාගන්නා ලදි. එමෙන්ම, පිටු 500ක උපග්‍රන්ථයක් අඩංගු ජේම්ස් රජුගේ අනුවාදය බයිබල් ශිෂ්‍යයන් විසින් සංස්කරණය කරන ලදුව සමිතිය මගින් ප්‍රකාශයට පත් කරන ලදි. වර්ෂ 1942දී සමිතිය තීරු සටහන්වල යොමු දැක්වීම් සහිත ජේම්ස් රජුගේ අනුවාදය ප්‍රකාශයට පත් කළේය. ඉන්පසු, දිව්‍ය නාමය සඳහන් අමෙරිකන් ස්ටෑන්ඩඩ් වර්ෂන් නමැති 1901 අනුවාදය, 1944දී සමිතිය මගින් මුද්‍රණය කිරීමට පටන්ගත්තේය. සමිතිය මගින් 1972දී ප්‍රකාශයට පත් කළ ස්ටීවන් ටී. බයිංටන්ගේ ද බයිබල් ඉන් ලිවිං ඉංග්ලිෂ් යනු, යෙහෝවාගේ නාමය උලුප්පා දැක්වූ තවත් අනුවාදයකි.
මේ සියලුම බයිබල් පරිවර්තන මුද්‍රණය කර බෙදාහැරීම පහසු වී තිබෙන්නේ යෙහෝවාගේ සාක්ෂිකරුවන් යොදාගෙන තිබෙන මේ නීතික සංස්ථා නිසයි. කෙසේවෙතත්, වඩාත්ම කැපීපෙනෙන දෙය වන්නේ, නව ලෝක බයිබල් පරිවර්තන කමිටුව සැකසී තිබෙන යෙහෝවාගේ සාක්ෂිකරුවන්ගේ ආලේප ලත් සාමාජිකයනුත්, වොච් ටවර් සමිතියත් අතර පවත්නා සමීප සහයෝගයයි. මේ වන විට, සම්පූර්ණයෙන්ම හෝ කොටස් වශයෙන් මෙම පරිවර්තනයේ පිටපත් 10,64,00,000ක් භාෂා 38කින් මුද්‍රණය වී තිබීම ගැන අපි සතුටු වන්නෙමු. පෙන්සිල්වේනියාවේ වොච් ටවර් බයිබල් ඇන්ඩ් ට්‍රැක්ට් සොසයටි යනු ඇත්තවශයෙන්ම බයිබල් සමිතියකි!
‘විශ්වාස වූ දාසයාව’ ඔහුගේ ‘ස්වාමියා සන්තක සියල්ල කෙරෙහි පත් කර’ ඇත. ඊට අ.එ.ජ. නියූ යෝක් නුවර ඇති මූලස්ථානය මෙන්ම ලොව පුරා ක්‍රියාත්මක වන ශාඛා කාර්යාල 110ද ඇතුළත් වේ. ඔවුන්ට පවරා ඇති දේ පාවිච්චි කරන ආකාරය ගැන වග කියන්න සිදු වන බව දාස පංතියේ සාමාජිකයන් දනී. (මතෙව් 25:14-30) එහෙත්, එය ‘වෙනත් බැටළුවන්’ අතර සිටින සුදුසුකම් ඇති අවේක්ෂකයන්ව නීතික සහ පරිපාලන වගකීම් සඳහා පාවිච්චි කිරීමෙන් ‘දාසයාව’ වළක්වන්නේ නැත. ඇත්තවශයෙන්ම, එසේ කිරීම මගින් පාලක මණ්ඩලයේ සාමාජිකයන්ට “යාච්ඤාවෙහිද වචනයේ මෙහෙකිරීමෙහිද” වැඩි කාලයක් යෙදී සිටීමට ඉඩ කඩ සැලසේ.—ක්‍රියා 6:4.
මේ ලෝකයේ පාලකයන් ඉඩ දෙන තාක් කල්, ‘විශ්වාස වූ නුවණැති දාසයාව’ නියෝජනය කරන පාලක මණ්ඩලය විසින් නීතික සංස්ථා යොදාගනු ඇත. මෙම සංස්ථා තිබීම පහසුවකි. එහෙත් ඒවා අත්‍යවශ්‍ය නොවේ. ආණ්ඩු ක්‍රම ව්‍යවස්ථාවක් මගින් නීතික සංස්ථාවකට තහංචි පැනවූවත්, දේශනා සේවය දිගටම ක්‍රියාත්මක වේ. දැන් පවා, තහංචි පනවා ඇති සමහර රටවල නීතික සංස්ථාවන් යොදා නොගැනේ. එහෙත්, රාජ්‍ය පණිවිඩය ප්‍රකාශයට පත් කෙරෙන අතර, ගෝලයන් සෑදීමද කෙරෙමින් පවතී. දිව්‍යාණ්ඩු තන්ත්‍රය දිගටම ක්‍රියාත්මක වේ. මෙය සිදු වන්නේ, පැළ කිරීම සහ වතුර දැමීම යෙහෝවාගේ සාක්ෂිකරුවන් සිදු කරන නිසාත්, ‘දෙවි වර්ධනය දෙන’ නිසාත්ය.—1 කොරින්ති 3:6, 7.
අප අනාගතය දෙස බලද්දී, යෙහෝවා තම සෙනඟගේ ආත්මික සහ ද්‍රව්‍යමය අවශ්‍යතා බලාගන්නා බවට නිසැක විය හැක. ඔහු සහ ඔහුගේ පුත්‍ර යේසුස් ක්‍රිස්තුස් රාජ්‍යය දේශනා කිරීමේ කාර්යය සම්පූර්ණ කිරීමට අවශ්‍ය ස්වර්ගීය මඟ පෙන්වීම සහ සහයෝගය දිගින් දිගටම සපයනු ඇත. ඇත්තවශයෙන්ම, දෙවිගේ සේවකයන් හැටියට අප කුමක් කළත්, එය සිදු කරන්නේ ‘මිනිස් බලයෙන්වත් ශක්තියෙන්වත් නොව, යෙහෝවාගේ ආත්මයෙනි.’ (සෙකරියා 4:6) මේ අන්තිම කාලයේදී, යෙහෝවා අපට දී ඇති බල පැවරුම ඉටු කළ හැක්කේ ඔහු සපයන ශක්තියෙන් පමණි. එබැවින් අප සැවොම, ඒ සඳහා දිව්‍ය උපකාරය පතා යාච්ඤා කරමු!