තුන්වන පරිච්ඡේදය
පරීක්ෂා කළත් යෙහෝවාට ඇදහිලිවන්ත බව ඔප්පු වෙයි!
1, 2. දානියෙල්ගේ වාර්තාවට මඟ හෙළි කළේ කිනම් කැපීපෙනෙන සිදුවීම්ද?
ජාත්‍යන්තර ජවනිකාවේ වැදගත් වෙනස්කමක් සිදු වන අවධියක, දානියෙල්ගේ අනාවැකිමය පොතෙහි තිරය දිග හැරෙයි. අෂූරිය, දැන් මොහොතකට කලින් තම අගනුවර වූ නිනිවය විනාශ වීමේ සොවින් තැවෙමින් සිටියා. මිසරය, යූදා දේශයට දකුණින් තහංචි පැනවූ වැදගැම්මකට නැති තැනක් බවට පත් වෙමින් තිබුණා. එමෙන්ම, බබිලෝනිය මහා බලවතා ලෙස, ලෝක බල අරගලයේ හිණිපෙත්තටම නඟිමින් සිටියා.
2 පොදු යුගයට පෙර 625දී, මිසරයේ ඵාරාවෝ-නෙකො බබිලෝනියවරුන් දකුණු දෙසට ව්‍යාප්ත වීම වැළැක්වීම සඳහා තම අවසාන වියරු උත්සාහයද දියත් කළා. ඔහු මේ අදහස පෙරදැරි කරගෙන, යුප්‍රටීස් ගංගාවේ උතුරු ඉවුරේ පිහිටි කර්කෙමිෂ් දක්වා තම හමුදාව මෙහෙයෙව්වා. කර්කෙමිෂ්යයි හැඳින්වූ එම යුද්ධය තීරණාත්මක මෙන්ම ඓතිහාසික එකක් වුණා. කිරුළ හිමි නෙබුකද්නෙශර් කුමරා බබිලෝනියේ හමුදාව මෙහෙයවමින් ඵාරාවෝ-නෙකොගේ හමුදාව අන්ත පරාජයකට පත් කළා. (යෙරෙමියා 46:2) ජයග්‍රහණයේ උද්දාමයෙන් ඉදිරියටම ගිය නෙබුකද්නෙශර්, සිරියාව සහ පලස්තීනය අතුගා දැමුවේ, එම ප්‍රදේශයෙන් මිසර බලය තුරන් කිරීමේ අටියෙන්. ඔහුගේ යුධ ව්‍යාපාරයට තාවකාලික විරාමයක් ගෙනාවේ ඔහුගේ පිය රජු වූ නැබොපොලසාර්ගේ අභාවයයි.
3. යෙරුසලමට එරෙහි නෙබුකද්නෙශර්ගේ මුල්ම යුධ ව්‍යාපාරයේ ප්‍රතිඵලය කුමක් වීද?
3 ඊළඟ වසරේදී, බබිලෝනියේ කිරුළ පළන් රජු හැටියට, නෙබුකද්නෙශර් සිරියාවේ සහ පලස්තීනයේ සිදු කළ යුධ ව්‍යාපාරය වෙත නැවත වරක් තම අවධානය යොමු කළා. ඔහු මුල් වතාවට යෙරුසලමට පැමිණියේ මේ වකවානුවේදීයි. බයිබලය වාර්තා කරන්නේ, “ඔහුගේ දවස්වලදී බබිලෝනියේ රජවූ නෙබුකද්නෙශර් පැමිණියේය, යෙහෝයාකිම්ද තුන් අවුරුද්දක් ඔහුට සේවයකොට පසුව ඔහුට විරුද්ධව කැරළිගැසුවේය” කියායි.—2 රාජාවලිය 24:1.
නෙබුකද්නෙශර් යෙරුසලමේ
4. දානියෙල් 1:1හි සඳහන් “යෙහෝයාකීම්ගේ රජකම්කිරීමේ තුන්වෙනි අවුරුද්දේදී” යන කියමන තේරුම්ගත යුත්තේ කෙසේද?
4 “යුදාහි රජවූ යෙහෝයාකීම්ගේ රජකම්කිරීමේ තුන්වෙනි අවුරුද්දේදී බබිලෝනියේ රජවූ නෙබුකද්නෙශර් රජ යෙරුසලමට ඇවිත් ඒක වටලා ගත්තේය” කියා දානියෙල් පොතේ ආරම්භක වචනවල කියවන්න තිබෙන නිසා, “තුන් අවුරුද්දක්” යන කියමන තුළ අපට විශේෂ වැදගත්කමක් තිබෙනවා. (දානියෙල් 1:1) පොදු යුගයට පෙර 628 සිට 618 දක්වා රජකම් කළ, යෙහෝයාකීම්ගේ මුළු පාලන කාලයේ තුන්වන අවුරුද්දේදී, නෙබුකද්නෙශර් “බබිලෝනියේ රජ” ලෙස පත්ව නොසිටි අතර, එවකට ඔහු සිටියේ කිරුළ හිමි කුමරා ලෙසයි. පොදු යුගයට පෙර 620දී, තමන්ට කප්පම් ගෙවන ලෙස නෙබුකද්නෙශර් යෙහෝයාකීම්ට බල කළා. එහෙත්, වසර තුනකට පමණ පසුව ඔහු කැරලි ගැසුවා. මෙසේ, පො.යු.පෙ. 618දී එනම්, කප්පම් ගෙවන රජු ලෙස යෙහෝයාකීම්ගේ රජකම් කිරීමේ තුන්වන අවුරුද්දේදී, කැරලිකාර යෙහෝයාකීම්ට දඬුවම් කිරීමට නෙබුකද්නෙශර් රජු දෙවන වතාවට යෙරුසලමට පැමිණියා.
5. යෙරුසලමට එරෙහි නෙබුකද්නෙශර්ගේ දෙවන යුධ ව්‍යාපාරයේ ප්‍රතිඵලය කුමක් වීද?
5 මේ වැටලීමේ ප්‍රතිඵලයක් ලෙස, ‘යෙහෝවා ඔහු අතට යුදාහි රජ වූ යෙහෝයාකීම් සහ දෙවිගේ ගෘහයේ බඩුවලින් කොටසක් ලබා දුන්නා.’ (දානියෙල් 1:2) වැටලීමේ මුල් අදියරේදීම, සමහරවිට කැරැල්ලකදී හෝ ඝාතනය කිරීමකින් යෙහෝයාකීම් මියයන්න ඇති. (යෙරෙමියා 22:18, 19) පොදු යුගයට පෙර 618දී, ඔහුගේ 18 හැවිරිදි පුත් යෙහෝයාඛින් ඔහු වෙනුවට රජ වුණා. එහෙත්, යෙහෝයාඛින්ගේ පාලනය ක්‍රියාත්මක වූයේ මාස තුනකුත් දින දහයක් පමණයි. පොදු යුගයට පෙර 617දී ඔහු යටත් වුණා.—2 රාජාවලිය 24:10-15, සසඳන්න.
6. යෙරුසලමේ දේවමාළිගාවේ තිබූ පරිශුද්ධ බඩුවලට නෙබුකද්නෙශර් කළේ කුමක්ද?
6 නෙබුකද්නෙශර්, යෙරුසලමෙහි දේවමාළිගාවෙන් පරිශුද්ධ බඩු කොල්ල කා, “ෂීනාර් දේශයේ තමාගේ දෙවියන්ගේ ගෘහයට ගෙනැවිත්, ඒ බඩු තමාගේ දෙවියන්ගේ [එනම්, මාර්ඩුක්ගේ හෝ හෙබ්‍රෙව් භාෂාවෙන් මෙරොදක්ගේ] භාණ්ඩාගාරයෙහි තැබුයේය.” (දානියෙල් 1:2; යෙරෙමියා 50:2) නෙබුකද්නෙශර් විසින් මාර්ඩුක්ගේ දේවාලය ගැන කළායයි පැවසෙන ප්‍රකාශයක් සම්බන්ධයෙන් බබිලෝනීය ලේඛනයක මෙසේ කියා තිබෙනවා: “මම රන් රිදී සහ අනර්ඝ ගල් ඇතුළෙහි ගබඩා කර . . . මාගේ රාජ්‍යයෙහි භාණ්ඩාගාරයෙහි තැන්පත් කළෙමි.” බේල්ෂශර් රජුගේ දවස්වලදී නැවත වරක් මේ පරිශුද්ධ බඩු ගැන අපට කියවන්න තිබෙනවා.—දානියෙල් 5:1-4.
යෙරුසලමේ අග්‍රගණයේ තරුණයෝ
7, 8. දානියෙල් 1:3, 4 සහ 6 කියවීමෙන්, දානියෙල් සහ ඔහුගේ මිත්‍රයන් තිදෙනාගේ පසුබිම ගැන අපට එළඹිය හැකි නිගමනය කුමක්ද?
7 යෙරුසලමේ දේවමාළිගාවේ වටිනා දේවලට වඩා වැඩි යමක් බබිලෝනියට ගෙනෙනු ලැබුවා. වාර්තාව මෙසේ කියනවා: “රජ තමාගේ නපුංසකයන්ගේ ප්‍රධානියාවූ අෂ්පෙනස්ට කථාකොට, ඉශ්‍රායෙල් පුත්‍රයන් අතරෙන් රාජ වංශයෙන්ද උත්තමයන්ගෙන්ද කැලලක් නැත්තාවූ, ශෝභමානවූ, සකල ශාස්ත්‍ර දැනුම් ඇත්තාවූ [සියලු ප්‍රඥාව සම්බන්ධයෙන් තීක්ෂ්ණ බුද්ධිය ඇත්තාවූ, NW], දැනගැන්මද ඥානයද ඇත්තාවූ [දැනුම ඇති, දැනගැන්ම සම්බන්ධයෙන් විචාර බුද්ධිය ඇත්තාවූ NW], රජුගේ මාළිගාවෙහි සිටින්ට පුළුවන්කම ඇත්තාවූ යෞවනයන් [දරුවන්, NW] [ගෙන්වාගන්න].”—දානියෙල් 1:3, 4.
8 තෝරාගත්තේ කාවද? “ඔවුන් අතරේ යුදා පුත්‍රයන්ගෙන් දානියෙල්ද හනනියාද මීෂායෙල්ද අසරියාද වූවෝය” කියා අපට කියා තිබෙනවා. (දානියෙල් 1:6) දානියෙල් සහ ඔහුගේ මිත්‍රයන් ගැන එතරම් පැහැදිලි නැති පසුබිමට, මේ තොරතුරු බිඳ යම් ආලෝකයක් හෙළනවා. උදාහරණයක් වශයෙන්, ඔවුන් “යුදා පුත්‍රයන්” එනම්, රාජකීය වංශයේ අය බව සැලකිල්ලට ගන්න. ඔවුන් රාජකීය පෙළපතෙන් පැවතුණත් නැතත්, අඩුම තරමින් ඔවුන් පැමිණියේ ඉහළ පැළැන්තියේ, බලපෑම් කළ හැකි පවුල්වලින්යයි සිතීම සාධාරණයි. මානසිකව සහ ශාරීරිකව හොඳ තත්වයක සිටියාට අමතරව, ඔවුන්ට තීක්ෂ්ණ බුද්ධිය, ප්‍රඥාව, දැනුම සහ විචාර බුද්ධිය තිබුණා. ඔවුන් මේ සැම දෙයකටම උරුමකම් කීවේ ‘දරුවන්යයි’ කීමට හැකි තරම් බාල වයසේදීමයි. සමහරවිට ඔවුන්ගේ නහඹරවියේ මුල් අවධියේදීයි. දානියෙල් සහ ඔහුගේ මිත්‍රයන් යෙරුසලමේ සිටි තරුණයන් අතුරින් විශිෂ්ට නැත්නම් අග්‍රගණයේ අයව සිටියා විය යුතුයි.
9. දානියෙල්ට සහ ඔහුගේ මිත්‍රයන් තිදෙනාට දේවභයැති දෙමාපියන් සිටි බවට නිසැක විය හැක්කේ මන්ද?
9 මේ යෞවනයන්ගේ දෙමාපියන් කවුද කියා වාර්තාව අපට කියන්නේ නැහැ. ඒ වුණත්, ඔවුන් තම දෙමාපිය වගකීම බැරෑරුම් ලෙස සැලකූ දේවභයැති මනුෂ්‍යයන් වූ බව නම් ස්ථිරයි. එවකට, යෙරුසලමෙහි ව්‍යාප්තව පැවති සදාචාර සහ ආත්මික පරිහානිය ගැන සලකා බලද්දී, විශේෂයෙන්ම ‘රාජ වංශය සහ උත්තමයන්’ අතරෙහි පැවති පරිහානිය දෙස බලද්දී, දානියෙල් සහ ඔහුගේ මිත්‍රයන් තිදෙනා තුළ දක්නට තිබූ විශිෂ්ට ගුණාංග අහම්බෙන් පැමිණි ඒවා නොවන බව පැහැදිලියි. තම පුතුන්ව දුර රටකට ගෙන යනවා දැකීම, දෙමාපියන්ට වාවගන්න බැරි දුකක් වූ බවට කිසිම සැකයක් නැහැ. අවසානයේදී සිදු වන්නේ කුමක්ද කියා ඔවුන් දැන සිටියා නම්, ඔවුන් මොනතරම් ආඩම්බර වෙයිද! දෙමාපියන් තම දරුවන්ව ‘යෙහෝවාගේ හික්මවීමෙන්ද මානසික ශීක්ෂණයෙන්ද ඇති දැඩි කිරීම’ කොතරම් වැදගත්ද!—එපීස 6:4, NW.
මනස් නැඹුරු කරගැනීමට සටනක්
10. යෞවන හෙබ්‍රෙව්වන්ට උගන්වනු ලැබුවේ කුමක්ද? එමෙන්ම, එහි අරමුණ කුමක් වීද?
10 වහාම, මේ වහලුන්ගේ තරුණ මනස් නැඹුරු කරගැනීමට සටනක් ඇරඹුණා. හෙබ්‍රෙව් නහඹරයන්ව බබිලෝනීය ක්‍රමයේ අච්චුවට දැමීමේ අරමුණින්, “[ඔවුන්ට] කල්දිවරුන්ගේ අකුරුත් භාෂාවත් උගන්වන්ට” නෙබුකද්නෙශර් තම නිලධාරීන්ට නියෝග කළා. (දානියෙල් 1:4) මෙය සාමාන්‍ය අධ්‍යාපනයක් වූයේ නැහැ. පිළිගත් ජාත්‍යන්තර බයිබල් විශ්වකෝෂය (ඉංග්‍රීසියෙන්) පැහැදිලි කරන්නේ, ඊට “සුමේරියානු, ආකේඩියානු සහ ඇරමයික . . . මෙන්ම වෙනත් භාෂාද, එම භාෂාවලින් ලියැවුණු සවිස්තර සාහිත්‍යයද ඇතුළත් විය” කියායි. ‘සවිස්තර සාහිත්‍යයට,’ ඉතිහාසය, ගණිතය, නක්ෂත්‍රය සහ වෙනත් ඒවාද ඇතුළත් වුණා. කෙසේවෙතත්, “ඊට සම්බන්ධ අශුභ නිමිති සහ නක්ෂත්‍රය යන දෙවර්ගයටම අයත් ආගමික පොත් පත් . . . විශාල කාර්යභාරයක් ඉටු කළා.”
11. හෙබ්‍රෙව් තරුණයන්ව බබිලෝනියේ රජ වාසලේ ජීවිතයට ඈඳාගැනීම සහතික කිරීම සඳහා කිනම් පියවර ගනු ලැබුවාද?
11 මේ හෙබ්‍රෙව් යෞවනයන්ව බබිලෝනියේ රජ වාසලේ චාරිත්‍ර සහ සංස්කෘතියට සම්පූර්ණයෙන්ම ඈඳාගන්නා පිණිස, “රජතෙමේ ඔවුන්ට තමාගේ භෝජනවලින්ද තමා බොන මුද්‍රිකපානයෙන්ද දවස්පතා කොටසක් නියමකොට, ඊට පසු ඔවුන් රජු ඉදිරියෙහි සිටින පිණිස තුන් අවුරුද්දක් ඔවුන් පෝෂ්‍යයකරන්ට අණ” කළා. (දානියෙල් 1:5) එපමණක්ද නොව, “නපුංසකයන්ගේ අධිපතියා ඔවුන්ට නම් තැබුවේය; ඔහු දානියෙල්ට බේල්ටෙෂශර්ද හනනියාට ෂද්‍රක්ද මීෂායෙල්ට මේෂක්ද අසරියාට අබේද්-නෙගෝද යන නම්” තැබුවා. (දානියෙල් 1:7) කෙනෙකුගේ ජීවිතයේ වැදගත් සිදුවීමක් සනිටුහන් කිරීම සඳහා ඔහුට අලුත් නාමයක් දීම බයිබල් කාලවලදී පොදු සිරිතක් වුණා. ආබ්‍රම් සහ සාරායි යන නම් ආබ්‍රහම් සහ සාරා ලෙස යෙහෝවා විසින් වෙනස් කිරීම නිදසුනක් ලෙස ගත හැකියි. (උත්පත්ති 17:5, 15, 16) මනුෂ්‍යයෙකු විසින් තවත් කෙනෙකුගේ නමක් වෙනස් කිරීම, එම මනුෂ්‍යයාට අධිකාරයක් හෝ බලයක් ඇති බවට පැහැදිලි සාක්ෂියක්. යෝසෙප් මිසරයේ ආහාර පරිපාලකයා බවට පත් වූ විට, ඵාරාවෝ ඔහුට ශාඵෙනත්-පනේයා කියා නම් කළා.—උත්පත්ති 41:44, 45; සසඳන්න 2 රාජාවලිය 23:34; 24:17.
12, 13. යෞවන හෙබ්‍රෙව්වන්ගේ නම් වෙනස් කිරීම, ඔවුන්ගේ ඇදහිල්ල බිඳ දැමීමේ වෑයමක් වූ බව කිව හැක්කේ මන්ද?
12 දානියෙල් සහ ඔහුගේ මිත්‍රයන් තිදෙනාගේ නම් වෙනස් කිරීම කැපීපෙනෙන්නක්. ඔවුන්ට ඔවුන්ගේ දෙමාපියන් විසින් දී තිබූ නම් යෙහෝවාගේ නමස්කාරය හා බැඳී තිබුණා. “දානියෙල්” යන නමින්, “දෙවි මාගේ විනිශ්චයකාරයා” යන්නත්, “හනනියා” යන නමින් “යෙහෝවා අනුග්‍රහය දක්වා ඇත” යන්නත් අර්ථවත් වන අතර, “මීෂායෙල්” යන නමින් සමහරවිට, “දෙවි හා සමාන කවුද?” යන්න අර්ථවත් වෙන්න ඇති. “අසරියා” යනු “යෙහෝවා උපකාර කළේය” යන්නයි. තම පුතුන් යෙහෝවා දෙවිගේ මඟ පෙන්වීම යටතේ හැදී වැඩී ඔහුගේ ඇදහිලිවන්ත සහ පක්ෂපාත සේවකයන් බවට පත් වෙනවා දැකීම, එම දෙමාපියන්ගේ ඒකායන අපේක්ෂාව වූ බවට කිසිම සැකයක් නැහැ.
13 කෙසේවෙතත්, හෙබ්‍රෙව්වන් සතරදෙනාට අලුතින් දුන් නම් සියල්ලක්ම බොරු දෙවිවරුන් හා සමීපව බැඳී තිබූ අතර, එවැනි දෙවිවරුන්ට සැබෑ දෙවි යටත් වී ඇති බව ඉන් ඇඟවුණා. මේ යෞවනයන්ගේ ඇදහිල්ල බිඳ දැමීමට ගත් කපටි වෑයමක මහත!
14. දානියෙල්ට සහ ඔහුගේ මිත්‍රයන් තිදෙනාට දී තිබූ අලුත් නම්වල තේරුම් මොනවාද?
14 දානියෙල්ගේ නම, “රජුගේ ජීවිතය රකින්න” යන අරුත ඇති බේල්ටෙෂශර් ලෙස වෙනස් කළා. පෙනෙන විදිහට, මෙය බබිලෝනියේ ප්‍රධාන දෙවියා වන බෙල් හෙවත් මාර්ඩුක්ගෙන් රැකවරණය ඉල්ලා කරන යාතිකාවක් සඳහා යොදන කෙටි යෙදුමක්. දානියෙල් සඳහා මේ නම තේරීමට නෙබුකද්නෙශර් හවුල් වූවාද නැද්ද යන්න අප දන්නේ නැති වුණත්, එය ඔහුගේ “දෙවියන්ගේ නාමය ලෙස” දමා තිබීම ගැන ඔහු උදම් ඇනුවා. (දානියෙල් 4:8) හනනියාගේ නම ෂද්‍රක් ලෙස වෙනස් කළ අතර, සමහර අධිකාරිත්වයන් එය “අකුගේ අණ” යන අර්ථය ඇති සංයුක්ත නමක් කියා විශ්වාස කරනවා. උනන්දුවට කරුණක් වන්නේ, අකු යනු සුමේරියානු දෙවියෙකුගේ නමක් වීමයි. මීෂායෙල්ට මේෂක් (සමහරවිට, මී·ෂා·අකු) කියා නම් කළා. මෙය “දෙවි හා සමාන කවුද?” යන්නෙහි සිට “අකු මෙන් වන්නේ කවුද?” යන්න දැක්වීම සඳහා කළ දක්ෂ පද පෙරළීමක්. අසරියාගේ බබිලෝනීය නම අබේද්-නෙගෝ. සමහරවිට ඉන් අර්ථවත් වූයේ, “නෙගෝගේ සේවකයා” යන්නයි. “නෙගෝ” යනු “නෙබෝ” යන්නට තවත් වචනයක්. එය දෙවියෙකුගේ නමක් වූ අතර, බබිලෝනියේ පාලකයන් කිහිපදෙනෙකුම තම නමට එම නාමය ඈඳාගෙන තිබුණා.
යෙහෝවාට පක්ෂපාතව සිටීමේ අධිෂ්ඨානයෙන් යුතුව
15, 16. දානියෙල් සහ ඔහුගේ මිත්‍රයන් ඊළඟට කිනම් අනතුරුවලට මුහුණ දුන්නාද? ඔවුන්ගේ ප්‍රතික්‍රියාව කුමක් වීද?
15 බබිලෝනීය නාමයන් සහ අධ්‍යාපන වැඩසටහනකට යළිත් සම්බන්ධ කරගැනීම මෙන්ම විශේෂ කෑම සැපයීම වැනි මේ සැම දෙයක්ම දානියෙල්ව සහ යෞවන හෙබ්‍රෙව්වන් තිදෙනාව බබිලෝනියේ ජීවිත ක්‍රමයට උරාගැනීමේ වෑයමක් වුණා. එපමණක්ද නොව, ඔවුන්ගේ දෙවි යෙහෝවාගෙන් මෙන්ම ආගමික පුහුණුවෙන් සහ පසුබිමෙන් ඔවුන්ව ඈත් කරන්න ගත් වෑයමක්ද වුණා. මේ සියලු පීඩන සහ පරීක්ෂා හමුවේ, මේ යෞවනයන් කටයුතු කරන්න යන්නේ කෙසේද?
16 බයිබලය කියන්නේ, ‘රජුගේ භෝජනයෙන්වත් ඔහු බොන මුද්‍රිකපානයෙන්වත් අපවිත්‍ර නොවී සිටීමට දානියෙල් තමාගේ සිතින් නියමකර [හෘදයෙන් අධිෂ්ඨාන, NW] කරගත්තේය’ කියායි. (දානියෙල් 1:8අ) නමින් සඳහන් කර ඇති එකම පුද්ගලයා දානියෙල් වුවත්, ඉන් පසුව සිදු වූ දේවලින් පෙනෙන පරිදි, ඔහුගේ තීරණයට මිත්‍රයන් තිදෙනා සහය වූ බව පැහැදිලියි. ‘ඔහුගේ හෘදයෙන් අධිෂ්ඨාන කරගත්තේය’ යන වචනවලින් පෙන්වන්නේ, දානියෙල්ගේ දෙමාපියන් මෙන්ම අනිත් අය දුන් උපදෙස් ඔහුගේ හෘදයට කිඳා බැස තිබූ බවයි. එවැනි පුහුණුවක් අනිත් හෙබ්‍රෙව්වන් තිදෙනාටත් ඔවුන්ගේ තීරණ ගැනීමේදී මඟ පෙන්වූ බවට සැකයක් නැහැ. තේරුම්ගැනීමට ඔවුන් ළාබාල වැඩියි කියා පෙනෙන්න තිබුණත්, අපේ දරුවන්ටත් ඉගැන්වීමේ වටිනාකම එය මනාව ඔප්පු කරනවා.—හිතෝපදේශ 22:6; 2 තිමෝති 3:14, 15.
17. දානියෙල් සහ ඔහුගේ මිත්‍රයන්, අනිත් විධිවිධානවලට නොව, රජුගේ දෛනික සැපයුම්වලට විරෝධය පෑවේ මන්ද?
17 හෙබ්‍රෙව් යෞවනයන් අනිත් විධිවිධානවලට විරෝධයක් නොපෑවත්, භෝජනවලට සහ මුද්‍රිකපානවලට පමණක් විරෝධය පෑවේ ඇයි? දානියෙල් තර්කානුකූලව කල්පනා කළ ආකාරයෙන් එසේ කිරීමට හේතුව පැහැදිලි වෙනවා. ඒ, ‘අපවිත්‍ර නොවී සිටීම සඳහායි.’ “කල්දිවරුන්ගේ අකුරුත් භාෂාවත්” ඉගෙනීම සහ බබිලෝනීය නම් දීම යනාදිය විරෝධය පළ කළ හැකි දේවල් වුණත්, ඒවා පුද්ගලයෙකුව අනිවාර්යයෙන්ම අපවිත්‍ර කරන්න යන්නේ නැහැ. ඊට අවුරුදු 1,000කට පමණ පෙර විසූ මෝසෙස්ගේ උදාහරණය සැලකිල්ලට ගන්න. “මිසරයන්ගේ සකල ශාස්ත්‍රයන්හි පුහුණුකරනු ලැබ” සිටියත්, ඔහු යෙහෝවාට පක්ෂපාතව සිටියා. ඔහුගේම දෙමාපියන් විසින් දුන් පුහුණුව ඔහුට ශක්තිමත් අත්තිවාරමක් සැපයුවා. ප්‍රතිඵලයක් ලෙස, “මෝසෙස් වැඩුණායින් පසු ඵාරාවෝගේ දුවගේ පුත්‍රයායයි කියනු ලැබීම ඇදහීමෙන් එපාකර, . . . කලකට පාපයේ සැප භුක්තිවිඳීමට වඩා [දෙවිගේ] සෙනඟ සමඟ දුක්විඳීම තෝරාගත්තේය.”—ක්‍රියා 7:22; හෙබ්‍රෙව් 11:24, 26.
18. රජුගේ සැපයුම්, යෞවන හෙබ්‍රෙව්වන්ව අපවිත්‍ර කරනු ඇත්තේ කිනම් ආකාරවලින්ද?
18 බබිලෝනියේ රජුගේ සැපයුම්, මේ තරුණ පුරුෂයන්ව අපවිත්‍ර කරන්න යන්නේ කිනම් ආකාරයෙන්ද? මුලින්ම, එම ආහාරවලට මෝසෙස්ගේ ව්‍යවස්ථාවෙහි තහනම් කළ ආහාර ඇතුළත් වෙන්න ඇති. උදාහරණයක් වශයෙන්, ව්‍යවස්ථාව යටතේ ඉශ්‍රායෙල්වරුන්ට තහනම් කළ අපවිත්‍ර සතුන්ව බබිලෝනීය ජාතිකයන් ආහාරයට ගත්තා. (ලෙවී කථාව 11:1-31; 20:24-26; ද්විතීය කථාව 14:3-20) දෙවනුව, මැරූ සතුන්ගේ මස් කන්න පෙර, උන්ගේ ලේ ඉවත් කිරීම බබිලෝනියයන්ගේ පුරුද්දක්ව තිබුණේ නැහැ. ලේ ඉවත් නොකළ මස් කෑම, රුධිරය පිළිබඳ යෙහෝවාගේ ව්‍යවස්ථාව කෙළින්ම කඩ කිරීමක් වෙනවා. (උත්පත්ති 9:1, 3, 4; ලෙවී කථාව 17:10-12; ද්විතීය කථාව 12:23-25) තුන්වනුව, බොරු දෙවිවරුන් අදහන්නන් භෝජනයක් හවුලේ වැළඳීමට පෙර, තම ආහාර චාරිත්‍රානුකූලව පිළිමවලට පූජා කළා. යෙහෝවාගේ සේවකයන් ඒ කිසිවකට සම්බන්ධ වන්නේ නැහැ! (1 කොරින්ති 10:20-22 සසඳන්න.) අවසන් වශයෙන්, මේද අධික ආහාර සහ සැර බීම දිනපතා පාවිච්චි කිරීම ඕනෑම වයස් මට්ටමක කෙනෙකුගේ සෞඛ්‍යයට හිතකර නොවන අතර, යෞවනයන් සම්බන්ධයෙන් ගනිද්දී, ඒ ගැන අමුතුවෙන් කියන්න දෙයක් නැහැ.
19. කිනම් හේතු මවන්න හෙබ්‍රෙව් තරුණයන්ට හැකිව තිබුණාද? එහෙත්, හරි නිගමනයට එළඹීමට ඔවුන්ට උපකාරවත් වූයේ කුමක්ද?
19 යමක් දැන සිටීම එකක්. එහෙත්, පීඩන සහ පරීක්ෂා යටතේ එය කිරීමට ධෛර්යය ඇතුව සිටීම තවත් දෙයක්. තම දෙමාපියන් සහ මිත්‍රයන් ඔවුන්ගෙන් බොහෝ දුර ඈතක සිටින නිසා තමන් කළ දේ ඔවුන් දන්නේ නැහැයි කියා තර්ක කිරීමට දානියෙල්ට සහ ඔහුගේ මිත්‍රයන් තිදෙනාට හැකිකම තිබුණා. එය රජුගේ අණ බවත්, වෙන කරන්න දෙයක් තිබුණේ නැති බවත් කියමින් නිදහසට හේතු මවන්නද ඔවුන්ට හැකියාවක් තිබුණා. ඊට අමතරව, වෙනත් යෞවනයන් එම විධිවිධානය එක පයින්ම පිළිගත් බවට කිසිම සැකයක් නැති අතර, එය සහභාගි වීමට දුෂ්කර එකක් ලෙස සලකනවාට වඩා ඔවුන් එය වරප්‍රසාදයක් ලෙස සලකන්න ඇති. එහෙත් එවන් දෝෂ සහිත සිතුවිලි, බොහෝ යෞවනයන්ට මලපතක් වන, රහසිගත පාපයේ බොරු වළට පහසුවෙන්ම මඟ පෙන්වීමට ඉඩ තිබුණා. ‘යෙහෝවාගේ ඇස් සෑමතැනම පවතින’ බවත්, ‘යහපත් වේවා, නපුරු වේවා, සියලු ක්‍රියාද සියලු රහස් දේද [සැබෑ, NW] දෙවි විනිශ්චයට පමුණුවන’ බවත් හෙබ්‍රෙව් තරුණයන් දැන සිටියා. (හිතෝපදේශ 15:3; දේශනාකාරයා 12:14) මේ ඇදහිලිවන්ත යෞවනයන් ගත් ක්‍රියාමාර්ගයෙන් අපි සියලුදෙනාම පාඩමක් ඉගෙනගනිමු.
ධෛර්යය සහ අඛණ්ඩ උත්සාහය විපාකදායකයි
20, 21. දානියෙල් ගත් ක්‍රියාමාර්ගය කුමක්ද? එමෙන්ම, ප්‍රතිඵලය කුමක් වීද?
20 අපවිත්‍ර කරන්නාවූ බලපෑම්වලට විරුද්ධව සිටීමට දානියෙල් තම හෘදයෙන් නියම කරගෙන, එම තීරණයට එකඟව ක්‍රියා කරන්න පටන්ගත්තා. “අපවිත්‍ර නොවී සිටින්ට නපුංසකයන්ගේ අධිපතියාගෙන් අවසර ඉල්ලුවේය [නොකඩවාම ඉල්ලමින් සිටියේය, NW].” (දානියෙල් 1:8ආ) “නොකඩවාම ඉල්ලමින්” යන්න කැපීපෙනෙන කියමනක්. බොහෝවිට, සමහර දුර්වලකම් ජයගැනීමට හෝ පරීක්ෂාවන්ට විරුද්ධව සාර්ථකව කටයුතු කිරීමට අප අපේක්ෂා කරන්නේ නම්, අඛණ්ඩ උත්සාහය වැදගත්.—ගලාති 6:9.
21 දානියෙල්ගේ සිද්ධියේදී, අඛණ්ඩ උත්සාහය විපාකදායී වුණා. ‘[සැබෑ, NW] දෙවි දානියෙල්ට නපුංසකයන්ගේ අධිපතියාගෙන් කරුණාවත් අනුකම්පාවත් ලැබෙන්ට සැලැස්සුවා.’ (දානියෙල් 1:9) අවසානයේදී දේවල් හොඳ අතට හැරුණේ දානියෙල් සහ ඔහුගේ මිත්‍රයන් ප්‍රියමනාප, උගත් පුද්ගලයන් වූ නිසා නොව, ඔවුන්ට යෙහෝවාගේ ආශීර්වාදය ලැබුණු නිසායි. ‘නුඹේම නුවණෙහි නොපිහිටා, නුඹේ මුළු සිතින් [හෘදයෙන්, NW] යෙහෝවා කෙරෙහි විශ්වාස කරන්න. නුඹේ සියලු මාර්ගවලදී ඔහු සලකන්න. එවිට ඔහු නුඹේ මාවත් සමතලා කරනවා ඇත’ යන හෙබ්‍රෙව් හිතෝපදේශය දානියෙල් නිසැකවම මතක් කරගන්න ඇති. (හිතෝපදේශ 3:5, 6) එම උපදේශය අනුගමනය කිරීම ඇත්තෙන්ම විපාකදායී වුණා.
22. හොඳ පදනමක් ඇතුව නපුංසකයන්ගේ අධිපතියා විරෝධය පෑවේ කෙසේද?
22 මුලින්ම, නපුංසකයන්ගේ අධිපතියා විරෝධය පාමින් කියා සිටියේ, “නුඹලාගේ කෑමද බීමද නියමකළ මාගේ ස්වාමිවූ රජ්ජුරුවන්ට භයවෙමි. නුඹලාගේ වයසේ යෞවනයන්ට වඩා නුඹලාගේ මුහුණු මලානිකව තිබෙනවා ඔහු දකින්නේ මක්නිසාද? එසේ නුඹලා නිසා මාගේ හිස රජු ඉදිරියෙහි උපද්‍රවයට පැමිණේය” කියායි. (දානියෙල් 1:10) මේ විරෝධය පෑමට සහ භයට පදනමක් තිබුණා. නෙබුකද්නෙශර් රජු, නැහැ බැහැ කියා බේරෙන්න පුළුවන් කෙනෙක් නෙවෙයි. රජුගේ උපදෙස්වලට පිටින් ගියොත්, තමන්ගේ “හිස” අනතුරේ බව නිලධාරියා තේරුම්ගත්තා. දානියෙල් කුමක් කරාවිද?
23. දානියෙල් ගත් ක්‍රියාමාර්ගයෙන්, ඔහු තමාට තීක්ෂ්ණ බුද්ධිය සහ ප්‍රඥාව ඇති බව පෙන්වූයේ කෙසේද?
23 තීක්ෂ්ණ බුද්ධියේ සහ ප්‍රඥාවේ අවශ්‍යතාව මතු වූයේ මෙහිදීයි. “මෘදු උත්තරයකින් කෝපය පහවෙයි; එහෙත් කර්කශ වචනයකින් තරහ හටගනියි” යන හිතෝපදේශය සමහරවිට යෞවන දානියෙල්ට මතක් වෙන්න ඇති. (හිතෝපදේශ 15:1) තමාගේ ඉල්ලීම ඉටු කළ යුතුමයි කියා මුරණ්ඩු ලෙස කියා සිටිනවා හෝ තමා වෙනුවෙන් අනිත් අය දිවි පිදිය යුතුයි කියා සිතනවා හෝ වෙනුවට, ඔහු කාරණය ඒ අවස්ථාවේදී තවත් දුරදිග ගෙන ගියේ නැහැ. සමහරවිට යම් බුරුලක් දීමට වැඩි කැමැත්තක් දැක්වීමට ඉඩ තිබූ “ගබඩාකාරයා” රජුට කෙළින්ම වගකිව යුතු නැති නිසා, දානියෙල් ඔහු වෙත නිවැරදි මොහොතේදී එළඹුණා.—දානියෙල් 1:11.
යෝජනාව දස දවසක පරීක්ෂණයකටයි
24. දානියෙල් යෝජනා කළේ කිනම් පරීක්ෂණය කිරීමටද?
24 “නුඹේ මෙහෙකරුවන් දස දවසක් පරීක්ෂාකර බලන ලෙස ඉල්ලමි; කන්ට එලවලුද බොන්ට වතුරද අපට ලැබේවා. පසුව අපේ පෙනීමද රජුගේ භෝජන කන්නාවූ යෞවනයන්ගේ පෙනීමද නුඹ බලා, නුඹට පෙනෙන හැටියට නුඹේ මෙහෙකරුවන්ට කළ මැනවි” කියමින් ගබඩාකරුට දානියෙල් යෝජනාවක් ඉදිරිපත් කළා.—දානියෙල් 1:12, 13.
25. දානියෙල්ට සහ ඔහුගේ මිත්‍රයන් තිදෙනාට දුන් ‘එළවළුවලට’ අයත් වූයේ මොනවාද?
25 දස දවසකට ‘එළවළු සහ වතුර’ පමණයි. අනිත් අය සමඟ සන්සන්දනය කරද්දී, ඔවුන් “මලානිකව” සිටීවිද? “එලවලු” යන්න පැමිණෙන්නේ, මූලිකව “ධාන්‍ය” ලෙස පරිවර්තනය කර ඇති හෙබ්‍රෙව් වචනයකින්. ඇතැම් බයිබල් පරිවර්තකයන්, එය “මාෂ බෝග” හෙවත්, “ආහාරයට ගත හැකි විවිධ රනිල වර්ගයේ (මෑ, බෝංචි හෝ පරිප්පු වැනි) ඇට” ලෙස විස්තර කරන බව කියා සිටිනවා. එය හුදෙක් ආහාරයට ගත හැකි ධාන්‍යවලට වඩා දේවල් ඇතුළත් වූ ආහාර වේලක් බව පද සම්බන්ධය අනුව සමහර විශාරදයන්ට හැඟෙනවා. එක් ආශ්‍රේය ග්‍රන්ථයක් සඳහන් කරන්නේ, “රජ මේසයෙන් එන මස් මාංස අධික බොජුන් වෙනුවට, දානියෙල් සහ ඔහුගේ මිත්‍රයන් තිදෙනා ඉල්ලා සිටියේ, පොදු ජනයා කෑමට ගන්න සාමාන්‍ය එළවළු වර්ග” කියායි. මේ අනුව, එම එළවළුවලට බෝංචි, පිපිඤ්ඤ, සුදුලූනු, ලීක්ස්, පරිප්පු, ලබු සහ රතුලූනුවලින් පිළියෙළ කරගත් පෝෂ්‍යදායී ආහාර මෙන්ම විවිධ ධාන්‍ය වර්ගවලින් සෑදූ පාන් අයත් වෙන්න ඇති. එය පෝෂණයෙන් අඩු ආහාර වේලක් කියා නිසැකවම කිසිවෙකුට කියන්න බැහැ. පෙනෙන විදිහට, ගබඩාකරුවාට කාරණය වැටහුණා. “ඒ කාරණය ගැන ඔහු ඔවුන්ට ඇහුම්කන්දී, දස දවසක් ඔවුන් පරීක්ෂාකර බැලුවේය.” (දානියෙල් 1:14) ප්‍රතිඵලය කුමක් වුණාද?
26. දස දවසේ පරීක්ෂණයේ ප්‍රතිඵලය කුමක් වීද? එමෙන්ම, දේවල් ඒ අතට හැරුණේ මන්ද?
26 “දස දවසකට පසු රජුගේ භෝජනයෙන් කෑවාවූ සියලු යෞවනයන්ට [දරුවන්ට, NW] වඩා ඔව්හු පෙනීමෙන් හොඳව, මාංසයෙන් තරව සිටියෝය.” (දානියෙල් 1:15) එළවළු ඇතුළත් ආහාර වේලක්, මස්වලින් පිරි එකකට වඩා තත්වයෙන් ඉහළයි කියා දැක්වීමේ සාක්ෂියක් ලෙස මෙය නොගත යුතුයි. ඕනෑම ආහාර වේලකින් නිසි ප්‍රතිඵල අත් කරගැනීමට දවස් දහයක් වැනි කෙටි කාලයක් ප්‍රමාණවත් නැහැ. එහෙත්, යෙහෝවාගේ අරමුණ ඉෂ්ට කරන්න නම් එය එතරම් කෙටි නැහැ. ඔහුගේ වචනය කියන්නේ, ‘යෙහෝවාගේ ආශීර්වාදය පොහොසත්කම ලබා දෙන්නේය, ඔහු ඊට දුක එකතු නොකරන්නේය’ කියායි. (හිතෝපදේශ 10:22) යෞවන හෙබ්‍රෙව්වන් සතරදෙනා ඔවුන්ගේ ඇදහිල්ල සහ විශ්වාසය යෙහෝවා මත තැබූ අතර, යෙහෝවා ඔවුන්ව අහක දැමුවේ නැහැ. සියවස් ගණනාවකට පසු, ආහාර නැතුව යේසුස් දවස් 40ක් ජීවත් වුණා. මේ ගැන කතා කරද්දී, ඔහු ද්විතීය කථාව 8:3හි ඇති වචන උපුටා දැක්වුවා. එහි කියන්නේ, “මනුෂ්‍යයා ජීවත්වෙන්නේ රොටිවලින් පමණක් නොවන බවත් [යෙහෝවාගේ] මුඛයෙන් නික්මෙන සියල්ලෙන්” බවත්ය. මේ කාරණය සම්බන්ධයෙන් දානියෙල් සහ ඔහුගේ මිත්‍රයන්ගේ අද්දැකීම විශිෂ්ට ගණයේ එකක්.
රාජ භෝජන සහ මුද්‍රිකපානය වෙනුවට තීක්ෂ්ණ බුද්ධිය සහ ප්‍රඥාව
27, 28. දානියෙල් සහ ඔහුගේ මිත්‍රයන් තිදෙනා ඉල්ලා සිටි ආහාර රටාව, ඉදිරියේදී මුහුණ දීමට තිබූ මහත් දේවල්වලට සූදානමක් වූයේ කිනම් ආකාරවලින්ද?
27 දස දවස හුදෙක් පරීක්ෂණයක් වුවත්, ප්‍රතිඵල ඉතා ඒත්තුගන්වනසුලුයි. “එවිට ගබඩාකාරයා ඔවුන්ගේ නියම භෝජනයද ඔවුන්ට බොන්ට තිබුණු මුද්‍රිකපානයද අහක්කර, එලවලු ඔවුන්ට දුන්නේය.” (දානියෙල් 1:16) පුහුණු වැඩසටහනේ සිටි අනිත් තරුණයන්, දානියෙල් සහ ඔහුගේ මිත්‍රයන් ගැන සිතුවේ කුමක්දැයි තේරුම්ගැනීම එතරම් අපහසු නැහැ. එළවළු නිසා දිනපතාම රජුගේ මංගල භෝජන අහක දමන එක, ඔවුන්ට නම් මහා පිස්සු වැඩක් වගේ පෙනෙන්න ඇති. එහෙත්, මහත් පරීක්ෂණ සහ පරීක්ෂා, ක්ෂිතිජයෙහි මතු වෙමින් තිබුණා. මේවාට මුහුණ දීම සඳහා, හෙබ්‍රෙව් යෞවනයන් හැකි උපරිමයෙන් අවදිව සහ සිහි ඇතුව සිටීම අවශ්‍ය කරනවා. මේ සියල්ලකටම වඩා, ඇදහිල්ලේ පරීක්ෂණවලින් සමත් වීමට, යෙහෝවා කෙරෙහි ඇති ඇදහිල්ල සහ විශ්වාසය ඔවුන්ට උපකාරවත් වේවි.—යෝෂුවා 1:7 සසඳන්න.
28 මීළඟට කියා ඇති දෙය, යෙහෝවා මේ යෞවනයන් සමඟ සිටි බවට සාක්ෂි සපයනවා. “මේ යෞවනයන් [දරුවන්, NW] සතරදෙනාට නම් [දෙවි] සියලු ආකාර ලියවිලි ගැනත් ශාස්ත්‍ර ගැනත් දැනගැන්මද ඥානයද [දුන්නේය.] දානියෙල්ට සියලු දර්ශනද ස්වප්නද සම්බන්ධ තේරුම තිබුණේය.” (දානියෙල් 1:17) පැමිණීමට තිබූ දුෂ්කර කාලවල් සමඟ කටයුතු කිරීම සඳහා, ශරීර ශක්තිය සහ හොඳ සෞඛ්‍යයකට වඩා වැඩි යමක් අවශ්‍ය වුණා. “ප්‍රඥාව ඔබේ හෘදයට ඇතුල් වූ කල, දැනුම ඔබේම ප්‍රාණයට ප්‍රිය දෙයක් වන්නේය; කල්පනා කිරීමේ ශක්තිය ඔබව රැකවල් කරන්නේය; විචාර බුද්ධිය ඔබව ආරක්ෂා කරන්නේය; එසේ කරන්නේ නපුරු මාර්ගයෙන් . . . ඔබව ගළවාගැනීමටය.” (හිතෝපදේශ 2:10-12, NW) ඉදිරියට තිබූ දෙයට සන්නාහ සන්නද්ධ වීම සඳහා එම ඇදහිලිවන්ත තරුණයන් සතරදෙනාට යෙහෝවා ප්‍රදානය කළෙත් හරියටම ඒ දෙයමයි.
29. ‘සියලු ආකාර දර්ශන සහ ස්වප්න තේරුම්ගන්න’ දානියෙල්ට හැකි වූයේ මන්ද?
29 දානියෙල්ට “සියලු දර්ශනද ස්වප්නද සම්බන්ධ තේරුම [තිබූ]” බව සඳහන් කරනවා. ඔහු අද්භූත අනාවැකි කියන්නෙක් බවට පත් වූ බව මෙයින් අඟවන්නේ නැහැ. දානියෙල්ව ශ්‍රේෂ්ඨ හෙබ්‍රෙව් අනාගතවක්තෘවරයෙක් ලෙස සැලකුවා. එහෙත්, ‘ස්වාමි වූ යෙහෝවා මෙසේ කියන්නේය’ හෝ ‘සේනාවල යෙහෝවා මෙසේ කියන්නේය’ වැනි කියමන් ප්‍රකාශ කිරීමට ඔහුට කිසිදාක ආනුභාවය නොලැබීම උනන්දුවට කරුණක්. (යෙසායා 28:16; යෙරෙමියා 6:9) එසේ වුණත්, යෙහෝවාගේ අරමුණ හෙළි කළ දර්ශන සහ ස්වප්න තේරුම්ගන්න සහ ඒවා පහදා දෙන්න දානියෙල්ට හැකි වූයේ, දෙවිගේ ශුද්ධාත්මයේ මඟ පෙන්වීම යටතේ පමණයි.
අන්තිමට, තීරණාත්මක පරීක්ෂණය හමුවේ
30, 31. දානියෙල් සහ ඔහුගේ මිත්‍රයන් තෝරාගත් ක්‍රියාමාර්ගය ඔවුන්ට ප්‍රයෝජනවත් වූ බව ඔප්පු වූයේ කෙසේද?
30 වසර තුනක යළි අධ්‍යාපනය ලබා දීම සහ පරීක්ෂණයට සූදානම් කිරීම අවසන් වුණා. ඊළඟට තීරණාත්මක පරීක්ෂණය පැමිණියා. ඒ රජු සමඟ කරන පෞද්ගලික සම්මුඛ සාකච්ඡාවයි. “ඔවුන් කැඳවාගන එන්ට රජු නියම කළ කාලය පැමුණුණු විට, නපුංසකයන්ගේ අධිපතියා නෙබුකද්නෙශර් ඉදිරියට ඔවුන් කැඳවාගන ආවේය.” (දානියෙල් 1:18) මෙය තරුණයන් සතරදෙනාට තම තමන් ගැන ගණන් දීමට සිදු වූ අවස්ථාව වුණා. බබිලෝනියේ මාර්ගවලට වඩා යෙහෝවාගේ ව්‍යවස්ථාවට ඇලී සිටීම ඔවුන්ට ප්‍රයෝජනවත් බව ඔප්පු වේවිද?
31 “රජ ඔවුන් සමග කථාකෙළේය. ඔවුන් සියල්ලන් අතරේ දානියෙල්ටත් හනනියාටත් මීෂායෙල්ටත් අසරියාටත් සමානවූ කිසිවෙක් සම්බ නොවීය. ඔව්හු [නොකඩවාම, NW] රජු ඉදිරියෙහි සිටියෝය.” (දානියෙල් 1:19) එය, පසු වූ වසර තුන තුළ ඔවුන් ගත් ක්‍රියාමාර්ගය සම්පූර්ණයෙන්ම නිවැරදි බව කොතරම් හොඳින් ඔප්පු වීමක්ද! ඔවුන්ගේ ඇදහිල්ල සහ හෘදය සාක්ෂිය මගින් පාලනය කළ ආහාර රටාවකට ඇලී සිටීම ඔවුන්ගේ පැත්තෙන් කොහෙත්ම මෝඩකමක් වුණේ නැහැ. සුළුයයි පෙනෙන්න තිබූ දේවලට ඇදහිලිවන්තව සිටීම හේතුවෙන් දානියෙල් සහ ඔහුගේ මිත්‍රයන් මහත් ආශීර්වාද ලැබුවා. පුහුණු වැඩසටහනෙහි සිටි යෞවනයන් සියලුදෙනාම සෙව්වේ, “රජු ඉදිරියෙහි [සිටීමේ]” වරප්‍රසාදයයි. ඒ සඳහා තෝරාගත් අය වූයේ, එම හෙබ්‍රෙව් තරුණයන් සතරදෙනා පමණක්දැයි කියා බයිබලය කියන්නේ නැහැ. ඒ කෙසේවෙතත්, ඔවුන් ගත් ඇදහිලිවන්ත ක්‍රියාමාර්ගය ඇත්තෙන්ම, ඔවුන්ට “මහත් විපාක” ගෙනාවා.—ගීතාවලිය 19:11.
32. දානියෙල්, හනනියා, මීෂායෙල් සහ අසරියා රාජ සභාවේ භුක්ති විඳි වරප්‍රසාදයට වඩා මහත් වරප්‍රසාදයක් භුක්ති විඳි බව කිව හැක්කේ කෙසේද?
32 “තමාගේ වැඩෙහි දක්ෂවූ මනුෂ්‍යයෙකු දකින්නෙහිද? ඔහු පහත් අය ඉදිරියෙහි නොව රජුන් ඉදිරියෙහි සිටින්නේය” කියා ශුද්ධ ලියවිල්ල කියනවා. (හිතෝපදේශ 22:29) මෙසේ, දානියෙල්, හනනියා, මීෂායෙල් හා අසරියාව රජ ඉදිරියේ සිටීමට, එනම් රාජ සභාවේ සාමාජිකයන් වීමට නෙබුකද්නෙශර් තෝරාගත්තා. මේ යෞවනයන් තුළින්, විශේෂයෙන්ම දානියෙල් තුළින්, දිව්‍ය අරමුණේ වැදගත් අංගයක් හෙළි කිරීමට යෙහෝවාගේ හස්තය කාරණා හසුරුවමින් සිටි බව මේ සෑම දෙයකින්ම අපට දැකිය හැකියි. නෙබුකද්නෙශර්ගේ රාජ සභාවේ සාමාජිකයන් වීමට තෝරාගැනීම ගෞරවයක් වුණත්, විශ්වනීය රජ වූ යෙහෝවා විසින් එතරම් පුදුමාකාර ආකාරයකට පාවිච්චි කිරීම ඊටත් වඩා ගෞරවයක් වුණා.
33, 34. (අ) යෞවන හෙබ්‍රෙව්වන් කෙරෙහි රජුගේ සිත ඇදී ගියේ මන්ද? (ආ) හෙබ්‍රෙව්වන් සතරදෙනාගෙන් අපට උගත හැකි පාඩම කුමක්ද?
33 හෙබ්‍රෙව් තරුණයන් සතරදෙනාට යෙහෝවා දී තිබූ ප්‍රඥාව සහ තීක්ෂ්ණ බුද්ධිය, තම රාජ සභාවේ සිටි සියලුම විනිශ්චයකාරයන් සහ පණ්ඩිතයන්ගේ ප්‍රඥාව සහ තීක්ෂ්ණ බුද්ධිය අභිභවා ගිය බව නෙබුකද්නෙශර් වහාම තේරුම්ගත්තා. “රජු විසින් ශාස්ත්‍රයත් නුවණත් සම්බන්ධ මොන කාරණයක් ඔවුන්ගෙන් විභාගකළත්, තමාගේ මුළු රාජ්‍යයෙහි සිටි සියලු මන්ත්‍රකාරයන්ටත් අනවිනකාරයන්ටත් වඩා ඔවුන් දස ගුණයක් සමර්ථ බව ඔහුට පෙනී ගියේය.” (දානියෙල් 1:20) එසේ වූයේ කෙසේද? “මන්ත්‍රකාරයන්” සහ “අනවිනකාරයන්” බබිලෝනියේ ලෞකික සහ මිථ්‍යා ඇදහීම් මත රඳා සිටිද්දී, දානියෙල් සහ ඔහුගේ මිත්‍රයන් ඉහළින් එන ප්‍රඥාව මත ඔවුන්ගේ විශ්වාසය තැබූ නිසායි. ඒ දෙක අතර කිසිම සමානකමක් නැහැ. ඔව්, කිසිම තරඟයක් නැහැ!
34 වසර ගණනාවක් පසු වී තිබුණත්, තත්වයන්හි එතරම් වෙනසක් වී නැහැ. ග්‍රීක් දර්ශනවාදය සහ රෝම නීතිය සුපතළව පැවති පළමු සියවසේදී මෙසේ ලිවීමට ප්‍රේරිත පාවුල් ආනුභාවය ලැබුවා: ‘මේ ලෝකයේ ප්‍රඥාව දෙවි ඉදිරියෙහි මෝඩකමය. මක්නිසාද: ඔහු ප්‍රඥාවන්තයන් ඔවුන්ගේ උපායවලින් අසු කරගන්නේයයි ලියා තිබේ. නැවතද: යෙහෝවා ප්‍රඥාවන්තයන්ගේ කල්පනා නිෂ්ඵලව තිබෙන බව දන්නේයයි ලියා තිබේ. එහෙයින් කවරෙක්වත් මනුෂ්‍යයන් ගැන පාරට්ටු නොකෙරේවා.’ (1 කොරින්ති 3:19-21) අදදිනද, මේ ලෝකයේ මන මෝහනය කිරීම්වලට පහසුවෙන්ම වසඟ නොවී, යෙහෝවා අපට උගන්වා ඇති දෙයට අප තදින් ඇලී සිටිය යුතුයි.—1 යොහන් 2:15-17.
අවසානය තෙක් විශ්වාසවන්තව
35. දානියෙල්ගේ මිත්‍රයන් තිදෙනා ගැන අප දන්නේ කොතරම් දුරකටද?
35 දූරා සමභූමියෙහි නෙබුකද්නෙශර්ගේ රන් රූපය සහ ගිනි උදුනෙහි පරීක්ෂණය සම්බන්ධ සිද්ධියේදී හනනියා, මීෂායෙල් සහ අසරියා යන අය විදහා පෑ ප්‍රබල ඇදහිල්ල, දානියෙල් තුන්වන පරිච්ඡේදයෙහි චමත්කාරජනක ලෙස දක්වා තිබෙනවා. මේ දේවභයැති හෙබ්‍රෙව්වන් ඔවුන්ගේ ජීවිතාන්තය දක්වා යෙහෝවාට ඇදහිලිවන්තව සිටි බවට කිසිම සැකයක් නැහැ. අප මේ බව දන්නේ, “ඔව්හු ඇදහිල්ලෙන් . . . ගින්නේ උෂ්ණය නිවුවෝය” කියා ප්‍රේරිත පාවුල් සැකයක් නැතුව අඟවන නිසායි. (හෙබ්‍රෙව් 11:33, 34) ඔවුන් යෙහෝවාගේ තරුණ සහ මහලු සේවකයන්ට විශිෂ්ට ආදර්ශ වෙනවා.
36. දානියෙල්ට තිබුණේ කිනම් විශිෂ්ට ජීවිත මාර්ගයක්ද?
36 දානියෙල් පළමුවන පරිච්ඡේදයේ අවසාන ඡේදය දානියෙල් ගැන කියන්නේ, “දානියෙල් වනාහි කෝරෙෂ් රජුගේ පළමුවෙනි අවුරුද්ද දක්වා සිටියේය” කියායි. (දානියෙල් 1:21) පොදු යුගයට පෙර 539දී, කෝරෙෂ් එක රැයකින් බබිලෝනිය පරාජය කළ බව ඉතිහාසය හෙළි කරනවා. දානියෙල්ට තිබූ කීර්තිය සහ හැකියාවන් නිසා කෝරෙෂ්ගේ රාජ සභාවේද දිගටම සේවය කළ බවට, තිබෙන සාක්ෂි කියාපානවා. ඇත්තෙන්ම, දානියෙල් 10:1 අපට කියන්නේ, “පර්සියාවේ රජවූ කෝරෙෂ්ගේ තුන්වෙනි [අවුරුද්දේදී]” වැදගත් කාරණයක් යෙහෝවා දානියෙල්ට හෙළි කළ බවයි. පොදු යුගයට පෙර 617දී, ඔහුව බබිලෝනියට ගෙනෙන විට ඔහු නහඹරයෙක්ව සිටියා නම්, එම අවසාන දර්ශනය ලැබෙද්දී, ඔහු අවුරුදු 100ට ළංව ඉන්න ඇති. යෙහෝවාට ඇදහිලිවන්තව සේවය කිරීමෙහි කොතරම් දීර්ඝ මෙන්ම ආශීර්වාද ලත් ජීවිත කාලයක්ද!
37. දානියෙල් පළමුවන පරිච්ඡේදය හැදෑරීමෙන් අපි කිනම් පාඩම් උගනිමුද?
37 ඇදහිල්ලේ පරීක්ෂණ සාර්ථකව ජයගත් ඇදහිලිවන්ත යෞවනයන් සතරදෙනෙකු පිළිබඳ කතන්දරයකට වඩා වැඩි යමක්, දානියෙල් පොතේ පළමුවන පරිච්ඡේදය අපට පවසනවා. තම අරමුණ ඉටු කිරීමට, තමන් කැමති ඕනෑම කෙනෙකුව පාවිච්චි කරන්න යෙහෝවාට හැක්කේ කෙසේද කියාත් එය අපට පෙන්වනවා. යෙහෝවා යමකට ඉඩහරිනවා නම්, විපත්තියක් මෙන් දිස් විය හැකි යමක්, ප්‍රයෝජනවත් අරමුණක් ඉටු කරගැනීම සඳහා දායක විය හැකි බව මේ වාර්තාව ඔප්පු කරනවා. එමෙන්ම, කුඩා දේවලදී ඇදහිලිවන්තව සිටීම මහත් විපාකයක් ගෙනෙන බවද එය කියනවා.
ඔබ වටහාගත්තේ කුමක්ද?
• දානියෙල් සහ ඔහුගේ මිත්‍රයන් තිදෙනාගේ පසුබිම ගැන කුමක් කිව හැකිද?
• හෙබ්‍රෙව් තරුණයන් සතරදෙනා කුඩා කාලයේ ලැබූ කදිම පුහුණුව, බබිලෝනියේදී පරීක්ෂණයට භාජන වූයේ කෙසේද?
• හෙබ්‍රෙව්වන් සතරදෙනාගේ ධෛර්යසම්පන්න ස්ථාවරයට යෙහෝවාගෙන් විපාක ලැබුවේ කෙසේද?
• යෙහෝවාගේ වත්මන් දින සේවකයන්ට, දානියෙල් සහ ඔහුගේ මිත්‍රයන් තිදෙනාගෙන් උගත හැක්කේ කිනම් පාඩම්ද?
[30වන පිටුවේ මුළු පිටුවේම පින්තූරය]