බයිබල් පොත් අංකය 38—සෙකරියා

ලේඛකයා: සෙකරියා

ලියූ ස්ථානය: යෙරුසලම

ලිවීම අවසන් කළේ: පො.යු.පෙ. 518

ආවරණය කළ කාලය: පො.යු.පෙ. 520-518 දක්වා

සෙකරියා අනාවැකි පවසන්න පටන්ගත් කාලයේදී යෙරුසලමේ පිහිටි යෙහෝවාගේ මාලිගාවේ ඉදි කිරීමේ වැඩ කටයුතු ඇනහිට තිබිණ. සාලමොන් අවුරුදු හතහමාරකින් පළමු දේවමාලිගාව ගොඩනඟා තිබිණ. (1 රාජා. 6:37, 38) එහෙත් නැවත සිය මව්බිමට පැමිණි යුදෙව්වන් යෙරුසලමට පැමිණ අවුරුදු 17ක් ගෙවී ගොස් තිබුණත් එය නිම කිරීමට තව බොහෝ වැඩ තිබිණ. අර්තක්ෂස්තා (බාඩියා නැතහොත් ගෞමාටා) විසින් තහනම් නියෝගයක් පැනවීමත් සමඟ වැඩ සම්පූර්ණයෙන්ම නැවතිණ. නමුත් මේ වන විට මෙම නිල තහනම තිබුණත් නැවත වරක් වැඩ කිරීමට පටන්ගෙන තිබිණ. ඉදි කිරීමේ වැඩ නැවත ආරම්භ කිරීමට ජනයාව උනන්දු කිරීමටත් එය නිමා කරන තුරු ඔවුන් සමඟ සිටීමටත් යෙහෝවා හග්ගයි සහ සෙකරියාව යොදාගනිමින් සිටියේය.—එස්රා 4:23, 24; 5:1, 2.

² ඔවුන් ඉදිරියෙහි තිබූ මෙම වැඩය මහත් කන්දක් මෙන් දිස් විය. (සෙක. 4:6, 7) ඔවුන් ස්වල්පදෙනෙකු වූ අතර, විරුද්ධකරුවෝ බොහොමයක් සිටියහ. දාවිත්ගේ පෙළපතින් පැමිණෙන අධිපතියෙක් වන සෙරුබ්බාබෙල් ඔවුන් සමඟ සිටියත් ඔවුන්ට රජෙකු නොසිටියේය. එමෙන්ම ඔවුන් ජීවත් වූයේ විදේශීය ආධිපත්‍යයක් යටතේය. සවිමත් ඇදහිල්ලක් ඇතුව සිටීමට හා උද්‍යෝගිමත් ලෙස ක්‍රියා කිරීමට අවශ්‍ය කාලයකදී, දුර්වල වී ආත්මාර්ථකාමී ආකල්පයක් ඇතුව සිටීම කොතරම් පහසුද! දෙවිගේ වර්තමාන අරමුණු සහ උදාර අනාගත අරමුණු වෙතට ඔවුන්ගේ අවධානය යොමු කරවීම සඳහා සෙකරියාව යොදාගත්තේය. එහි ප්‍රතිඵලයක් වශයෙන් කළ යුතු වැඩය සඳහා ඔවුන්ව ශක්තිමත් කරන ලදි. (8: 9, 13) එය වනාහි අගය කිරීමක් නොදැක්වූ ඔවුන්ගේ මුල් පියවරුන් මෙන් ක්‍රියා කිරීමට කාලය නොවීය.—1:5, 6.

³ සෙකරියා කවරෙක් වූයේද? සෙකරියා යන නමින් හැඳින්වූ වෙනස් පුද්ගලයන් 30දෙනෙකු පමණ ගැන බයිබලයේ සඳහන් වේ. කෙසේවෙතත් මේ නම ඇති පොතේ ලේඛකයාව “ඉද්දෝගේ පුත්‍රයා වන බෙරෙකියාගේ පුත්‍ර වූ අනාගතවක්තෘ වූ සෙකරියා” යනුවෙන් හඳුන්වනු ලබයි. (සෙක. 1:1; එස්රා 5:1; නෙහෙ. 12: 12, 16) ඔහුගේ නාමයේ (හෙබ්‍රෙව්, සෙඛ්හාර්යාහ්) අර්ථය “යෙහෝවා සිහි කර තිබේ” යනුයි. ‘සේනාවල යෙහෝවා’ තමන්ගේ සෙනඟව සිහි කර, ඔහුගේ නාමය නිසා ඔවුන් සමඟ හොඳින් කටයුතු කරන බව සෙකරියාගේ පොතේ ඉතා පැහැදිලිව සඳහන් කර තිබේ. (සෙක. 1:3) පොතේ සඳහන් වන දිනවලින් පෙනී යන්නේ යටත් පිරිසෙන් අවුරුදු දෙකක කාලයක්වත් එමගින් ආවරණය කෙරෙන බවයි. දේවමාලිගාව ගොඩනැඟීමේ කටයුතු නැවත ආරම්භ කිරීම හා සෙකරියා අනාවැකි පැවසීමට පටන්ගැනීම සිදු වූයේ “දාරියුස්ගේ දෙවෙනි අවුරුද්දේ අටවෙනි මාසයේදීය” (පො.යු.පෙ. 520 ඔක්තෝබර්/නොවැම්බර්). (1:1) “දාරියුස් රජුගේ සතරවෙනි අවුරුද්දේ කිස්ලෙව් වන නවවෙනි මාසයේ සතරවෙනිදා” (පො.යු.පෙ. 518, දෙසැම්බර් 1වනදා පමණ) යනුවෙන් තවත් යොමු දැක්වීමක් පොතේ තිබේ. (7:1) මේ නිසා, සෙකරියා අනාවැකි පැවසුවෙත් ඒවා වාර්තා කරනු ලැබුවෙත් පො.යු.පෙ. 520-518 දක්වා කාලයේදී බවට සැකයක් නැත.—එස්රා 4:24.

⁴ සෙකරියාගේ පොත අධ්‍යයනය කරන්නන්ට එහි විශ්වාසවන්තභාවය ගැන සාක්ෂි බහුලව සොයාගත හැක. නිදසුනක් වශයෙන් තීර්ට සිදු වූ දෙය සලකා බලන්න. බබිලෝනීය රජ වන නෙබුකද්නෙශර් තීර් විනාශ කර දැමුවේ වසර 13ක කාලයක් පුරා එය වටලාගෙන සිටීමෙන් පසුවයි. කෙසේවෙතත් තීර් සම්පූර්ණයෙන් විනාශ කිරීමට ඔහුට හැකි වූයේ නැත. එහෙත් තීර් සම්පූර්ණයෙන්ම විනාශ වන බව වසර ගණනාවකට පසු සෙකරියා පුරෝකථනය කළේය. මහ ඇලෙක්සැන්ඩර් විසින් තීර් දූපත් නුවර පරාජය කරමින් ජලය හරහා උස් මාර්ගයක් තනන ලදී. මෙය වික්‍රමාන්විත ක්‍රියාවක් ලෙස සැලකේ. ඔහු කිසිම අනුකම්පාවක් නැතුව එම නගරයට ගිනි තැබුවේය. මෙසේ සියවස් දෙකකට පමණ පෙර පුරෝකථනය කළ සෙකරියාගේ අනාවැකිය ඉටු විය.a—සෙක. 9:2-4.

⁵ කෙසේවෙතත් පොත දේවානුභාවයෙන් ලියූ බවට තිබෙන ප්‍රබලතම සාක්ෂිය මෙසියස් වන ක්‍රිස්තුස් යේසුස් සම්බන්ධයෙන් එහි සඳහන් අනාවැකිවල ඉටුවීමෙන් දැනගත හැක. පහත සඳහන් ශුද්ධ ලියවිලි පාඨ සැසඳීමෙන් මෙය පැහැදිලි වේ. සෙකරියා 9:9 සමඟ මතෙව් 21:4, 5 සහ යොහන් 12:14-16ද; සෙකරියා 12:10 සමඟ යොහන් 19:34-37ද; සෙකරියා 13:7 සමඟ මතෙව් 26:31 සහ මාර්ක් 14:27. එමෙන්ම, සෙකරියා 8:16 සහ එපීස 4:25ද; සෙකරියා 3:2 සහ යූද් 9ද; සෙකරියා 14:5 සහ යූද් 14ද යන ශුද්ධ ලියවලි පාඨ අතරද සැලකිය යුතු සමානකම් තිබේ. දේවවචනයේ දක්නට තිබෙන එකඟතාව සැබවින්ම මවිතකරය!

⁶ නවවන පරිච්ඡේදයෙන් පසු ලේඛන ශෛලිය වෙනස් වීමෙන් පෙනී යන්නේ එම කොටස සෙකරියා ලීවේ නැති බවයි කියා ඇතැම් බයිබල් විවේචකයෝ පවසති. කෙසේවෙතත්, ලේඛන ශෛලියේ වෙනසට හේතුව වන්නේ සාකච්ඡාවට භාජන වී තිබෙන විෂයේ කරුණු වෙනස් වී තිබීමයි. පළමුවන පරිච්ඡේද අටේ 1-8 ඇතුළත් වන්නේ සෙකරියාගේ දවස්වල විසූ ජනයාට වඩාත් වැදගත්කමින් යුත් කරුණු වුවත්, 9-14 දක්වා පරිච්ඡේදවලදී අනාගතවක්තෘවරයා අවධානය යොමු කරන්නේ ඈත අනාගත කාලයක් වෙතටය. මතෙව් සෙකරියා පොතෙන් උපුටා දැක්වූවත් ඔහුගේ වචනවලින් යෙරෙමියාට යොමු දැක්වූයේ මන්ද කියා ඇතමුන් ප්‍රශ්න කර ඇත. (මතෙ. 27:9, 10ආ; සෙක. 11:12) (වර්තමාන බයිබල්වල දක්වා තිබෙන පරිදි යෙසායා වෙනුවට) යෙරෙමියා පසුකාලීන අනාගතවක්තෘවරුන්ගෙන් පළමුවෙනියා වශයෙන් යම් කාලයකදී සැලකූ බව පෙනෙන්ට තිබේ. මෙලෙස, මතෙව් “යෙරෙමියා” යනුවෙන් සෙකරියාට යොමු දැක්වීමේදී, ඔහු එක්තරා යුදෙව් සම්ප්‍රදායක් අනුගමනය කළා විය හැක. එම සම්ප්‍රදායට අනුව, ශුද්ධ ලියවිල්ලට අයත් යම් පොත් කාණ්ඩයක් හැඳින්වූයේ එම කාණ්ඩයට අයත් පළමුවෙනි පොතේ නමිනි. එවකට ලියවිලි හැටියට දැන සිටියාවූ සියලුම පොත් හැඳින්වීමට යේසුස්ද “ගීතිකා” යන නම භාවිත කළේය.—ලූක් 24:44.b

⁷ පොදු වශයෙන් දේවමාලිගාව නැවත ගොඩනැඟීම සම්බන්ධයෙන් එසකියෙල් සහ දානියෙල් දුටු දර්ශන හා සමාන දර්ශන අටකින් සමන්විත දර්ශන මාලාවක් හයවන පරිච්ඡේදයේ අටවන වගන්තිය දක්වා අන්තර්ගත වේ. එම දර්ශනවලින් පසු විශ්වාසවන්ත නමස්කාරය ගැනත් යළි පිහිටුවීම සහ යෙහෝවාගේ යුද්ධයේ දවස ගැනත් අනාවැකි සහ ප්‍රකාශයන් සඳහන් වේ.

ප්‍රයෝජනවත් වීමට හේතු

²³ සෙකරියාගේ අනාවැකිය අධ්‍යයනය කරමින් එය ගැන මෙනෙහි කරන සියල්ලෝම ඇදහිල්ල ශක්තිමත් කරන දැනුමක් ලබාගැනීමෙන් ප්‍රයෝජන ලබනු ඇත. ස්වකීය සෙනඟගේ අවශ්‍යතාවන්ට අනුව ඔවුන්ව බලවත් කරමින් ඔවුන් වෙනුවෙන් සටන් කරන සහ ඔවුන්ව ආරක්ෂා කරන තැනැත්තා වශයෙන් සෙකරියා 50 වතාවකට වැඩියෙන් ‘සේනාවල යෙහෝවා’ කෙරෙහි අවධානය යොමු කරවයි. මහත් කන්දක් මෙන් දිස් වූ විරුද්ධවාදිකම් දේවමාලිගාවේ වැඩ නිම කිරීමට තර්ජනයක් වූ විට සෙකරියා මෙසේ කීවේය. “සෙරුබ්බාබෙල්ට යෙහෝවාගේ වචනය මේය. එනම්, බලයෙන්වත් ශක්තියෙන්වත් නොව මාගේ ආත්මයෙන්යයි සේනාවල යෙහෝවා කියන්නේය. එම්බා මහත් කන්ද, නුඹ කවුද? සෙරුබ්බාබෙල් ඉදිරියෙහි නුඹ සමභූමියක් වන්නෙහිය.” යෙහෝවාගේ ආත්මයේ උපකාරය ඇතුව දේවමාලිගාවේ වැඩ සම්පූර්ණ කරන ලදි. ඒ හා සමානව අදදිනත් බාධා සමඟ කටයුතු කිරීමේදී යෙහෝවා කෙරෙහි ඇදහිල්ල තබනවා නම් ඒවා පහ වනු ඇත. එය සිදු වන්නේ යේසුස් සිය ගෝලයන්ට පැවසුවාක් මෙනි. “අබ ඇටයක් පමණ ඇදහිල්ල නුඹලාට ඇත්නම්, මේ කන්දට කතාකොට: මෙතැනින් අහක්ව, එතැනට යවයි කීවත් ඒක යන්නේය. කිසිවක් නුඹලාට බැරි නොවන්නේය.”—සෙක. 4:6, 7; මතෙ. 17:20, 21.

²⁴ මේ කාලයේ යෙහෝවාගේ සංවිධානයේ විශේෂ ලක්ෂණයක් වන පක්ෂපාතකම 13වන පරිච්ඡේදයේ 2 සිට 6 දක්වා වගන්තිවල නිදර්ශනය කරයි. මෙම ගුණාංගය ඉතා කිට්ටු ලේ ඥාතීන් අතර පවතින සඳබතා වැනි සියලු මිනිස් සම්බන්ධතා පවා අභිභවා යා යුතුය. ඉතා කිට්ටු ඥාතියෙකු යෙහෝවාගේ නාමයෙන් බොරුවට අනාවැකි කියනවා නම්, එනම් රාජ්‍ය පණිවිඩයට පටහැනිව කතා කරමින් දෙවිගේ ජනයාගෙන් සැදුම් ලත් සභාවේ සිටින වෙනත් අයට වැරදි ලෙස බලපෑම් කිරීමට වෑයම් කරන අවස්ථාවක සභාව විසින් ගනු ලබන ඕනෑම විනිශ්චයකට එම තැනැත්තාගේ පවුලේ සාමාජිකයන් පක්ෂපාතව අනුබල දිය යුතුය. බොරු අනාවැකි පවසන ඕනෑම සමීප ආශ්‍රිතයෙකු සම්බන්ධයෙන්ද ගත යුත්තේ එම ස්ථාවරයමයි. මෙසේ කිරීමෙන් ඔහුගේ වැරදි ක්‍රියාවන් හේතුවෙන් හෘදය පෑරී ඔහු ලජ්ජාවට පත් විය හැක.

²⁵ මුල් ඡේදවල පෙන්වා දුන්නාක් මෙන් යේසුස් ‘යටහත්ව කොටළුදෙනෙකුගේ පැටියෙකු පිට නැඟී’ යන රජෙකු ලෙස යෙරුසලමට ඇතුල් වීමද, ‘රිදී තිහකට’ ඔහුව පාවා දීමද, ඒ අවස්ථාවේදී ඔහුගේ ගෝලයන්ගේ විසිර යෑම හා සොල්දාදුවා තමාගේ හෙල්ලයෙන් වධකණුවේදී ඔහුට අනිනු ලැබීමද යන සියල්ල ඉතා නිවැරදිව සෙකරියා පුරෝකථනය කළේය. (සෙක. 9:9; 11:12; 13:7; 12:10) යෙහෝවාගේ මාලිගාව ගොඩනඟන්නා “පැළෑටිය” වශයෙන්ද අනාවැකියේ හඳුන්වා තිබේ. මේ තැනැත්තා ‘යාකොබ්ගේ ගෘහයේ රජෙකු වශයෙන් සදාකාලයටම රජකම් කරන’ යේසුස් ක්‍රිස්තුස් බව යෙසායා 11:1-10; යෙරෙමියා 23:5; සහ ලූක් 1:32, 33 සැසඳීමෙන් පෙනී යයි. සෙකරියා මෙම “පැළෑටිය” විස්තර කරන්නේ ‘තම සිංහාසනයෙහි සිටින පූජකයෙක්’ ලෙසය. මෙම විස්තරය පාවුල්ගේ මෙම වදන් සමඟ එකඟ වේ. ‘යේසුස් මෙල්කිසදෙක්ගේ පිළිවෙළේ හැටියට සදාකාලයටම උත්තම පූජකයෙක්ව’ සිට ‘මහෝත්තමයාණන්ගේ සිංහාසනයේ දකුණු පැත්තේ හිඳගත්තේය.’ (සෙක. 6:12, 13; හෙබ්‍රෙ. 6:20; 8:1) මෙසේ මෙම අනාවැකිය ස්වර්ගයේ දෙවිගේ දකුණු පැත්තේ සිටින උත්තම පූජකයා සහ රජු වශයෙන් ‘පැළෑටියට’ යොමු දක්වයි. ඒ අතරම සියල්ල කෙරෙහි පරමාධිපති පාලකයා වන්නේ යෙහෝවා බව එහි ප්‍රකාශ කරයි. “යෙහෝවා මුළු පොළොව කෙරෙහි රජව සිටිනවා ඇත. ඒ කාලයෙහි යෙහෝවා පමණක්ම දෙවිව සිටිනවා ඇත. ඔහුගේ නාමය පමණක්ම ඇති වන්නේය.”—සෙක. 14:9.

²⁶ එම කාලයට යොමු දක්වමින් අනාගතවක්තෘවරයා 20 වතාවක් පමණ “ඒ කාලයේදී” යන වාක්‍ය ඛණ්ඩය නැවත නැවතත් සඳහන් කරයි. ඔහුගේ අනාවැකිය අවසන් කරන්නේද එම වාක්‍ය ඛණ්ඩය යොදාගනිමිනි. එය බොහෝ වතාවක් සඳහන් කිරීමෙන් පැහැදිලි වන්නේ දේවතා රූපවල නාම පහ කිරීම හා බොරු අනාගතවක්තෘවරුන් සිඳ දමනු ලැබීම සිදු වන දවස විය යුතු බවයි. (13:2, 4) එම දවස වනාහි යෙහෝවා කලහකාරී ජාතීන් සමඟ යුද්ධ කර ඔවුන් අතරෙහි වියවුල පතුරුවා ඔවුන්ව සම්පූර්ණයෙන්ම විනාශ කර දමා, තම සෙනඟට සරණක් ලෙස ‘ඔහුගේ කඳුවල මිටියාවත’ සපයා දෙන දවසයි. (14:1-5, 13; 12:8, 9) එසේය, “ඔවුන්ගේ දෙවි වූ යෙහෝවා තමන් සෙනඟ වූ රැළ මෙන් ඒ දවසේ ඔවුන් ගලවන්නේය.” තවද ඔවුහු එකිනෙකා මිදිවැල හා අත්තික්කා ගස යට සිටින තමාගේ මිතුරන්ට හඬගසනවා ඇත. (සෙක. 9:16; 3:10; මීකා 4:4) සේනාවල යෙහෝවා ස්වකීය සෙනඟ ‘අතර වාසය කරන’ හා ‘ජීවමාන වතුර යෙරුසලමෙන් නික්මවන’ තේජවත් දවස එයයි. “ඒ කාලයෙහි” සිදු වන සිදුවීම් රාජ්‍ය පොරොන්දුවේ සඳහන් ‘අලුත් අහස සහ අලුත් පොළොව’ පිළිබඳ පෙර නිමිති ලෙස සෙකරියාගේ වදන්වලින් හඳුන්වා දෙයි.—සෙක. 2:11; 14:8; එළි. 21:1-3; 22:1, 2.

²⁷ “කුඩා දේවල දවස හෙළා දැක්කේ කවුද” කියා යෙහෝවා අසයි. බලව! මෙම සෞභාග්‍යය, පොළොව පුරා පැතිර යනු ඇත. ‘බොහෝ සෙනඟද බලවත් ජාතීහුද සේනාවල යෙහෝවාව යෙරුසලමේ සොයන්ට එන්නෝය. සියලු භාෂාවලින් සමන්විත ජාතීන්ගෙන් මනුෂ්‍යයන් දසදෙනෙකු, යුදෙව් ජාතික මනුෂ්‍යයෙකුගේ වස්ත්‍ර කොන අල්ලාගෙන, අපි නුඹලා සමඟ යන්නෙමුව. මක්නිසාද දෙවි නුඹලා සමඟ සිටින බව අප විසින් අසා තිබේයයි කියනවා ඇත.’ “ඒ කාලයෙහි” අශ්වයන්ගේ මිණිගෙඩිවල පවා ‘යෙහෝවාට ශුද්ධකම අයිතිය’ කියා ලියා තිබෙනවා ඇත. ඉමහත් ප්‍රීතිය ගෙන දෙන මෙම අනාවැකි තුළින් යෙහෝවා තමන්ගේ රාජ වංශය මගින් සිය නාමය විශුද්ධවත් කරනු ලබන බවට පැහැදිලි කෙරෙන නිසා ඒවා සලකා බැලීමෙන් අත් වන ප්‍රයෝජන ඉමහත්ය.—සෙක. 4:10; 8:22, 23; 14:20.

[පාදසටහන්වල]