වැඩකාරයා තමාගේ කුලිය ලබන්ට සුදුසුද?
ඔවුන් දෙස බලන්න! අපිරිසිදු නිවෙස්වල ජීවත්වෙමින්, බොහෝ විට මූලික අවශ්‍යතා පමණක් සහිතව, පෙනෙන විධියට ඔවුහු මහත් අමාරුවෙන් ජීවත් වෙති, කෙසේවෙතත් ඔවුන් බොහෝ දෙනෙකු ජීවත් වන්නෙත් පවුල් ඇතිදැඩි කරන්නෙත් ධනවත් දේශයකය. ඔවුහු වනාහි සංක්‍රමණ වැඩකරුවෝ වෙති, එක්සත් ජනපදයේ පමණක් මිලියන පහක් පමණ සිටිති, දේශයේ වඩාත්ම විශාල සංස්ථාවලින් සමහරකට ඔවුහු පලතුරු සහ එළවුළු කඩා රැස් කරති.
ගිනියම් අව්වේ මහන්සි වී වැඩ කරන කැක්කුම් සහිත කැලැල් ඇති ඔවුන්ගේ ශරීර දෙස බලන්න. ඈත කඩවල් සහ සුපිරි වෙළෙඳසැල්වල රාක්ක සහ පෙට්ටි අලංකාර කරන්නට යන්නාවූ එළවුළු කැඩීමෙන්, පැය ගණනාවක් නැමී සිටීමෙන් පසුව ඔවුන්ගේ ශරීර කෙළින් කිරීමට ඔවුන් දරන වෑයම දෙස බලන්න. ඉරු උදාවීමේ සිට ඉරු බැසයෑම දක්වා, සතියකට දින හයක් සහ හතක් ඔවුන් එහි සිටිනු ඇත. තම දෙමව්පියන් සහ බොහෝ විට තම මහලු ආච්චිලා සීයලා සමඟ වැඩ කරන දරුවන් දෙස බලන්න. අස්වැන්න නෙලා ගැනීමට නියම කාලය පැමිණෙන විට, බාලයන්ගේ දෙමව්පියන් ඍතුවෙන් ඍතුවට, ඒ ඒ තැන්වලට යන හෙයින් බාලයන් බොහෝ දෙනෙකු කුඩා අවධියේදීම පාසල් යෑම නතර කෙරේ. මේ සියල්ලක්ම ඔවුන් කරන්නේ ජීවිතය ගෙන යෑමට යන්තමින් අවශ්‍ය දෑ ලබාගැනීම පිණිසය.
මෙම කුලී වැඩකරුවන් කෙත්වල වෙහෙස වී වැඩ කරනවා ඔබ බලා සිටිද්දී, පහත් මට්ටමක පියාසර කරන අහස් යාත්‍රාවක කෙළවර නොවන ශබ්දය ඔබට හිරිහැර කරයිද? අහස් යාත්‍රාවේ ඉසින යන්ත්‍රවල තුඩුවලින් නික්මෙන හිංසාකාරී කෘමිනාශක මගින් ඔබගේ දෙනෙත් දැවීමටත් ඔබගේ සම රිදීමටත් කැසීමටත් සලස්වයිද? ඔබට ඇති විය හැකි කෙටි මෙන්ම දිගු-කාලීන උවදුරු ගැන ඔබට බියක් තිබේද? වැඩකරුවෝ එසේ බිය වෙත්. එසේ ඉසිනු ලබන ද්‍රව්‍ය හැම වෙලේම ඔවුන්ගේ ඇදුම්වල, නාස්පුඩුවල, ඔවුන්ගේ පෙණහලුවල තිබේ. මෙම අහිතකර රසායන ද්‍රව්‍යයන් ඔවුන්ගේ දරුවන් සහ වයසක දෙමව්පියන්ට හානි සිදු කරනවා ඔවුන් විසින් දැක තිබේ. කෘමි නාශක විෂකැවීම නිසා පවුලේ සාමාජිකයන් සහ හවුල් සේවකයන් වැඩි වයසට යන්නට පෙර ආබාධිත වීම ඔවුන් විසින් දැක තිබේ.
දැන්, දැරියක් ඇගේ නහඹර වියේ මුල් අවධියට පසුව එක් අවසන්ධි වූ උකුලක්, දකුණු පැත්තේ උරස පේශියක් නොමැතිව සහ ඇගේ මුහුණේ එක පැත්තක් පක්ෂාඝාතව උපත ලැබුවාය. ඇගේ මව ගැබිණිව සිටි කාලයේදී ස්ට්‍රෝබෙරි කෙත්වල ඉසිණු ලැබූ කෘමිනාශක බෙහෙත් ඇගේ අංගවිකලත්වයට හේතු වූ බව ඇගේ පියා විශ්වාස කරයි. කෘමිනාශකවලට නිරාවරණය වීම පමණක් වසරකට වැඩකරුවන් 3,00,000කට බලපාන බවත් සංක්‍රමණ වැඩකරුවන්ට වෙනත් ඕනෑම කර්මාන්තයක සිටින වැඩකරුවන්ට වඩා පස් ගුණයකින් වැඩි බෙලහීනතා අනුපාතයක් තිබෙන බවත් වාර්තා කොට තිබේ.
කෙත්වල ඔවුන් වෙහෙස මහන්සි වී වැඩකරන දසුනෙන් හෝ ඔවුන්ගේ අපිරිසිදු ජීවන තත්ත්වයන් නිරීක්ෂණය කිරීමෙන් ඔබගේ චිත්ත වේගයන් නොකැලඹේ නම්, ඔවුන්ගේ වචනවලට සවන් දෙන්න: “මේ වැඩ ඔබව අතිශයින් වෙහෙසට පත් කරයි,” යනුවෙන් කෙතෙහි ඉතා දුෂ්කර දීර්ඝ දවසක් ගත කිරීමෙන් පසුව දරුවන් හත් දෙනෙකුගේ මවක් සුසුම්ලමින් කියයි. “මට කළ හැක්කේ ඇඟ සෝදා නින්දට යෑම පමණයි. මම නිදා ගත්තේ අද උදේ 4 පසු වුණාට පස්සෙයි, එනිසා මට දවල් කෑම උයන්නත් වෙලාව තිබුණේ නැහැ, එමනිසා මං කාලත් නැහැ. දැන් කෑම කන්ටත් මට මහන්සි වැඩියි.” ඇගේ දෑත්වල දිය බිබිලි ඇත. ගෑරුප්පුවක් හෝ හැන්දක් භාවිතා කර ආහාර ගැනීම ඇයට වේදනාකාරි දෙයක් වනු ඇත.
“ඇතැම්විට සති අන්තවල අපගේ දරුවන් අපට උපකාර කරන අතර කෙත්වල වැඩ කිරීම කොතරම් දුෂ්කරද කියා ඔවුන් දන්නවා,” යනුවෙන් තවත් මවක් කීවාය. “ජීවනෝපායක් සඳහා එම රැකියාවේ යෙදීමට ඔවුන් කැමති නැහැ. . . . පසුගිය ග්‍රීෂ්ම ඍතුවේ දොඩම් කැඩීමේදී මගේ දෑත්වලට අතුළු වූ පතුරු තවමත් තියෙනවා.” ඇගේ ස්වාමිපුරුෂයා මෙසේ පැවසුවේය: “සතියකට දින හයකට අපි ඉරුඋදාව සිට ඉරු බැසයෑම දක්වා වැඩ කරනවා. . . . එහෙත් ඇතැම්විට අපේ මුළු ජීවිත කාලය පුරාම අපි මෙම දේම කරන්නට යනවා විය හැකියි. වෙන මොනවා කරන්නද?” එක්ව එම යුවළ වසරකට ප්‍රමාණවත් නොවන ඩොලර් 10,000ක් උපයා ගනිති—අමෙරිකානු ප්‍රමිතිවලට අනුව එය දිළිදුකමේ මට්ටම වෙයි.
වැඩකරුවෝ තම රැකියා අහිමි වේ යන බිය නිසා දොස් කීමට අකමැති වෙති. “ඔබ දොස් කීවා නම්, ඒ අය නැවත ඔබව කැඳවන්නේ නැහැ,” යනුවෙන් එක්කෙනෙක් කීවේය. සංක්‍රාමී වැඩකරුවන්ගෙන් බොහෝ දෙනෙක් අස්වැන්නක් නෙලනු ලබන තැන්වලට යෑම සඳහා පවුල් හැර යෑමට සිදු වූ ස්වාමිපුරුෂයෝ සහ පියවරුය, එසේ පවුල් හැර යෑමට සිදු වන්නේ වැඩකරුවන් 300කට පමණ ඉඩකඩ සපයන බැරැක්ක, පවුලේ අනෙක් සාමාජිකයන් සඳහා ඉතා අපවිත්‍ර නිසාත් තදබදය බොහෝ සෙයින් වැඩි වන නිසාත්ය. “[මගේ පවුල] සමඟ මුළු වසර පුරාම ජීවත්වීම ප්‍රසන්න දෙයක්, නමුත් මට කරන්ට සිදු වී තිබෙන්නේ මෙයයි,” යනුවෙන් එක් පියෙක් පැවසුවේය. “දැනටමත් අපි අන්තිම තුට්ටුවටම බැහැලයි ඉන්නේ,” යනුවෙත් තවත් පියෙක් පැවසුවේය. “අපේ තත්ත්වය අන්තයටමයි ගිහිල්ලා තියෙන්නේ, එනිසා වෙනවා නම් හොඳක් වේවි.” මොවුන්ගෙන් බොහෝ දෙනෙකු වැටුප් පරිමාණ ඒකකයේ වඩාත්ම පහත් තත්ත්වයක සිටීම තත්ත්වය වඩාත් දුෂ්කර කරවයි. වැඩකරු පවුලකට වසරකට ඩොලර් 10,000ක් ලැබීම, ඇතැම් අයට අත්කර ගැනීමට අපේක්ෂා කළ නොහැකි විශාල මුදල් ප්‍රමාණයක් මෙන් පෙනේ. “වගාකරුවන්ට තුන්වන ලෝක වැටුප් ප්‍රමාණ ගෙවා ඔවුන්ට අණ කරනු ලබන පරිද්දෙන්ම වැඩ නොකරන වැඩකරුවන්ව නෙරපා දැමීමට හැකි,” යයි පීපල් වීක්ලි සඟරාව සඳහන් කරයි. “වැඩකාරයා තමාගේ කුලිය ලබන්ට සුදුසුය,” යනුවෙන් යේසුස්වහන්සේ පැවසූ සේක. (ලූක් 10:7) මෙම ප්‍රතිපත්තිය ඔවුන්ගේ ජීවිත තුළ කවදා අදාළ වේද කියා සංක්‍රමණ වැඩකරුවන් කල්පනා කරනවා විය හැකිය.
අපගේ දරුවන්ට උගන්වන අය
තමන්ගේ රැකියාව වශයෙන්, කියවීම, ලිවීම, අක්ෂරවින්‍යාසය, ගණිතය, මූලික විද්‍යාව, රැකියා ස්ථානයේ හැසිරිය යුතු ආකාරය—යනාදී අධ්‍යාපනයේ මූලික අංග, දරුවන්ටත් වැඩිහිටියන්ටත් ඉගැන්වීමේ වගකීම දරන අය ගැන දැන් කල්පනා කර බලන්න. උසස් අධ්‍යාපනයේ ආයතනවල, නීතිය, වෛද්‍ය කර්මය, රසායන විද්‍යාව, ඉන්ජිනේරු විද්‍යාව සහ උසස් තාක්ෂණයන්, එනම් මෙම පරිගණක සහ අභ්‍යවකාශ යුගයේ වැඩි ලාභයක් උපදවන රැකියා ඉදිරිපත් කරන ක්ෂේත්‍රයන් ශික්ෂකයන් විසින් උගන්වනු ලබයි. ගුරු ක්ෂේත්‍රයට තිබෙන අතිශය වැදගත්කම නිසා, පිරිනමනු ලබන අනර්ඝ සේවයට ගැළපෙන වැටුපක් ලැබීමට තරම් සුදුසු උසස් මට්ටමක මෙම අය සිටින්නේ නැද්ද? ඔවුන් පිරිනමන සේවයට නොගැළපෙන විශාල වැටුපක් ලබන අය සමඟ සන්සන්දනය කිරීමේදී, ගුරු වෘත්තිය මත සමාජය විසින් ඉතා අඩු තක්සේරුවක් කර තිබෙනවා යයි පෙනිය හැකිය.
මෙම 20වන ශතවර්ෂයේ අවසානය වන විට, ඇතැම් ස්ථානවල ගුරු වෘත්තිය අධික-අවදානමක් සහිත රැකියාවක් බවට පත් වී තිබේ, උසස් පාඨශාලාවල පමණක් නොව නමුත් ප්‍රාථමික පාසල්වල පවා තත්ත්වය එසේ වේ. ඇතැම් ප්‍රදේශවල පන්තිකාමර තුළ සහ ක්‍රීඩා පිට්ටනිවල ඇවිදින විට නොහික්මුණු දරුවන්ගෙන් තමන්ව ආරක්ෂා කිරීම සඳහා කෝටු අතැතිව යන්නට කියා ගුරුවරුන්හට උපදෙස් දී තිබේ. හැම වයසේම පාසල් ළමුන් විසින් තමන් ළඟ සහ කෑම පෙට්ටිවල තුවක්කු සහ පිහි ගෙනයනු ලැබේ.
ශිෂ්‍යයන් විසින් පමුණුවනු ලැබූ ශාරීරික පීඩාව පුරුෂ සහ ස්ත්‍රී ගුරුවරුන් විසින් විඳ තිබේ. මෑත වර්ෂ තුළ ද්විතියික පාඨශාලාවල, ගුරුවරු 47,000ක් සහ ශිෂ්‍යයෝ මිලියන 2.5ක් පමණ සැහැසියාවට ගොදුරු වූවන් බවට පත් වූහ. “ගැටලුව සෑම තැනම පවතින නමුත්, සෑම වසරකම එක් ගුරුවරයෙක් පහර ලැබීමේ අවස්ථා 50න් 1කට මුහුණ දෙන නාගරික ප්‍රදේශවල තත්ත්වය ඊටත් වඩා දරුණු වේ,” යනුවෙන් NEA ටුඩේ නමැති ගුරු පුවත්පතෙහි වාර්තා විය. පාසල්වල විශාල ලෙස පැතිර ගිය මත්ද්‍රව්‍ය සහ මධ්‍යසාර භාවිතය ගුරුවරුන්ගේ නිෂ්ඵලභාවය වැඩි වීමට තුඩු දී ඇත.
ඔවුන්ගේ බර තවත් වැඩි වීමට තුඩු දෙමින්, ඇතැම් ප්‍රදේශවල ඔවුන්ගේ රැකියා කාලය පුරාම වෘත්තිමය අතින් දියුණු වීමට ගුරුවරුන්ගෙන් අපේක්ෂා කෙරේ, ඔවුන්ගේ ක්ෂේත්‍රයේ ගුරුවරුන් සඳහා වූ උසස් පාඨමාලා හැදෑරීමට හෝ ගුරුවරුන් සඳහා වූ සමුළු හෝ සම්මේලනවලට සහභාගි වීමට ඔවුන්ගේ නිවාඩු කාලය ගත කිරීමට ඔවුන්ට දිරිගැන්වේ. එසේ වුවත්, එක්සත් ජනපදයේ ඇතැම් ප්‍රධාන නගරවල, පාසල් ආරක්ෂකයන්ට—එනම් පාසල් පිරිසිදුව සහ අලුත්වැඩියා කර තැබීමට භාරව සිටින අයට—ගෙවනු ලබන වැටුප් මට්ටම ගුරුවරුන්ගේ වැටුප්වලට වඩා ඩොලර් 20,000කින් වැඩි විය හැකි බව දැනගැනීමට ලැබීම ඔබව පුදුමයට පත් කරවයිද?
ගුරුවරුන්ගේ වැටුප් ප්‍රමාණය රටින් රටට, රජයෙන් රජයට සහ දිස්ත්‍රික්කයෙන් දිස්ත්‍රික්කයට වෙනස් වෙයි. ඇතැම් රටවල ගුරුවරුන් සඳහා ගෙවුම් පරිමාණය මුළු රටටම පහළම ගෙවුම් පරිමාණය වෙයි. වඩා ධනවත් රටවල පවා, ශික්ෂකයන් මත වැටී තිබෙන වගකීම බලන කල, ඔවුන්ට ලැබෙන වැටුප් අසාධාරණ බව වාර්තාවලින් අඟවයි.
ද නිව් යෝක් ටයිම්ස්හි වාර්තා වී ඇති පරිදි, ගුරුවරුන් සහ ශික්ෂකයන් සඳහා වූ ගෙවුම් පරිමාණය පිළිබඳව විවේචකයෙක් මෙසේ පැවසුවේය: “ඉගැන්වීම වැනි . . . කැපවීමකින් කළ යුතු වෘත්තීන්ට හැම විටම වාගේ ලැබී තිබෙන වන්දි හෝ දීමනා ඉතා සුළු ඒවා වී තිබේ. ‘ඒ ඔවුන් [කැමති ක්ෂේත්‍රයයි], ඔවුන්ට සතුට ලැබෙන්නේ ඒක කිරීමෙන් තමයි,’ යන්න පොදු ජනයා හැමවිටම පාහේ කල්පනා කළ ආකාරයයි. ඒක එතරම් සාධාරණ යයි මට නොසිතේ, ඇරත් එය බුද්ධිමත් දෙයක් කියාවත් මට සිතෙන්නේ නැහැ.” නිදසුනක් වශයෙන්, ද නිව් යෝක් ටයිම්ස්හි පළ වූ මෙම වාර්තාව සැලකිල්ලට ගන්න: “වර්ෂ 1991-92 විද්‍යාලීය වර්ෂය තුළ විද්‍යාලීය සහ විශ්ව විද්‍යාලීය වැටුප් ඉහළ නැඟුණේ, වසර 20ක් තුළ වඩාත්ම අඩු ප්‍රමාණයකිනි,” එනම් සාමාන්‍යයක් වශයෙන් 3.5ක ප්‍රතිශතයකින් පමණි. “එම 3.5ක වැඩිවීම උද්ධමනය සඳහා සකස් කරනු ලබන විට, වැටුප් 0.4ක ඉතා කුඩා මට්ටමකින් වැඩි වූ,” බව එක් පර්යේෂිකාවක් සටහන් කළාය. වගකීම් දරන ශික්ෂකයන්ට ගෙවන පහත් වැටුප් නිසා, වඩා හොඳ වැටුපක් වෙනුවෙන් ගුරු වෘත්තිය අත්හැරීමට බොහෝ දෙනෙකු පෙලඹිය හැකි බවට වූ සැලකිල්ල වැඩි වෙමින් පවතී.
තවද ක්‍රීඩාවත් තිබේ
පාලනයක් නැති වේතන සම්බන්ධයෙන් අසමානකම පැහැදිලි වන නිදර්ශනයකි ක්‍රීඩා ලෝකය. දිළිඳු මට්ටමේ සිටින සංක්‍රමණ වැඩකරුවන් සහ අසාධාරණ වේතන ලබන ශික්ෂකයන්, ක්‍රීඩකයන්ගේ පෞද්ගලික භාවිතය සඳහා ඇති අතිවිශාල වැටුප් ප්‍රමාණය සලකන්නේ කෙසේද?
තම වෘත්තියේ වෙහෙස නොබලා නියැලී සිටින සාමාන්‍ය පොලිස් භටයා සහ හදිසි සංඥාවලට වහා ප්‍රතිචාරය දක්වමින් ජීවත්වන ගිනි නිවන සේවකයා—එනම් හැම දිනකම රැකියාවේ නියැලෙද්දී සිය දිවි පරදුවට තබන අය—වෘත්තියක් වශයෙන් ක්‍රීඩාවේ යෙදෙන අය ශූරයන් වශයෙන් සලකනු ලබන හෙයින් ඔවුන්ට ගෙවනු ලබන අතිවිශාල වැටුප් අනුමත කරනවාද? පසුගිය දශකය තුළ එක්සත් ජනපදයේ, පොලිස් නිලධාරීන් 700කටත් වඩා වැඩි දෙනෙක් සේවයේ යෙදී සිටිද්දීම මරුමුවට පත් වී ඇත. ගිනි නිවන හමුදාවේ සේවකයන්ගේ මරණ සංඛ්‍යාවද ඉහළ වේ. කෙසේවෙතත්, වෘත්තියේ යෙදී සිටින උසස් පුහුණුවක් ලැබ ඇති මෙම අයට ඉතා අඩු වශයෙන් ගෙවනු ලබන බව සමස්ථ ලෝක පිළිගැනීමයි. සමාජය විසින් ඔවුන්ගේ රැකියා සහ ජීවිත මත තබා තිබෙන වටිනාකම ගැන ඔවුන් ප්‍රශ්න නොකරනු ඇත්ද?
නිදසුනක් වශයෙන්, එක්සත් ජනපදයේ, කැනඩාවේ සහ ජපානයේ සිටින ක්‍රීඩා ලෝලීන්ගේ අවධානය ආකර්ෂණය කරන්නාවූ ප්‍රබල ක්‍රීඩාවක් වන, බේස්බෝල් සැලකිල්ලට ගන්න. එක්සත් ජනපදයේ ඉහළ පෙළේ ක්‍රීඩකයන් 200දෙනෙකුට වැඩි ගණනක් වසරකට ඩොලර් මිලියන එකකට වඩා වැඩියෙන් උපයා ගනිති. වර්ෂ 1992 බේස්බෝල් ක්‍රීඩා සමය අවසානයේදී, ක්‍රීඩකයන් 100දෙනෙක් තමන්ට ඩොලර් මිලියන 516ක් සහතික කරන ගිවිසුම්වලට අත්සන් තැබුවෝය. මොවුන්ගෙන් 23දෙනෙක්, වසරකට ඩොලර් මිලියන 3කට වඩා වැඩියෙන් වටින ගිවිසුම්වලට අත්සන් තැබූහ. එතරම් ප්‍රසිද්ධ නොවන මෙම ක්‍රීඩකයන්ගේ අතිවිශාල වැටුප් අඳුරේ හෙලන්නේ වඩා කීර්තිමත් අයගේ ගිවිසුම්ය, ඔවුහු වසර හයකට ක්‍රීඩා කිරීම සඳහා ඩොලර් මිලියන 43කටත්, වසර පහකට ඩොලර් මිලියන 36කටත් වඩා වැඩි මුදලකට අත්සන් තැබූහ. සෑම වසරකම වේතන ඉහළ නගිමින් පවතින අතර, බේස්බෝල් ඉතිහාසය තුළ වඩා ඉහළ වේතන ප්‍රමාණ සඳහා නව වාර්තා තබනු ලබයි. පාපන්දු ක්‍රීඩකයන්ගේ වේතනද ඩොලර් 5,00,000ක් දක්වා ශීඝ්‍රයෙන් ඉහළ නගිනවා දැක ගැනීමට හැකි වී තිබේ.
මෙම වේතන මතු සඳහන්වන ප්‍රශ්නය මතු කරයි, සාමාන්‍ය පාඨකයාට සතිපතා ඩොලර් 62,500ක ගෙවීමක් උපයාගැනීම කල්පනාකර බැලීමටවත් හැකිද? “එසේ වුවත් සති-16 ක්‍රීඩා සමය තුළ ජාතික පාපන්දු පෙළේ සෙල්ලම් කරන ඩොලර් මිලියන ගණන් උපයා ගන්නා ක්‍රීඩකයෝ සියලු දෙනාම සෑම සතියකම කරන්නේ එම දෙයමයි,” යනුවෙන් ද නිව් යෝක් ටයිම්ස් වාර්තා කළේය. “එසේත් නැතහොත් හැම සති දෙකකට වරක් ඩොලර් 75,000ක ගෙවීමක් ලබන, මිලියන 2ක් උපයා ගන්නා බේස්බෝල් ක්‍රීඩකයෙක් සම්බන්ධයෙන් කුමක් කිව හැකිද? බදු ආදිය ගෙවීමෙන් පසුව, මාසයේ 15වෙනිදා දක්වා යන්තම් පිරිමසා ගැනීම සඳහා ඔහුට ඩොලර් 50,000ක් තිබේ.” නිෂ්පාදන ද්‍රව්‍ය පිට අනුමැතිය හා අත්සන් තැබීම සඳහා, බේස්බෝල් පන්දු මත අත්සන තැබීම සඳහා, ක්‍රීඩා ලෝලීන් සඳහා වූ දේවල අත්සන තැබීම සඳහා සෙනඟක් ඉදිරියේ පෙනී සිටීමට පමණක්, යනාදියට ගෙවන ගාස්තුව මීට ඇතුළත් වන්නේ නැත, මේ සියල්ලක්ම ඇතැම්විට මිලියන ගණනාවක් දක්වා ඉහළ නැගිය හැකිය. නැවතත්, ක්‍රීඩකයෙකුට එක් වරක් ක්‍රීඩා කිරීමෙන් උපයාගත හැකි මුදලට වඩා අඩු මුදල් ප්‍රමාණයක් මුළු වසරක් තුළ උපයා ගන්නා අඩු වැටුපක් ලබන ගුරුවරයා හෝ ගුරුවරිය කල්පනා කළ යුත්තේ කුමක්ද?
රූපවාහිනියේ බලය නිසා, ගොල්ෆ් ක්‍රීඩාවේ, ටෙනිස් ක්‍රීඩාවේ, පැසි පන්දු ක්‍රීඩාවේ සහ අයිස් හොකී ක්‍රීඩාවේ වෘත්තියක් වශයෙන් නියැලෙන අයද අති විශාල මුදල් ප්‍රමාණ ලබාගෙන ඇත. තම ක්ෂේත්‍ර තුළ සිටින විශිෂ්ට අයට තමන්ගේ ආදායම මිලියන ගණන්වලින් ගණන් කළ හැකිය. ප්‍රධාන අයිස් හොකී ක්‍රීඩකයෙකු විසින් වසර හයකට ඩොලර් මිලියන 42ක ගිවිසුමකට අත්සන තබනු ලැබේ. තවත් අයිස් හොකී ක්‍රීඩකයෙකුට වසර පහක් සඳහා ඩොලර් මිලියන 22ක් ලැබෙයි, ඇරත් තුවාල වීම හෝ අසනීප වීම නිසා ඔහු කවදාවත් ඔහුගේ කණ්ඩායම වෙනුවෙන් ක්‍රීඩා නොකළත් ක්‍රීඩා සමයකට ඩොලර් මිලියන 4.4ක් ඔහුට ලැබෙයි.
ටෙනිස් ක්‍රීඩාවේ වෘත්තියක් වශයෙන් යෙදෙන දක්ෂ ක්‍රීඩකයන් දෙදෙනෙකු, එනම් ස්ත්‍රියක සහ පුරුෂයෙකු අතර තරඟයකදී—ඊට “විරුද්ධ ලිංගයේ අය අතර සටන” යනුවෙන් නම් කරන ලදි—ජයග්‍රාහකයාට ඩොලර් 5,00,000ක දීමනා මල්ලක් සඳහා ටෙනිස් පිටිය මත එම දෙදෙනා තදින් සටන් කළහ. පිරිමි ක්‍රීඩකයා ජයග්‍රහණය අත්කර ගත් නමුත්, “ක්‍රීඩා පිටිය මත පෙනී සිටීමට පමණක් ප්‍රමාණවත් මුදලක් ඔවුන් දෙදෙනාටම ලැබූ බව වාර්තා වේ, එය කොපමණද කියා නිවේදනය කරනු නොලැබුවත් කෙනෙකුට ඩොලර් 2,00,000 සිට ඩොලර් 5,00,000 දක්වා ලැබූ බව තක්සේරු කරන ලදි.”
රටවල් ස්වල්පයක් පමණක් නම් කරනවා නම්, බ්‍රිතාන්‍ය, ඉතාලිය, ජපානය සහ ස්පාඤ්ඤය බඳු රටවල, වෘත්තියක් වශයෙන් ක්‍රීඩාවේ යෙදෙන අයට ලැබෙන වැටුප් ප්‍රමාණ අතිශයින් ඉහළ නැග ඇත—පුදුමකරවන ඩොලර් මිලියන ගණන් මුදල් ඔවුන්ට ලැබේ. මේ සියල්ල නිසා වෘත්තියක් වශයෙන් ටෙනිස් ක්‍රීඩාවේ යෙදෙන එක් ඉහළ පෙළේ ක්‍රීඩකයෙක් 90 ගණන්වල වේතන “අසභ්‍ය” යයි නම් කිරීමට පෙලඹුණේය.
කෙසේවෙතත්, මෙම ඉහළ වේතන ප්‍රමාණ සඳහා වෘත්තියක් වශයෙන් ක්‍රීඩාවේ යෙදෙන අය යම් ආකාරයකින් වගකිව යුතු බව මින් අදහස් කරන්නේ නැත. දක්ෂ ක්‍රීඩකයන්ට උසස් වැටුප් ඉදිරිපත් කරන්නේ කණ්ඩායම්වල හිමිකරුවන්ය. ක්‍රීඩකයන් ලබාගන්නේ ඔවුන්ට ඉදිරිපත් කරන දේ පමණි. කණ්ඩායම්වලට ජය පැතීම සඳහා ක්‍රීඩා ලෝලීන්ව ආකර්ෂණය කිරීමේ ගෞරවය ක්‍රීඩකයන්ටය. නිදසුනක් වශයෙන්, 1992 බේස්බෝල් සහ පාපන්දු සමවලදී, බොහෝ ක්‍රීඩාංගනවල වාර්තාගත සෙනඟක් දක්නා ලදි. මෙයත්, රූපවාහිනියේ විකාශනය කිරීම සඳහා අයිතියට ගෙවනු ලබන මුදලත් කණ්ඩායම්වල හිමිකරුවන්ට වැඩි ආදායමක් ගෙනදී ඇත. එබැවින්, ක්‍රීඩකයන්ට හුදෙක් ලැබීමට සුදුසු ප්‍රමාණය ලැබෙනවා යයි මේ හේතු නිසා කිව හැකිය.
අපගේ ආහාර එක්රැස් කිරීම සඳහා ගිනියම් අව්වේ දීර්ඝ පැය ගණනාවක් වෙහෙස මහන්සි වන සංක්‍රමණ වැඩකරුවන්ගේ පහත් වැටුප්, බෝලයක් දැලක් උඩින් යෑවීමට, කුඩා සිදුරක් තුළ වැටීමට සැලැස්වීමට හෝ සීමාව පසුකරගෙන යෑමට පහරක් ගැසීම සඳහා ගෙවනු ලබන අතිවිශාල වැටුප් සමඟ සන්සන්දනය කර බැලීමේදී, එය ධනවත් සමාජයක පවත්නා සාරධර්ම පිළිබඳ හැඟීමේ ඛේදනීය විස්තරයක් වේ.
අසමානකම් දක්වන තවත් අධ්‍යයනයක් සලකා බලන්න, එය වනාහි වෘත්තියක නියැලී සිටියා වූ තවත් සුප්‍රසිද්ධ පුද්ගලයෙකු සම්බන්ධ විස්තරයයි. පෝලියෝ රෝගය වැළකීමට එන්නතක් සඳහා පර්යේෂණ පැවැත්වීමට ඩොලර් මිලියන 2කට වඩා අඩු මුදල් ප්‍රමාණයක් සමඟින් වැඩ කළ, අමෙරිකානු විද්‍යාඥ ජෝනස් සාල්ක් සහ ඔහුගේ හවුල් පර්යේෂකයෝ පරීක්ෂණාගාරයක එන්නත් එකිනෙක සූත්‍රයකට අනුව සකස් කර, පැය ගණනාවක් පුරා පරීක්ෂාවක් මත පරීක්ෂාවක් පවත්වමින් වෙහෙස මහන්සි වූහ. වර්ෂ 1953දී, අත්හදා බැලීම සඳහා එන්නතක් තමා විසින් නිපදවා තිබෙන බව සාල්ක් නිවේදනය කළේය. එම එන්නත අත්හදා බැලීම සඳහා දෙනු ලැබූ මුල් අය අතර, සාල්ක්, ඔහුගේ භාර්යාව සහ ඔවුන්ගේ පුතුන් තුන්දෙනා සිටියෝය. එම එන්නත ආරක්ෂාකාරී මෙන්ම බලපෑමෙන් යුක්ත වූ බව සොයා ගන්නා ලදි. අදදින, පෝලියෝ සම්පුර්ණයෙන්ම වාගේ තුරන් කරනු ලැබ ඇත.
මෙම මාරාන්තික මෙන්ම අංගවිකල කරවන රෝගය වැළැක්වීම සඳහා විශිෂ්ට ලෙස දායක වීම නිසා සාල්ක්ට බොහෝ ගෞරවයන් හිමි විය. එසේ වුවත්, මුදල් දීමනා කිසිවක් පිළිගැනීමට ඔහු ප්‍රතික්ෂේප කළේය. එන්නත වැඩි දියුණු කිරීම සඳහා ඔහු සිය පරීක්ෂණාගාරයට නැවත ගියේය. ප්‍රත්‍යක්ෂ ලෙස, ඔහුගේ නියම විපාකය වූයේ මුදල් නොව, නමුත් මෙම දරුණු උවදුරෙන් දරුවන් සහ දෙමව්පියන් නිදහස් වීම දැකීමෙන් ලැබෙන තෘප්තියයි.
අසනීප, රෝග සහ දුක සදහටම තුරන් කොට ඇත්තාවූ, පාරාදීස පොළොවක් මත සදාකල් ජීවත්වීමේ අපේක්ෂා සම්බන්ධව උගන්වනු ලැබීම ගැන අවසාන වශයෙන් සලකා බලන්න. එබඳු ශුභාරංචි උගන්වන්නන්ට සාධාරණ ලෙස උපයාගත හැකි විශාල වැටුප් ප්‍රමාණ ගැන කල්පනා කර බලන්න. එසේ වුවත්, එබඳු ශික්ෂකයෝ සිටින නමුත්, ඔවුන් උගන්වන්නේ ගෙවීමකින් තොරවය! ඔවුන්ට මූල්‍යමය විපාකයක් නොමැත! ‘වැඩකාරයා තමාගේ කුලිය ලබන්ට සුදුසුයයි’ යේසුස්වහන්සේ පැවසූ විට, මෙම ශුභාරංචියේ ගුරුවරුන්හට ලැබිය යුතු වේතන සම්බන්ධයෙන් උන්වහන්සේ කථාකරමින් සිටියේ නැත. (ලූක්. 10:7) ඔවුන්ට තමන්ගේ අවශ්‍යතා ලැබෙනු ඇති බව උන්වහන්සේ පැවසූ සේක. එබඳු අයට උන්වහන්සේ තවදුරටත් මෙසේ පැවසූ සේක: “නුඹලා නොමිලයේ ලැබුවහුය, නොමිලයේ දීපල්ලා.” (මතෙව් 10:8) ඔවුන්ගේ විපාකය කුමක් වනු ඇද්ද? ආහ්, නොවරදවාම මෙතෙක් ජීවත් වූ ශ්‍රේෂ්ඨතම මනුෂ්‍යයා පොරොන්දු වූ දෙයමය—එනම් පවිත්‍ර කරන ලද පාරාදීස පොළොවක් මත, සදාකාල ජීවනයයි. මිලියන ගණන් ඉක්මවන වේතනවලට එය සන්සන්දනය කළ නොහැක! g94 3/22
[9 පිටුවෙහි ඇති කොටුව]
මුදල්, කීර්තිය, හෝ මත්ද්‍රව්‍ය—කුමක්ද?
වෘත්තියක් වශයෙන් ක්‍රීඩාවේ නියැලීම තුළින් ලබාගත හැකි කීර්තියේ සහ ඩොලර් මිලියන ගණන්වල ආකර්ෂණය, අසාමාන්‍ය ලෙස කෙටි කාලයක් තුළ ඉතා සවිශක්ති සම්පන්න වූ ශරීර සහ පේශීන් වර්ධනය කරගැනීම සඳහා උපායක් වශයෙන් ධාතුජනක ස්ටෙරොයිඩ භාවිතා කිරීමට යෞවනයන්ව පොලඹවනු ලැබ තිබේ. මෙම මත්ද්‍රව්‍යවල භාවිතය “අතිඅන්තරාසහිත ප්‍රමාණයන්” දක්වා වැඩි වී තිබෙන බව, එක්සත් ජනපදයේ ඔලිම්පික් මත්ද්‍රව්‍ය පාලක වැඩසටහනේ සාමාජිකයෙකු වන, වෛද්‍ය එන්. ටේලර් අනතුරු ඇඟවූයේය. එක්සත් ජනපදයේ පමණක්, යෞවන අය 2,50,000ක් පමණ ස්ටෙරොයිඩ භාවිතා කරන බව තක්සේරු කර තිබේ.
“විද්‍යාලයේදී ස්ටෙරොයිඩ භාවිතා කිරීමට තිබෙන බලපෑම අදහාගත නොහැකි තරම්ය,” යනුවෙන් වෘත්තියක් වශයෙන් පාපන්දු ක්‍රීඩාවේ යෙදෙන්නෙක් පැවසුවේය. “ස්ටෙරොයිඩ භාවිතා කිරීමෙන් අවුරුදු 20කට පමණ පසුව ඇති විය හැකි ගැටලු ගැන ක්‍රීඩකයෝ කල්පනා නොකරති. විශේෂයෙන් විද්‍යාලයීය මට්ටමින් ගත් කළ ඔවුන් දින 20ක්වත් ඉදිරියට කල්පනා කරන්නේ නැත. විශේෂයෙන් බාල වියකදී, ක්‍රීඩකයාගේ මනස සකස් වී තිබෙන ආකාරය වනුයේ: “එය අත්කර ගැනීම සඳහා මම ඕනෑම දෙයක් කරන්න ලෑස්තියි” යන්නය.
“මට ක්‍රීඩකයෙකු වීමට ඕනෑ නම්, මට ඒවා භාවිතා කරන්න අවශ්‍යමයි,” යනුවෙන් පාපන්දු ක්‍රීඩකයෙකු වීමට බලාපොරොත්තු වෙමින් සිටි කෙනෙක් පැවසුවේය. “. . . බර එසවීමේ කාමරය තුළ තරගකාරී ස්වභාවය ඉතා අධිකයි. සෑම වසරකම වඩා වැඩියෙන් ලොකු වීමටත් ශක්තිමත් වීමටත් ඔබට ඕනෑ වේ, අනිත් අය එසේ වෙනවා ඔබ දකියි, එමනිසා ඔබත් එසේ වීමට කැමති වෙයි. එම මානසික නැඹුරුවාව බලපැවැත්වීමට පටන් ගනී.” කෙසේවෙතත්, එම හැඟීම තිබුණ නමුත්, මෙම ක්‍රීඩකයා තමා අත්කරගැනීමට බලාපොරොත්තු වූ දෑ ස්ටෙරොයිඩ භාවිතය නැතිව අත්කර ගත්තේය—එනම් ඔහු වෘත්තිමය පාපන්දු ක්‍රීඩකයෙක් බවට පත් වූයේය. ස්ටෙරොයිඩ, “නීති විරෝධී මත්ද්‍රව්‍යකට වඩා බොහෝසෙයින් ක්‍රීඩාවට හානිකර” වන බව ඔහු විශ්වාස කරයි.
වෛද්‍යවරුන් විසින් පමණක් නොව, නමුත් ස්ටෙරොයිඩ සහ ශරීරය-බලවත් කරන්නාවූ වෙනත් මත්ද්‍රව්‍යවල අතිශය හානිකර බලපෑම් විඳ ඇති අය විසින්ද තොරතුරු සම්භාරයක් ලියා තිබේ. වඩාත්ම බරපතළ ප්‍රතික්‍රියාවල ප්‍රතිඵලය මරණය වී ඇත.
[7 පිටුවෙහි ඇති පින්තූරය]
කැලිෆෝනියාවේ ගිල්රොයිහි සුදු ලූණු අස්වැන්න නෙලා ගනිමින් සිටින සංක්‍රමණ වැඩකරුවෝ
[හිමිකම් වඟන්තිය]
Camerique/H. Armstrong Roberts
[8 පිටුවෙහි ඇති පින්තූරය]
ඔවුන්ගේ කුලිය ලැබීමට වටින අය වශයෙන් ගුරුවරුන් උසස් මට්ටමක සිටින්නේ නැද්ද?
[10 පිටුවෙහි ඇති පින්තූරය]
එක්සත් ජනපදයේ ඉහළ පෙළේ බේස්බෝල් ක්‍රීඩකයන් 200දෙනෙකුට වඩා වැඩි දෙනෙක් වසරකට ඩොලර් මිලියන එකකට වඩා වැඩියෙන් උපයා ගනිති
[හිමිකම් වඟන්තිය]
Focus on Sports