බයිබල් පොත් අංකය 43—යොහන්

ලේඛකයා: ප්‍රේරිත යොහන්

ලියූ ස්ථානය: එපීසය හෝ ඊට ආසන්නව

ලිවීම සම්පූර්ණ කළේ: පො.යු. 98දී පමණ

ආවරණය කළ කාලය: ප්‍රස්තාවනාවෙන් පසු, පො.යු. 29-33 දක්වා

මතෙව්ගේ, මාර්ක්ගේ සහ ලූක්ගේ සුවිශේෂ වාර්තා වසර 30කට වැඩි කාලයක් පුරා බෙදාහරිමින් තිබූ අතර, පළමු සියවසේ විසූ ක්‍රිස්තියානීහු ඒවා ශුද්ධාත්මයෙන් ආනුභාවය ලැබූ මිනිසුන්ගේ කෘති ලෙස බෙහෙවින් අගය කොට සැලකූහ. මේ වන විට, එනම් එම සියවසේ අවසානය ළංවීමත් යේසු සමඟ සිටි අයගේ ගණන අඩුවීමත් සිදු වෙමින් තිබියදී, තවත් යමක් පැවසීමට තිබේද යන ප්‍රශ්නය ඇතැම්විට පැනනැඟුණා විය හැක. පෞද්ගලික මතක සටහන් ඇසුරෙන් යේසුගේ දේවසේවයේ තවත් අනගි තොරතුරු සම්පූර්ණ කළ හැකි යමෙකු ඒ වන විටත් සිටියේද? ඔව්, සිටියේය. වියපත්ව සිටි යොහන් යේසු සමඟ ඇසුරු කිරීමෙන් සුවිශේෂ ලෙස ආශීර්වාද ලැබූ කෙනෙකි. පෙනෙන ප්‍රකාරයට යොහන් බව්තීස්තගේ ගෝලයන් අතුරින් දෙවිගේ බැටළු පැටියාව හඳුන්වා දෙනු ලැබූ මුල්ම අය අතරේ ඔහු සිටි අතර, තමා සමඟ දේවසේවයේ පූර්ණකාලීනව හවුල් වීම සඳහා ස්වාමින් විසින් ඇරයුම් කරනු ලැබූ මුල්ම සතරදෙනාගෙන් කෙනෙකි. (යොහන් 1:35-39; මාර්ක් 1:16-20) ඔහු තම දේවසේවය පුරා යේසු සමඟ සමීප ඇසුරක් දිගටම පවත්වාගෙන ගිය අතර, අන්තිම පාස්කුවේදී යේසුගේ ළයට හාන්සි වී සිටි ‘යේසු ප්‍රේම කළ’ ගෝලයා විය. (යොහන් 13:23; මතෙ. 17:1; මාර්ක් 5:37; 14:33) මරණයට පත් කිරීමේ ඉතා දුක්බර ස්ථානයේ ඔහු සිටි අතර, ඒ ස්ථානයේදී, යේසු තම මාංසික මවව රැකබලා ගැනීම ඔහුට භාර දුන් අතර, යේසු නැවත නැඟිට සිටීමේ ආරංචිය සෝදිසි කරබැලීම සඳහා සොහොන් ගෙය දෙසට ඔවුන් වේගයෙන් දිව යද්දී, පේතෘස්ව පසු කරගෙන වේගයෙන් දිව ගිය තැනැත්තා ඔහු විය.—යොහන් 19:26, 27; 20:2-4.

² ක්‍රියාශීලී දේවසේවයේ වසර 70කට ආසන්න කාලය මගින් වඩාත් මෘදු ස්වභාවයකට පත් වූ නිසාත්, මෑතකදී ඔහු පත්මොස් දූපතේ හුදකලාව සිරගත වී සිටියදී දුටු දර්ශනවලින් හා කළ මෙනෙහි කිරීම්වලින් උද්දීපනය වූ නිසාත්, දිගු කාලයක සිට තම හදවතේ නිධාන කරගෙන සිටි දේවල් වාර්තා කිරීම සඳහා යොහන් මැනවින් සන්නාහ සන්නද්ධ වී සිටියේය. මේ වාර්තාව කියවන සෑම කෙනෙකුම ‘යේසු දෙවිගේ පුත්‍රයා වූ ක්‍රිස්තුස් බව විශ්වාස කරන පිණිසත්, විශ්වාස කොට ඔහුගේ නාමයෙන් ජීවනය ලබන පිණිසත්,’ එම අනර්ඝ ජීවනදායක කියමන් බොහොමයක් සිහියට නංවාගෙන වාර්තා කිරීමට හැකි වන පරිදි ශුද්ධාත්මය දැන් ඔහුගේ මනස ප්‍රාණවත් කරයි.—20:31.

³ දෙවන සියවසේ විසූ ක්‍රිස්තියානීහු මේ වාර්තාවේ ලේඛකයා වශයෙන් යොහන්ව පිළිගත් අතර, මේ ලේඛනය සම්මත ශුද්ධ ලියවිලි ග්‍රන්ථ සමූහයට අයත් වන අවිවාදයෙන් පිළිගත් කොටසක් ලෙස සැලකූහ. දෙවන සියවසේ අගභාගයේ හා තුන්වන සියවසේ මුල්භාගයේ විසූ ඇලෙක්සැන්ඩ්‍රියාවේ ක්ලෙමන්ට්, අයිරීනියස්, ට’ටූලියන් සහ ඔරිගන් යන සියලුදෙනාම යොහන්ගේ කර්තෘත්වය සහතික කළහ. එපමණක්ද නොව, යොහන් මෙහි කර්තෘ බවට අභ්‍යන්තර සාක්ෂි බොහොමයක් පොතෙන්ම සොයාගැනීමට තිබේ. පැහැදිලිවම මේ සුවිශේෂයේ ලේඛකයා යුදෙව්වෙකු වූ අතර, යුදෙව්වන්ගේ චාරිත්‍ර වාරිත්‍ර හා දේශය ඔහුට හුරු පුරුදු දෙයක් විය. (2:6; 4:5; 5:2; 10:22, 23) මෙම වාර්තාවෙහි දැක්වෙන සමීප විස්තරවලින් ඇඟවෙන්නේ, ඔහු නිකම්ම ප්‍රේරිතයෙකු පමණක් නොව, නමුත් විශේෂ අවස්ථාවලදී යේසු කැටුව ගිය පේතෘස්, යාකොබ් සහ යොහන් යන තිදෙනාගෙන් සෑදුණු ඉතා සමීප කණ්ඩායමේ කෙනෙකුද වූ බවය. (මතෙ. 17:1; මාර්ක් 5:37; 14:33) මේ පොත ලිවීමට බොහෝ කලකට පෙර, එනම් පො.යු. 44දී පමණ පළමුවන හෙරොද් අග්‍රිපා විසින් යාකොබ්ව ප්‍රාණ පරිත්‍යාගියෙකු වශයෙන් ඝාතනය කරනු ලැබූ නිසා, මොවුන් අතුරින් යාකොබ්ව (සෙබදීගේ පුත්‍රයා) කපාහැරේ. (ක්‍රියා 12:2) පේතෘස්ව කපාහරිනු ලබන්නේ, ඔහු ලේඛකයා සමඟ යොහන් 21:20-24හි සඳහන් කර තිබෙන නිසයි.

⁴ ප්‍රේරිත යොහන්ගේ නම කිසි විටක සඳහන් කර නැතත්, මෙම අවසාන වගන්තිවලදී ‘යේසු ප්‍රේම කළ’ ගෝලයා ලෙස ලේඛකයාට යොමු දක්වා තිබෙන අතර, වාර්තාවේ අවස්ථා කිහිපයකම මේ හා සමාන ප්‍රකාශයන් භාවිත කර ඇත. මෙහිදී යේසුගේ මේ වදන් උපුටා දක්වන්නේ ඔහු ගැන පවසන්නාක් මෙනි: “මා එන තුරු ඔහු සිටිනවාට මා කැමති නම් නුඹට මොකද?” (යොහන් 21:20, 22) මෙයින් අදහස් වන්නේ, එම වදන්වලින් යොමු දක්වා තිබෙන ගෝලයා පේතෘස්ට හා සෙසු ප්‍රේරිතයන්ට වඩා දිගු කාලයක් ජීවත්ව සිටින්න යන බවය. මේ සියල්ලම ප්‍රේරිත යොහන්ට ගැළපේ. යේසුගේ පැමිණීම හා සම්බන්ධ එළිදරව් දර්ශනය ලැබීමෙන් පසු, ‘ආමෙන්, ස්වාමි වූ යේසු එන්න’ යන වදන් සමඟින් යොහන් ඒ විශිෂ්ට අනාවැකිය නිම කිරීම සිත්ගන්නා දෙයකි.—එළි. 22:20.

⁵ අදාළ කාරණය සම්බන්ධයෙන් යොහන්ගේ ලියවිලිවල නිශ්චිත තොරතුරු ඉදිරිපත් කර නොතිබුණත්, පත්මොස් දූපතේ වහල්භාවයෙන් මිදීමෙන් පසු, ඔහු මේ සුවිශේෂය ලියූ බව පොදුවේ පිළිගනු ලබන දෙයකි. (එළි. 1:9) පො. යු. 96-98 දක්වා කාලයේදී රෝමයේ අධිරාජ්‍යයා වූ න’වා, කලින් සිටි අධිරාජ්‍යයා වූ ඩොමිෂන්ගේ පාලන සමයේ අවසාන භාගයේදී වහල්භාවයට ගෙනා බොහෝදෙනෙකුව ආපසු කැඳෙව්වේය. යොහන් පො.යු. 98දී පමණ, තම සුවිශේෂය ලිවීමෙන් පසුව, ට්‍රේජන් අධිරාජ්‍යයාගේ පාලන සමයේ තුන්වන අවුරුද්දේදී, එනම් පො.යු. 100දී සාමකාමී මරණයක් එපීසයේදී අද්දුටු බවට විශ්වාස කෙරේ.

⁶ මෙම සුවිශේෂය ලියූ ස්ථානය එපීසය හෝ ඊට ආසන්න ප්‍රදේශයක් වීම සම්බන්ධයෙන් ඉතිහාසඥ යුසීබියස්, (පො.යු. 260 පමණ-342) අයිරීනියස්ගේ මෙම වදන් මෙසේ උපුටා දක්වයි: “ස්වාමින්ගේ ළපැත්තේ පවා හාන්සි වී සිටි ගෝලයා වන යොහන් ආසියාවේ පිහිටි එපීසයේ ජීවත් වෙමින් සිටි කාලයේදී මේ සුවිශේෂය රචනා කළේය.”a යේසුගේ විරුද්ධවාදීන්ට “ඵරිසිවරුන්,” “නායක පූජකයන්” මෙන්ම ඒ හා සමාන වෙනත් නම්වලින් යොමු දක්වනවා වෙනුවට “යුදෙව්වරුන්” යන පොදු යෙදුමෙන් අවස්ථා රාශියක ඇමතීම, මෙම පොත පලස්තීනයෙන් පිටතදී ලියූ බවට වූ කාරණයට අනුබල දෙනවා. (යොහන් 1:19; 12:9) එමෙන්ම, ගලීල මුහුද පිළිබඳ තොරතුරු දක්වා තිබෙන්නේ එහි රෝම නම වන තිබේරියස් මුහුද නමින්ය. (6:1; 21:1) යුදෙව් නොවන අයගේ ප්‍රයෝජනය සඳහා ඔහු යුදෙව්වරුන්ගේ උත්සව පිළිබඳව උපකාරවත් වන පැහැදිලි කිරීම් සපයයි. (6:4; 7:2; 11:55) ඔහුව පිටුවහල් කළ ප්‍රදේශය වන පත්මොස් දූපත එපීසය අසල පිහිටා තිබූ අතර, එපීස සභාව මෙන්ම කුඩා ආසියාවේ පිහිටි සෙසු සභා සමඟ දැනහැඳුනුම්කමක් තිබූ බව එළිදරව් 2වන හා 3වන පරිච්ඡේදවලින් ඇඟවෙයි.

⁷ විසිවන සියවසේදී සොයාගත් වැදගත් අත්පිටපත් යොහන්ගේ සුවිශේෂයේ විශ්වාස කටයුතුභාවයට අනුබල දෙයි. දැන් පැපිරස් රයිලන්ඩ්ස් 457 (p⁵²) යනුවෙන් හඳුන්වනු ලබන, ඊජිප්තුවේ තිබී සොයාගත්, යොහන් 18:31-33, 37, 38 අඩංගු වන යොහන් සුවිශේෂයේ කැබැල්ල මේවායින් එකක් වන අතර, එය එංගලන්තයේ මැන්චෙස්ට’හි පිහිටි ජෝන් රයිලන්ඩ්ස් පුස්තකාලයේ සුරක්ෂිතව තබා ඇත.b එය පළමු සියවසේ අගභාගයේ යොහන් විසින් ලියූ බවට වූ සම්ප්‍රදාය කෙරෙහි බලපාන අන්දම ගත් කළ, 1949 පළ වූ ද බයිබල් ඇන්ඩ් මොඩන් ස්කොල’ෂිප් (බයිබලය සහ නූතන පාණ්ඩිත්‍යය) යන සිය පොතෙහි 21වන පිටුවෙහි, නැසීගිය ශ්‍රීමත් ෆ්‍රෙඩ්‍රික් කෙන්යන් මෙසේ පැවසීය: “මෙය ඉතා කුඩා කැබැල්ලක් වුවත්, ක්‍රි.ව. 130-150 අතර කාලපරිච්ඡේදයේදී පමණ, ඇතැම්විට එය සොයාගනු ලැබූ ප්‍රාදේශීය ඊජිප්තුවේදී, මෙම සුවිශේෂයේ අත්පිටපතක් අතිනත යවනු ලැබූ බවට ප්‍රමාණවත් සාක්ෂි ලැබෙනවා. ලියවිල්ල මුලින්ම ලියූ තැනේ සිට එය අතිනත යැවීම සඳහා අවම කාලයකට පවා ඉඩ දුන්නොත්, එය ලියනු ලැබූ දිනය කොතරම් ආපස්සට යනවාද කිවහොත්, පළමුවන සියවසේ අන්තිම දශකය වන සම්ප්‍රදායික දිනයට එය ඉතා සමීප වන බැවින්, මෙම සම්ප්‍රදායේ වලංගුතාව ප්‍රශ්න කිරීමට කිසිදු හේතුවක් තවත් නැත.”

⁸ යොහන්ගේ සුවිශේෂය එහි හැඳින්වීම සම්බන්ධයෙන් විශිෂ්ටත්වයක් උසුලයි; ‘පටන්ගැන්මේදී දෙවි සමඟ’ සිටි වාක්‍යය, සියලු දේවල් සෑදීමේදී යොදාගත් තැනැත්තා හැටියට එහිදී හෙළි කරයි. (1:2) පියා සහ පුත්‍රයා අතර තිබෙන අනර්ඝ සබඳතාව හඳුන්වා දීමෙන් පසුව, යොහන් ඉතා දක්ෂ ලෙස විශේෂයෙන්ම දෙවිගේ ශ්‍රේෂ්ඨ විධිවිධානය තුළ සෑම දෙයක්ම එක්සත් කරවන සමීප ප්‍රේමයෙන් යුත් දෘෂ්ටිකෝණයකින් යේසුගේ ක්‍රියාවන් හා අනුශාසනාවන් විචිත්‍රවත්ව ඉදිරිපත් කිරීම ආරම්භ කරයි. යේසුගේ භූමික ජීවිතය හා සම්බන්ධ මෙම වාර්තාව පො.යු. 29-33 දක්වා කාලපරිච්ඡේදය ආවරණය කරන අතර, ඔහු දේවසේවයේ නිරත වූ කාලය අවුරුදු තුනහමාරක් බව තහවුරු කෙරෙන එක් සාක්ෂියක් සපයමින්, යේසු තමාගේ දේවසේවා කාලයේදී සහභාගි වූ පාස්කු උත්සව සතර සඳහන් කිරීමට මෙම වාර්තාව සැලකිලිමත් වෙයි. ඊට උදාහරණ හැටියට එම පාස්කු උත්සවවලින් තුනක් සඳහන් කර ඇත. (2:13; 6:4; 12:1; 13:1) ඒවායින් එකකට “යුදෙව්වරුන්ගේ මංගල්‍යයක්” වශයෙන් යොමු දක්වා තිබුණත්, “තව සාරමසක් ගිය කල ගොයම් කපන කාලය” පැමිණෙන බව යේසු පවසා කෙටි කලකට පසුව, එය සිදු වූ බව අවට පාඨ සම්බන්ධයෙන් දැක්වේ. මේ අනුව මෙම මංගල්‍යය ගොයම් කපන කාලයේ ආරම්භයේ පමණ සිදු වූ පාස්කුව බව අඟවයි.—4:35; 5:1.c

⁹ “යොහන් විසින් ලියනලද ශුභාරංචිය” මූලික වශයෙන් අතිරේක තොරතුරු සපයයි; ඉන් සියයට 92ක්ම සෙසු සුවිශේෂ තුනෙහි ආවරණය කර නැති අලුත් තොරතුරුයි. එසේ වුවත්, යොහන් තම සුවිශේෂය අවසන් කරන්නේ මෙම වදන් සමඟින්ය: “[යේසු] කළ වෙනත් බොහෝ දේවල්ද ඇත්තේය, ඒවා එකින් එක ලියනලද්දේ නම්, ලියනු ලබන පොත් දරන්ට ලෝකයත් මදියයි සිතමි.”—21:25.

ප්‍රයෝජනවත් වීමට හේතු

³⁰ එහි ඍජුභාවය සම්බන්ධයෙන් ප්‍රබල වූද, ක්‍රිස්තුස් බවට පත් වූ වාක්‍යය, සමීප මෙන්ම හද උණුසුම් කරවන ආකාරයකින් ගෙනහැර දැක්වීම සම්බන්ධයන් ඒත්තුගන්වනසුලු වූද, “යොහන් විසින් ලියනලද” යේසු පැවසූ වචනවලින් සහ කළ ක්‍රියාවලින් දෙවිගේ මෙම ආලේප ලත් පුත්‍රයා පිළිබඳව සමීප දසුනක් අපට සපයයි. තමාව “අපණ්ඩිතවූ නූගත්” කෙනෙකු බවට සලකුණු කරන යොහන්ගේ ලේඛන ශෛලිය හා වාග් මාලාව සරල වුවත්, ඔහුගේ ප්‍රකාශයන් ඉමහත් ප්‍රබලබවකින් යුක්තයි. (ක්‍රියා 4:13) පියා සහ පුත්‍රයා අතර තිබෙන සමීප ප්‍රේමය මෙන්ම ඔවුන් සමඟ එකමුතුව සිටීමෙන් අත් කරගත හැකි ආශීර්වාද ලත් ප්‍රේමනීය සබඳතාව දැනුම් දීමට දරන වෑයමේදී, ඔහුගේ සුවිශේෂය, එහි හිණි පෙත්තටම නඟියි. යොහන් සෙසු සුවිශේෂ තුනේම තිබෙනවාට වඩා “ප්‍රේමය” හා “ප්‍රේම කළ” යන වචන වැඩි වාර ගණනක් භාවිත කරයි.

³¹ පටන්ගැන්මේදී, වාක්‍යය සහ පියා වන දෙවි අතර පැවතියේ මොන තරම් තේජවත් සබඳතාවක්ද! දෙවිගේ මඟ පෙන්වීම අනුව, ‘වාක්‍යය මාංසවත් වී, කරුණාවෙන්ද සත්‍යයෙන්ද පූර්ණව, අප අතරෙහි වාසය කළේය. පියා වෙතින් වූ ඒකජාතක පුත්‍රයාගේ මහිමය වැනි ඔහුගේ මහිමය දුටිමු. [ඔහු ලබන්ට නොවටිනා තරම් වූ කරුණාවෙන් සහ සත්‍යයෙන් පූර්ණව සිටියේය, NW].’ (යොහන් 1:14) ඉන්පසු, තමාගේ සබඳතාව පියාගේ කැමැත්තට එකඟව කොන්දේසි විරහිතව යටත් විය යුතු වීමට අවශ්‍ය බව යොහන්ගේ සුවිශේෂය පුරාම යේසු අවධාරණය කරයි. (4:34; 5:19, 30; 7:16; 10:29, 30; 11:41, 42; 12:27, 49, 50; 14:10) මෙම සමීප සබඳතාව පිළිබඳ ඔහුගේ ප්‍රකාශයන්, යොහන් 17වන පරිච්ඡේදයේ වාර්තා වී තිබෙන හැඟීම් දනවන යාච්ඤාවේදී එහි තේජවත් වූ උච්චාවස්ථාව කරා එළඹෙයි; එම යාච්ඤාවේදී, පියා තමාට පොළොවේදී කරන්න දුන් වැඩ නිමා කර තිබීම ගැන මෙන්ම මෙම වචනත් යේසු පියාට දන්වයි: “දැන් පියාණෙනි, ලෝකය තිබෙන්ට පළමුවෙන් ඔබ වෙත මට තිබුණු මහිමයෙන් ඔබ වෙත මා ගෞරවයට පැමිණෙවුව මැනව.”—17:5.

³² සිය ගෝලයන් සමඟ ඇති යේසුගේ සබඳතාව ගැන කුමක් කිව හැකිද? මොවුන්ට මෙන්ම සියලුම මනුෂ්‍යවර්ගයාට දෙවිගේ ආශීර්වාද සැපයෙන එකම මාධ්‍යය ලෙස යේසුගේ කාර්යභාරයට දිගටම ප්‍රමුඛත්වයක් දෙනු ලැබේ. (14:13, 14; 15:16; 16:23, 24) ‘දෙවිගේ බැටළු පැටියා,’ “ජීවනදායක කෑම,” “ලෝකයේ ආලෝකය,” “යහපත් බැටළු එඬේරා,” ‘නැවත නැඟිටීම හා ජීවනය,’ ‘මාර්ගය, සැබෑව හා ජීවනය’ සහ “සැබෑවූ මිදිවැල” යනුවෙන් ඔහුට යොමු දක්වා තිබේ. (1:29; 6:35; 8:12; 10:11; 11:25; 14:6; 15:1) තමන් සහ තම ගෝලයන් අතර පමණක් නොව, නමුත් පියා සමඟද තිබෙන මවිතකර එක්සත්කම ගැන යේසු කතා කරන්නේ, මෙම “සැබෑවූ මිදිවැල” නමැති නිදර්ශනයේදීය. බොහෝ පලදැරීමෙන් ඔවුහු තම පියාව මහිමයට පත් කරන්නෝය. ‘පියා මට ප්‍රේම කළාක් මෙන් මමත් නුඹලාට ප්‍රේම කරමි. මාගේ ප්‍රේමයෙහි පවතින්න’ කියා යේසු උපදෙස් දෙයි—15:9.

³³ ඊළඟට ප්‍රේම කරන මේ සියලුදෙනාත් ‘මොවුන්ගේ වචනය කරණකොටගෙන ඔහු කෙරෙහි ඇදහිල්ල තබන’ අයත්, සත්‍යය නමැති වචනයෙන් පවිත්‍ර වී ඔහුගේ පියා සමඟත් ඔහු සමඟත් ඒකත්වයක් වන පිණිස ඔහු යාච්ඤා කරන්නේ මොන තරම් උද්‍යෝගයකින්ද! ඇත්තෙන්ම, යේසුගේ දේවසේවයේ සම්පූර්ණ අරමුණ සිය පියාට කළ ඔහුගේ යාච්ඤාවේ මෙම අවසන් වදන්වලින් විශිෂ්ට ලෙස ප්‍රකාශ කර ඇත: “ඔබ මා කෙරෙහි ඇතුව සිටි ප්‍රේමය ඔවුන් තුළෙහිද මාත් ඔවුන් තුළෙහිද වන පිණිස ඔබගේ නාමය ඔවුන්ට දැන්වීමි, තවත් දන්වන්නෙමි.”—17:20, 26.

³⁴ යේසු තම ගෝලයන්ව ලෝකයේ තබා වෙන් වී යමින් සිටියත්, උපකාරකයෙකු, එනම් “සත්‍යතාවේ [ආත්මය]” නොදී ඔවුන්ගෙන් වෙන් වී යමින් නොසිටියේය. එපමණක්ද නොව, “ආලෝකයේ පුත්‍රයන්” හැටියට ජයගන්නා අන්දම පෙන්වා දෙමින්, ලෝකය සමඟ තිබෙන ඔවුන්ගේ සබඳතාව පිළිබඳව ඔහු ඔවුන්ට කාලෝචිත උපදෙස් දුන්නේය. (14:16, 17; 3:19-21; 12:36) “නුඹලා මාගේ වචනයෙහි පවතිනවා නම්, සැබෑවට නුඹලා මාගේ ගෝලයෝය; නුඹලා සැබෑව දැනගන්නවා ඇත, සැබෑවද නුඹලා නිදහස්කරන්නේය” කියා යේසු පැවසුවේය. ඊට වෙනස්ව, අන්ධකාරයේ පුත්‍රයන්ට ඔහු මෙසේ පැවසුවේය: “නුඹලා නුඹලාගේ පියවූ යක්ෂයාගෙන්ය, නුඹලා නුඹලාගේ පියාගේ තෘෂ්ණාවන් ඉෂ්ටකරන්ට කැමතිය. . . . ඔහු තුළ සැබෑකම නැති හෙයින් ඔහු සැබෑවෙහි [ස්ථිර ලෙස, NW] නොපැවතුණේය.” එසේනම්, හැමවිටම සත්‍යයෙහි ස්ථිරව සිටීමට, ඔව්, “ආත්මයෙන්ද සැබෑකමෙන්ද [පියාට] නමස්කාර” කරමින් “ධෛර්යවත්වෙන්න; මම ලෝකයෙන් ජයගතිමි” යනුවෙන් යේසු පැවසූ වදන්වලින් ශක්තිමත් වීමට අපි අදිටන් කරගනිමු.—8:31, 32, 44; 4:23; 16:33.

³⁵ මේ සියල්ල දේවරාජ්‍යයටද සම්බන්ධය. නඩුව විභාග කරන අවස්ථාවේදී යේසු මෙසේ සාක්ෂි දුන්නේය: “මාගේ රාජ්‍යය මේ ලෝකය සම්බන්ධව නොවේ. මාගේ රාජ්‍යය මේ ලෝකය සම්බන්ධවී නම්, යුදෙව්වරුන්ට මා භාරදෙනු නොලබන පිණිස මාගේ සේවකයන් සටන්කරනවා ඇත. නුමුත් දැන් මාගේ රාජ්‍යය මෙලොවින් නොවේ.” අනතුරුව පිලාත්ගේ ප්‍රශ්නයට උත්තර දෙමින් ඔහු මෙසේ පැවසුවේය: “මම රජෙක්යයි නුඹ කියනවා හරිය. ඒ පිණිස මම ඉපද සිටිමි, මා ලෝකයට ඇවිත් සිටින්නේ සත්‍යයට සාක්ෂිදෙන පිණිසය. සත්‍යයෙන්වූ සියල්ලෝ මාගේ හඬ අසති.” (18:36, 37) සවන් දී, රජු සමඟ එක්සත්ව “[දෙවිගේ] රාජ්‍යයට ඇතුල්වෙන්ට” ‘අලුතින් ඉපදීම ලබන’ අය ඇත්තෙන්ම සන්තෝෂවත්හුය. එඬේර රජුගේ හඬට සවන් දී ජීවනය අත් කරගන්නාවූ “වෙනත් බැටළුවෝ” සන්තෝෂවත්හුය. මෙය ලියනු ලැබුවේ ‘යේසු දෙවිගේ පුත්‍රයා වූ ක්‍රිස්තුස් බව ඔබ විශ්වාස කරන පිණිසත්, විශ්වාස කොට ඔහුගේ නාමයෙන් ජීවනය ලබන පිණිසත්’ නිසා, යොහන්ගේ සුවිශේෂයේ මෙම සැපයුම සඳහා කෘතඥපූර්වක වීමට ඇත්තෙන්ම හේතු තිබේ.—3:3, 5; 10:16; 20:31.

[පාදසටහන්වල]