7. සිංහාසනයේ ඉඳගෙන සිටින තැනැත්තාගෙන් ලියවිල්ල භාරගැනීමට යේසුස් සුදුසු වෙන්නේ මොන හේතු නිසාද?

⁷ පව් රහිත පරිපූර්ණ කෙනෙක් ලෙස ඉතා දරුණු පරීක්ෂා මැද යෙහෝවා දෙවිට ඉතා විශ්වාසවන්තව සේවය කළ එකම තැනැත්තා යේසුස්. සාතන් එල්ල කළ චෝදනාවලට සම්පූර්ණ උත්තරයක් දුන්නෙත් ඔහුයි. (හිතෝපදේශ 27:11) තම ජීවිතය පූජා කරන්න කලින් රාත්‍රියේ “මම ලෝකයෙන් ජයගත්තෙමි” කියා ඔහු පැවසුවේ ඒ නිසයි. (යොහන් 16:33) යේසුස්ව නැවත නැඟිටුවා, “ස්වර්ගයෙහිද පොළොවෙහිද සියලු බලය” ඔහුට දෙන්න යෙහෝවා දෙවිට හොඳ පදනමක් තිබෙනවා. මේ අනුව දෙවිගේ සියලු සේවකයන් අතරින් අකුළන ලියවිල්ල ලබාගෙන එය දිගහැර එහි අතිවැදගත් පණිවුඩය දැනුම් දීමට සුදුසු එකම තැනැත්තා යේසුස් මිස වෙන කිසිවෙක් නෙවෙයි.—මතෙව් 28:18.

11. තේජසට පත් යේසුස්ව “මරනු ලැබුවාක් මෙන් පෙනුණු බැටළු පැටවෙකු” ලෙස දැක්වීම ඔහුට කරන අගෞරවයක් නොවන්නේ මන්ද?

¹¹ තේජසට පත් යේසුස්ව “මරනු ලැබුවාක් මෙන් පෙනුණු බැටළු පැටවෙකු” ලෙස දැක්වීම ඔහුට කරන අගෞරවයක්ද? කොහෙත්ම නැහැ! යේසුස් මරණය දක්වාම විශ්වාසවන්තව සිටීම නිසා සාතන්ට අන්ත පරාජයක් අත් වුණා. ඒ වගේම යෙහෝවා දෙවිට එය මහත් ජයග්‍රහණයක් වුණා. යේසුස්ව මේ ආකාරයට දක්වා තිබෙන්නේ මේ නිසයි. යේසුස් සාතන්ගේ ලෝකය ජයගත් බවත් යෙහෝවා දෙවි සහ යේසුස් මිනිස් වර්ගයා කෙරෙහි ඉතා ගැඹුරු ප්‍රේමයක් පෙන්වා ඇති බවත් එයින් අපට මතක් කර දෙනවා. (යොහන් 3:16; 15:13; කොලොස්සි 2:15ද බලන්න.) මේ අනුව පොරොන්දු වූ වංශයෙන් බිහි වන ප්‍රධාන තැනැත්තා වන යේසුස් අකුළන ලියවිල්ල විවෘත කිරීමට එකම සුදුස්සා බව ඉතා පැහැදිලිව පෙනී යනවා.—උත්පත්ති 3:15.