රෝමය තම ආහාර සපයාගැනීම සඳහාද නැව් කර්මාන්තය මත රඳාසිටියා. මිලියනයක පමණ ජනතාවකගෙන් යුත් රෝමයට විශාල ලෙස ධාන්‍ය අවශ්‍යව තිබුණා; වර්ෂයකට ටොන් 2,50,000ක් හා 4,00,000ක් අතර ප්‍රමාණයක් අවශ්‍ය වුණා. අවශ්‍ය ධාන්‍ය ලැබුණේ කොහෙන්ද? ෆ්ලේවියස් ජොසීෆස්, IIවන හෙරොද් අග්‍රිපා පැවසූ දෙයක් උපුටා දක්වමින්, වර්ෂයකට මාස අටක් පුරා උතුරු අප්‍රිකාව රෝමයට ආහාර සැපයූ බවත්, අනික් මාස හතරේදී නගරයේ පෝෂණය සඳහා ප්‍රමාණවත් ධාන්‍ය ඊජිප්තුවෙන් සැපයූ බවත් පැවසුවා. යාත්‍රා දහස් ගණනක් එම නගරයට ධාන්‍ය සැපයුවා.

මෙලීතයේදී බිඳීගිය, පාවුල් සිටි නැව ගැන පැවසිය හැක්කේ කුමක්ද? එය “ඉතාලියට යන අලෙක්ෂන්ද්‍රියාවේ නැවක්” වූ ධාන්‍ය නැවක් වුණා. (ක්‍රියා 27:6) පෞද්ගලිකව ධාන්‍ය නැව් කාණ්ඩයක අයිතිකරුවන් වූ ග්‍රීක්වරුන්, ෆිනීෂියවරුන් හා සිරියවරුන් ඒවා මෙහෙයවූ අතර ඒවාට අවශ්‍ය දේවල්ද සැපයුවා. කෙසේනමුත්, රජය මගින් නැව් කුලියට ගත්තා. “එම විශාල සේවය සඳහා අවශ්‍ය යන්ත්‍රෝපකරණ, ඒවා ක්‍රියා කරවීමට අවශ්‍ය මිනිස්සු හා උපකරණ වැනි දේ ගැනීමට වඩා, බදු එකතු කළ ක්‍රමයටම, කොන්ත්‍රාත් ක්‍රමයට වැඩ කරවාගැනීම පහසු බව ආණ්ඩුව සොයාගත්තා” යයි ඉතිහාසඥ විලියම් එම්. රම්සේ පවසයි.