11, 12. හෙරොද් ක්‍රිස්තියානීන්ට පීඩා කළේ ඇයි? ඒ සඳහා ඔහු කළේ මොකක්ද?

¹¹ යේසුස් ඉහත සඳහන් දේ පවසන විට පේතෘස්ද එතැන සිටියා. උනන්දුවෙන් යාච්ඤා කිරීම මොන තරම් වැදගත්ද කියා පසුව ඔහුම අද්දැක්කා. (ක්‍රියා 12:1-6 කියවන්න.) යුදෙව්වන්ගේ සිත් දිනාගැනීම සඳහා හෙරොද් ක්‍රිස්තියානීන්ට පීඩා කළ බව ක්‍රියා 12වෙනි පරිච්ඡේදයේ මුල් ඡේදවල සඳහන් වෙනවා. යාකොබ් යේසුස්ගේ නියෝජිතයෙක් බවත් ඔහු යේසුස්ව ඉතා කිට්ටුවෙන් ආශ්‍රය කළ බවත් දැන සිටි හෙරොද් යාකොබ්ව ‘මරා දැමුවා.’ (ක්‍රියා 12:2) සහෝදර සහෝදරියන් යාකොබ්ට බොහෝ සේ ප්‍රේම කළ නිසා ඔහුගේ මරණය ගැන ඔවුන් ගොඩක් දුක් වුණා.

13, 14. (අ) පේතෘස් සිරභාරයේ සිටියදී සභාවේ අය කළේ මොකක්ද? (ආ) ඉන් අපට ඉගෙනගන්න පුළුවන් මොනවාද?

¹³ ‘පේතෘස් සිරභාරයේ සිටියදී සභාව ඔහු වෙනුවෙන් මහත් උනන්දුවෙන් දෙවිට යාච්ඤා කරමින් සිටියා.’ (ක්‍රියා 12:5) යාකොබ්ව ඝාතනය කර තිබූ නිසා ඔවුන් දුක් වුණත් අධෛර්යය වුණේ නැහැ. යාච්ඤා කිරීමෙන් පලක් නැහැ කියා සිතුවෙත් නැහැ. විශ්වාසවන්ත සේවකයන් දෙවිගේ කැමැත්තට එකඟව යාච්ඤා කරන විට දෙවි ඇහුම්කන් දී ඒවාට පිළිතුරු දෙන බව ඔවුන් දැන සිටියා.—හෙබ්‍රෙ. 13:18, 19; යාකො. 5:16.

¹⁴ එම සහෝදර සහෝදරියන් කළ දෙයින් අපට ඉගෙනගන්න පුළුවන් මොනවාද? අප ගැන පමණක් නොව අන් අය ගැනත් යාච්ඤා කිරීම අපට අවදිව සිටීමට උපකාරයක් බව ඉන් ඉගෙනගත හැකියි. (එෆී. 6:18) ප්‍රශ්න ගැටලු මැද සිටින සමහර සහෝදර සහෝදරියන්ව ඔබ දන්නවාද? සමහරවිට ඔවුන් විරුද්ධවාදිකම්වලට මුහුණ දී හෝ ස්වාභාවික විපත්වලට ගොදුරු වී හෝ ඇති. තවත් සමහරුන් ශුභාරංචිය ප්‍රකාශ කිරීම තහනම් කළ රටවල ජීවත් වෙනවා ඇති. එවැනි අය වෙනුවෙන් උනන්දුවෙන් යාච්ඤා කිරීම ඉතා වැදගත්. ඊට අමතරව පවුල් ප්‍රශ්න තිබෙන, අධෛර්යය වී සිටින හෝ අසනීපයෙන් සිටින අය ගැනද ඔබ දන්නවා ඇති. සමහරවිට ඒ ගැන ඔබ හැර වෙන කිසි කෙනෙක් නොදන්නවාද විය හැකියි. යෙහෝවා දෙවි ‘යාච්ඤා අසන තැනැත්තාණන්’ නිසා ඔහුට යාච්ඤා කරන විට එවැනි අයගේ නම් සඳහන් කරමින් යාච්ඤා කිරීම මොන තරම් වැදගත්ද!—ගීතා. 65:2.