මකිදෝනියෙහි ක්‍රිස්තු ධර්මය ව්‍යාප්ත කිරීමට වැදගත් ආකාරයකින් තුඩු දුන් ආධාරකයක් වුණේ, ගල් ඇල්ලූ රෝම මහාමාර්ගයක් වූ වියා එග්නාටියායි. ඒජියන් මුහුදේ උතුරු කෙළවරේ පිහිටි නෙයාපොලිස (දැන් ග්‍රීසියේ, කවාලා) නමැති මුහුදු තොටට ගොඩබැසීමෙන් පසු, එම මිෂනාරිවරුන් පැහැදිලි ලෙස මෙම මහාමාර්ගය දිගේ මකිදෝනිය දිස්ත්‍රික්කයේ ප්‍රධාන නගරය වූ පිලිප්පිය බලා ගමන් කළා. එම මාර්ගය, පාවුල් සහ ඔහුගේ සහයකයන්ගේ ඊළඟ ගමනාන්තයන් වූ අම්පිපොලිස, අපොලෝනිය සහ තෙසලෝනිකය වෙතටත් දිවගියා.—ක්‍රියා 16:11–17:1.

පිලිප්පියේ සිට, පාවුල්ද ඔහුගේ සහයකයන්ද වියා එග්නාටියා දිගේ අම්පිපොලිස සහ අපොලෝනිය හරහා තෙසලෝනිකයට ගමන් කළා; ඒ ගමන මුළුමනින්ම කිලෝමීටර් 120ක් පමණ වුණා. (ක්‍රියා 17:1) අවට සිනගෝගවල යුදෙව්වන් සබත් දවසේදී එක්රැස් වූ නිසා, තෙසලෝනිකයෙහි ශුභාරංචිය දේශනා කිරීමට පාවුල් එයින් ප්‍රයෝජන ගත්තා. මේ හේතුවෙන්, යුදෙව්වන් සමහරදෙනෙක්ද ග්‍රීක්වරුන් මහත් සමූහයක්ද ඇදහිලිවන්තයන් බවට පත් වුණා.—ක්‍රියා 17:2-4.