බයිබල් පොත් අංකය 48—ගලාති
ලේඛකයා: පාවුල්
ලියූ ස්ථානය: කොරින්තිය හෝ සිරියානු අන්තියෝකිය
ලිවීම සම්පූර්ණ කළේ: පො.යු. 50-52 පමණ
පාවුල් විසින් ගලාති 1:2හි අමතන ලද ගලාතියේ පිහිටි සභාවලට, පෙනෙන විදිහට පිසිදියේ අන්තියෝකිය, ඉකෝනිය, ලුස්ත්‍රාව හා දර්බය යන සභා ඇතුළත් වූවා විය හැක. එම ප්‍රදේශ වෙනස් දිස්ත්‍රික්කවල පිහිටියත්, ඒ සියල්ලම රෝමයට අයත් පළාතේ පිහිටා තිබිණ. පාවුල් බාර්ණබස් සමඟ මේ ප්‍රදේශය හරහා කළ පළමු මිෂනාරි ගමන ගැන ක්‍රියා 13 සහ 14 යන පරිච්ඡේදවල පැවසෙයි. එම ගමනේ ප්‍රතිඵලයක් හැටියට ගලාතියේ සභා සංවිධානය කෙරිණ. මෙම සභා සෑදී තිබුණේ, යුදෙව්වන් හා යුදෙව් නොවන්නන්ගෙනි; කෙල්ටිකවරුන් නොහොත් පුරාණ ප්‍රංශ වැසියන් යුදෙව් නොවන්නන්ට අයත් වූ බවට කිසිම සැකයක් නැත. මෙය සිදු වූයේ පො.යු. 46දී පමණ පාවුල් යෙරුසලමට කළ සංචාරයෙන් ටික කලකට පසුවයි.—ක්‍රියා 12:25.
2 පොදු යුගයේ 49වන වසරේදී පාවුල් සීලස් හා එක්ව ගලාතියට අයත් බලප්‍රදේශයේ තම දෙවන මිෂනාරි ගමන ආරම්භ කළේය. එහි ප්‍රතිඵලයක් හැටියට “සභාවෝ ඇදහිල්ලෙහි ස්ථිරව, දවස්පතා ගණනින් වැඩිවූහ.” (ක්‍රියා 16:5; 15:40, 41; 16:1, 2) කෙසේවෙතත්, බොරු ගුරුවරු, එනම් යුදෙව්වාදීහු ඔවුන් පසුපසින්ම ගොස් බලපෑම් ඇති කරන්න තැත් කළහ. චර්මච්ඡේදනය හා මෝසෙස්ගේ ව්‍යවස්ථාව පැවැත්වීම සැබෑ ක්‍රිස්තු ධර්මයේ අත්‍යවශ්‍ය අංග බව විශ්වාස කිරීම සඳහා මොවුන් විසින් ගලාතියේ පිහිටි සභාවල සිටි සමහරුන්ව පොලඹවනු ලැබීය. මේ අතරතුර, පාවුල් මිසිය පසු කරමින් මකිදෝනියට හා ග්‍රීසියට ගමන් කර, අවසානයේදී කොරින්තියට පැමිණ, ඔහු සහෝදරයන් සමඟ එහි මාස 18කට වැඩි කාලයක් ගත කළේය. ඉන්පසු, පො.යු. 52දී, ඔහු එපීසය හරහා ඔහුගේ ප්‍රධාන වාසස්ථානය වූ සිරියානු අන්තියෝකිය බලා පිටත් වූයේය. එම වසරේදීම ඔහු එහි පැමිණියේය.—ක්‍රියා 16:8, 11, 12; 17:15; 18:1, 11, 18-22.
3 පාවුල් ගලාතිවරුන්ට තම ලිපිය ලිව්වේ කොතැනකදීද? එමෙන්ම කවදාද? යුදෙව්වාදීන්ගේ ක්‍රියාකාරකම් ඔහු දැනගත් විගස එය ලියූ බවට කිසිම සැකයක් නැත. මෙය කොරින්තියේ, එපීසයේ හෝ සිරියානු අන්තියෝකියේ සිට ලියනු ලැබුවා විය හැක. කොරින්තියේ සිට ගලාතියට තොරතුරු ළඟාවීමට ප්‍රමාණවත් කාලයක් තිබූ බැවින් බොහෝදුරට ඔහු මෙය ලියන්න ඇත්තේ පො.යු. 50-52 අතර කාල සීමාවේ ඔහු කොරින්තියේ නතර වී සිටි මාස 18ක කාලයේදී විය හැකියි. ඔහු එපීසයේ නතර වූයේ කෙටි කාලයකට බැවින් ලියූ ස්ථානය එය විය නොහැක. කෙසේවෙතත් පසුව ඔහු, පෙනෙන විදිහට පො.යු. 52 ගිම්හානයේදී ඔහුගේ ප්‍රධාන වාසස්ථානය පිහිටා තිබූ සිරියානු අන්තියෝකියේ ‘කාලයක් පසු කළේය.’ එමෙන්ම මෙම නගරය හා කුඩා ආසියාව අතර සන්නිවේදන කටයුතු පහසු වූ නිසා, මේ කාලයේදී යුදෙව්වාදීන් පිළිබඳ වාර්තාව ඔහු ලැබූ බවත්, සිරියානු අන්තියෝකියේ සිට ගලාතිවරුන්ට ලිපිය ලියූ බවත් සිතිය හැක.—ක්‍රියා 18:23.
4 මෙම ලිපිය පාවුල්ව විස්තර කරන්නේ ‘මනුෂ්‍යයන් කෙරෙන්වත් මනුෂ්‍යයා කරණකොටගෙනවත් නොව, යේසුස් ක්‍රිස්තුස් සහ පිය වූ දෙවි කරණකොටගෙන වූ ප්‍රේරිතයෙක්’ ලෙසයි. ප්‍රේරිතයෙකු වශයෙන් ඔහු යෙරුසලමේ සිටි ප්‍රේරිතයන් සමඟ එකඟව කටයුතු කළ බවත් තවත් ප්‍රේරිතයෙකු වන පේතෘස්ව නිවැරදි කිරීමේදී ඔහු තම අධිකාරිය ක්‍රියාත්මක කළ බවත් තහවුරු කරමින් මෙම ලිපිය පාවුල්ගේ ජීවිතය හා ප්‍රේරිතකම පිළිබඳ බොහෝ පැති අනාවරණය කරයි.—ගලා. 1:1, 13-24; 2:1-14.
5 ගලාතිවරුන්ට ලියූ ලිපියේ නිරවද්‍යතාව හා පිළිගත් ග්‍රන්ථ සමූහයට අයත් බව කිනම් සාධක මගින් සනාථ කරනවාද? අයිරීනියස්, ඇලෙක්සැන්ඩ්‍රියාවේ ක්ලෙමන්ට්, ට’ටූලියන් හා ඔරිගන් යන අයගේ ලියවිලිවල එයට නමින්ම යොමු දක්වා තිබේ. එපමණක්ද නොව, එය මතු දැක්වෙන වැදගත් බයිබල් අත්පිටපත් ගණයට ඇතුළත් වෙයි: සයිනඉටික්, ඇලෙක්සැන්ඩ්‍රීන්, වැටිකන් අංක 1209, කෝඩෙක්ස් එෆ්රේමි සිරි රෙස්ක්‍රිප්ටස්, කෝඩෙක්ස් බ’සේ සහ චෙස්ට’ බීටි පැපිරස් අංක 2 (p46). තවදුරටත්, එය සෙසු ග්‍රීක් ශුද්ධ ලියවිලි සමඟ මෙන්ම එය නිතර යොමු දක්වන හෙබ්‍රෙව් ශුද්ධ ලියවිලි සමඟද සම්පූර්ණ එකඟතාවක් දක්වයි.
6 පාවුල් “ගලාතියේ සභාවලට” ලියූ ප්‍රබල මෙන්ම තදබල ලිපිය මගින් (1) තමා සැබෑ ප්‍රේරිතයෙක් බවත් (මෙය, අපකීර්තියට පත් කිරීම සඳහා යුදෙව්වාදීන් විසින් සොයන ලද කරුණකි) (2) නිර්දෝෂ කොට ගණන් ගනු ලබන්නේ ක්‍රිස්තුස් යේසුස් කෙරෙහි ඇදහිල්ල තැබීම කරණකොටගෙන මිස, ව්‍යවස්ථාවේ ක්‍රියා කරණකොටගෙන නොවන බවත් සනාථ කරයි. එමනිසා චර්මච්ඡේදනය ක්‍රිස්තියානීන්ට අනවශ්‍ය දෙයකි. තම ලිපි ලිවීමට ලේකම්වරයෙකු යොදාගැනීම පාවුල්ගේ පුරුද්ද වුවත්, ඔහු ‘ලොකු අකුරුවලින් ඔහුගේම අතින්’ ගලාතිවරුන්ට ලීවේය. (6:11) මෙම පොතේ අඩංගු දෑ පාවුල්ට මෙන්ම ගලාතිවරුන්ටද ඉතාමත් වැදගත් විය. යේසුස් ක්‍රිස්තුස් තුළින් සැබෑ ක්‍රිස්තියානීන් භුක්ති විඳින නිදහස අගය කිරීම ගැන මෙම පොත අවධාරණය කරයි.
ප්‍රයෝජනවත් වීමට හේතු
14 පාවුල් විනාශකාරි පීඩා කරන්නෙකුව සිට ජාතීන් කෙරෙහි විමසිලිමත් ප්‍රේරිතයෙක් බවට පත් වූවා කියා ගලාතිවරුන්ට ලියූ ලිපිය, ඔහු පිළිබඳව හෙළි කරයි. ඔහු නිතරම තම සහෝදරයන්ගේ ශුභසිද්ධිය තකා ඕනෑම දෙයක් කරන්න සූදානමින් සිටියේය. (1:13-16, 23; 5:7-12) තර්කානුකූලව හා ශුද්ධ ලියවිලි ඇසුරෙන් බොරු තර්ක බිඳ හෙළමින් ගැටලු හැසිරවීමට අවේක්ෂකයෙකු වහා කටයුතු කළ යුතු බව පාවුල් ආදර්ශයෙන් පෙන්නුම් කළේය.—1:6-9; 3:1-6.
15 ක්‍රිස්තුස් තුළ තම නිදහස තහවුරු කරගැනීමේදී හා ශුභාරංචිය විකෘති කොට දක්වන්නන්ව හෙළා දැකීමේදී මෙම ලිපිය ගලාතියේ පිහිටි සභාවලට ප්‍රයෝජනවත් විය. යමෙකුව ධර්මිෂ්ඨ ලෙස ප්‍රකාශ කරනු ලබන්නේ ඇදහිල්ල කරණකොටගෙන බවත් යමෙකුට ගැලවීම ලබාගැනීම සඳහා චර්මච්ඡේදනය තවදුරටත් අවශ්‍ය නැති බවත් එය පැහැදිලිව සඳහන් කළේය. (2:16; 3:8; 5:6) එකම සභාවේ සිටින යුදෙව්වන්ව හා අන්‍යජාතීන්ව එකමුතු කිරීම සඳහා එවන් මාංසික බෙදීම් පැත්තකට දැමීම උපකාරවත් විය. “නුඹට මෙන් නුඹේ අසල්වාසියාට ප්‍රේමකරන්න” යන ප්‍රතිපත්තිය තවමත් ක්‍රියාත්මක වන බැවින්, ව්‍යවස්ථාව මගින් ලැබෙන නිදහස මාංසික ආශාවන් ක්‍රියාවට නැංවීම සඳහා පෙලඹවීමක් ඇති කරන දෙයක් නොවීය. අද දින සිටින ක්‍රිස්තියානීන් සඳහා මාර්ගදර්ශකයක් හැටියට එය දිගටම ක්‍රියාත්මක වෙයි.—5:14.
16 හෙබ්‍රෙව් ශුද්ධ ලියවිලි මත පදනම් වූ ප්‍රබල නිදසුන් මගින්, මූලධර්ම පිළිබඳ බොහෝ කරුණු පැහැදිලි කරමින් පාවුල් ලියූ ලිපිය ගලාතිවරුන්ට උපකාරවත් විය. එය, “ඉහළ තිබෙන යෙරුසලම” යෙහෝවාගේ ස්ත්‍රිය ලෙස හඳුන්වා දෙමින් යෙසායා 54:1-6 ඇතුළත් විස්තරය සම්බන්ධයෙන් දේවානුභාවයෙන් දුන් පැහැදිලි කිරීමක් ඉදිරිපත් කළේය. දෙවිගේ පොරොන්දුවේ උරුමක්කරුවන් වන්නේ ක්‍රිස්තුස් කරණකොටගෙන නිදහස ලැබූවන් මිස දිගටම ව්‍යවස්ථාවේ වහලුන් හැටියට සිටින අය නොවන බව පැහැදිලි කරමින් එය හාගර් හා සාරා පිළිබඳ “උපමාව” පැහැදිලි කළේය. (ගලා. 4:21-26; උත්. 16:1-4, 15; 21:1-3, 8-13) ව්‍යවස්ථා ගිවිසුම මගින් ආබ්‍රහම් ආශ්‍රිත ගිවිසුමට යමක් එකතු කළා මිස එය අවලංගු නොකළ බව එය හොඳින් පැහැදිලි කළේය. ගිවිසුම් දෙක පිළියෙළ කරන කාල සීමාව අතර තිබෙන විරාමය අවුරුදු 430ක් බවද එය පෙන්වා දුන්නේය. (ගලා. 3:17, 18, 23, 24) මේ දේවල් ඇතුළත් වාර්තාව සුරක්ෂිත කොට තිබෙන්නේ අද දින සිටින ක්‍රිස්තියානීන්ගේ ඇදහිල්ල ගොඩනැංවීම සඳහාය.
17 වඩාත් වැදගත් දෙය වන්නේ ගලාතිවරුන්ට ලියූ ලිපිය මගින් සියලුම අනාගතවක්තෘවරුන් උනන්දුවෙන් බලා සිටි රාජ්‍ය වංශය නිවැරදිව හඳුනාගැනීමයි. ‘පොරොන්දු දෙන ලද්දේ ආබ්‍රහම්ටත් ඔහුගේ වංශයටත්ය. ඒ වංශය ක්‍රිස්තුස්ය.’ ක්‍රිස්තුස් යේසුස් කෙරෙහි ඇදහිල්ල තැබීම කරණකොටගෙන දෙවිගේ දරුවන් බවට පත් වෙන අයව මේ වංශයට ඇතුළත් කරගනු ලබන බව පෙනෙන්න තිබේ. “නුඹලා [ක්‍රිස්තුස්ගේ] නම්, නුඹලා ආබ්‍රහම්ගේ වංශයද පොරොන්දුව ලෙස උරුමක්කාරයෝද වන්නහුය.” (3:16, 17, 29) මෙම රාජ්‍ය උරුමක්කරුවන් හා ඔවුන් සමඟ එක්ව සේවය කරන්නන් ගලාතිවරුන්ට දෙන ලද මෙම කදිම අවවාදානුශාසනාවලට අවනත විය යුතුය: “ක්‍රිස්තුස් අප මුදවාගත් නිදහස්කමෙහි ස්ථිරව පිහිටා සිටින්න.” ‘අපි වෙහෙසට පත් නොවෙමු නම් නියම කාලයේදී කපාගන්න යන බැවින් යහපත් දෑ කිරීම අත් නොහරිමු.’ “ප්‍රධානකොට ඇදහිල්ලේ පවුලට අයිතිවූවන්ට, යහපත්කම්කරමු.”—5:1, NW; 6:9, NW, 10.
18 මාංසයේ ක්‍රියාවල හවුල් වන අය ‘දෙවිගේ රාජ්‍යයේ උරුමය නොලබන’ බවට ප්‍රබල අනතුරු ඇඟවීමක් අවසානයේදී සපයා තිබේ. එසේනම්, සියලුදෙනාම ලෝකයේ අපවිත්‍රකම්වලින් හා වාද විවාදවලින් සම්පූර්ණයෙන්ම ඈත් වී, “ප්‍රේමය, ප්‍රීතිය, සමාදානය, ඉවසිලිවන්තකම, කරුණාවන්තකම, යහපත්කම, විශ්වාසකම, මෘදුකම, පමණ දැන ක්‍රියාකිරීම” යන ආත්මයේ පල වගා කිරීම කෙරෙහි තමන්ගේ හදවත් මුළුමනින්ම යොමු කරවාගැනීමට ඉඩහරිත්වා!—5:19-23.