බයිබල් පොත් අංකය 41—මාර්ක්

ලේඛකයා: මාර්ක්

ලියූ ස්ථානය: රෝමය

ලිවීම සම්පූර්ණ කළේ: පො.යු. 60 පමණ-65 දක්වා

ආවරණය කළ කාලය: පො.යු. 29-33 දක්වා

ගෙත්සෙමනේදී යේසුව අත්අඩංගුවට ගෙන, ඔහු සමඟ සිටි ප්‍රේරිතයන් පලා ගිය විට, “තමාගේ නග්න ශරීරයෙහි හණ රෙද්දක් පොරවාගත් එක්තරා තරුණයෙක්” ඔහු පසුපස ගියේය. සමූහයා ඔහුවත් අල්ලාගන්න උත්සාහ කළ අවස්ථාවේදී, “ඔහු හණ රෙද්ද අත්හැර, නග්නව පලා ගියේය.” මේ තරුණයා මාර්ක් විය යුතුයයි සාමාන්‍යයෙන් විශ්වාස කෙරේ. “මාර්ක් නම්ලත් යොහන්” යනුවෙන් ඔහුව ක්‍රියා පොතේ විස්තර කර තිබෙන අතර, ඔහුගේ පවුලට ඔවුන්ගේම නිවසක් හා සේවකයන් සිටි නිසා, ඔහු යෙරුසලමේ විසූ ධනවත් පවුලකින් පැවත ආ කෙනෙකු විය හැක. ඔහුගේ මව වන මරියාද ක්‍රිස්තියානි ස්ත්‍රියකව සිටි අතර, මුල් සභාව රැස්වීම් පවත්වන ස්ථානයක් හැටියට ඇගේ නිවස පාවිච්චි කළේය. දේවදූතයා විසින් පේතෘස්ව සිරගෙදරින් මුදවාගත් අවස්ථාවේදී, ඔහු මේ නිවසට ගිය විට, සහෝදරයන් එහි එක්රැස් වී සිටි බව සොයාගත්තේය.—මාර්ක් 14:51, 52; ක්‍රියා 12:12, 13.

² කුප්‍රසයෙන් පැමිණි ලෙවීවරයෙකු මෙන්ම මිෂනාරිවරයෙකු වන බාර්ණබස් මාර්ක්ගේ ඥාති සහෝදරයෙකු විය. (ක්‍රියා 4:36; කොලො. 4:10) සාගත සහනාධාර සම්බන්ධයෙන් කටයුතු කිරීමට බාර්ණබස් පාවුල් සමඟ යෙරුසලමට පැමිණි කාලයේදී, මාර්ක් පාවුල්වද දැන හඳුනා ගත්තේය. සභාව සමඟ හා ජ්වලිත සංචාරක සේවකයන් සමඟ කළ මේ ආශ්‍රයන් හේතුවෙන්, මිෂනාරි සේවයට ඇතුල් වීම සඳහා ආශාව මාර්ක්ගේ සිතට කාවැදුණු බව නොඅනුමානය. එමනිසා පාවුල්ගේ හා බාර්ණබස්ගේ පළමුවන මිෂනාරි ගමනේදී, හවුල් සහයකයෙකු හැටියට ඔහු කටයුතු කළ බව අපට පෙනී යනු ඇත. කෙසේවෙතත්, යම් හේතුවක් නිසා මාර්ක් පම්පිලියේ පර්ගායේදී ඔවුන්ගෙන් වෙන් වී ආපසු යෙරුසලමට පැමිණියේය. (ක්‍රියා 11:29, 30; 12:25; 13:5, 13) මේ හේතුව නිසා, තමන්ගේ දෙවන මිෂනාරි ගමනට මාර්ක්ව කැටුව යෑම පාවුල් ප්‍රතික්ෂේප කළ අතර, එහි ප්‍රතිඵලයක් වශයෙන් පාවුල් බාර්ණබස්ගෙන් වෙන්ව ගියේය. පාවුල් සීලස් කැටුව ගිය අතර, බාර්ණබස් තමාගේ ඥාති සහෝදරයා වන මාර්ක්ව කැඳවාගෙන කුප්‍රසයට නැවෙන් ගියේය.—ක්‍රියා 15:36-41.

³ මිෂනාරි සේවය සඳහා සුදුස්සෙකු හැටියට මාර්ක් සුදුසුකම් අත් කරගත් අතර, ඔහු බාර්ණබස්ට පමණක් නොව, නමුත් පසුව ප්‍රේරිත පේතෘස්ට හා පාවුල්ටද වටිනා උපකාරයක් වූයේය. පාවුල්ව මුලින්ම රෝමයේ සිරගත කළ කාලයේදී (පො.යු. 60-61 පමණ) මාර්ක් ඔහු සමඟ සිටියේය. (පිලෙ. 1, 24) ඉන්පසු පො.යු. 62 සිට 64 දක්වා කාලපරිච්ඡේදය අතරතුර, මාර්ක් පේතෘස් සමඟ බැබිලෝනියේ සිටි බව අපට පෙනී යනවා ඇත. (1 පේතෘ. 5:13) පෙනෙන ප්‍රකාරයට පො.යු. 65දී, පාවුල් නැවත වරක් රෝමයේදී සිරකරුවෙකු වන අතර, “ඔහු මට ප්‍රයෝජනවත්ය” කියා පවසමින්, මාර්ක් සමඟ එන්න කියා ඔහු ලිපියකින් තිමෝතිගෙන් ඉල්ලා සිටියි. (2 තිමෝ. 1:8; 4:11) බයිබල් වාර්තාවේ මාර්ක් ගැන අවසන් වරට කරන සඳහන් කිරීම මෙය වේ.

⁴ සුවිශේෂවලින් කෙටිම එක වන මේ සුවිශේෂය රචනා කිරීමේ ගෞරවය මාර්ක්ට හිමි වේ. ඔහු යේසුගේ ප්‍රේරිතයන්ගේ හවුල් සේවකයෙකු වූ අතර, ශුභාරංචිය උදෙසා තමාගේම ජීවිතය පරදුවට තැබීය. එහෙත් මාර්ක් ප්‍රේරිතවරුන් 12දෙනාගෙන් කෙනෙකු නොවන අතර, ඔහු යේසුගේ කිට්ටුම ආශ්‍රිතයෙක්ද නොවීය. යේසුගේ දේවසේවය පිළිබඳව ඔහුගේ වාර්තාව මුල සිට අග දක්වාම සැබවින්ම සජීවිව තබාගැනීමට සලස්වන සමීප තොරතුරු ඔහු ලබාගත්තේ කොතැනින්ද? පැපියස්, ඔරිගන් සහ ට’ටූලියන් යන අයගේ පැරණිතම සම්ප්‍රදායන්ට අනුව, තොරතුරු මූලාශ්‍රය වූයේ පේතෘස්ය; මාර්ක් ඔහු සමඟ කිට්ටුවෙන් ඇසුරු කළේය.a පේතෘස් ඔහුව “මාගේ පුත්‍ර[යා]” කියා හැඳින්වූවා නොවේද? (1 පේතෘ. 5:13) පේතෘස්, මාර්ක් වාර්තා කළ සෑම සිදුවීමක්ම පාහේ ඇසින් දුටු සාක්ෂිකරුවෙකු විය; එමනිසා සෙසු සුවිශේෂවල දක්නට නොලැබෙන විස්තරාත්මක කරුණු ඔහු පේතෘස්ගෙන් දැනගත්තා විය හැක. උදාහරණයක් හැටියට, සෙබදීගේ “වැඩකාරයන්,” “දණින් හිඳ” යේසුට කන්නලව් කරන ලාදුරු රෝගියා, “ගල්වලින් [තමාවම] කපාගනිමින්” සිටි යක්ෂාවේශ වූ මිනිසා සහ යේසු “දේවමාළිගාව ඉදිරියෙහි” ඔලීව කන්දේ වාඩි වී සිටි අවස්ථාවේදී, ‘මනුෂ්‍ය පුත්‍රයා මහත් බලයෙන්ද තේජසින්ද යුක්තව පැමිණීම’ හා සම්බන්ධ අනාවැකිය ඉදිරිපත් කිරීම යනාදිය ගැන මාර්ක් කතා කරයි.—මාර්ක් 1:20, 40; 5:5; 13:3, 26.

⁵ පේතෘස් ගැඹුරු චිත්තවේගයන් ඇති පුද්ගලයෙකු වූ බැවින් මාර්ක්ට යේසුගේ හැඟීම් හා චිත්තවේගයන් තේරුම් කර දෙමින් විස්තර කරන්න ඔහුට හැකි විය. යේසුට හැඟුණු ආකාරය හා ඔහු ප්‍රතික්‍රියා කළ ආකාරය ගැන මාර්ක් බොහෝ අවස්ථාවලදී වාර්තා කරන්නේ ඒ හේතුව නිසාය. උදාහරණයක් හැටියට, යේසු “දුක්වී, උදහසින් ඔවුන් වටකර” බැලුවේය; ඔහු ‘සුසුම් ලෑවේය’; ඔහු “ආත්මයෙන් බලවත්ලෙස සුසුම්[ලෑවේය].” (3:5; 7:34; 8:12) “ඔහුට ප්‍රේමකොට” කියා පවසමින්, පොහොසත් තරුණ පාලකයෙකු කෙරෙහි වූ යේසුගේ හැඟීම් ගැන අපට පවසන්නේ මාර්ක්ය. (10:21) යේසු තමාගේ ගෝලයන් මැද කුඩා දරුවෙකු සිටුවා තැබුවා පමණක් නොව, නමුත් “ඔහු[ව] වඩා [ගත්]” බවත්, තවත් අවස්ථාවකදී “[ඔහු] ඔවුන් වඩාගෙන, ඔවුන් පිට අත් [තැබූ]” බවත් පවසන වාර්තාව මොන තරම් උණුසුම් එකක්ද!—9:36; 10:13-16.

⁶ පේතෘස්ගේ සමහර ගතිලක්ෂණ මාර්ක්ගේ ලේඛන ශෛලියෙන් දැකගත හැක; ඒ ශෛලිය ආවේගාත්මකයි, සජීවියි, ප්‍රබලයි, ප්‍රාණවත්, එමෙන්ම විස්තරාත්මකයි. ඔහු සිද්ධීන් විස්තර කරන්නේ අධිවේගයකින් මෙන් පෙනෙයි. උදාහරණයක් හැටියට, ඔහුගේ කතා වස්තුව චමත්කාරජනක ශෛලියකින් ඉදිරිපත් කරමින්, නැවත නැවත “එකෙණෙහිම” යන වචනය සඳහන් කර ඇත.

⁷ මතෙව්ගේ සුවිශේෂ පරීක්ෂා කර බැලීමට මාර්ක්ට හැකියාවක් තිබුණත්, ඔහුගේ වාර්තාවේ ඇතුළත් වන්නේ සෙසු සුවිශේෂවල සඳහන් වී නොමැති තොරතුරුවලින් සියයට හතක් පමණක් වුවත්, මාර්ක් හුදෙක් මතෙව්ගේ සුවිශේෂය සංක්ෂිප්ත කර දක්වා විශේෂ කරුණු කිහිපයක් එකතු කළා කියා විශ්වාස කිරීම, වැරදි වැටහීමක් වනු ඇත. මතෙව් යේසුව විස්තර කර තිබුණේ, පොරොන්දු වූ මෙසියස් හා රජ හැටියට වුවත්, දැන් මාර්ක් යේසුගේ ජීවිතය හා ඔහු කළ දේවල් වෙනත් කෝණයකින් සැලකිල්ලට භාජන කරයි. ප්‍රාතිහාර්යයන් කරන දෙවිගේ පුත්‍රයා හා ජයග්‍රාහී ගැළවුම්කරුවා ලෙස ඔහු යේසුව විස්තර කොට දක්වයි. මාර්ක් ක්‍රිස්තුස්ගේ දේශනයන් හා ඉගැන්වීම්වලට අවධානය යොමු කරනවාට වඩා, ඔහුගේ ක්‍රියාකාරකම් අවධාරණය කරයි. උපමාවලින් සුළු ප්‍රමාණයක් හා යේසුගේ දීර්ඝ අනුශාසනාවන්ගෙන් එකක් පමණක් වාර්තා කර තිබෙන අතර, කන්ද උඩ දේශනාව අත්හැර ඇත. මාර්ක්ගේ සුවිශේෂය කෙටි වන්නේ මේ හේතුව නිසාය. කෙසේවෙතත්, සෙසු සුවිශේෂවල තරමටම මෙම සුවිශේෂයෙත් ක්‍රියාකාරකම් බහුලව අඩංගු වේ. අඩුම තරමින් ප්‍රාතිහාර්යයන් 19කටවත් විශේෂ යොමු දැක්වීම් කර තිබේ.

⁸ මතෙව් තමාගේ සුවිශේෂය යුදෙව්වන් සඳහා ලියා තිබුණත්, සාක්ෂිවලින් දක්වන පරිදි මාර්ක් තමාගේ සුවිශේෂය මූලිකව රෝමවරුන් සඳහා ලීවේය. අප මෙය දන්නේ කෙසේද? මෝසෙස්ගේ ව්‍යවස්ථාව ගැන සඳහන් කර ඇත්තේ, එයට යොමු දක්වන සංවාදයන් වාර්තා කළ අවස්ථාවලදී පමණි; එමෙන්ම යේසුගේ පරම්පරාව ගැන සඳහන් කර නැත. ක්‍රිස්තුස්ගේ සුවිශේෂය සර්වලෝක වැදගත්කමකින් යුත් එකක් සේ ඉදිරිපත් කර ඇත. ඔහු යුදෙව් නොවන පාඨකයන් නොදැන සිටියා විය හැකි යුදෙව් සිරිත් විරිත් සහ ඉගැන්වීම් පැහැදිලි කරමින් අදහස් දක්වයි. (2:18; 7:3, 4; 14:12; 15:42) ඇරමයික භාෂාවෙන් කළ ප්‍රකාශයන් පරිවර්තනය කර ඇත. (3:17; 5:41; 7:11, 34; 14:36; 15:22, 34) ඔහු පලස්තීනයේ භූවිද්‍යාත්මක නම් හා වෘක්ෂලතාදියට අමතර පැහැදිලි කිරීම් මුසු කරයි. (1:5, 13; 11:13; 13:3) යුදෙව් කාසිවල වටිනාකම රෝම මුදල්වලින් දක්වා ඇත. (12:42, පාදසටහන) ඔහු සෙසු සුවිශේෂ ලේඛකයන්ට වඩා වැඩියෙන් ලතින් වචන භාවිත කරයි; ස්පෙක්‍යූලාටො (පෞද්ගලික ආරක්ෂක භටයා), ප්‍රේතෝරියම් (ආණ්ඩුකාරයාගේ මාලිගාව) සහ සෙන්චූරියෝ (හමුදා නිලධාරියා) යන වචන ඊට උදාහරණ වේ.—6:27; 15:16, 39.

⁹ පෙනෙන විදිහට මාර්ක් තම සුවිශේෂය මූලිකවම රෝමවරුන් සඳහා ලියූ නිසා, බොහෝදුරට ඔහු මෙය රෝමයේ සිට ලියූ බව පෙනෙයි. ප්‍රේරිත පාවුල්ගේ පළමුවන හා දෙවන සිරගත වීම සිදු වූ කාලයේදී, එනම් පො.යු. 60-65 දක්වා කාලපරිච්ඡේදයේදී, මෙම පොත රෝමයේ සිට රචනා කළා යන නිගමනයට එළඹීමට, පැරණිතම සම්ප්‍රදායන් මෙන්ම එහි අඩංගු වන දෑ යන කරුණු දෙක මඟ පාදයි. එම වර්ෂවලදී, මාර්ක් අඩුම තරමින් එක්වතාවක් හෝ ඇතැම්විට දෙවතාවක් රෝමයේ සිටියා විය හැක. මාර්ක් මෙම සුවිශේෂයේ ලේඛකයා වූ බව දෙවන හා තෙවන සියවස්වල විසූ ප්‍රධාන වියතුන් තහවුරු කරයි. දෙවන සියවසේ මැද භාගය වන විට, මේ සුවිශේෂයේ පිටපත් ක්‍රිස්තියානීන් අතර බෙදාහරිමින් තිබිණ. ක්‍රිස්තියානි ග්‍රීක් ශුද්ධ ලියවිලිවලින් සමන්විත සෑම මුල් නාමාවලියකම මෙය දක්නට තිබීමෙන්, මාර්ක්ගේ සුවිශේෂයේ නිවැරදිභාවය තහවුරු වේ.

¹⁰ කෙසේවෙතත්, ඇතැම්විට 16වන පරිච්ඡේදයේ 8වන පදයෙන් පසු එක් කර තිබෙන දිගු මෙන්ම කෙටි සමාප්තීන් නිවැරදි ඒවා බව නොසැලකිය යුතුය. සයිනිඉටික් සහ වැටිකන් අංක 1209 වැනි පැරණි අත්පිටපත් බොහොමයක එම සමාප්තීන් දක්නට නැත. “ඔව්හු භයව සිටි[යහ]” යන වදන් සමඟින් නිවැරදි වාර්තාව අවසන් වන බවට සිව්වන සියවසේ විසූ යූසීබියස් සහ ජෙරොමි යන විශාරදයන් එකඟ වේ. ඇතැම්විට අනික් සමාප්තීන් එක් කරනු ලැබුවේ, සුවිශේෂය අවසන් වන හදිසි ආකාරය මකාදැමීමේ අරමුණ ඇතුව විය හැක.

¹¹ මාර්ක්ගේ වාර්තාවේ නිවැරදිබව දැකගත හැක්කේ, සෙසු සුවිශේෂ සමඟ ඔහුගේ සුවිශේෂයේ තිබෙන පූර්ණ එකඟතාවෙන් පමණක් නොව, නමුත් උත්පත්ති සිට එළිදරව් දක්වා මුළු ශුද්ධ ලියවිලි සමඟ තිබෙන එකඟතාවෙන්ද එය දැකගත හැක. එපමණක්ද නොව, යේසු ගැන නැවත නැවත පැහැදිලි කර ඇත්තේ, තමාගේ වචනවලදී පමණක් නොව, නමුත් ස්වාභාවික බලයන්, සාතන් හා භූතයන්, අසනීප සහ ලෙඩ රෝග මෙන්ම මරණය කෙරෙහි පවා බලය තිබූ තැනැත්තෙකු ලෙසටය. එමනිසා මාර්ක් මෙම කාවදිනසුලු හැඳින්වීමෙන් තමාගේ කතා වස්තුව ආරම්භ කරයි: “යේසුස් [ක්‍රිස්තුස්ගේ] ශුභාරංචියේ පටන්ගැන්මය.” ඔහුගේ පැමිණීමෙන් හා දේවසේවයෙන් අදහස් වූයේ “ශුභාරංචි[යයි];” එබැවින් මාර්ක්ගේ සුවිශේෂය අධ්‍යයනය කිරීම, පාඨකයන් සියලුදෙනාටම ප්‍රයෝජනවත් විය යුතුය. මාර්ක් විසින් විස්තර කර තිබෙන සිද්ධීන් මගින්, පො.යු. 29 වසන්ත සමයේ සිට පො.යු. 33 වසන්ත සමය දක්වා කාලපරිච්ඡේදය ආවරණය කෙරේ.

ප්‍රයෝජනවත් වීමට හේතුව

³¹ මුල් ක්‍රිස්තියානි කාලයේ සිට මේ දක්වා සිටින මාර්ක් සුවිශේෂයේ පාඨකයන් සියලුදෙනාටම, යේසුස් ක්‍රිස්තුස්ගේ මේ විචිත්‍රවත් කතාව මගින්, මෙසියස් සම්බන්ධයෙන් හෙබ්‍රෙව් ලියවිලිවල සඳහන් අනාවැකි බොහොමයක ඉටුවීම හඳුනාගැනීමට හැකි වී තිබේ. “බලව, මම මාගේ දූතයා නුඹට පෙරටුව යවමි” යන ආරම්භක උපුටා දැක්වීමේ සිට “මාගේ දෙවියනි, මාගේ දෙවියනි, ඔබ මා අත්හැරියේ මක්නිසාද” යනුවෙන් වධකණුවේදී යේසු වේදනාවෙන් පැවසූ වදන් දක්වා මාර්ක් විසින් වාර්තා කර තිබෙන යේසුගේ ජ්වලිත දේවසේවය පිළිබඳ මුළු වාර්තාවම, හෙබ්‍රෙව් ශුද්ධ ලියවිලිවල පුරෝකථනය කර තිබූ දෑ සමඟ එකඟ වේ. (මාර්ක් 1:2; 15:34; මලා. 3:1; ගීතා. 22:1) එපමණක්ද නොව, ඔහු කළ ප්‍රාතිහාර්යයන් මෙන්ම විස්මය දනවන ක්‍රියා, යහපත් ඉගැන්වීම්, ඔහුගේ නිකැළැල් කීර්තිය, යෙහෝවාගේ වචනය හා ආත්මය මත ඔහු සම්පූර්ණයෙන්ම රඳා සිටීම හා බැටළුවන් කෙරෙහි දක්වන මෘදු මොළොක් සැලකිල්ල යන මේ සියල්ලම, ඔහු දෙවිගේ පුත්‍රයා වශයෙන් බලතල ඇතුව පැමිණි තැනැත්තා බව අඟවයි. ඔහු “බලය ඇති කෙනෙකු මෙන්,” එනම් යෙහෝවාගෙන් ලැබුණු බලතල ආශ්‍රයෙන් ඉගැන්වූ අතර, ඔහු මේ පොළොව මත තමාගේ ප්‍රධාන වැඩය හැටියට “[දෙවිගේ] ශුභාරංචිය දේශනා කරමින්,” “[දෙවිගේ] රාජ්‍යය සමීපය” යන පණිවිඩය අවධාරණය කළේය. ඔහුගේ ඉගැන්වීම්වලට අවනත වන සියලුදෙනාටම, එමගින් කියා නිම කළ නොහැකි ප්‍රයෝජන ලැබෙන බව ඔප්පු වී තිබේ.—මාර්ක් 1:22, 14, 15.

³² යේසු තම ගෝලයන්ට මෙසේ පවසයි: “[දෙවිගේ] රාජ්‍යයේ රහස නුඹලාට දී තිබේ.” ‘දෙවිගේ රාජ්‍යය’ යන යෙදුම 14වතාවක් මාර්ක් භාවිත කරන අතර, රාජ්‍යය කරණකොටගෙන ජීවනය ලබන්නාවූ අයට මඟ පෙන්වන ප්‍රතිපත්ති බොහොමයක් සඳහන් කරයි. යේසු මෙසේ ප්‍රකාශ කළේය: “මා නිසා . . . තමාගේ ජීවිතය නැතිකරගන්න කවරෙක් නුමුත් ඒක ගළවාගන්නේය.” ජීවනය ලබාගැනීමේදී, ඊට බාධා වන සෑම දෙයක්ම ඉවත් කර දැමිය යුතුයි: “ඇස් දෙක ඇතුව නිරයේ [ගෙහෙන්නාවේ, NW] හෙළනු ලැබීමට වඩා එක ඇසක් ඇතුව [දෙවිගේ] රාජ්‍යයට ඇතුල්වීම නුඹට හොඳය.” යේසු තවදුරටත් මෙසේද ප්‍රකාශ කළේය: “යමෙක් [දෙවිගේ] රාජ්‍යය ළදරුවෙකු මෙන් පිළි නොගත්තොත් ඔහු කිසිසේත් එහි ඇතුල් නොවන්නේය;” එමෙන්ම, ‘ධනවතුන්ට දෙවිගේ රාජ්‍යයට ඇතුල් වීම කොපමණ අමාරුද!’ දවන පූජා හා යාගවලට වඩා වටින්නේ, උතුම් ආඥා දෙක පැවැත්වීම බව තේරුම්ගන්නාවූ තැනැත්තා, “[දෙවිගේ] රාජ්‍යයට නුදුරුව සිටි[නවා]” කියා ඔහු පැවසුවේය. මේවා මෙන්ම මාර්ක්ගේ සුවිශේෂයේ අඩංගු වන රාජ්‍යය පිළිබඳ වෙනත් ඉගැන්වීම්වල, අපට එදිනෙදා ජීවිතයේදී අදාළ කරගත හැකි යහපත් උපදේශයන් බොහොමයක් සඳහන් වේ.—4:11; 8:35; 9:43-48; 10:13-15, 23-25; 12:28-34.

³³ “මාර්ක් විසින් ලියන ලද ශුභාරංචිය,” එහි පාඨකයාට යේසුගේ දේවසේවය පිළිබඳව හැඟීම් දනවන, වේගවත් මෙන්ම ක්‍රියාශීලී සමාලෝචනයක් කරමින්, ඇතැම්විට පැයකින් හෝ දෙකකින් එය සම්පූර්ණයෙන්ම කියවිය හැක. දේවානුභාවය ලත් මේ වාර්තාව එසේ එක දිගට කියවීම හා එය සමීපව අධ්‍යයනය කිරීම හා මෙනෙහි කිරීම, සැමවිටම ප්‍රයෝජනවත් බව සනාථ වනු ඇත. මාර්ක්ගේ ශුභාරංචිය පළමුවන සියවසේදී ප්‍රයෝජනවත් වූ ආකාරයටම, අද දින සිටින පීඩාවන්ට මුහුණ දෙන ක්‍රිස්තියානීන්ටද ප්‍රයෝජනවත් වේ; මන්දයත්, දැන් සැබෑ ක්‍රිස්තියානීන් ‘කටයුතු කිරීමට අසීරු අර්බුදකාරි කාලවලට’ මුහුණ දෙන බැවිනුත්, අපේ ආදර්ශකයා වන යේසුස් ක්‍රිස්තුස් සම්බන්ධයෙන් ලියවී තිබෙන මේ වාර්තාවෙන් සොයාගත හැකි දේවානුභාවය ලත් මඟ පෙන්වීම්වල අවශ්‍යතාව තිබෙන බැවිනුත්ය. එය කියවන්න; එහි චමත්කාරජනක ක්‍රියාකාරකම් මගින් ආස්වාදයක් ලබන්න; අපේ ඇදහිල්ලේ ප්‍රධාන කර්තෘද පරිපූරකයාද වන යේසු පෙන්වූ කිසිම දෙයකට අහිමි කළ නොහැකි ප්‍රීතිය භුක්ති විඳිමින්, ඔහුගේ අඩි පාරේ ගමන් කිරීමට දිරිය ලබාගන්න. (2 තිමෝ. 3:1; හෙබ්‍රෙ. 12:2) ඔව්, ක්‍රියාශීලී පුද්ගලයෙකු සේ ඔහුව දකින්න; ඔහුගේ ජ්වලිතය හදවතෙහි ගැඹුරින් බලපැවැත්වීමට ඉඩහරින්න; ඔහුගේ බිඳහෙළිය නොහැකි අඛණ්ඩතාව මෙන්ම පරීක්ෂා හා පීඩා මැද විදහාපෙන්වූ ධෛර්යය අනුකරණය කරන්න. දේවානුභාවය ලත් ශුද්ධ ලියවිලිවල අන්තර්ගත වන මේ මාහැඟි ප්‍රයෝජන ගෙන දෙන කොටසින් සැනසිල්ල ලබාගන්න. සදාකාල ජීවනය පසුපස හඹා යෑමේදී, මෙමගින් ඔබට ප්‍රයෝජන අත් වේවා!

[පාදසටහන]