“දෙවිට ළං වෙන්න”

“දෙවිට ළං වෙන්න, එවිට ඔහු ඔබට ළං වන්නේය.”—යාකොබ් 4:8, NW.

1, 2. (අ) මිනිසුන් බොහෝවිට කියා සිටින දෙය කුමක්ද? (ආ) යාකොබ් දුන්නේ කිනම් අවවාදයද? තවද එය දීම අවශ්‍ය වුණේ ඇයි?

“දෙවියන් අප සමඟයි.” මේ වචන ජාතික ලාංඡනවලද, එමෙන්ම සොල්දාදුවන්ගේ නිල ඇඳුම්වලද දක්නට තිබෙනවා. “දෙවියන් කෙරෙහි විශ්වාස කරමු” යන කියමන අද දින භාවිත වන අසංඛ්‍යාත කාසි සහ මුදල් නෝට්ටුවලත් සඳහන් වෙනවා. මේ නිසා තමන්ට දෙවියන් සමඟ කිට්ටු සම්බන්ධයක් තිබෙන බව මිනිසුන් පොදුවේ කියා සිටින දෙයක්. ඒ වුණත්, මේ වගේ සම්බන්ධතාවක් ඇත්තටම තබාගන්නට නම්, ඒ ගැන කතා කිරීම හෝ යම් උද්ධෘත පාඨ ප්‍රදර්ශනය කිරීමට වඩා වැඩි යමක් අවශ්‍ය වන බවට ඔබ එකඟ වෙන්නේ නැද්ද?

² දෙවි සමඟ සම්බන්ධතාවක් තබාගන්නට පුළුවන් කියලායි බයිබලය පෙන්වන්නේ. ඒ වුණත් අපිත් ඒ සඳහා උත්සාහයක් දරන්න ඕනේ. මුල් සියවසේ හිටපු ආලේප ලත් ක්‍රිස්තියානීන්ටත් යෙහෝවා දෙවි සමඟ තිබූ ඔවුන්ගේ සම්බන්ධතාව ශක්තිමත් කරගැනීමට අවශ්‍ය වෙලා තිබුණා. ඉතිං සමහරක් අයට ඔවුන් තුළ තිබූ මාංසික නැඹුරුවාවන් ගැනත් ආත්මික පිරිසිදුකම නැති කරගැනීම ගැනත් උපදෙස් දෙන්න ක්‍රිස්තියානි අවේක්ෂකයෙකු වූ යාකොබ්හට සිදු වුණා. ඒත් සමඟම මෙන්න මේ ප්‍රබල අවවාදයත් ඔවුන්ට දෙන්නට ඔහු අමතක කළේ නැහැ. “දෙවිට ළං වෙන්න, එවිට ඔහු ඔබට ළං වන්නේය.”[NW] (යාකොබ් 4:1-12) “ළං වෙන්න” කියා කීමෙන් යාකොබ් අදහස් කරපු දේ මොකක්ද?

3, 4. (අ) “දෙවිට ළං වෙන්න” යන කියමනෙන් පළමු සියවසේ විසූ යාකොබ්ගේ සමහරක් පාඨකයන්ට මොන වගේ දෙයක් මතක් වුණා වෙන්න පුළුවන්ද? (ආ) දෙවි වෙතට ළඟා වෙනවා කියන කාරණය ගැන අපිට හරියටම ස්ථිර වෙන්න පුළුවන් ඇයි?

³ තම පාඨකයන්ගෙන් හුඟාක්දෙනෙකුට හුරු පුරුදුව තිබූ ප්‍රකාශයකුයි යාකොබ් මෙහිදී යොදාගත්තේ. සෙනඟ වෙනුවෙන් පූජකයන් තමන් ‘ළඟට ආ යුතු’ ආකාරය සම්බන්ධයෙන් යෙහෝවා මෝසෙස්ගේ නීතිය තුළ විශේෂ උපදෙස් දී තිබුණා. (නික්මයාම 19:22) මේ ආකාරයෙන්, යෙහෝවා වෙතට ළං වෙනවා කියන එක සැහැල්ලුවට නොගත යුතු දෙයක්ය යන කාරණය යාකොබ් තමන්ගේ පාඨකයන්හට සිහිගැන්වූවා විය හැකියි. ඒකට හේතුව යෙහෝවා විශ්වයේ උත්තරීතරම තනතුර හොබවන නිසායි.

⁴ අනෙක් අතට ගත්තහම, එක්තරා බයිබල් විශාරදයෙක් අදහස් දැක්වූවාක් මෙන්, “[යාකොබ් 4:8හි සඳහන] මෙම අවවාදය ප්‍රබල බලාපොරොත්තුක් ජනිත කරවයි.” යෙහෝවා තමාට ළං වෙන්න කියා සෑමවිටම ප්‍රේමණීය ලෙස අසම්පූර්ණ මිනිසුන්ට ආරාධනා කර තිබූ බව යාකොබ් දැන සිටියා. (2 ලේකම් 15:2) යෙහෝවා වෙතට වඩාත් පූර්ණ අර්ථයකින් ළඟා වෙන්න මාර්ගය විවෘත කර දුන්නේ යේසුස්ගේ මිදීමේ මිල පූජාවයි. (එපීස 3:10, 12) ඔන්න දැන් දෙවි වෙතට ළඟා වෙන මාර්ගය මිලියන ගණනකට විවෘත වෙලා. එහෙමනම්, අපට මෙම මවිතාකාර ප්‍රස්තාවෙන් ප්‍රයෝජන ගන්න පුළුවන් කොහොමද? හොඳයි, එහෙමනම් යෙහෝවා දෙවි වෙතට අපිට ළඟා වෙන්න පුළුවන් මාර්ග තුනක් ගැන දැන් අපි කෙටියෙන් සලකා බලමු.

දෙවි පිළිබඳ ‘දැනුම ලබාගනිමින්’ සිටින්න

5, 6. දෙවි ගැන ‘දැනුම ලබාගැනීමට’ ඇතුළත් වන දේ ගැන කුඩා සාමුවෙල්ගේ ආදර්ශය තුළින් පෙන්වා දී ඇත්තේ කොහොමද?

⁵ යොහන් 17:3ට [NW] අනුව, යේසුස් මෙසේ පැවසුවා. “සදාකාල ජීවනය නම් මේය. එකම සැබෑ දෙවි වන ඔබ ගැනත් ඔබ එවූ තැනැත්තා වන යේසුස් ක්‍රිස්තුස් ගැනත් ඔවුන් දැනුම ලබාගැනීමය.” බොහෝ පරිවර්තනවල නම් මෙම පදය නව ලෝක පරිවර්තනයට වඩා ටිකක් වෙනස් විදිහටයි පරිවර්තනය කර තියෙන්නේ. දෙවි පිළිබඳ “දැනුම ලබාගැනීම” කියා කියනවා වෙනුවට, එම පරිවර්තනවල නිකම් සරලව කියන්නේ දෙවිව “හැඳිනගැනීම,” නැත්නම් දෙවිව “දැනගැනීම” කියලායි. කොහොමවුණත්, විශාරදයන් බොහෝදෙනෙක් මෙහිදී දකින දෙයක් තමයි, මෙහි යොදා ඇති මුල් ග්‍රීක් වචනයේ අරුතට මීට වඩා වැඩි යමක් ඇතුළත්ය කියන එක. ඒ කියන්නේ, දිගටම සිදු වෙන ක්‍රියාවලියක්, එනම් තවත් කෙනෙකු සමඟ ඉතා සමීප සම්බන්ධතාවකට තුඩු දෙන ක්‍රියාවලියක් මීට ඇතුළත් වන බවයි.

⁶ දෙවිව ඉතා සමීප ලෙස දැනගැනීමට හැකිවීම යන අදහස යේසුස් විසූ කාලයේ සිටි අයට අලුත් අදහසක් වුණේ නම් නැහැ. අපි උදාහරණයක් ගනිමු. හෙබ්‍රෙව් ශුද්ධ ලියවිල්ලේ අපට කියවීමට තිබෙනවා, සාමුවෙල් ළමයෙකුව සිටින විට, ඔහු “ඒ වන විටත් යෙහෝවාව දැනගැනීමට පැමිණ නොසිටි” බව. (1 සාමුවෙල් 3:7, NW) මේකෙන් අදහස් කරනවාද සාමුවෙල් තම දෙවි ගැන දැන සිටියේ බොහොම ටිකයි කියලා? නැහැ. ඔහුගේ දෙමාපියන් සහ පූජකයන් ඔහුට බොහෝ දේවල් උගන්වා තිබූ බවට කිසිම සැකයක් නැහැ. කොහොමවුණත්, එක්තරා විශාරදයෙක් කියන විදිහට, මෙම පදයේ භාවිත කර ඇති හෙබ්‍රෙව් වචනය “වඩාත් සමීපතම මිත්‍රයෙකුට භාවිත කරන්න පුළුවන්.” සාමුවෙල් පසුව යෙහෝවා වෙනුවෙන් කතා කරන්නෙකු වශයෙන් සේවය කරද්දී දැන සිටි තරම් කිට්ටුවෙන් යෙහෝවාව ඒ වන විට දැනගෙන තිබුණේ නැහැ. සාමුවෙල් ලොකු මහත් වෙලා මේරූ කෙනෙක් වෙද්දී, ඔහු යෙහෝවාව දැනහඳුනා ගෙන ඔහු සමඟ සමීපතම සම්බන්ධතාවක් අත් කරගත් බවට කිසිම සැකයක් නැහැ.—1 සාමුවෙල් 3:19, 20.

7, 8. (අ) බයිබලයේ වඩාත් ගැඹුරු ඉගැන්වීම් තේරුම්ගන්න අමාරුයි කියා අපි නොසිතිය යුත්තේ ඇයි? (ආ) අප අධ්‍යයනය කළ යුතු දේවවචනයේ අඩංගු ගැඹුරු සත්‍යතාවන් සමහරක් මොනවාද?

⁷ ඔබ දැන් කුමක්ද කරමින් සිටින්නේ? යෙහෝවාව ඉතා කිට්ටුවෙන් දැනහඳුනා ගත හැකි වන විදිහට ඔබ ඔහු පිළිබඳව දැනුම ලබාගනිමින් සිටිනවාද? එහෙම කරන්න නම්, ඔබ දෙවි සපයන ආත්මික ආහාර කෙරෙහි ‘බොහෝ ආශාවක්’ ඇති කරගත යුතුයි. (1 පේතෘස් 2:3) මූලික කාරණා විතරක් පාඩම් කරලා සෑහීමට පත් වෙන්න එපා. බයිබලයේ සමහර වඩාත් ගැඹුරු කාරණා ගැන ඉගෙනගන්න උත්සාහ කරන්න. (හෙබ්‍රෙව් 5:12-14) ඒ කාරණා තේරුම්ගන්නට හුඟාක් අමාරුයි කියලා ඔබට හිතෙනවාද? එහෙමනම් මෙන්න මේක මතක තියාගන්න. යෙහෝවායි අපේ “උදාර උපදේශකයා.” (යෙසායා 30:20 NW) ගැඹුරු සත්‍යතාවන් අසම්පූර්ණ මිනිසුන්ගේ මනස්වලට ඇතුල් කරන්නේ කොහොමද කියලා ඔහු දන්නවා. එවගේම ඔහු ඔබට උගන්වන දේ වටහාගන්නට ඔබ දරන අවංක ප්‍රයත්නයට ආශීර්වාද කරන්නත් ඔහුට පුළුවන්. ඔව්, ඒ ගැන නම් කිසිම සැකයක් තියාගන්න එපා!—ගීතාවලිය 25:4.

⁸ ඇයි ඔබම “දෙවිගේ ගැඹුරු දේවල්” සමහරක් ගැන පරීක්ෂා කරලා බලන්නේ නැත්තේ? (1 කොරින්ති 2:10) මේවා දේවධර්මාධරයන් හෝ පූජකයන් විසින් වාද විවාදවලට භාජන කළ හැකි නිකම්ම නිරස කාරණා නම් නොවේ. මේවා අපගේ මේ ස්නේහවන්ත පියාණන්ගේ මනස සහ හදවත පිළිබඳව සියුම් අවබෝධයක් ලබා දෙන මූලධර්මයන්. ඇත්තටම කියනවා නම්, ඒ වගේ අවබෝධයක් ලබාගනිද්දී එයින් ලැබෙන තෘප්තිය හරිම චමත්කාරජනකයි. උදාහරණයක් හැටියට මිදීමේ මිලය, “පරිශුද්ධ රහස,” වගේ විෂයන් ගන්න. ඒ වගේම යෙහෝවා තමන්ගේ ජනයාට ආශීර්වාද කිරීමටත් තම අරමුණ ඉටු කරගැනීමටත් යොදාගෙන ඇති විවිධ ගිවිසුම් දිහා බලන්න. මේ විෂයන් වගේම මේ හා සමාන තවත් විෂයන්, පෞද්ගලිකව පර්යේෂණය කරන්න වගේම අධ්‍යයනය කරන්නත් අපූරු ක්ෂේත්‍රයන්ය.—1 කොරින්ති 2:7.

9, 10. (අ) උඩඟුකම භයානක දෙයක් වන්නේ ඇයි? තවද එයින් වැළකී සිටීමට අපට උපකාරවත් වන්නේ කුමක්ද? (ආ) යෙහෝවා පිළිබඳව දැනුම ලබාගනිද්දී, අප යටහත් පහත් අය වීමට දැඩි වෑයමක් ගත යුත්තේ ඇයි?

⁹ ඔබ වඩාත් ගැඹුරු ආත්මික සත්‍යතාවන් පිළිබඳ දැනුමෙන් වැඩෙනකොට, ඒ වගේ දැනුමක අන්තරායක් තියෙන්න පුළුවන්. ඒකෙන් පරෙස්සම් වෙන්න. ඒ තමයි, උඩඟුකම. (1 කොරින්ති 8:1) උඩඟුකම කියන මේ උගුල හරිම භයානකයි. මොකද ඒක මිනිසුන්ව දෙවිගෙන් ඈත් කරනවා. (හිතෝපදේශ 16:5; යාකොබ් 4:6) මේක මතක තියාගන්න. එනම් තමන්ගේ දැනුම නිසා කිසිම මිනිසෙකුට පාරට්ටු කරගන්නට කිසිදු හේතුවක් නැහැ. මෙය පැහැදිලි කරගන්න එක් උදාහරණයක් ගමු. මිනිස් සංහතියේ වඩාත් නවීනතම විද්‍යාත්මක ප්‍රගතිය පිළිබඳව සමීක්ෂණයක විස්තර සපයන එක්තරා පොතක හැඳින්වීමේ සඳහන් වෙන්නේ මෙන්න මෙහෙමයි. “අප වඩ වඩාත් කාරණා දැනගන්න, දැනගන්න, අපි දන්නේ කොච්චර අල්පයක්ද යන වග අපට වැටෙහනවා. . . . අපට තවමත් ඉගෙනගන්නට තිබෙන දේවල් සමඟ සසඳද්දී, අප ඉගෙනගෙන තිබෙන හැම දෙයක්ම හුදෙක් අංශු මාත්‍රයක් පමණයි.” එවන් යටහත් පහත් මානසිකත්වයක් ඇතුව සිටීම කොතරම් යෝග්‍යද! එහෙමනම්, ලබාගත හැකි ශ්‍රේෂ්ඨතම දැනුම, ඒ කියන්නේ යෙහෝවා දෙවි පිළිබඳ දැනුම හා සසඳද්දී, අප ඊටත් වඩා කොපමණ වැඩියෙන් යටහත් පහත්ව සිතන්න ඕනෑද! ඒ ඇයි?

¹⁰ යෙහෝවා ගැන බයිබලයේ කියන සමහරක් කියමන් ගැන සලකා බලන්න. “ඔබගේ කල්පනා ඉතා ගැඹුරුය.” (ගීතාවලිය 92:5) “[යෙහෝවාගේ] ඥානය අසීමිතය.” (ගීතාවලිය 147:5, නව අනුවාදය) “[යෙහෝවාගේ] ඥානය දැනගන්ට බැරිය.” (යෙසායා 40:28) “අහෝ, දෙවිගේ ප්‍රඥාවෙත් දැනගැන්මෙත් බහුලත්වය කොපමණ ගැඹුරුද!” (රෝම 11:33) යෙහෝවා ගැන දැනගන්නට තියෙන සියලුම දේවල් අපිට කවදාවත් දැනගන්නට ලැබෙන්නේ නැති බව නම් පැහැදිලියි. (දේශනාකාරයා 3:11) ඔහු අපට පුදුමාකාර දේවල් බොහොමයක් උගන්වා තියෙනවා. ඒ වුණත් තවත් අපමණ දේවල් ඔහු ඉදිරි අනාගතයේදී අපට උගන්වාවි. මේවායින් අප තවත් බොහෝ දේවල් ඉගෙනගනීවි. එහෙම අපේක්ෂාවක් අපගේ සිත් සතන් තුළ මහත් සන්තුෂ්ටියක් ඇති කරවන්නේ නැද්ද? ඒ වගේම අපව තවත් යටහත් පහත් කරවන්නේ නැද්ද? එහෙමනම්, අප තව තවත් ඉගෙනගනිමින් ලබාගන්නා දැනුම යෙහෝවාට තව තවත් ළං වෙන්නත්, ඒ විදිහටම ඔහු වෙත ළං වෙන්න අනිත් අයට උදව් කරන්නත් සෑමවිටම යොදාගමු. හැබැයි, අනුන්ට වඩා ඉහළින් කැපීපෙනෙන්න නම් ඒ වගේ දැනුමක් කිසිදාක යොදා නොගනිමු.—මතෙව් 23:12; ලූක් 9:48.

යෙහෝවා කෙරෙහි ඇති ඔබේ ප්‍රේමය ප්‍රකාශ කරන්න

11, 12. (අ) යෙහෝවා පිළිබඳව අප ලබාගනිමින් සිටින දැනුම අපට බලපාන්න ඕනෑ කොහොමද? (ආ) යම් පුද්ගලයෙකු තුළ දෙවි කෙරෙහි ඇති ප්‍රේමය අවංකද කියා නිශ්චය කරන්නේ කුමකින්ද?

¹¹ ප්‍රේරිත පාවුල් මෙහිදී දැනුම හා ප්‍රේමය අතර ඇති සම්බන්ධය කදිම ලෙස ගෙනහැර දක්වා තිබෙනවා. ඔහු මෙහෙම ලිව්වා. “මා නොකඩවා යාච්ඤා කරන්නේ, ඔබේ ප්‍රේමය නිවැරදි දැනුමෙන් සහ පූර්ණ විචාර බුද්ධියෙන් වඩ වඩා බහුල වන්න” කියායි. (පිලිප්පි 1:9, NW; [1:11, පැ.අ.]) අහංකාරයෙන් හිස උදුම්මාගන්නවා වෙනුවට, යෙහෝවා ගැනත් ඔහුගේ අරමුණ ගැනත් අප ඉගෙනගන්නාවූ සෑම වටිනා සත්‍යයක්ම අපගේ ස්වර්ගික පියාණන් සඳහාවූ අපගේ ප්‍රේමය වැඩි කරන්න ඕනෑ.

¹² ඇත්ත වශයෙන්ම, තමන් දෙවිට ප්‍රේම කරනවායයි කියන බොහෝදෙනෙක් ඇත්තටම එසේ කරන්නේ නැහැයි කියන එක අපි දන්නවා. ඔවුන්ගේ හදවත් පිරී පවතින්නේ අවංක චිත්තවේගී හැඟීම්වලින් වෙන්න පුළුවන්. නිවැරදි දැනුමට එකඟව පවතින විට, ඒ වගේ හැඟීම් තියෙන එක හොඳයි, ප්‍රශංසාකටයුතුයි. කෙසේවෙතත්, දෙවි කෙරෙහි සැබෑ ප්‍රේමයක් ඇති බවට එය ප්‍රමාණවත් සාක්ෂියක් නොවෙයි. ඒ ඇයි? දැන් බලන්න, සැබෑ ප්‍රේමයක් දේවවචනයේම නිර්වචනය කර ඇති විදිහ. “දෙවිට ප්‍රේමවීම නම්, අප විසින් ඔහුගේ ආඥා පැවැත්වීමය. ඔහුගේ ආඥා බර නැත.” (1 යොහන් 5:3) එහෙමනම්, යෙහෝවා කෙරෙහි ඇති ප්‍රේමය අවංකයි කියලා පේන්නේ කීකරුකමින් කරන ක්‍රියා තුළින් විතරයි.

13. යෙහෝවා කෙරෙහි ඇති ප්‍රේමය නිරූපණය කිරීමට දේවභය අපට උපකාරවත් වන්නේ කොහොමද?

¹³ දේවභය යෙහෝවාට කීකරු වීමට අපට මහෝපකාරී වෙනවා. යෙහෝවා උදෙසා ඉමහත් වූ ගැඹුරු භයක් අප තුළ ඇති වන්නේ ඔහු ගැන දැනගැනීමෙන්. ඔහුගේ අසීමිත ශුද්ධකම, මහිමය, බලය, යුක්තිය, ප්‍රඥාව සහ ප්‍රේමය ගැන ඉගෙනගැනීමෙන්. එවන් භයක් අප තුළ තිබීම යෙහෝවාට ළංවීම සඳහා තිබිය යුතු අනිවාර්ය අවශ්‍යතාවක්. මේ සම්බන්ධයෙන් ගීතාවලිය 25:14හි [NW] කියන දෙය බලන්න. “යෙහෝවා සමඟ සමීප සම්බන්ධතාවක් ඇත්තේ ඔහුට භය වෙන අයටය.” මේ අනුව, අපගේ ස්නේහවන්ත දයාබර ස්වර්ගික පියාණන්ව අසතුටු කිරීමේ සුවදායක භයක් අපට තිබෙනවා නම්, ඔහු වෙතට ළං වෙන්න අපට පුළුවන්. හිතෝපදේශ 3:6හි වාර්තා කර ඇති ඥානවන්ත උපදෙසට අවනත වීමට අපට ඉවහල් වන්නේ දේවභයයි. “නුඹේ සියලු මාර්ගවලදී නුඹ ඔහුව සලකන්න, එවිට ඔහු නුඹේ මාවත් සමතලා කරනවා ඇත.” මේ කියමනෙන් මොකක්ද අදහස් කරන්නේ?

14, 15. (අ) අපට අපගේ දෛනික ජීවිතයේ ගැනීමට තිබෙන සමහරක් තීරණ මොනවාද? (ආ) අපගේ දේවභක්තිය පිළිබිඹු වන ආකාරයකින් තීරණ ගැනීමට අපට හැක්කේ කෙසේද?

¹⁴ සෑම දවසකම වගේ තීරණ ගැනීමට ඔබට සිදු වෙනවා. සමහරක් ඒවා වැදගත් කාරණා පිළිබඳ තීරණ, සමහරක් ඒවා සුළු සුළු කාරණා ගැන. උදාහරණයක් හැටියට, ඔබත් සමඟ එකට වැඩ කරන අය සමඟ, ඔබගේ පාසැලේ ළමුන් සමඟ, අසල්වාසීන් සමඟ ඔබ කරන්නේ මොන වගේ කතා බහද? (ලූක් 6:45) ඔබට කරන්නට තිබෙන වැඩ ඔබ මහන්සි වී කඩිසර ලෙස කරනවාද? නැත්නම් හැකි තරම් අඩු ප්‍රයත්නයක් දරා එය ඉවරයක් කර දමන්නටද ඔබ උත්සාහ කරන්නේ? (කොලොස්සි 3:24) ඔබ ළං වෙන්න උත්සාහ කරන්නේ යෙහෝවා කෙරෙහි මද ප්‍රේමයක් තිබෙන හෝ කිසිම ප්‍රේමයක් නැති අය වෙතටද? නැත්නම් ඔබේ උත්සාහ දරන්නේ ආත්මික මනසක් ඇති අය සමඟ ඔබේ සම්බන්ධතාවන් ශක්තිමත් කරගන්නටද? (හිතෝපදේශ 13:20) දේවරාජ්‍යයේ කාරණා වැඩිදියුණු කරන්න, සුළු වශයෙන් හරි ඔබ කරන්නේ කුමක්ද? (මතෙව් 6:33) එදිනෙදා ජීවිතයේ තීරණ ගැනීමට සිදු වන විට, මෙහි සඳහන් කර ඇති ශුද්ධ ලියවිලිමය ප්‍රතිපත්ති අදාළ කරගන්නවා නම්, ඇත්ත වශයෙන්ම ඔබ ‘ඔබේ සියලු මාර්ගවලදී’ යෙහෝවාව සලකනවා කියා කියන්න පුළුවන්.

¹⁵ ඇත්ත වශයෙන්ම, අප ගන්නා සෑම තීරණයකදීම, මෙම සිතිවිල්ලෙන් අප පාලනය විය යුතුය. එනම්, මා කුමක් කරනවාටද යෙහෝවා කැමති වෙන්නේ? ඔහුව වඩාත්ම සතුටු කිරීමට මට හැක්කේ මා ගන්නා කොයි වගේ ක්‍රියාමාර්ගයකින්ද? (හිතෝපදේශ 27:11) මේ විදිහට දේවභය පෙන්වීම යෙහෝවා කෙරෙහි වූ අපගේ ප්‍රේමය පළ කිරීමට තිබෙන බොහොම හොඳ ක්‍රමයක්. ඒ විතරක් නෙවෙයි, ආත්මිකව, සදාචාරාත්මකව සහ ශාරීරිකව පිරිසිදුව සිටීමටද දේවභය අපව පොලඹවනවා. මෙය මතක තබාගන්න. “දෙවිට ළං වෙන්න” කියා යාකොබ් ක්‍රිස්තියානීන්ගෙන් උදක්ම ඉල්ලා සිටි එම පදයේ ඊළඟට ඔහු දෙන අවවාදය සිතට ගන්න. “පව්කාරයෙනි, ඔබේ දෑත් පිරිසිදු කරගන්න. දෙගෙඩියාවෙන් සිටින්නෙනි, ඔබේ සිත් පවිත්‍ර කරගන්න.”—යාකොබ් 4:8, NW.

16. යෙහෝවාට දීම මගින්, අපට කිසිදා ඉටු කරගත නොහැක්කේ කුමක්ද? එහෙත් කුමක් කිරීමෙන් අපට සෑමවිටම සාර්ථකත්වය ලැබිය හැකිද?

¹⁶ ඇත්ත වශයෙන්ම, යෙහෝවා කෙරෙහි වූ අප සතු ප්‍රේමය අපට පෙන්විය හැක්කේ නපුරෙන් වැළකී සිටීමෙන් පමණක් නොවෙයි. ඊට වඩා බොහෝ සෙයින් වැඩි යමක් එයට ඇතුළත් වෙනවා. තවද, හරි දෙය කිරීමටද ප්‍රේමය අපව පොලඹවයි. උදාහරණයක් හැටියට, යෙහෝවාගේ අපරිමිත ත්‍යාගශීලීවන්තභාවයට අප ප්‍රතිචාරය දක්වන්නේ කෙසේද? යාකොබ් ලීවේ මෙසේයි. “සෑම යහපත් දීමනාවක්ද සෑම සම්පූර්ණ ත්‍යාගයක්ද ඉහළින්ය. මන්ද, අහසෙහි ආලෝකවල පියාණන් කෙරෙන් එය බැස එන්නේය.” (යාකොබ් 1:17, NW) අප අපේ දේපළවලින් යමක් යෙහෝවාට දීමේදී, අපි ඔහුව ධනවත් නොකරන බව ඇත්තයි. තිබෙන හැම දෙයක්ම හැම සම්පතක්ම අයිති ඔහුටයි. (ගීතාවලිය 50:12) අපගේ කාලය හා ශක්තිය අප යෙහෝවාට දෙන විට, ඔහුට වෙනත් ක්‍රමයකින් ලබාගන්නට බැරි අවශ්‍යතාවක් අප විසින් සපුරාලමින් සිටිනවාත් නෙවෙයි. දෙවිගේ රාජ්‍යය පිළිබඳ ශුභාරංචිය දේශනා කිරීම අපි නොකරනවායයි සිතමු. එහෙමනම්, ගල් ලවා මොරගස්වන්නට ඔහුට පුළුවන්. එසේනම්, අපේ සම්පත්, කාලය හා ශක්තිය අපි යෙහෝවාට දෙන්නේ ඇයි? ඒ අපගේ මුළු සිතින්, ජීවිතයෙන්, මනසින් හා ශක්තියෙන් අප ඔහුට ප්‍රේම කරන බව පෙන්වන්නටයි.—මාර්ක් 12:29, 30, NW.

17. යෙහෝවාට සතුටු සිතින් දීමට අපව පෙලඹිය හැක්කේ කුමකටද?

¹⁷ අප යෙහෝවාට දෙන විට, එසේ කළ යුත්තේ හද පිරි සතුටකිනුයි. “මක්නිසාද, සතුටු සිතින් දෙන්නාට දෙවි ප්‍රේම කරන්නේය.” (2 කොරින්ති 9:7) ද්විතීය කථාව 16:17හි වාර්තා කර ඇති ප්‍රතිපත්තිය සතුටු සිතින් දීමට අපට උපකාරවත් වෙනවා. “නුඹේ දෙවි වූ යෙහෝවා නුඹට දී තිබෙන ආශීර්වාදයේ හැටියට, එකිනෙකා තම තමාගේ පුළුවන්කම ප්‍රකාර දීමනාවක් ඇතුව පෙනී සිටීවා.” ඇත්ත වශයෙන්ම යෙහෝවා අප කෙරෙහි කොතරම් ත්‍යාගශීලී වී තිබෙනවාද කියා කල්පනා කර බලන විට, අප තුළ බලවත් ආශාවක් ඇති වෙන්නේ ඔහුට නොමසුරුව දීමටයි. අන්න එහෙම දෙනකොට, ඔහුගේ හදවත සතුටින් ඉපිල යයි. ඒක හරියට පියෙක් තම සිඟිති දරුවාගෙන් කුඩා තෑග්ගක් ලබන විට දැනෙන සතුට වගේ. මේ අන්දමින් අපගේ ප්‍රේමය යෙහෝවාට පළ කරන විට, නිතැතින්ම අපි ඔහු වෙතට ළං වෙමු.

යාච්ඤාව මගින් සමීප සම්බන්ධතාවක් ගොඩනඟා ගැනීම

18. අපගේ යාච්ඤාවල ගුණාත්මකභාවය දියුණු කරන ආකාරය සලකා බැලීම වටින්නේ මන්ද?

¹⁸ අප පෞද්ගලිකව යාච්ඤාපූර්වකව ගත කරන මොහොතවල් අපට ඉතා උතුම් ප්‍රස්තාවක් විවෘත කර දෙනවා. එය නම් අපගේ ස්වර්ගික පියාණන් සමඟ ඉතා කුලුපග සමීප කතා බහක නියැලීමට ලැබෙන අවස්ථාවයි. (පිලිප්පි 4:6) යාච්ඤාව කියන්නේ දෙවි වෙතට ළංවීමට තිබෙන ඉතා වැදගත්ම මාර්ගයක් නිසා, අපගේ යාච්ඤාවල ගුණාත්මකභාවය ගැන මදක් නැවතී සලකා බැලීම වටිනවා. ඉන් අදහස් කරන්නේ යාච්ඤාවල අදහස් හොඳින් පෙළගස්වා භාෂාවේ ඇති හර බර වචන යොදා කරන යාච්ඤා නොව, ඒවා හදවතින්ම නික්මෙන අවංක ප්‍රකාශන විය යුතු බවය. අපගේ යාච්ඤාවල ගුණාත්මකභාවය දියුණු කරන්න අපට හැක්කේ කොහොමද?

19, 20. අප යාච්ඤා කිරීමට පෙර මෙනෙහි කළ යුත්තේ ඇයි? එවන් මෙනෙහි කිරීමක් සඳහා සුදුසු සමහරක් විෂයන් මොනවාද?

¹⁹ යාච්ඤා කිරීම ආරම්භ කරන්න ඉස්සර වෙලා අපට ඒ ගැන මෙනෙහි කර බලන්න පුළුවන්. අප යාච්ඤා කරන්නට කලින් මෙනෙහි කරනවා නම්, අපගේ යාච්ඤා නිශ්චිත වෙනවා, අරුත්බර වෙනවා. මෙසේ එකම දේ යළි යළිත් කීමෙන් හා මතකයේ රැඳී තිබෙන යම් හුරු පුරුදු අදහස් නැවත කීමේ පුරුද්දෙන් වළකින්න පුළුවන්. (හිතෝපදේශ 15:28, 29) ඒ සඳහා යේසුස් සඳහන් කළ ආදර්ශ යාච්ඤාවේ අන්තර්ගත යම් තේමාවන් ගැන මෙනෙහි කර බැලීම සහ අනතුරුව ඒවා අපගේම තත්වයන්ට අදාළ වන්නේ කෙසේදැයි සලකා බැලීම උපකාරවත් වෙන්න පුළුවන්. (මතෙව් 6:9-13) නිදසුනක් වශයෙන්, මේ පොළොව මත යෙහෝවාගේ කැමැත්ත ඉටු කිරීමෙහිලා අප විසින් කරන්නට බලාපොරොත්තු වන කුඩා කොටස කුමක්ද කියා අපට අපගෙන්ම අසාගත හැකියි. හැකි තාක් දුරට යෙහෝවා අපව පාවිච්චි කරනවාට අප තුළ ඇති කැමැත්ත ප්‍රකාශ කරන්නටත් ඔහු අපට දී තිබෙන මොනයම් හෝ පැවරුමක් ඉෂ්ට කරන්නට අවශ්‍ය උපකාර ඉල්ලන්නටත් අපට පුළුවන්ද? අපගේ ද්‍රව්‍යමය අවශ්‍යතා ගැන සිත සිතා සිටීමෙන් අප හොඳටම වෙහෙසට පත් වී සිටිනවාද? අපට සමාව අවශ්‍ය වන්නේ කිනම් වැරදිවලටද? අප විසින් වැඩියෙන් සමාව දීමට අවශ්‍ය වන්නේ කාටද? අප වරදට පෙලඹෙන්නේ කොයි පැත්තෙන්ද? මේ කාරණයේදී යෙහෝවාගේ ආරක්ෂාව ලැබීමේ අවශ්‍යතාව අප කොතරම් දුරකට වටහාගෙන සිටිනවාද?

²⁰ මීට අමතරව, යෙහෝවාගේ උපකාරය විශේෂයෙන්ම අවශ්‍ය වන්නාවූ අය ගැන අප දන්නවා වෙන්න පුළුවන්. (2 කොරින්ති 1:11) ඒ වගේම, අමතක නොකළ යුතු දෙයක් වන්නේ ස්තුති දීමයි. අප මදක් නැවතී ඒ ගැන කල්පනා කර බැලුවහොත්, යෙහෝවා අප වෙත දක්වා තිබෙන යහපත්කමේ බහුලත්වය වෙනුවෙන් සෑම දවසකම ඔහුට ස්තුති කරන්නටත් ප්‍රශංසා දෙන්නටත් අපට පමණටත් වඩා හේතු තිබෙනවාට සැකයක් නැහැ. (ද්විතීය කථාව 8:10; ලූක් 10:21) මෙසේ කිරීම අමතර ප්‍රයෝජනයක්ද ගෙන දෙයි. එනම්, ජීවිතය පිළිබඳව වඩාත් සුබවාදී, කෘතඥපූර්වක ආකල්පයක් ඇති කරගැනීමට හැකිවීමයි.

21. අප යෙහෝවා වෙතට යාච්ඤාවෙන් ළඟා වන විට, අපට උපකාරවත් විය හැක්කේ කිනම් ශුද්ධ ලියවිලි ආදර්ශයන් අධ්‍යයනය කිරීමද?

²¹ එමෙන්ම අධ්‍යයනය කිරීමෙන්ද අපගේ යාච්ඤාවල ගුණය නංවාලන්න පුළුවන්. විශ්වාසවන්ත පුරුෂයන් හා ස්ත්‍රීන් විසින් කරන ලද කැපීපෙනෙන යාච්ඤා දේවවචනයේ සඳහන් වෙලා තිබෙනවා. උදාහරණයක් හැටියට, අප ඉදිරියේ යම් අභියෝගාත්මක ගැටලුවක් තිබෙනවා නම්, මේ නිසා අප තුළ යම් කනස්සල්ලක් හෝ අපගේ හෝ අප ප්‍රේම කරන අයගේ ශුභසාධනය ගැන බියක් ඇති වෙලා කියා සිතමු. එවිට, යාකොබ්ගේ යාච්ඤාව කියවන්නට අපට හැකියි. එහි සඳහන් වෙන්නේ පළිගැනීමට අදිටන් කරගෙන සිටි තම සහෝදරයා වූ එසව්ව හමුවීමට යෑමට පෙර යාකොබ් කළ යාච්ඤාවයි. (උත්පත්ති 32:9-12) එසේ නැතහොත්, මිලියනයක් පමණ වූ එතියෝපියන්ගෙන් සමන්විත හමුදාව, දෙවිගේ සෙනඟට තර්ජනය කළ විට ආසා රජ කළ යාච්ඤාව ගැන අපට අධ්‍යයනය කරලා බලන්න පුළුවන්. (2 ලේකම් 14:11, 12) යෙහෝවාගේ නාමය මතට නින්දාවක් ගෙන දිය හැකි ගැටලුවක් නිසා අප කැලඹීමට පත් වී සිටිනවා නම්, කර්මෙල් කන්ද මත බාල් වන්දනාකරුවන් ඉදිරියේ එලියා කළ යාච්ඤාව සලකා බලන එක හොඳයි. නැත්නම් යෙරුසලමේ කනගාටුදායක තත්වය පිළිබඳව නෙහෙමියා කළ යාච්ඤාව සලකා බැලීම වටිනවා. (1 රාජාවලිය 18:36, 37; නෙහෙමියා 1:4-11) ඒ වගේ යාච්ඤා කියවා මෙනෙහි කිරීමෙන් අපගේ ඇදහිල්ල ශක්තිමත් වෙනවා විතරක් නෙවෙයි, අපට මහා බරක් වී ඇති මෙම කාරණා පිළිබඳව යෙහෝවා සමඟ වඩාත් හොඳම ආකාරයෙන් කතා කළ හැක්කේ කොහොමද යන්න පිළිබඳවත් යම් අදහසක් ගත හැකියි.

22. වර්ෂ 2003 සඳහා වාර්ෂික පදය කුමක්ද? එම වසර පුරාම වරින් වර අපට අපෙන්ම කුමක් ඇසිය හැකිද?

²² එසේනම්, “දෙවිට ළං වෙන්න” යනුවෙන් යාකොබ් දෙන උපදෙසට අවනත වීම තරම් වඩා උතුම් ගෞරවයක්, වඩා උතුම් ඉලක්කයක් නැති බව පැහැදිලියි. (යාකොබ් 4:8, NW) දෙවි පිළිබඳව දැනුම ලබාගැනීමෙහි ප්‍රගතියක් ලැබීම මගින්, ඔහු කෙරෙහි ඇති අපගේ ප්‍රේමය වඩ වඩාත් ප්‍රකාශ කිරීමට මං සෙවීම මගින් සහ යාච්ඤාව තුළින් ඔහු සමඟ ඇති සමීප සම්බන්ධතාව ශක්තිමත් කරගැනීම මගින් අපි ඔහුට ළං වෙමු. වර්ෂ 2003 තුළදී යාකොබ් 4:8 සඳහන් වාර්ෂික පදය මනසේ පෙරදැරි කරගෙන, අප ඇත්ත වශයෙන්ම යෙහෝවාට ළං වෙමින් සිටිනවාද කියා දිගටම අපිවම පරීක්ෂා කර බලමු. නමුත්, එම ප්‍රකාශයේ පසුව සඳහන් වූ කොටස ගැන කුමක් කියන්නට පුළුවන්ද? යෙහෝවා ‘ඔබට ළං වන්නේ’ කිනම් අර්ථයෙන්ද? ඉන් අත් වන ආශීර්වාද මොනවාද? ඊළඟ ලිපියේ මෙම කාරණය සාකච්ඡා වේවි.

“ඔහු ඔබට ළං වන්නේය”

“[දෙවි] අප එකිනෙකාට නුදුරුව සිටින්නේය.”—ක්‍රියා 17:27.

1, 2. (අ) තරුවලින් පිරි අහස් කුස දෙස බලන කල, මැවුම්කරු සම්බන්ධව අපට කිනම් ප්‍රශ්න ඇසිය හැකිද? (ආ) මිනිසුන් යෙහෝවාගේ ඇස් හමුවේ ඉතා වටිනා බව බයිබලය අපට සහතික ලෙස කියා සිටින්නේ කෙසේද?

ඔබ කවදා හෝ දිනක නිසසල රාත්‍රියක තරුවලින් පිරි අහස දෙස ගරු බියෙන් හා පුදුමයෙන් බලං ඉඳලා තියෙනවාද? නිමක් කොනක් පරක් තෙරක් නොපෙනෙන අහස් කුසේ ගිණිය නොහැකි තාරකා ඔබ සිත තුළ පහළ කරන්නේ මහත් ගරු බියක්. මේ නිම් හිම් නැති මේ විශ්වයේ අපේ පෘථිවිය දූවිලි අංශුවක් වගෙයි. ඒ කියන්නේ, ‘මුළු පොළොවේ මහෝත්තමයා’ වන මැවුම්කරුවාණන් මිනිසුන්ව ගණනකටවත් ගන්නට බැරි තරමට අතිශයින් ඉහළින් සිටින කෙනෙක් කියන එකද? එහෙම නැත්නම් කිසිම විදිහකින් මිනිසුන්ට දැනගන්නට බැරි තරම් ඈත දුරක සිටින කෙනෙක් කියන එකද?—ගීතාවලිය 83:17.

² බයිබලය අපට සහතික ලෙස කියා සිටින්නේ මිනිසුන් යෙහෝවාගේ ඇස් හමුවේ බොහෝ සෙයින් වටිනවා කියලායි. ඇත්තෙන්ම දේවවචනය අපට දිරිගන්වන්නේ ඔහුව සොයන ලෙසටයි. “ඔහු අප එකිනෙකාට නුදුරුව සිටින්නේය” කියා එහි කියනවා. (ක්‍රියා 17:27; 1 ලේකම් 28:9) ඇත්තෙන්ම දෙවිට ළංවීමට අපි පියවර ගන්නවා නම්, ඔහු අපගේ ප්‍රයත්නවලට ප්‍රතිචාර දක්වාවි. කිනම් ආකාරයකින්ද? ඔව්, 2003 වසරේ වාර්ෂික පදය අපට මේ ගැන දෙන්නේ හද උණුසුම් කරවන පිළිතුරක්. ‘ඔහු ඔබට ළං වන්නේය.’ (යාකොබ් 4:8) යෙහෝවාට ළංව සිටින අයට ඔහු විසින් වගුරුවන පුදුමාකාර ආශීර්වාද කිහිපයක් ගැන දැන් අපි සාකච්ඡා කරමු.

යෙහෝවාගෙන් ලැබෙන පෞද්ගලික ත්‍යාගයක්

 3. තමන්ට ළං වෙන අයට යෙහෝවා දෙන ත්‍යාගය මොකක්ද?

³ පළමුවෙන්ම අපට සලකා බැලිය හැක්කේ මේකයි. යෙහෝවා සිය සේවකයන් උදෙසා වෙන් කර ඇති වටිනා තෑග්ගක් තිබෙනවා. මේ ලෝක ක්‍රමයේ තිබෙන කිසිම බලයකට, ධනයකට හා අධ්‍යාපනයකට මේ ත්‍යාගය ඉදිරිපත් කරන්නට බැහැ. එය පෞද්ගලික ත්‍යාගයක්. එය යෙහෝවා දෙන්නේ තමන්ට ළං වී සිටින අයට පමණයි. ඒ මොකක්ද? දේවවචනය මෙසේ පිළිතුරු දෙනවා. “ඥානයට [විචාර බුද්ධියට, NW] නුඹේ ශබ්දය නඟන්නෙහි නම්, නුඹ රිදී මෙන් ඇය සොයා, [සැඟවුණු, NW] නිධාන මෙන් ඇය ගැන විභාග කරන්නෙහි නම්, නුඹ යෙහෝවා කෙරෙහි භයවීම තේරුම්ගන්නෙහිය, දෙවි හැඳිනගැනීමටද [දෙවි පිළිබඳ දැනුම ලබාගැනීමටද, NW] පැමිණෙන්නෙහිය. මක්නිසාද ප්‍රඥාව දෙන්නේ යෙහෝවාය.” (හිතෝපදේශ 2:3-6) අසම්පූර්ණ මිනිසුන්ට “දෙවි පිළිබඳ දැනුම” සොයාගන්නට හැකිවීම ගැන නිකම් හිතලා බලන්න! ඒ ත්‍යාගය, ඒ කියන්නේ දෙවිගේ වචනයේ සඳහන් දැනුම ‘සැඟවුණු නිධානයකට’ සමානයි. ඒ ඇයි?

4, 5. “දෙවි පිළිබඳ දැනුම” ‘සැඟවුණු නිධානවලට’ සමාන කළ හැක්කේ මන්ද? පැහැදිලි කරන්න.

⁴ එක දෙයක් තමයි, දෙවි පිළිබඳ දැනුම ඉතා වටිනා එකක් වීම. ඉන් ලැබෙන වටිනාම ආශීර්වාදයක් නම් සදාකාල ජීවනයේ අපේක්ෂාවයි. (යොහන් 17:3) නමුත් ඒ දැනුම දැන් පවා අපේ ජීවිත පෝෂ්‍යය කරනවා. උදාහරණයක් හැටියට, දේවවචනය අපි ඉතා පරෙස්සමින් අධ්‍යයනය කිරීම නිසා බොහෝ සෙයින් වැදගත් වූ ප්‍රශ්නවලට අපට පිළිතුරු ලැබිලා තියෙනවා. ඒ තමයි, දෙවිගේ නම කුමක්ද? (ගීතාවලිය 83:17) මළ අයගේ සැබෑ තත්වය කුමක්ද? (දේශනාකාරයා 9:5, 10) පොළොව සඳහා වූ දෙවිගේ අරමුණ කුමක්ද? (යෙසායා 45:18) ඒ වගේම ජීවිතයේ හොඳම මාර්ගය බයිබලයේ සඳහන් ප්‍රඥාවන්ත උපදෙස් අදාළ කරගැනීම බව අපි දැනගෙන සිටිනවා. (යෙසායා 30:20, 21; 48:17, 18) මේ නිසා ජීවිතයේ කනස්සලුභාවයන්ට මුහුණ දෙන්නටත්, නියම සන්තෝෂය මෙන්ම තෘප්තිය ගෙන දෙන ජීවිත මාර්ගයක් ඔස්සේ ඉදිරියට යන්නටත් උපකාරවත් වෙන හොඳ මඟ පෙන්වීමක් අපට තිබෙනවා. මේ සියල්ලටම වඩා, දේවවචනය ගැන අප කර තිබෙන අධ්‍යයනය නිසා යෙහෝවාගේ පුදුමාකාර ගුණාංග ඉගෙනගෙන තිබෙනවා විතරක් නෙමේ ඔහුට ළං වෙන්නටත් අපට පුළුවන් වෙලා තියෙනවා. මේ අනුව බලද්දී, “දෙවි පිළිබඳ දැනුම” මත පදනම් වූ යෙහෝවා සමඟ කිට්ටු සම්බන්ධතාවක් ඇතුව සිටීම තරම් වටින්නේ වෙන මොනවාද?

⁵ දෙවි පිළිබඳ දැනුම ‘සැඟවුණු නිධානවලට’ සංසන්දනය කරන්න තවත් හේතුවක් අපට තිබෙනවා. වෙනත් බොහෝ නිධාන වගේ මෙම නිධානයද ලෝකයේ ඉතා විරලව පවතින එකක්. මේ ලෝකයේ ජනගහනය බිලියන හයක් පමණ වෙනවා. ඒ අතුරින් යෙහෝවාගේ නමස්කාරකයන් සිටින්නේ මිලියන හයක් පමණයි. ඒ කියන්නේ 1,000කින් එක් කෙනෙක් පමණයි “දෙවි පිළිබඳ දැනුම” සොයාගෙන තිබෙන්නේ. දෙවිගේ වචනයේ තිබෙන සත්‍යය දැනගැනීමට ලැබීම කොතරම් කලාතුරකින් ලැබෙන වරප්‍රසාදයක්ද කියන එක තේරුම්ගැනීම සඳහා බයිබලයේ අඩංගු එක් ප්‍රශ්නයක් ගැන සලකා බලන්න. එය නම්, මිනිස්සු මැරෙනකොට සිද්ධ වන්නේ මොකක්ද? මිනිසා මැරෙනවා කියලාත් මළ අයට කිසිම සිහියක් නැහැ කියලාත් ශුද්ධ ලියවිල්ලේ පවසන බව අපි දන්නවා. (යෙසායා 38:18) එහෙත්, කෙනෙක් මැරුණායින් පස්සේ දිගටම ජීවත් වන බව මේ ලෝකයේ ආගම් වැඩි ප්‍රමාණයකට අයත් අය විශ්වාස කරනවා. මේ ඉගැන්වීම ක්‍රිස්තියානි ලෝකයේ ආගම්වල ප්‍රධානතම ඉගැන්වීමක්. ඒ විතරක් නෙවේ, බෞද්ධ, හින්දු, ඉස්ලාම්, ජෛන ආගම, යුදෙව් ආගම, ෂින්ටෝ, සීක්වාදය සහ ටාඕවාදය නමැති චීන ආගම වැනි ආගම් අතරත් මේ මූලික ඉගැන්වීම පැතිර පවතිනවා. බලන්න, බිලියන ගණනක් ජනයා එකම බොරු ඉගැන්වීමකට රැවටිලා!

6, 7. (අ) “දෙවි පිළිබඳ දැනුම” සොයාගත හැක්කේ කාට පමණක්ද? (ආ) ‘ප්‍රඥාවන්තයන්ගෙන් සහ බුද්ධිමතුන්ගෙන්’ සැඟවී තිබෙන තීක්ෂ්ණ බුද්ධියක් ලබා දීමෙන් යෙහෝවා අපට ආශීර්වාද කර තිබෙන බව පෙන්වන්නේ කිනම් උදාහරණයෙන්ද?

⁶ තවත් විශාල ජන සමූහයක් “දෙවි පිළිබඳ දැනුම” සොයාගෙන නැත්තේ ඇයි? ඒකට හේතුව තමයි, ඔහුගේ උපකාරය නැතිව දේවවචනයේ අරුත මුළුමනින්ම වටහාගැනීමට යමෙකුට බැරිවීම. මෙය මතක තබාගන්න. මේ දැනුම ත්‍යාගයක්. යෙහෝවා මේ දැනුම දෙන්නේ අවංකකමින් සහ යටහත් පහත්කමින් සිය වචනය සොයා බැලීමට කැමති අයට පමණයි. එවන් අය “මාංසික ලෙස ප්‍රඥාවන්ත” නොවෙනවා විය හැකියි. (1 කොරින්ති 1:26, NW) මේ ලෝකයේ මිමිවලට අනුව ඔවුන් අතරින් බොහෝදෙනෙකුව “නූගත් සාමාන්‍ය මිනිසුන්” ලෙස සලකනු ලබනවා වෙන්නට පුළුවනි. (ක්‍රියා 4:13, NW) එහෙත්, ඒක වැදගත් කාරණයක් නෙවේ. යෙහෝවා අපට “දෙවි පිළිබඳ දැනුම” දෙන්නේ ඔහු අපේ හදවත් තුළ දකින ගුණාංග නිසායි.

⁷ නිදසුනක් සලකා බලන්න. ක්‍රිස්තියානි ලෝකයේ විශාරදයන් බොහෝදෙනෙක් බයිබලය ගැන මහා හුඟාක් විස්තර ලියලා තිබෙනවා. එවැනි පොත් පත්වල බයිබලයේ ඓතිහාසික පසුබිම, හෙබ්‍රෙව් සහ ග්‍රීක් වචනවල අරුත සහ තවත් එවැනි දේවල් ලියා තිබෙනවා වෙන්නට පුළුවනි. මෙවැනි විශාරදයන්ට මෙවන් දැනුමක් තිබෙනවා වුවත්, ඔවුන් ඇත්තටම “දෙවි පිළිබඳ දැනුම” සොයාගෙන තිබෙනවාද? නිකම් සිතා බලන්න! බයිබලයේ තේමාව ඔවුන්ට පැහැදිලිව තේරුම්ගන්න පුළුවන්ද? යෙහෝවාගේ ස්වර්ගික රාජ්‍යය මගින් ඔහුගේ පරමාධිපත්‍යයේ යුක්තිසහගත බව තහවුරු කිරීම යන තේමාව ඔවුන්ට පැහැදිලිව වැටහෙනවාද? යෙහෝවා දෙවි ත්‍රිත්වයක කොටසක් නොවන බව ඔවුන් දන්නවාද? එවන් කාරණා පිළිබඳව නිවැරදි අවබෝධයක් අපටයි තිබෙන්නේ. ඒ ඇයි? ‘ප්‍රඥාවන්තයන් සහ බුද්ධිමතුන්’ [NW] බොහෝදෙනෙකුගෙන් සැඟවී තිබෙන ආත්මික සත්‍යතාවන් ගණනාවක් ගැඹුරින් පැහැදිලිව අවබෝධ කරගන්නට යෙහෝවා අපට අවශ්‍ය තීක්ෂ්ණ බුද්ධියක් දී ආශීර්වාද කර තිබෙන නිසායි. (මතෙව් 11:25) යෙහෝවා තමන්ට ළංව සිටින අයට කොතරම් ආශීර්වාද කරනවාද!

“යෙහෝවා තමන්ට ප්‍රේම කරන සියල්ලන් ආරක්ෂා කරන්නේය”

8, 9. (අ) යෙහෝවාට ළං වී සිටින අයට ලැබෙන තවත් ආශීර්වාදයක් දාවිත් විස්තර කළේ කොහොමද? (ආ) සැබෑ ක්‍රිස්තියානීන්ට දිව්‍ය ආරක්ෂාව අවශ්‍ය වන්නේ ඇයි?

⁸ යෙහෝවාට ළංව සිටින අය භුක්ති විඳින තවත් ආශීර්වාදයක් නම්, දිව්‍ය ආරක්ෂාවයි. මහත් විපත්තිවලට මුහුණ දුන් ගීතිකාකාර දාවිත් මෙසේ ලීවා. “යෙහෝවා තමන්ට යාච්ඤා කරන සියල්ලන්ට, එනම් සැබවින් ඔහුට යාච්ඤා කරන සියල්ලන්ට ළංව සිටියි. ඔහු තමන් කෙරෙහි භය ඇත්තන්ගේ ආශාව ඉෂ්ට කර දෙන්නේය. ඔවුන්ගේ මොරගැසීම අසා ඔවුන් ගලවයි. යෙහෝවා තමන්ට ප්‍රේම කරන සියල්ලන් ආරක්ෂා කරන්නේය.” (ගීතාවලිය 145:18-20) ඔව්, යෙහෝවා තමන්ට ප්‍රේම කරන අයට ළංව සිටිනවා. ඒ නිසා, උපකාරය පතා ඔවුන් කරන මොරගැසීම්වලට ඔහු කන් දෙන්නේ ඉතා විගසින්.

⁹ අපට දිව්‍ය ආරක්ෂාව අවශ්‍ය වන්නේ ඇයි? ‘කටයුතු කිරීමට අසීරු අර්බුදකාරී කාලවල’ බලපෑම් දැනෙනවාට අමතරව, සැබෑ ක්‍රිස්තියානීන් යෙහෝවාගේ ප්‍රධාන සතුරා වන සාතන් නමැති යක්ෂයාගේ විශේෂ ඉලක්කයක් බවටද පත්ව සිටිනවා. (2 තිමෝති 3:1, NW) ඒ සටකපට සතුරා මාන බලන්නේ අපව ‘ගිලගැනීමටයි.’ (1 පේතෘස් 5:8) සාතන් අපට පීඩා කරනවා, පීඩනයට ලක් කරනවා, ඒ විතරක් නෙමේ අපව වරදට පොලඹනවා. තමාට වාසි ප්‍රයෝජන ලබාගැනීමේ අටියෙන් ඔහු අපගේ මනසේ හා හදවතේ තිබෙන ආකල්ප දෙස බලා සිටින්නේ හරිම කපටි විදිහට. ඔහුගේ කල්පනාවේ තිබෙන්නේ එකම එක දෙයක්. ඒ තමයි, අපගේ ඇදහිල්ල දුර්වල කර අපව ආත්මිකව ගිල දැමීම. (එළිදරව් 12:12, 16) එවන් ප්‍රබල සතුරු බලවේගයක් සමඟ සටන් කරන්නට අපට සිද්ධ වෙලා තියෙන නිසා, ‘යෙහෝවා තමන්ට ප්‍රේම කරන සියල්ලන්ව ආරක්ෂා කරන’ බව දැන සිටීම මහත් අස්වැසිල්ලක් හා සහනයක් නොවෙයිද?

10. (අ) යෙහෝවා තම ජනයාව ආරක්ෂා කරන්නේ කොහොමද? (ආ) වඩාත් වැදගත්ම ආරක්ෂාව මොකක්ද? ඒ ඇයි?

¹⁰ එහෙත්, යෙහෝවා සිය ජනයාව ආරක්ෂා කරන්නේ කොහොමද? ඔහු අපව ආරක්ෂා කරන බවට පොරොන්දු වී තිබෙනවා කියන්නේ අපට මේ ක්‍රමය තුළ කිසිම ප්‍රශ්නයක් ගැටලුවක් නැතුව ජීවත් වෙන්න ලැබෙනවා කියන එක නම් නෙමේ. අනික අප වෙනුවෙන් ප්‍රාතිහාර්යයන් කිරීමට දෙවි බැඳී සිටිනවා කියන එකත් නෙමේ. කොහොමවුණත් යෙහෝවා තමන්ගේ ජනයාට ශාරීරික ආරක්ෂාව දෙන්නේ කණ්ඩායමක් හැටියටයි. සැබෑ නමස්කාරකයන්ව පොළොවෙන් අතුගා දාන්න නම් ඔහු යක්ෂයාට කවදාවක්වත් ඉඩ දෙන්නේ නැහැ! (2 පේතෘස් 2:9අ, 10අ) මේ සියල්ලටම වඩා යෙහෝවා අපව ආත්මික වශයෙන් ආරක්ෂා කරනවා. පරීක්ෂා විඳදරාගන්නට අවශ්‍ය දේවලින් අපව සන්නද්ධ කරන ඔහු, තමා සමඟ අපට තිබෙන සම්බන්ධය රැකගන්නට අපට පිහිට වෙනවා. දීර්ඝ කාලීනව සලකා බලද්දී, වඩාත් වැදගත්ම ආරක්ෂාව තමයි ආත්මික ආරක්ෂාව. ඒ ඇයි? අපට යෙහෝවා සමඟ හොඳ සම්බන්ධයක් තියෙනවා නම්, කිසිම දෙයකට, ඔව් මරණයටවත් බැහැ අපට සදාකාලික හානියක් කරන්නට.—මතෙව් 10:28.

11. යෙහෝවා සිය ජනයාගේ ආත්මික ආරක්ෂාව සඳහා දී තිබෙන්නේ මොන වගේ සැපයුම්ද?

¹¹ තමන්ට ළංව සිටින අයගේ ආත්මික ආරක්ෂාව සඳහා යෙහෝවා දී තිබෙන්නේ මහත් බහුල වූ සැපයුම්. විවිධ පරීක්ෂාවන්ට මුහුණ දෙන්නට අවශ්‍ය ප්‍රඥාව තම වචනය වන බයිබලය තුළින් ඔහු අපට දී තිබෙනවා. (යාකොබ් 1:2-5) ශුද්ධ ලියවිල්ලේ සඳහන් වී ඇති ප්‍රායෝගික උපදෙස් අදාළ කරගැනීමම මහත් ආරක්ෂාවක්. ඒ විතරක් නෙමේ, යෙහෝවා “තමන්ගෙන් ඉල්ලන්නන්ට ශුද්ධාත්මය” දෙනවා. (ලූක් 11:13) ඒ ආත්මය තමයි, විශ්වයේ තිබෙන වඩාත් ප්‍රබලතම බලවේගය. ඉතින් අප හමුවට එන ඕනෑම පරීක්ෂාවකින් හෝ වරදට පොලඹවන අවස්ථාවන්වලින් සාර්ථකව ජය අත් කර දෙන්නට එම බලවේගයට පුළුවන් බව අමුතුවෙන් කියන්න ඕනද! ක්‍රිස්තුස් තුළින්, යෙහෝවා “දීමනා වශයෙන් පුරුෂයන්” සපයා තිබෙනවා. (එපීස 4:8, NW) ආත්මිකව සුදුසුකම් ලැබ සිටින මෙම පුරුෂයන් උත්සාහ කරන්නේ සෙසු නමස්කාරකයන්ට උපකාර කිරීමේදී යෙහෝවා දක්වන එම දයානුකම්පාවම පිළිබිඹු කරන්නටයි.—යාකොබ් 5:14, 15.

12, 13. (අ) යෙහෝවා අපට නියමිත වේලාවට ආත්මික ආහාර සපයන්නේ කිනම් මාර්ගවලින්ද? (ආ) අපගේම ආත්මික ශුභසිද්ධිය උදෙසා යෙහෝවා සපයන සැපයුම් ගැන ඔබට හැඟෙන්නේ කොහොමද?

¹² යෙහෝවා අපට ආරක්ෂාව ලබාගැනීමට තවත් දෙයක්ද සපයනවා. ඒ තමයි, නියමිත වේලාවට ලැබෙන ආත්මික ආහාර. (මතෙව් 24:45) මුරටැඹ හා පිබිදෙව්! ඇතුළු මුද්‍රිත ප්‍රකාශන ඇසුරෙනුත්, රැස්වීම්, එක්රැස්වීම් වගේම සමුළු මාර්ගයෙනුත් යෙහෝවා අපට අවශ්‍ය දේ අපට අවශ්‍ය වේලාවටම ලබා දෙනවා. ක්‍රිස්තියානි රැස්වීමකදී හරි, එක්රැස්වීමකදී හරි, එහෙම නැත්නම් සමුළුවකදී හරි ඔබේ හදවත ස්පර්ශ කරපු, ඔබව ශක්තිමත් කරපු හෝ ඔබට සැනසීමක් ලබා දීපු දෙයක් ඔබට මතකද? ඉහත සඳහන් ප්‍රකාශනයක පළ වූ යම් ලිපියක් කියවද්දී, එය ඔබටම ලියූ දෙයක් කියා ඔබට කවදා හරි හැඟී ගොස් තියෙනවාද?

¹³ සාතන්ගේ වඩාත් ප්‍රබලතම අවියක් තමයි, අධෛර්යය කිරීම. මේකට අපි කිසිම කෙනෙක් අහු නොවී ඉඳියි කියලා කියන්න බැහැ. දිගු කලක් තිස්සේ පවතින කලකිරුණු ස්වභාවය නිසා අපේ ශක්තිය හීන වෙලා යෑමට විතරක් නෙමේ, ඔහුගේ දරුණු පහරවලින් තදබල ලෙස අපිව තුවාල වෙන්නටත් පුළුවන්. (හිතෝපදේශ 24:10) අප තුළ ඇති වෙන අශුභවාදී හැඟීම් දැකලා ඉන් අනිසි ප්‍රයෝජන ගන්න ඔහු දත කන නිසා, අපිට උදව් උපකාර අවශ්‍යයි. මුරටැඹ සහ පිබිදෙව්! සඟරාවල විටින් විට ලිපි පළ වී තිබෙනවා අධෛර්යය වෙන අවස්ථාවලදී ඉන් ගොඩ එන්න අවශ්‍ය උදව් ලබාගන්න. එක් ක්‍රිස්තියානි සහෝදරියක් ඒ වගේ ලිපියක් ගැන කිව්වේ මෙහෙමයි. “ඒ ලිපිය මම හැමදාම වගේ කියවනවා. එතකොට මගේ ඇස්වලින් කඳුළු ගලා හැළෙනවා. මගේ ඇඳ ළඟම මං ඒක තියාගෙනයි ඉන්නේ. එතකොට මම මානසිකව වැටිලා ඉන්න වේලාවලදී මට ඒක කියවන්න පුළුවන්. මේ වගේ ලිපිවලින් මට දැනෙනවා යෙහෝවා ඔහුගේ ආරක්ෂක හස්තයෙන් මාව වැලඳගන්නවා වගේ.”a යෙහෝවා නියමිත වේලාවේදී අපට ආත්මික ආහාර සපයන එක ගැන අපි ඔහුට කෘතඥ වෙන්නේ නැද්ද? මෙය මතක තබාගන්න. අපගේ ආත්මික ශුභසාධනය උදෙසා ඔහු සපයන මේ සැපයුම් ඔහු අපට ළංව සිටින බවටත්, ඔහු අපව ඔහුගේ රැකවරණය යටතේ තබාගෙන සිටින බවටත් සාක්ෂියක්.

‘යාච්ඤා අසන තැනැත්තාට’ ළංවීම

14, 15. (අ) යෙහෝවාට ළං වී සිටින අයට ඔහු පෞද්ගලිකව ලබා දී ඇති ආශීර්වාදය කුමක්ද? (ආ) යාච්ඤාවෙන් යෙහෝවා වෙතට නිදහසේ ළඟාවීමට හැකිවීම පුදුමාකාර වරප්‍රසාදයක් වන්නේ ඇයි?

¹⁴ මිනිස්සුන්ට බලය හා අධිකාරය ලැබෙන්නට ලැබෙන්නට, ඔවුන් යටතේ සිටින අයට ඔවුන්ට ළඟා වෙන්ට බැරි තත්වයක් ඇති වෙනවා ඔබ දැකලා තිබෙනවාද? එහෙත් යෙහෝවා දෙවි නම් එහෙම නෙවේ. නිකම්ම නිකම් මිනිස්සු පළ කරන අදහස් ගැන උනන්දුවක් දක්වන්නට බැරි තරම් ඔහු දුර සිටින කෙනෙක්ද? නැහැ, කොහෙත්ම නැහැ! යාච්ඤාව නමැති දීමනාව යෙහෝවා තමන්ට ළංව සිටින අයට දෙන තවත් ආශීර්වාදවලින් එකක්. ‘යාච්ඤා අසන තැනැත්තාට’ නිදහසේ ළං වෙන්නට ලැබීම සැබවින්ම අතිවැදගත් වරප්‍රසාදවලින් එකක්. (ගීතාවලිය 65:2) ඒ ඇයි?

¹⁵ අපි මෙහෙම ගනිමු. විශාල සංස්ථාවක විධායක අධ්‍යක්ෂකවරයෙකුට බොහෝ වගකීම් තිබෙනවා. තමන් විසින් හසුරුවන්නේ කොයි කාරණාද අනුන්හට පවරා දෙන්නේ කොයි කාරණාද කියලා ඔහුයි තීරණය කරන්නේ. මේ වගේ, විශ්වයේ පරමාධිපති පාලකයාණන්ට පුළුවන් තමන් විසින්ම හසුරුවන්නේ මොන වගේ කාරණාද වෙනත් අයට පවරන්නේ මොන වගේ කාරණාද කියා තීරණය කරන්න. යෙහෝවා සිය සෙනෙහෙවන්ත පුත්‍රයා වන යේසුස්ට පවරා දී තිබෙන සියලු දේ ගැන හිතලා බලන්න. පුත්‍රයාට “විනිශ්චය කරන්ට” බලය දී තිබෙනවා. (යොහන් 5:27) දේවදූතයන් පවා “ඔහුට යටත් කරන ලද්දෝ වෙති.” (1 පේතෘස් 3:22) යෙහෝවා තම බලවත් ශුද්ධාත්මය යේසුස්ට බොහෝ සෙයින් ලබා දී තිබෙනවා. ඒ පොළොව මත සිය ගෝලයන්ට මඟ පෙන්වීම ලබා දීමට හැකි වන විදිහට. (යොහන් 15:26; 16:7) ඒ නිසා යේසුස්ට හැකි වුණා මෙහෙම කියන්න. “ස්වර්ගයෙහිද පොළොවෙහිද සියලු බලය මට දී තිබේ.” (මතෙව් 28:18) එහෙත්, අපගේ යාච්ඤා ගැන කල්පනා කර බලද්දී, යෙහෝවා ඒක කිසි කෙනෙකුට පවරන්නේ නැතුව තමන් විසින්ම පෞද්ගලිකව ඒවාට සවන් දෙන්නට තීරණය කර තිබෙන බව පේනවා. අප කරන යාච්ඤා යේසුස්ගේ නාමයෙන් යෙහෝවා වෙතටම ඔප්පු කරන්න කියා බයිබලයේ අපට උනන්දු කරන්නේ ඒ නිසායි.—ගීතාවලිය 69:13; යොහන් 14:6, 13.

16. යෙහෝවා අපගේ යාච්ඤාවලට ඇත්තටම සවන් දෙනවාය කියා කීමට අපට හැක්කේ ඇයි?

¹⁶ යෙහෝවා ඇත්තටම අපේ යාච්ඤාවලට කන් දෙනවාද? ඔහු අපේ යාච්ඤාවලට කිසිම සැලකිල්ලක් දක්වන්නේ නැත්නම්, “නොකඩවා යාච්ඤා කරන්න” කියා හෝ අපගේ කරදර සහ සිත්තැවුල් තමන් වෙතට විසි කරන්න කියා හෝ ඔහු කවදාවක්වත් අපෙන් ඉල්ලා සිටින්නේ නැහැ. (රෝම 12:12; ගීතාවලිය 55:22; 1 පේතෘස් 5:7; NW) බයිබල් කාලවල විසූ ඇදහිලිවන්ත සේවකයන්ට තිබුණා යෙහෝවා තමන්ගේ යාච්ඤාවලට සවන් දෙන බවට ස්ථිර විශ්වාසයක්. (1 යොහන් 5:14) මේ නිසායි, ගීතිකාකාර දාවිත් මෙහෙම ලිව්වේ. “[යෙහෝවා] මාගේ බස් අසන්නේය.” (ගීතාවලිය 55:17) යෙහෝවා අපට ළංව සිටින බවටත් අපේ හැම සිතිවිල්ලක්ම ඔහු දන්නා බවටත් අපේ කාංසාවන් ඇසීමට ඔහු සූදානමින් සිටින බවටත් නිසැකව සිටීමට අපට හුඟාක් හේතු තිබෙනවා.

යෙහෝවා සිය සේවකයන්ට විපාක දෙයි

17, 18. (අ) සිය බුද්ධිමත් මැවිලි විසින් තමන්ට විශ්වාසවන්තව කරනු ලබන සේවය ගැන යෙහෝවාට හැඟෙන්නේ කොහොමද? (ආ) අප කරන දයාවේ ක්‍රියාවන් යෙහෝවාට හොඳින් පෙනෙන බව හිතෝපදේශ 19:17න් විස්තර කෙරෙන ආකාරය පැහැදිලි කරන්න.

¹⁷ මිනිස්සු කුමක් කළත් නොකළත් ඒ මගින් විශ්වනීය පරමාධිපති හැටියට යෙහෝවාගේ තත්වයට කිසිදු බලපෑමක් සිදු වන්නේ නැහැ. කොහොමවුණත්, යෙහෝවා බොහෝ සෙයින් අප කරන දේවල් අගය කරන දෙවි කෙනෙක්. ඔහු තම බුද්ධිමත් මැවිලි සිදු කරන විශ්වාසවන්ත සේවය අගය කරනවා. ඇත්තටම කියනවා නම්, ඒක යෙහෝවාට හරියට වටිනවා. (ගීතාවලිය 147:11) එහෙමනම්, යෙහෝවාට ළංව සිටින අය විසින් භුක්ති විඳින තවත් ප්‍රයෝජනයක් තිබෙනවා. ඒ තමයි ඔහු සිය සේවකයන්ට මහත් විපාක ගෙන දීම.—හෙබ්‍රෙව් 11:6.

¹⁸ තවත් බයිබලය පැහැදිලිව පෙන්වන දෙයක් තමයි, තම නමස්කාරකයන් කරන හැම දෙයක්ම යෙහෝවා අගය කරන බව. උදාහරණයක් හැටියට අපිට මෙහෙම කියවන්නට තිබෙනවා. “දුප්පතුන්ට අනුකම්පා කරන්නා යෙහෝවාට ණයට දෙන්නේය. ඔහුගේ හොඳ ක්‍රියාවට ඔහු ඔහුට ප්‍රතිඵල දෙන්නේය.” (හිතෝපදේශ 19:17) දිලිඳුන් කෙරෙහි යෙහෝවා දැක්වූ දයාන්විත සැලකිල්ල මෝසෙස්ගේ නීතිය තුළ පැහැදිලිව පිළිබිඹු වුණා. (ලෙවී කථාව 14:21; 19:15) ඉතින් දිලිඳු අය සමඟ කටයුතු කරද්දී අපි යෙහෝවාගේ දයාව අනුකරණය කරනකොට යෙහෝවාට කොහොම හැඟෙයිද? අපි කිසිම දෙයක් ආපසු බලාපොරොත්තු නොවී දිලිඳු අයට දෙනකොට යෙහෝවා එය සලකන්නේ ඔහුට දුන් ණයක් හැටියටයි. එම ණය තම අනුග්‍රහයෙන් හා ආශීර්වාදයෙන් ගෙවීමට යෙහෝවා පොරොන්දු වෙනවා. (හිතෝපදේශ 10:22; මතෙව් 6:3, 4; ලූක් 14:12-14) ඔව්, අප සමඟ හවුලේ නමස්කාරයේ යෙදෙන කෙනෙකුට අපි දයානුකම්පාව පෙන්වද්දී, එය යෙහෝවාගේ හදවත ස්පර්ශ කරනවා. අප කරන දයාවේ ක්‍රියාවන් අපගේ ස්වර්ගික පියාණන්ට හොඳට පෙනෙන බව දැනගන්නට ලැබීම ගැන මොනතරම් කෘතඥපූර්වක විය යුතු දෙයක්ද!—මතෙව් 5:7.

19. (අ) දේශනා කිරීමේදී හා ගෝලයන් සෑදීමේදී අප දරන ප්‍රයත්නයන් යෙහෝවා අගය කරන බවට අපට සහතික වෙන්න පුළුවන් මන්ද? (ආ) සිය රාජ්‍යයට අනුබල දෙමින් පිරිනමන ක්‍රියාවන්ට යෙහෝවා විපාක දෙන්නේ කෙසේද?

¹⁹ යෙහෝවාගේ රාජ්‍යය වෙනුවෙන් අප කරන දෙය යෙහෝවා විශේෂයෙන්ම අගය කරනවා. අප යෙහෝවාට ළං වෙද්දී, රාජ්‍ය දේශනා කිරීමේ හා ගෝලයන් සෑදීමේ වැඩයට හැකි තාක් උපරිමයෙන් අපගේ කාලය, ශක්තිය හා ධනය වැය කිරීමට ආශාවක් ඇතිවීම ස්වාභාවිකයි. (මතෙව් 28:19, 20) ඇතැම් අවස්ථාවල අපට හිතෙන්න පුළුවන් අප සේවය තුළ ඉටු කරන්නේ බොහොම ටිකයි කියලා. යෙහෝවා අපගේ ප්‍රයත්න සම්බන්ධයෙන් සතුටු වෙනවාද කියලාත් අපේ අසම්පූර්ණ සිත තුළ යම් සැකයක් පහළ වෙන්න පුළුවන්. (1 යොහන් 3:19, 20) එහෙත්, ප්‍රේමයෙන් පෙලඹී මුළු හදවතින්ම කරන ලොකු කුඩා ඕනෑම ත්‍යාගයක් යෙහෝවා ඉතා ඉහළින් අගය කරනවා. (මාර්ක් 12:41-44) බයිබලය අපට සහතික කරන්නේ මෙහෙමයි. ‘ඔබේ වැඩද ඔහුගේ නාමයට පෙන්වූ ප්‍රේමයද අමතක කිරීමට දෙවි අධර්මිෂ්ඨ නැත.’ (හෙබ්‍රෙව් 6:10) ඇත්ත වශයෙන්ම, යෙහෝවාගේ රාජ්‍යයට අනුබල දෙමින් අප කරන පුංචිම ක්‍රියාවක් වුවත් යෙහෝවාට මතක තිබෙනවා විතරක් නෙමේ ඔහු ඒවාට විපාකත් දෙනවා. දැනටත් ආත්මික ආශීර්වාද භුක්ති විඳින අතරේදී, පැමිණීමට තිබෙන යෙහෝවාගේ නව ලෝකයේ ප්‍රීතියෙන් ජීවත් වීමේ අපේක්ෂාවද ඇතුව කල් යවමු. එහිදී යෙහෝවා තම හස්තය විදහා තමන්ට ළංව සිටින සියල්ලන්ගේ ධර්මිෂ්ඨ ආශාවන් සපුරාලනවා ඇති.—ගීතාවලිය 145:16; 2 පේතෘස් 3:13.

20. වසර 2003 පුරාම අපගේ වාර්ෂික පදයේ වචන මතකයේ තබාගැනීමට අපට හැක්කේ කොහොමද? ඉන් අත් වන ප්‍රතිඵල මොනවාද?

²⁰ වසර 2003 පුරාම අපගේ ස්වර්ගික පියාණන්ට ළංව සිටීම සඳහා දිගින් දිගටම යත්න දරනවාද කියා අපි අපගෙන්ම අසාගනිමු. අප එසේ කරමින් සිටිනවා නම්, ඔහු පොරොන්දු වෙලා තියෙන දේ ඒ විදිහටම කරයි කියලා අපිට සහතික වෙන්න පුළුවන්. මන්ද, ‘දෙවිට බොරු කිව නොහැක.’ (තීතස් 1:1) ඔබ ඔහුට ළං වන්නේ නම්, ඔහුද ඔබට ළං වෙනවා නිසැකයි. (යාකොබ් 4:8 NW) ඒකෙන් ලැබෙන ප්‍රතිඵලය මොකක්ද? දැන් මහඟු ආශීර්වාද භුක්ති විඳීමට ලැබීමත් සදාකාලයටම යෙහෝවාට තව තවත් ළංවීමේ අපේක්ෂාවත්!

[පාදසටහන]